Pa Les Erer Lezot Fer Twa Tonbe

1, 2. Kouma Labib ti predir lakrwasman pep Zeova?

LOR LATER, ena enn lorganizasion kot ena bann dimounn ki kontan Zeova ek ki anvi servi Li. Sa bann dimounn-la se bann Temwin Zeova. Mem si zot ena bann defo ek zot fer bann erer, Zeova gid so pep avek so lespri sin. Anou get de-trwa fason kouma Li finn beni zot.

² An 1914, ti ena bien tigit dimounn ki ti ador Zeova. Me Zeova ti beni travay predikasion. Gras-a sa, plizir milyon dimounn finn aprann konn bann verite ki sorti dan Labib ek finn vinn So bann Temwin. Zeova ti predir sa lakrwasman extraordiner la kan Li ti dir: “Seki tipti pou vinn enn milye ek seki tigit pou vinn enn nasion for. Mwa, Zeova, mo pou akseler sa dan so ler.” (Izai 60:22) Azordi, nou trouv bien ki sa profesi-la finn realize. Pep Zeova kouma enn gran nasion. Ofet, boukou pei dan lemond antie ena enn popilasion ki pli tigit ki pep Zeova.

3. Kouma bann serviter Bondie finn montre lamour?

³ Pandan bann dernie zour, Zeova finn ed so pep pou fer zot lamour pou sakenn zot kamarad vinn pli for. “Bondie limem lamour,” ek so pep imit Li. (1 Zan 4:8) Zezi ti donn lord so bann disip pou “ena lamour pou zot kamarad.” Li ti osi dir zot: “Si zot ena lamour pou zot kamarad, tou dimoun pou kone ki zot mo disip.” (Zan 13:34, 35) Dan nou lepok, bann serviter Zeova finn montre lamour pou sakenn zot kamarad mem kan bann lezot pep ti pe lager. Par exanp, dan Deziem Lager Mondial, ti ena apepre 55 milyon dimounn ki ti mor. Me pep Zeova pa finn touy personn dan sa lager-la. (Lir Mika 4:1, 3.a) Koumsa, zot pa ti ena “disan personn lor [zot] latet.”​—Zistwar Bann Apot 20:26, NW.

4. Kifer li extraordiner ki pep Zeova pe kontign ogmante?

⁴ Pep Bondie pe kontign ogmante mem si zot ena enn lennmi bien pwisan, Satan. Limem “bondie sa sistem-la.” (2 Korintien 4:4, NW.) Satan kontrol bann sistem politik dan sa lemond-la, ek mem bann media osi. Li servi zot pou esey fer nou aret pres bonn nouvel. Kanmem sa, li pa kapav aret sa travay-la. Me, Satan kone ki li res bien tigit letan, alor li kontigne fer zefor pou anpes nou ador Zeova.​—Revelasion 12:12.

ESKI TO POU RES FIDEL KAN LEZOT FER ERER?

5. Kifer li kapav arive ki sertin bles nou? (Get zimaz dan koumansman lartik.)

⁵ Bann serviter Bondie finn aprann ki li bien inportan pou kontan Bondie ek lezot dimounn. Zezi ti dir: “‘To bizin kontan Zeova to Bondie avek tou to leker ek avek tou to nam ek avek tou to lespri.’ Samem pli gran ek premie komannman. Deziem komannman ki parey, se: ‘To bizin kontan to prosin kouma tomem.’” (Matie 22:35-39, NW.) Me dapre Labib, tou bann dimounn inparfe akoz pese Adan. (Lir Romin 5:12, 19.) Alor li kapav arive ki sertin dan kongregasion dir ouswa fer enn kitsoz ki bles nou. Kan sa arive, ki nou pou fer? Eski nou lamour pou Zeova pou res for? Eski nou pou res fidel ar Li ek ar so pep? Labib rakont nou zistwar sertin serviter Bondie ki ti dir ek fer bann kitsoz ki ti bles lezot. Anou gete ki nou kapav aprann ar zot lexanp.

6. Dan ki sans Eli pa’nn reisi disiplinn so bann garson?

⁶ Par exanp, Eli ti gran pret dan Izrael, me so de garson ti dezobeir bann lalwa Zeova. Labib dir: “Bann garson Eli ti bann vorien; zot pa ti rekonet lotorite Zeova.” (1 Samiel 2:12) Eli ti kone ki so bann garson ti pe fer bann kitsoz bien grav. Kanmem sa, li pa ti ase disiplinn zot. Finalman, Zeova ti koriz Eli ek so de garson. Ek plitar, Zeova ti nepli servi bann desandan Eli kouma gran pret. (1 Samiel 3:10-14) Fer koumadir to ti viv dan lepok Eli ek to’nn al kone ki li’nn les so bann garson fer bann move kitsoz. Eski sa ti pou dekouraz twa? Eski sa sitiasion-la ti pou fer to lafwa an Zeova diminie ziska ki to aret servi Li?

