Kifer Bondie Finn Permet ki Bann Milyon Zwif Mor Pandan Deziem Lager Mondial?

Boukou poz zot sa kestion-la parski zot finn perdi bann kamarad ek lafami kan sa finn arive. Zot bien soufer akoz sa, alor zot pe anvi gagn bann repons ek zot pe osi rod rekonfor. Boukou trouv seki finn arive kouma kitsoz pli pir ki bann dimounn finn kapav fer ek zot gagn difikilte pou krwar dan Bondie.

Seki sertin dimounn panse lor Bondie ek lamor sa bann milyon Zwif-la

Sertin dimounn panse: Li pa bon ki nou demande kifer Bondie finn permet sa.

Laverite: Bann dimounn ki ena enn gran lafwa ti deza demann Bondie kifer Li permet soufrans. Par exanp, profet Abakuk ti demann Bondie: “Kifer to fer mwa trouv tou seki move? Ek kifer to toler bann dimounn dominer? Kifer ena destriksion ek violans otour mwa? Ek kifer ena sa kantite lager ek diskision la?” (Abakuk 1:3) Olie ki Bondie ti ankoler avek Abakuk, Li ti fer ekrir sa bann kestion-la dan Labib pou ki nou osi nou kapav lir li.

Sertin dimounn panse: Bondie pa kas latet kan bann dimounn soufer.

Laverite: Bondie deteste tou bann move kitsoz ek kan bann dimounn soufer akoz sa. (Proverb 6:16-19) Dan lepok Noe, Bondie “so leker ti fermal” parski later ti ranpli ar laviolans. (Zenez 6:5, 6) Alor, nou kapav sir ki Bondie ti bien sagrin kan Li ti trouv sa bann milyon Zwif-la mor.​—Malaki 3:6.

Seki bann dimounn panse: Bondie finn permet ki sa bann milyon Zwif-la mor pou pini bann Zwif.

Laverite: Dan premie siek, Bondie ti permet ki bann Romin detrir Zerizalem. (Matie 23:37–24:2, NTKM) Depi sa lepok-la, Bondie pa prefer enn ras ouswa enn nasion ouswa mem pini zot. Pou Bondie, “pena okenn diferans ant Zwif ek non-Zwif.”​—Romin 10:12, NTKM.

Seki bann dimounn panse: Si enn Bondie ki bien pwisan ek ki ena lamour ti existe, Li pa ti pou permet ki bann milyon Zwif mor.

Laverite: Se pa akoz Bondie ki ena soufrans, me parfwa Li permet sa pandan enn tan.​—Zak 1:13, NTKM; 5:11, NTKM.

Kifer Bondie finn permet ki bann milyon Zwif mor?

Bondie finn permet ki bann milyon Zwif mor pou mem rezon kifer Li permet ki tou bann dimounn soufer: Se pou reponn bann kestion ki’nn souleve depi bien lontan. Labib montre dan enn fason bien kler ki azordi se Diab ki pe diriz lemond ek pa Bondie. (Lik 4:1, 2, 6, NTKM; Zan 12:31, NTKM) Dan Labib ena de rezon ki kapav ed nou pou konpran kifer Bondie finn permet ki bann milyon Zwif mor.

1. Bondie ti kree bann dimounn avek liberte pou swazir. Bondie ti dir bann premie imin, Adan ek Ev, seki Li ti anvi zot fer, me Li pa ti fors zot pou obeir Li. Malerezman, zot finn swazir pou deside par zotmem seki bon ek seki pa bon. Zot finn fer enn move swa ek toutlong listwar bann dimounn osi finn fer enn move swa. Akoz sa, sa finn ena bann move konsekans lor limanite. (Zenez 2:17; 3:6; Romin 5:12, NTKM) Liv Statement of Principles of Conservative Judaism dir: “Si azordi ena sa kantite soufrans-la dan lemond, se parski nou mal servi nou liberte pou swazir.” Olie ki Bondie ti tir sa liberte pou swazir la avek nou, Li finn donn bann dimounn letan pou esey diriz zot par zotmem.

2. Bondie kapav ek anvi repar tou bann dega ki finn ena akoz sa levennman-la. Bondie promet ki Li pou redonn lavi bann milyon dimounn ki’nn mor, parmi ena osi sa bann milyon Zwif-la. Bann ki’nn sirviv sa levennman-la ena bann move souvenir ek zot soufer akoz sa. Bondie promet ki Li pou tir sa lapenn-la osi. (Izai 65:17; Zistwar Bann Apot 24:15, NTKM) Lamour ki Bondie ena pou nou donn nou lasirans ki Li pou realiz sa bann promes-la.​—Zan 3:16, NTKM.

Sertin dimounn ki’nn viktim sa levennman-la, finn kapav gard enn lafwa for ek konpran kifer zot lor later. Zot finn reisi fer sa parski zot finn konpran kifer Bondie finn permet soufrans ek kouma biento Li pou repar tou bann dega ki finn ena akoz sa levennman-la.