Eski Sex Oral Se Vremem enn Relasion Sexiel?

U.S. Centers for Disease Control and Prevention report inn interviewe bann zenn ki ena ant 15 ek 19 an, ek anviron lamwatie parmi zot inn dir ki zot inn deza pratik sex oral.a Sharlene Azam, ki’nn ekrir liv Oral Sex Is the New Goodnight Kiss, dir: “Si ou koz avek bann adolesan [lor sex oral], zot pou dir ou ki se enn kitsoz normal pou zot. Ofet, zot pa konsider li kouma enn relasion sexiel.”

• Ki to panse?

• Seki to bizin kone

• Kifer li inportan pou kone seki Bondie panse?

Ki to panse?

Reponn sa bann kestion-la par wi ouswa non.

1. Eski enn tifi kapav tom ansint apre sex oral?

   1.  Wi

   2.  Non

2. Eski enn dimounn kapav gagn bann maladi akoz sex oral?

   1.  Wi

   2.  Non

3. Eski sex oral se vremem enn relasion sexiel?

   1.  Wi

   2.  Non

Seki to bizin kone

Konpar to bann repons avek bann repons ki ena anba.

1. Eski enn tifi kapav tom ansint apre sex oral?

   Repons: Non. Se enn rezon kifer boukou dimounn panse ki pena nanye demal avek sex oral.

2. Eski enn dimounn kapav gagn bann maladi akoz sex oral?

   Repons: Wi. Enn dimounn ki pratik sex oral kapav gagn hépatite (A ouswa B), bann bouton lor so sex, gonore (enn maladi ki gagne kan gagn relasion), herpès, VIH (sida), ek sifilis.

3. Eski sex oral se vremem enn relasion sexiel?

   Repons: Wi. Bann relasion sexiel, sex oral, sodomi (sex par deryer) ek kares sex enn lot dimounn, se bann relasion sexiel parski sa inplik sex enn lot dimounn.

Kifer li inportan pou kone seki Bondie panse?

Anou get de-trwa verse Labib ki pou ed nou pou konpran seki Bondie panse lor sex oral.

Labib dir: “Samem volonte Bondie: . . . pa [viv] enn lavi imoral.”​—1 Tesalonisien 4:3, Nouvo Testaman Dan Kreol Morisien, NTKM.

Kan Labib koz lor “lavi imoral,” sa inplik tou bann relasion intim ant de dimounn ki pa marye. Parmi ena bann relasion sexiel, sex oral, sodomi, ek kares sex enn lot dimounn. Kan enn dimounn amenn enn lavi imoral, li pou gagn bann konsekans. Enn parmi bann pli move konsekans ki li kapav gagne, se gat so lamitie avek Bondie.​—1 Pier 3:12.

Labib dir: “Zom ki livre limem dan pese imoralite li fer pese kont so prop lekor.”​—1 Korintien 6:18, NTKM.

Sex oral kapav fer enn dimounn tom malad ek osi gat so lamitie avek Bondie. Li kapav osi fer enn dimounn ena bann santiman negatif. Liv Talking Sex With Your Kids dir ki ‘bann dimounn ki’nn gagn relasion sexiel avan maryaz souvan regrete ouswa ena santiman ki zot partner pa kas latet ar zot. Ek zot kapav ena sa bann santiman-la apre ninport ki laktivite sexiel.’

Labib dir: “Mwa, Zeova, Momem to Bondie, Momem ki ansegn twa pou to profi.”​—Izai 48:17.

Eski to panse ki bann lalwa Bondie konsernan sex pou fer twa gagn bann bienfe? Ouswa to panse ki zot pe priv twa? Pou ed twa reponn sa bann kestion-la, anou pran enn lexanp. Mazinn enn sime kot boukou transpor pase. Lor sa sime-la ena bann pano sinializasion ek bann robo. Eski to pou konsider sa bann pano-la ek sa bann robo-la kouma bann kitsoz ki anpes twa fer seki to anvi ouswa kouma enn proteksion? Ki pou arive si twa ek bann lezot sofer pa pran zot kont?

Li parey pou bann prinsip Bondie. Si to pa pran zot kont, to kapav sir ki to pou rekolte seki to’nn seme. (Galat 6:7, NTKM) Liv Sex Smart dir: “Plis to pa pran kont to bann krwayans ek to bann prinsip ek ki to fer bann kitsoz ki to panse pa tro bon, mwins to pou ena respe pou tomem.” Parkont, si to swiv bann prinsip Bondie, to pou gagn plis lasirans pou exprim seki to panse. Ek anplis, to pou kapav kontign ena enn bon konsians.​—1 Pier 3:16, NTKM.