Jéhovah, Li enn Bondié ki ena reconnaissance
“Bondié pa injuste pou blié seki zot inn faire ek l’amour ki zot finn montré pou so nom.”—Hébreux 6:10.
1. Couma Jéhovah ti montré so reconnaissance envers Ruth, enn femme moabite?
JÉHOVAH bien apprecié kan bann dimoune faire bann zeffort sincere pou faire so volonté ek Li recompense zot en abondance. (Hébreux 11:6) Boaz, ki ti enn zom fidel, ti koné ki Jéhovah ena sa grand qualité-la. Li ti koz lor reconnaissance Jéhovah kan li ti dire Ruth, enn Moabite ki ti bien occupe so belle-mere ki ti veuve: “Mo souhaité ki Jéhovah recompense to fason agir, ek ki to gagne enn salaire parfait ar Jéhovah.” (Ruth 2:12) Eski Ruth ti gagne benediction Bondié? Oui! Parski so zistoire finn ecrire dan la Bible. En plus, li ti marié avek Boaz ek li ti vinn enn ancetre le roi David ek Jésus Christ, toulé-deux. (Ruth 4:13, 17; Matthieu 1:5, 6, 16) Dan la Bible, ena encore beaucoup lezot l’exemple ki montré ki Jéhovah ena reconnaissance pou seki so bann serviteur faire.
2, 3. (a) Kifer eski reconnaissance ki Jéhovah ena li extraordinaire? (b) Kifer Jéhovah kapav montré enn reconnaissance sincere? Expliké.
2 Jéhovah Li-mem ti pou considere sa couma enn kitsoz injuste si Li pa ti montré so reconnaissance. Hébreux 6:10 dire: “Bondié pa injuste pou blié seki zot inn faire ek l’amour ki zot finn montré pou so nom, kan zot finn servi bann saint ek ki zot pé contigne servi bannla.” Seki extraordinaire ici, c’est ki Bondié montré so reconnaissance pou bann dimoune ki bien devoué ar Li, mem si zot bann dimoune imparfait ek zot pa reussi arrive ziska so la-gloire.—Romains 3:23.
3 Parski nou imparfait, kitfois nou kapav pensé ki seki nou faire pou montré nou l’attachement envers Jéhovah, pena enn grand valeur ek ki nou pa merite so benediction. Mais Jéhovah konn bien nou bann mobile ek nou situation, ek Li vrai-mem apprecié seki nou faire dan so service avek tou nou nâme. (Matthieu 22:37) Nou kapav prend enn l’exemple: Enn mama trouve enn cadeau lor so la-table—enn collier ki coute bon marché. Li kapav considere sa cadeau-la couma enn kitsoz ki pena beaucoup valeur, ek mette li dan enn coin. Mais, lor carte ki ena avek sa cadeau-la, li aprann ki c’est so tifi ki finn acheté sa collier-la avek tou so ti kass ki li’nn ramassé. Sa faire sa mama-la considere sa cadeau-la dan enn lot fason. Kitfois, li ena larme dan so lizié, li maye so tifi ek li dire li ki quantité li apprecié seki li’nn faire.
4, 5. En rapport avek reconnaissance, couma eski Jésus ti imite Jéhovah?
4 Jéhovah konn bien nou bann mobile ek nou limite. A cause sa, Li bien apprecié kan nou faire tou seki nou kapav dan so service, ki li beaucoup ou-soit tigit. Dan sa domaine-la, Jésus ti imite Jéhovah dan enn fason parfait. Anou ré-guette sa recit ki koz lor enn veuve ki ti mette zis deux ti piece dan boite tresor. La Bible dire: “Kan [Jésus] ti leve so lizié, li ti trouve bann riche ki ti pé mette zot don dan bann boite tresor. Apré, li ti trouve enn veuve ki ti misere, mette deux ti piece la monnaie ki ti ena bien tigit valeur dan boite, ek li ti dire: ‘Mo dire zot vrai-mem, sa veuve-la, mem si li misere, finn mette plus ki zot tou. Parski tou sa bannla finn donne seki zot ena en plus, mais li, dan so la-misere, li finn mette tou seki li ti ena pou vive.’ ”—Luc 21:1-4.