7. Ki pese bien grav David ti fer, ek kouma Zeova ti azir anver li?

⁷ David ti ena bann zoli kalite, ek se akoz sa ki Zeova ti bien kontan li. (1 Samiel 13:13, 14; Zistwar Bann Apot 13:22) Me mem David ti fer enn erer bien grav. Pandan ki Ouriya ti dan enn lager, David ti gagn bann relasion sexiel avek Bat-Sheba, madam Ouriya, ek li ti tom ansint. David pa ti anvi ki personn kone ki li ti fer. Alor li ti donn Ouriya lord pou vinn get li ek li ti esey konvink li pou retourn so lakaz. David ti pe atann ki Ouriya gagn relasion avek so madam pou ki bann dimounn panse ki se Ouriya ki papa sa tibaba-la. Me Ouriya pa ti anvi retourn kot li. Alor David ti fer sir ki Ouriya mor dan lager. Akoz sa bann pese bien grav la, David ek so fami ti bien soufer. (2 Samiel 12:9-12) Kanmem sa, Zeova ti ena pitie pou li ek ti pardonn li. Li ti kone ki David ti anvi fer seki drwat. (1 Lerwa 9:4) Si to ti viv dan sa lepok-la, ki to ti pou panse lor seki David ti fer? Eski to ti pou aret servi Zeova akoz sa?

8. (a) Kouma lapot Pier pa ti tini so promes? (b) Mem si Pier ti fer enn erer, kifer Zeova ti kontign servi li?

⁸ Enn lot lexanp Biblik se Lapot Pier. Zezi ti swazir li pou vinn enn parmi so bann zapot. Kanmem sa, finn deza arive ki Pier finn dir ouswa finn fer bann kitsoz ki pa ti bon. Par exanp, Pier ti promet ki zame li pa ti pou Zezi abandonn mem si lezot abandonn li. (Mark 14:27-31, 50) Me kan ti aret Zezi, tou bann zapot, mem Pier ti abandonn li. Apre sa, dan trwa diferan lokazion, Pier ti dir ki li pa ti konn Zezi. (Mark 14:53, 54, 66-72) Me Pier ti bien regret seki li ti fer. Alor, Zeova ti pardonn li ek ti kontign servi li. Si to ti enn disip dan sa lepok-la, ek to’nn kone ki Pier inn fer, eski to ti pou kontign fer Zeova konfians?

9. Kifer to ena konfians ki Zeova touletan fer seki zis?

⁹ Dan sa bann lexanp-la, nou trouve ki sertin serviter Zeova ti fer bann move kitsoz ek sa ti bien bles lezot. Si sa arive zordi, kouma to pou reazir? Eski to pou aret al renion ouswa abandonn Zeova ek so pep? Ouswa to pou konpran ki Zeova Li pre pou pardone ek kitfwa Li pe atann dimounn-la repanti? Me defwa li arive ki enn kikenn ki’nn fer enn pese grav pa regret seki li’nn fer. Eski to pou ena konfians ki Zeova konsian sa sitiasion-la ek ki Li pou azir dan bon moman? Li kapav mem rezet sa dimounn-la si bizin. Eski to ena konfians ki Zeova touletan pou fer seki bon ek seki zis?

RES FIDEL

10. Ki Zezi ti konpran konsernan bann erer ki Zida Iskaryot ek Pier ti fer?

¹⁰ Dan Labib, ena zistwar boukou dimounn ki finn res fidel ar Zeova ek so pep mem si bann ki toutotour zot ti fer bann erer bien grav. Meyer lexanp se Zezi. Apre ki li ti pas enn lanwit pou priye so Papa pou rod so led, Zezi ti swazir 12 zapot. Me plitar, enn parmi sa bann zapot-la, Zida Iskaryot, ti trayir li. Anplis, lapot Pier ti dir ki li pa ti konn Zezi. (Lik 6:12-16; 22:2-6, 31, 32) Zezi pa ti rann Zeova responsab ni so bann lezot disip. Kifer? Parski li ti konpran ki se pa akoz zot ki sertin parmi so bann zapot ti desevwar li. Zezi ti res pros avek so Papa ek li ti kontign servi Li avek fidelite. Se pou sa ki Zeova ti rekonpans li kan Li ti resisit li ek plitar Li finn fer Zezi vinn Lerwa dan Rwayom ki dan lesiel.​—Matie 28:7, 18-20.

11. Ki Labib ti predir konsernan bann serviter Zeova azordi?

¹¹ Lexanp Zezi ansegn nou ki nou bizin res fidel ar Zeova ek ar so pep. Ek nou ena bann bon rezon pou sa. Nou kapav trouve ki Zeova pe gid so pep dan lepok lafin. Li pe ed zot pou pres laverite dan lemond antie, ek se zis zot tousel ki pe fer sa travay-la. Gras-a lansegnman Zeova, zot vremem dan linite ek zot ere. Zeova ti dekrir sa kan Li ti dir: “Gete! Mo bann serviter pou kriye dan lazwa parski zot leker pou kontan.”​—Izai 65:14.

