LARTIK LETID 34
Aprann ar Bann Profesi ki Ena dan Labib
“Bann ki ena disernman pou konpran.”—DAN. 12:10.
KANTIK 98 Bann Lekritir—Inspire par Bondie
REZIMEa
1. Ki kitsoz kapav ed nou pou kontan etidie bann profesi ki ena dan Labib?
ENN zenn frer ki apel Ben dir: “Mo bien kontan etidie bann profesi ki ena dan Labib.” Eski twa osi to kontan bann profesi? Ouswa kitfwa to panse ki bann profesi pa interesan, ouswa ki zot tro difisil pou konpran? Selman, kan to aprann kifer Zeova inn fer ekrir bann profesi dan Labib, kitfwa to pou koumans kontan zot.
2. Ki nou pou examine dan sa lartik-la?
2 Dan sa lartik-la, nou pou gete kifer nou bizin konn bann profesi ki ena dan Labib, ek osi kouma nou kapav etidie zot. Apre sa, nou pou examinn de profesi ki ena dan liv Daniel, ek nou pou gete kifer zot bien inportan pou nou azordi.
KIFER NOU BIZIN ETIDIE BANN PROFESI?
3. Ki nou bizin fer si nou anvi konpran bann profesi ki ena dan Labib?
3 Nou bizin rod led pou konpran bann profesi ki ena dan Labib. Anou pran enn lexanp. Fer koumadir to pe vizit enn landrwa ki to pa konn ditou, me to ena enn kamarad avek twa ki konn landrwa-la bien. Li kone exakteman kotsa zot ete, ek li kone osi ki sime zot bizin pran. Sirman to bien kontan ki sa kamarad-la inn vinn avek twa, pa vre! Zeova Li koumadir sa kamarad-la. Li konn lavenir! Alor, pou nou konpran bann profesi ki ena dan Labib, nou bizin demann Li so led.—Dan. 2:28; 2 Pier 1:19, 20.
Kan nou etidie bann profesi ki ena dan Labib, sa kapav ed nou pou prepar nou pou seki pou arive dan lavenir (Get paragraf 4)
4. Kifer Zeova inn fer ekrir bann profesi dan Labib? (Zeremi 29:11) (Get zimaz osi.)
4 Parey kouma ninport ki bon paran, Zeova anvi ki so bann zanfan ena enn zoli lavenir. (Lir Zeremi 29:11.) Selman, nou bann paran pa konn lavenir. Me Zeova kone seki pou arive dan lavenir, ek Li touletan ena rezon! Dan Labib, Li’nn fer ekrir bann profesi pou nou kapav konn bann levennman inportan ki pou arive dan lavenir. (Iza. 46:10) Alor, bann profesi Biblik zot kouma bann zoli kado ki nou Papa Zeova inn donn nou. Me kouma nou kapav sir ki bann profesi Labib pou vremem realize?
5. Ki kitsoz bann zenn kapav aprann ar lexanp Max?
5 Dan lekol, nou bann zanfan souvan antoure ar bann dimounn ki pena respe pou Labib. Zot konportman ek zot bann koze kapav fer nou bann zenn ena bann dout. Anou get lexanp enn frer ki apel Max. Li dir: “Kan mo ti zenn, mo ti koumans ena bann dout. Mo ti panse ki mo bann paran pa ti ansegn mwa laverite, ek ki Labib pa ti vremem sorti kot Bondie.” Ki bann paran Max ti fer? Max dir: “Mem si sa ti bien trakas zot, mo bann paran ti res kalm, ek zot pa ti ankoler.” Bann paran Max ti servi Labib pou reponn so bann kestion. Me Max osi ti fer bann resers. Li dir: “Mo ti etidie bann profesi Labib par momem, ek mo ti partaz seki mo ti aprann ar bann lezot zenn.” Ki’nn arive lerla? Max dir: “Sa ti ed mwa pou konpran ki Labib vremem sorti kot Bondie!”
6. Ki to bizin fer si to ena bann dout, ek kifer?
6 Fode pa to santi twa mal, si parey kouma Max, to koumans ena bann dout konsernan bann lansegnman ki ena dan Labib. Selman, to bizin pa tarde pou azir. Bann dout, zot koumadir larouy. Si enn kitsoz ki to kontan koumans gagn larouy ek ki to pa fer nanye, tigit-tigit li kapav manz sa kitsoz-la net. Pou tir bann dout ki kapav detrir to lafwa, to kapav demann tomem, ‘Eski mo krwar seki Labib dir lor lavenir?’ Si to pa tro kone, alor etidie bann profesi ki ena dan Labib ek ki’nn fini realize. Kouma to kapav fer sa?