5 Oui, parski Jésus ti konn situation sa madame-la—ki li ti enn veuve ek li ti misere—li ti comprend ki valeur sa don-la ti ena, ek li ti bien apprecié sa. Nou kapav dire mem zaffaire concernant Jéhovah. (Jean 14:9) Eski sa pa encourage ou kan ou koné ki n’importe ki ou situation, ou kapav gagne faveur Bondié ek so Garson ki ena reconnaissance pou seki ou faire?
Jéhovah recompense enn Éthiopien ki ti ena la crainte pou Li
6, 7. Kifer ek couma Jéhovah ti montré so reconnaissance envers Ébed-Mélek?
6 Kan nou lire la Bible, plusieurs fois nou trouvé ki Jéhovah montré so reconnaissance envers bann dimoune ki faire so volonté. Par exemple, anou guette fason ki Li ti agir avek Ébed-Mélek, enn Éthiopien ki ti ena la crainte pou Bondié. Ébed-Mélek ti vive dan mem lepok ki prophete Jérémie ek li ti servi dan palais mauvais le roi Tsidqiya, en Juda. Ébed-Mélek ti aprann ki bann prince Juda ti mette enn fausse accusation lor Jérémie. Zot ti dire ki li ti pé encourage bann dimoune pou rebelle kont le roi ek zot ti’nn jette li dan enn trou pou li mort sans mangé. (Jérémie 38:1-7) Ébed-Mélek ti koné ki beaucoup dimoune ti ena enn grand la-haine pou Jérémie a cause message ki li ti preché. Li ti riské so la-vie kan li ti al plaide pou la vie Jérémie devant le roi. Li ti dire avek courage: “Ah mo seigneur le roi, sa bann zom-la finn mal agir dan tou seki zot inn faire ar prophete Jérémie; zot inn jette li dan enn grand trou pou li mort là, a cause la famine.” Lerla, lor l’ordre le roi, Ébed-Mélek ti prend 30 zom ek ti al sauve prophete Bondié.—Jérémie 38:8-13.
7 Jéhovah ti trouvé ki Ébed-Mélek ti ena la foi, ek ki sa ti aide li pou surmonte la peur ki li ti kapav ena. Alors, Jéhovah ti montré so reconnaissance envers Ébed-Mélek ek Li ti dire li par prophete Jérémie: “Mo pé realise mo bann parole lor sa la-ville-la pou faire enn malheur, pa pou faire di-bien . . . Ek sa jour-la mo pou delivré toi, . . . ek personne pa pou livré toi dan la main bann zom ki to peur. Parski vrai-mem mo pou faire toi sapé . . . ; oui, seki to pou gagné, c’est to la-vie, parski to finn ena confiance en moi.” (Jérémie 39:16-18) Oui, Jéhovah ti sap Ébed-Mélek ek Jérémie dan la main bann mauvais prince Juda ek plitar dan la main bann Babylonien ki ti detruire Jérusalem. Psaume 97:10 dire: “[Jéhovah] protege la vie so bann fidel; Li sap zot dan la main bann mauvais dimoune.”
“To Papa ki guetté en secret, pou rann toi”
8, 9. Couma Jésus ti montré ki qualité la priere Jéhovah apprecié?
8 Seki la Bible dire lor la priere c’est enn lot preuve ki Jéhovah apprecié ek accorde enn grand valeur ar seki nou faire pou montré nou l’attachement pou Li. Enn dimoune sage ti dire: “La priere bann dimoune droite, sa li enn plaisir pou [Bondié].” (Proverbes 15:8) Dan lepok Jésus, beaucoup chef religieux ti prié en publik, pa parski zot ti vrai-mem attaché ar Bondié, mais parski zot ti envie impressionne bann dimoune. Jésus ti dire: “Zot pé gagne tou zot recompense.” Mais avek so bann disciple, li ti dire: “Mais toi, kan to prié, rente dan to la-chambre ek, apré ki to’nn ferme la porte, prié to Papa ki là dan secret; lerla to Papa ki guetté en secret, pou rann toi.”—Matthieu 6:5, 6.