12. Kouma nou bizin konsider erer lezot?

¹² Nou vremem kontan ki Zeova pe gid nou ek ed nou pou fer bann bon kitsoz. Parkont, bann dimounn dan lemond Satan pa ere ek zot pena okenn lespwar pou lavenir. Li pou telman bet ek inzis ki nou kit Zeova ek so pep zis parski enn kikenn dan kongregasion finn fer ouswa finn dir enn kitsoz ki pa bon! Okontrer, nou bizin res fidel anver Zeova ek swiv so direksion. Nou bizin osi aprann kouma pou konsider erer lezot ek kouma nou pou reazir.

KOUMA TO BIZIN REAZIR?

13, 14. (a) Kifer nou bizin ena pasians anver sakenn nou kamarad? (b) Ki promes nou anvi rapel?

¹³ Ki to bizin fer si enn frer inn dir ouswa inn fer enn kitsoz ki’nn bles twa? Labib donn nou sa konsey-la: “Pa ofanse vit, parski ofans vit, samem ki trouv dan leker bann dimounn bet.” (Ekleziast 7:9) Nou tou nou inparfe ek nou fer bann erer. Alor nou pa kapav atann ki nou bann frer ek ser pou touletan dir ek fer seki bon. Ek li pa pou bon osi ki nou kontign rapel zot bann erer. Si nou fer sa, nou riske perdi nou lazwa pou servi Zeova. Pli pir ankor, nou lafwa an Zeova kapav diminie, ek nou riske kit so lorganizasion. Lerla, nou pa pou kapav servi Zeova, ni atann pou viv dan lemond nouvo.

¹⁴ Alor, ki kapav ed twa pou kontign servi Zeova dan lazwa mem si lezot fer bann kitsoz ki afekte twa? Touletan rapel sa promes bien ankourazan la: “Gete! Mo pe kree enn nouvo lesiel ek enn nouvo later; ek personn pa pou rapel bann kitsoz avan, ek sa pa pou vinn dan zot leker.” (Izai 65:17; 2 Pier 3:13) Zeova pou donn twa sa bann benediksion-la si to res fidel anver Li.

15. Dapre Zezi, ki nou bizin fer kan lezot fer bann erer?

¹⁵ Biensir, nou pankor rant dan lemond nouvo. Alor, si kikenn bles nou, nou bizin medit lor seki Zeova anvi nou fer. Par exanp, Zezi ti dir: “Si zot pardonn lezot zot fot, zot Papa dan lesiel pou pardonn zot osi, me si zot pa pardonn lezot, zot Papa osi pa pou pardonn zot fot.” Ek kan Pier ti demann Zezi si nou bizin pardone “ziska set fwa,” Zezi ti reponn li: ‘Non pa set fwa, me swasann-dis set fwa.’ Zezi ti ansegn nou ki nou bizin touletan dispoze pou pardonn lezot.​—Matie 6:14, 15; 18:21, 22.

16. Ki bon lexanp Zozef finn lese?

¹⁶ Lexanp Zozef ansegn nou kouma nou bizin reazir kan lezot desevwar nou. Zakob ti ena zis de garson avek Rashel: Zozef ek so ti frer. Zakob ti ena dis lezot garson, me li ti pli kontan Zozef. Akoz sa bannla ti zalou Zozef. Ofet, zot ti telman deteste li ki zot ti vann li kouma enn esklav, ek li ti retrouv li Lezip. Apre boukou lane, lerwa Lezip ti etabli Zozef kouma deziem personaz pli pwisan dan sa pei-la parski li ti inpresione ar so bon travay. Plitar, bann frer Zozef ti vinn aste manze dan Lezip parski ti ena lafaminn dan zot pei. Kan zot ti trouv Zozef, zot pa ti rekonet li, me li, li ti rekonet zot. Mem si bannla ti mal azir anver li, Zozef pa ti tir vanzans. Okontrer, li ti teste zot pou gete si vremem zot ti sanze. Kan li ti realize ki bannla ti sanze, Zozef ti fer zot kone kisannla li ete. Apre, li ti konsol zot ek ti dir zot: “Pa bizin zot per. Mo pou kontign donn zot ek zot bann ti zanfan manze.”​—Zenez 50:21.

17. Ki to determine pou fer kan lezot fer erer?

¹⁷ Li bon to rapel ki, parski tou dimounn fer erer, li kapav arive ki to’si to ofans lezot. Alor si to realize ki to finn bles kikenn, swiv konsey ki Labib done. Demann li pardon, ek esey fer lape ar li. (Lir Matie 5:23, 24, NW.) Nou kontan kan lezot pardonn nou. Alor, nou osi nou bizin pardonn lezot. Kolosien 3:13 (NW) dir nou: “Kontign siport sakenn zot kamarad, ek pardonn sakenn zot kamarad avek tou zot leker mem si kikenn ena kitsoz kont enn lot. Parey kouma Zeova inn pardonn zot avek tou so leker, fer parey zot osi.” Si vremem nou kontan nou bann frer, nou pa pou kontign ankoler pou enn kitsoz ki zot inn fer dan lepase. (1 Korintien 13:5) Ek si nou pardonn lezot, Zeova osi pou pardonn nou. Alor kan lezot fer erer, anou pardonn zot parey kouma nou Papa, Zeova, pardonn nou.​—Lir Psom 103:12-14.