KOUMA NOU BIZIN ETIDIE BANN PROFESI?
Pou nou ena konfians an Zeova parey kouma Daniel, nou bizin ena limilite ek fer bann resers kan nou etidie bann profesi Labib, ek nou bizin osi fer sa ar bann bon lintansion (Get paragraf 7)
7. Kouma nou kapav swiv lexanp Daniel kan nou etidie bann profesi? (Daniel 12:10) (Get zimaz osi.)
7 Pou kone kouma nou bizin etidie bann profesi ki ena dan Labib, anou gete kouma profet Daniel ti fer. Daniel ti etidie bann profesi avek enn bon lintansion, setadir li ti anvi konn laverite. Li ti osi ena limilite. Li ti kone ki Zeova ti pou ed li pou konpran bann profesi si li ti res pros ar Li ek si li ti obeir Li. (Dan. 2:27, 28; lir Daniel 12:10.) Daniel ti montre ki li ti ena limilite kan li ti rod led Zeova. (Dan. 2:18) Daniel ti osi fer bann resers. Li ti rod bann repons dan bann Lekritir ki ti ena dan so lepok. (Zer. 25:11, 12; Dan. 9:2) Kouma nou kapav swiv lexanp Daniel?
8. Kifer sertin dimounn pa anvi krwar dan bann profesi Labib, me ki nou nou bizin fer?
8 Reflesi pou ki rezon to pe etidie bann profesi. Eski to pe etidie bann profesi parski to vremem anvi konn laverite? Si se pou sa rezon-la, alor Zeova pou ed twa. (Zan 4:23, 24; 14:16, 17) Me pou ki rezon ankor enn kikenn kapav etidie bann profesi? Sertin kitfwa etidie bann profesi pou rod bann prev ki Labib pa sorti kot Bondie. Zot panse ki, si zot gagn sa bann prev-la, zot kapav viv zot lavi kouma zot anvi. Alor, kan nou etidie bann profesi, nou bizin fer li avek enn bon lintansion. Aster-la, anou get enn kalite inportan ki nou bizin ena pou nou konpran bann profesi.
9. Ki kalite nou bizin ena pou nou konpran bann profesi? Explike.
9 Ena limilite. Zeova promet ki Li pou ed bann ki ena limilite. (Zak 4:6) Alor, nou bizin priye Li ek demann Li pou ed nou pou konpran bann profesi. Si nou ena limilite, nou pou osi aksepte led lesklav fidel ek saz, ki Zeova pe servi pou donn nou nou manze dan ler ki bizin. (Lik 12:42) Zeova enn Bondie ki kontan lord, alor li lozik ki Li servi zis sa esklav-la pou ed nou pou konpran bann verite ki ena dan Labib.—1 Kor. 14:33; Efe. 4:4-6.
10. Ki nou kapav aprann ar lexanp Esther?
10 Fer bann resers. Swazir enn profesi ki to ti pou kontan etidie ek fer bann resers lor la. Anou get lexanp enn ser ki apel Esther. Li ti anvi konn plis lor bann profesi ki ti predir ki Lemesi ti pou vini. Esther dir: “Kan mo ti ena 15 an, mo ti koumans rod bann prev ki montre ki sa bann profesi-la ti ekrir avan lepok Zezi.” Seki Esther ti lir konsernan bann Roulo Lamer Mor ti ed li pou gagn sa bann prev-la. Li dir: “Sertin parmi sa bann roulo-la ti ekrir avan lepok Zezi. Alor, bann profesi ki ena ladan bizin sorti kot Bondie.” Esther dir ki ena bann kitsoz ki li ti bizin lir plizir fwa pou ki li konpran zot, me li bien kontan ki li’nn fer sa zefor-la. Apre ki li’nn etidie plizir profesi Labib, Esther dir: “Aster-la, mo vremem sir ki Labib dir laverite!”
