Eski Li Inportan ki Nou Form Parti enn Lorganizasion Relizie?

Seki Labib dir

Wi, parski Bondie anvi ki nou zwenn ansam pou ador Li. Labib dir: “Anou panse kouma nou kapav ankouraz nou kamarad pou ena lamour ek pou fer dibien. Anou pa abandonn nou lasanble.”​—Ebre 10:24, 25, NTKM.

Zezi ti dir: “Si zot ena lamour pou zot kamarad, tou dimoun pou kone ki zot mo disip.” (Zan 13:35, NTKM.) Alor, pou ki zot kapav montre sa kalite lamour-la, bann disip Zezi ti bizin zwenn ansam pou ador Bondie ek frekant sakenn so kamarad. (1 Korintien 16:19, NTKM.) Antan ki enn group, zot ti pou bann frer ek ser ki partaz mem lafwa.​—1 Pier 2:17, NTKM.

Eski li ase ki nou form parti enn relizion?

Labib montre ki bann dimounn bizin zwenn ansam pou ador Bondie. Me li montre osi ki si enn dimounn anvi fer Bondie plezir, li pa ase ki li zis form parti enn relizion. Pou ki enn dimounn gagn faver Bondie, fode ki so relizion ena enn lefe lor so lavi. Par exanp, Labib dir: “Ala seki Bondie Papa konsider kouma vre relizion ki pena okenn tas: pran swin bann orfelin ek vev dan zot soufrans e pa les zot kontamine par lemonn.”​—Zak 1:27, NTKM.