Enn zenom pe get bann dimounn rant dan Lasal kot fer Renion

BANN ZENN DEMANDE

Kifer Li Inportan ki Mo Asiste Bann Renion?

De fwa par semenn, bann Temwin Zeova fer bann renion dan zot Lasal Renion. Ki pase dan sa bann renion-la, ek kouma sa bann renion-la kapav ed twa?

Ki pase dan bann renion?

Dan sa bann renion-la, to pou trouve kouma pou aplik seki to pe aprann dan Labib. Bann renion kapav ed twa pou:

aprann laverite lor Bondie.
konpran seki pe pase dan lemond azordi.
vinn enn pli bon dimounn.
trouv bann pli bon kamarad ki ena.

Kifer li inportan ki to asiste sa bann renion-la?

Seki to pou aprann pou ed twa. Bann prinsip Labib ki bann Temwin Zeova examine pandan bann renion pou ed twa “gagn sazes.” (Proverb 4:5) Alor, gras-a Labib to pou kapav pran bann bon desizion. Li kapav osi ed twa pou gagn repons pou bann kestion bien inportan, kouma par exanp:

Kifer nou lor later?
Eski se akoz Bondie ki nou soufer?
Ki arive kan enn dimounn mor?

Dan bann renion ki nou fer wikenn, ena bann diskour ki koz lor bann size kouma:

Kifer Nou Bizin Les Nou Gide par Labib?
Kot Ou Kapav Gagn Led dan Ou Bann Maler?
Seki Rwayom Bondie Pe Fer pou Nou Azordi

“Enn kamarad lekol ti asiste enn nou bann renion. Li ti asiz ansam avek mo fami, ek li ti swiv renion dan nou bann liv. Apre sa, li ti dir ki sa ti bien inpresionn li pou tann bann komanter ki lasistans ti done. Li ti osi dir ki, dan so legliz, bann dimounn pena bann liv pou etidie Labib parey kouma nou.”—Brenda.

Eski to ti kone? Dan bann Lasal kot nou fer Renion, lantre gratis ek nou pa pas laket.

Bann dimounn ki to pou zwenn pou ankouraz twa. Labib dir ki enn parmi bann rezon kifer bann Kretien bizin zwenn ansam, se pou ‘ankouraz zot kamarad.’ (Ebre 10:24, 25, NTKM) Nou pe viv dan enn lemond kot bann dimounn pans zis zotmem, alor sa fer dibien pou frekant bann dimounn ki fer Bondie ek lezot pas avan zotmem.

“Apre enn long lazourne, parfwa mo santi mwa tris ek fatige, me bann dimounn ki mo zwenn dan renion ed mwa pou santi mwa pli bien. Kan mo retourn kot mwa apre enn renion, mo santi mwa bien ek pare pou atak enn nouvo lazourne.”—Elisa.

Eski to ti kone? Dan lemond, ena plis ki 120,000 lasanble bann Temwin Zeova ek zot zwenn dan plis ki 60,000 diferan plas. Sak lane, nou konstrir anviron 1,500 Lasal Renion pou akeyir bann dimounn.a

Seki bann zenn panse

“Kan mo ti kolez, enn kamarad lekol ti asiste de-trwa renion ansam avek mwa. Sa finn bien inpresionn li pou trouve ki bann dimounn diferan laz pe etidie Labib ansam. Pa tro lontan, mo patron ti asiste enn renion, ek li ti bien inpresione pou trouve ki kantite fwa nou servi Labib. Kan mo’nn trouve ki kantite li ti kontan nou renion, sa finn ogmant mo rekonesans pou bann renion!”—Jessica.

“Bann renion ed mwa pou aret pans mo bann problem. Nou aprann kouma pou ena enn pli bon lavi, kouma pou vinn enn pli bon dimounn, ek lezot kitsoz ankor. Apre renion, mo touletan santi mwa bien ek ankouraze.”—Timothy.

“Mo ti invit enn misie renion. Apre sa renion-la, li ti dir: ‘Mo’nn vini zis pou kapav montre twa ki to bann krwayans fos. Me, ofet se mo bann krwayans ki fos!’ Li ti inpresione pou trouve ki kantite bann Temwin Zeova zanti. Li ti dir: ‘Mem si mo ti fek zwenn zot, zot ti koz avek mwa koumadir zot ti konn mwa depi bien lontan!’”—Jacob.

“Inn deza arive ki mo’nn dir ar momem, ‘Kouma renion fini, mo pou ale.’ Me pandan renion, mo ti nepli ena sa santiman-la. Apre renion, mo koz avek lezot ek mo nepli rapel kifer mo ti ena sa santiman-la. San bann renion, mo pa ti pou ena bann bon kamarad kouma mo ena azordi.”—Madison.

a Pou trouv enn plas kot fer renion, al dan seksion “Renion Bann Temwin Zeova” ek klik lor “Rod Lasal Pli Pre ar Ou.”