11. Ki bienfe nou gagne kan nou sir ki Labib dir laverite?
11 Kan nou trouve kouma sertin profesi Labib inn fini realize, sa ogmant nou konfians an Zeova ek sa motiv nou pou swiv bann instriksion ki Li donn nou. Anplis, bann profesi Labib donn nou enn zoli lesperans pou lavenir. Alor, kan nou etidie zot, zot ed nou pou res pozitif mem kan nou gagn bann difikilte. Aster-la, anou get de profesi ki ena dan liv Daniel ek ki pe realize dan nou lepok. Kan nou konpran sa bann profesi-la, sa pou ed nou pou pran bann bon desizion.
KIFER PROFESI LIPIE KI AN FERAY EK LARZIL KONSERN NOU?
12. Ki lipie sa stati-la reprezante? (Daniel 2:41-43)
12 Lir Daniel 2:41-43. Dan rev Lerwa Naboukodonozor, lipie sa stati ki lerwa ti trouve la ti an ‘feray melanze ar larzil mou.’ Kan nou konpar sa profesi-la ar bann lezot profesi ki ena dan liv Daniel ek liv Revelasion, nou konpran ki lipie sa stati-la reprezant Pwisans Mondial Anglo-Ameriken, bann gouvernman ki pe dominn lemond azordi. Konsernan sa pwisans mondial la, Daniel dir ki “enn parti sa rwayom-la pou for ek enn parti pou feb.” Kifer enn parti pou feb? Akoz bann dimounn, ki reprezant larzil, anpes sa bann gouvernman-la pou servi zot pouvwar kouma zot anvi.b
13. Ki kitsoz inportan nou’nn aprann dan sa profesi-la?
13 Bann explikasion ki Daniel done konsernan sa stati-la, sirtou konsernan so lipie, aprann nou bann kitsoz bien inportan. Premierman, Pwisans Mondial Anglo-Ameriken inn montre ki li bien pwisan. Par exanp, li ti ena enn rol bien inportan pou gagn Premie Lager Mondial ek Deziem Lager Mondial. Selman, li pe vinn deplizanpli feb parski bann dimounn ki res dan sa de pei-la, zot pa dakor ant zotmem ek zot osi milit kont gouvernman. Deziemman, sa pwisans-la pou dernie pwisans mondial ki pou dirize avan ki Rwayom Bondie detrir tou bann gouvernman imin. Mem si parfwa bann lezot gouvernman opoz zot ar Pwisans Mondial Anglo-Ameriken, zot pa pou ranplas li. Nou konn sa parski sa “ros” ki reprezant Rwayom Bondie la pou kraz lipie sa stati-la, setadir Pwisans Mondial Anglo-Ameriken.—Dan. 2:34, 35, 44, 45.
14. Kan nou konpran profesi konsernan lipie sa stati-la, kouma sa kapav ed nou pou pran bann bon desizion?
14 Eski to sir ki profesi Daniel konsernan lipie sa stati-la li vre? Si wi, sa pou ena enn lefe lor fason ki to viv to lavi. To kone ki sa move lemond-la pou detrir biento, alor to pa pou galoup deryer bann kitsoz materyel. (Lik 12:16-21; 1 Zan 2:15-17) Kan to konpran sa profesi-la, to konpran osi linportans pou kontign prese ek ansegn bann dimounn. (Mat. 6:33; 28:18-20) Apre ki nou’nn etidie sa profesi-la, to kapav poz tomem sa kestion-la, ‘Eski mo bann desizion montre ki mo sir ki Rwayom Bondie pou detrir tou bann gouvernman imin biento?’
KIFER PROFESI “LERWA DINOR” EK “LERWA DISID” KONSERN NOU?
15. Kisann-la “lerwa dinor” ek “lerwa disid” azordi? (Daniel 11:40)
15 Lir Daniel 11:40. Daniel sapit 11 koz lor de lerwa, ouswa de gouvernman, ki pe opoz zot ar zot kamarad. Kan nou konpar sa profesi-la ar bann lezot profesi ki ena dan Labib, nou konpran ki “lerwa dinor” reprezant Larisi ar so bann alie, ek “lerwa disid” reprezant Pwisans Mondial Anglo-Ameriken.c
Kan nou konpran ki “lerwa dinor” ek “lerwa disid” pe realiz bann profesi Labib, nou pou mwins trakase ek sa pou osi ogmant nou lafwa (Get paragraf 16-18)
