Zel ki enn Myxine Prodir

Depi bien lontan bann siantis finn interes zot ar zel ki enn myxine prodir. Me, kifer sa interes zot otan? Parski dapre bann siantis, zel ki enn myxine prodir, li enn parmi bann sibstans ki “pli mou ek pli elastik ki enn kreatir vivan kapav prodir.”

Reflesi lor la: Enn myxine se enn pwason ki resanble enn angi ek ki res dan fon lamer. Kan enn lot kreatir rod atak li, pwason-la ena enn glann spesial ki larg enn zel. Dan sa zel-la, ena bann proteinn ki kapav kree enn sibstans ki lagli-lagli ek bann milye lezot proteinn ki koumadir bann long difil. Kan sa bann proteinn-la melanze, delo ki otour sa pwason-la vinn lagli-lagli ek bien epe. Sa likid epe la kol ar bann kreatir ki rod atak li ek anpes zot respire. Lerla, zot oblize larg pwason-la.

Zel sa pwason-la li vremem extraordiner. Sak difil proteinn ki ena ladan, li san fwa pli fin ki seve enn imin ek dis fwa pli solid ki difil nilon. Kan sa bann proteinn-la melanz avek delo sale, zot form enn likid epe ek lagli-lagli ki koumadir enn tami. Sa likid epe la kapav tini delo ki 26,000 fwa pli lour ki li. An realite, sa likid-la li preske 100 poursan delo!

Bann siantis pa’nn kapav reprodir zel sa pwason-la. Enn parmi zot ti dir ki “li tro konplike.” Me bann siantis pe anvi servi enn bakteri pou reprodir sa bann difil proteinn la. Zot pe anvi fer enn kitsoz ki leze, ki solid, ki elastik, ek ki pa pou fer ditor lanvironnman. Zot pe pans pou servi sa bann difil proteinn la pou fer bann materyel ki kapav servi dan domenn medikal ek textil. Ofet, kapav servi sa bann difil proteinn la dan boukou lezot domenn.

Ki ou panse? Kan ou get sa zel extraordiner ki enn myxine prodir la, ki ou pou dir? Li’nn aparet par limem ouswa eski inn kree sa?