16. Kouma “lerwa dinor” pe tret bann serviter Zeova?
16 Bann serviter Zeova ki viv dan bann pei ki dirize par “lerwa dinor” pe gagn boukou persekision. Sertin Temwin inn gagn bate ek zot inn al dan prizon akoz zot lafwa. Me olie ki persekision “lerwa dinor” fer zot per, sa finn ogmant zot lafwa an Zeova ek so Parol Labib. Kifer? Parski nou bann frer ek ser kone ki, kan zot pe gagn persekision, sa pe realiz profesi ki Daniel ti anonse.d (Dan. 11:41) Kan nou konpran sa profesi-la, sa ed nou pou ena konfians dan bann promes Zeova ek pou res fidel anver li.
17. Bann serviter Zeova ki res dan bann pei ki dirize par “lerwa disid,” ki difikilte zot inn gagne?
17 Dan lepase, “lerwa disid” osi ti persekit bann serviter Zeova. Par exanp, dan bann lane 1900-1950, bann lotorite ti met boukou frer dan prizon ek zot ti met boukou zenn Temwin deor dan lekol, parski bann-la ti gard zot netralite. Sa bann dernie lane-la, bann serviter Zeova ki res dan bann pei ki dirize par “lerwa disid,” inn gagn bann lezot difikilte parski zot fidel anver Zeova. Par exanp, pandan bann eleksion, enn Kretien kapav gagn tantasion pou soutenir enn parti ouswa enn kandida politik. Mem si li pa pou al vote, kitfwa dan so leker ek dan so lespri ena enn ki li prefere. Akoz sa, li bien inportan ki nou gard nou netralite, pa zis par nou bann aksion, me osi dan nou bann panse.—Zan 15:18, 19; 18:36.
18. Kouma nou reazir kan nou trouv “lerwa dinor” ek “lerwa disid” opoz zot ar zot kamarad? (Get zimaz osi.)
18 Bann dimounn ki pa krwar dan bann profesi Labib, kitfwa zot bien trakase kan zot trouv “lerwa disid” opoz li ar “lerwa dinor.” (Dan. 11:40) Apre tou, toule-de lerwa ena ase misil nikleer pou detrir tou dimounn lor later. Selman, nou kone ki Zeova zame pa pou les sa arive! (Iza. 45:18) Alor, olie ki nou trakase kan nou trouv “lerwa dinor” ek “lerwa disid” pe opoz zot ar zot kamarad, sa ogmant nou lafwa. Sa fer nou konpran ki lafin sa move lemond-la bien pre!
KONTIGN FER ZEFOR POU KONPRAN BANN PROFESI
19. Ki nou bizin aksepte konsernan bann profesi?
19 Nou pa kone kouma sertin profesi Labib pou realize. Profet Daniel osi pa ti konpran tou seki li ti ekrir. (Dan. 12:8, 9) Selman, mem si nou pa konpran san poursan kouma enn profesi pou realize, sa pa vedir ki li pa pou realize. Dan moman ki Li swazir, nou kapav sir ki Zeova pou ed nou pou konpran sertin profesi, parey kouma Li’nn fer dan lepase.—Amos 3:7.
20. Ki profesi pou realize biento, ek ki nou bizin kontign fer?
20 Apre ki bann-la pou dir “lape ek sekirite,” bann gouvernman sa lemond-la pou atak fos relizion ek zot pou detrir li. (1 Tes. 5:3; Rev. 17:16, 17) Apre sa, zot pou atak bann serviter Zeova. (Eze. 38:18, 19) Lerla, lager Armagedon pou koumanse. (Rev. 16:14, 16) Nou kapav sir ki tousala pou arive biento. Me ziska ki sa arive, anou kontign montre ki nou kontan nou Papa Zeova, kan nou kontign fer zefor pou konpran bann profesi ek kan nou ed lezot osi pou fer parey.
KANTIK 95 Lalimier Briye Pli For
a Mem si sa lemond-la pe deplizanpli anpire, nou kapav sir ki nou pou ena enn zoli lavenir. Nou konpran sa kan nou etidie bann profesi ki ena dan Labib. Dan sa lartik-la, nou pou get sertin rezon kifer nou bizin etidie bann profesi ki ena dan Labib. Nou pou examinn osi de profesi ki ena dan liv Daniel, ek nou pou gete ki bienfe nou gagne kan nou konpran zot.