9 Bien-sur, Jésus pa ti pé condamne bann la-priere ki faire en publik, parski li-mem dan certain l’occasion, li ti prié en publik. (Luc 9:16) Jéhovah bien apprecié kan nou prié Li avek enn leker sincere sans ki nou rod impressionne lezot. En realité, bann la-priere ki nou faire en privé, zot montré ki quantité nou content Bondié ek ki quantité nou ena confiance en Li. Alors, nou pa etonné ki souvent, Jésus ti rod enn place kot li ti pou tousel pou li prié. Enn fois, li ti faire sa “boner gramatin, alors ki ti encore faire noir.” Enn lot l’occasion, “li ti al dan montagne, li tousel pou prié.” Ek avant ki li ti choisir so 12 zapotre, Jésus ti passe toute la-nuit pou prié.—Marc 1:35; Matthieu 14:23; Luc 6:12, 13.
10. Ki nou kapav sur si nou bann la-priere montré ki nou sincere?
10 Surement ki Jéhovah ti bien ecoute bann la-priere sincere ki Jésus ti faire! Oui, ena fois, kan Jésus ti prié, li ti “criyé fort ek li ti ploré, ek Bondié ti ecoute so la-priere parski li ti ena la crainte pou Li.” (Hébreux 5:7; Luc 22:41-44) Kan nou bann la-priere montré ki nou sincere coumsa, nou kapav sur ki nou Papa ki dan le ciel ecoute nou bien ek ki Li apprecié sa. Oui, “Jéhovah pré avek tou bann . . . ki invok Li avek fidelité.”—Psaume 145:18.
11. Ki Jéhovah pensé lor seki nou faire kan nou tousel?
11 Si Jéhovah apprecié ki nou prié Li en secret, alors ki quantité Li apprecié ki nou obeir Li en secret! Oui, Jéhovah koné ki nou faire kan nou tousel. (1 Pierre 3:12) Kan nou reste fidel ek nou obeir Li kan nou tousel, sa montré ki nou ena “enn leker complet” envers Jéhovah. Sa montré ki nou ena bann bon mobile dan nou leker ek ki nou leker attaché ar seki droite. (1 Chroniques 28:9) Pena doute ki enn conduite coumsa faire leker Jéhovah content!—Proverbes 27:11; 1 Jean 3:22.
12, 13. Couma nou kapav veille nou leker ek nou l’esprit ek ressemblé Nathanaël ki ti enn disciple fidel?
12 Sa vedir ki bann chrétien ki fidel faire bien attention pou pa faire bann peché en cachiette. Par exemple, zot pa guette pornographie ek la violence, bann peché ki faire zot l’esprit ek zot leker vinn impur. Mem si nou kapav cachiette certain peché devant bann dimoune, nou bien koné ki “tou kitsoz au clair ek bien exposé devant lizié sa Kikenn ar ki nou bizin rann compte-la.” (Hébreux 4:13; Luc 8:17) Kan nou faire zeffort pou rejette bann kitsoz ki Jéhovah pa content, nou garde enn bon conscience ek nou content pou koné ki nou ena faveur Bondié. Oui, pena doute ki Jéhovah bien apprecié enn dimoune “ki marche dan l’integrité, ek ki pratik la justice, ek ki dire la verité dan so leker.”—Psaume 15:1, 2.
13 Mais couma eski nou kapav veille nou l’esprit ek nou leker dan enn lé-monde ki rempli avek bann mauvais kitsoz? (Proverbes 4:23; Éphésiens 2:2) Nou bizin profite bien tou bann disposition ki Jéhovah prend pou aide nou lor plan spirituel. En plus, nou bizin faire zeffort pou rejette seki mauvais ek faire seki bon. Si jamais ena bann mauvais desir ki commence germé dan nou leker, fodé ki nou agir vite ek rasse zot pou ki zot pa poussé ek faire nou faire peché. (Jacques 1:14, 15) Maziné ki quantité ou ti pou content si Jésus dire lor ou seki li ti dire lor Nathanaël: “Guetté, [enn dimoune] ki pena okenn fausseté dan li.” (Jean 1:47) Plitar, Nathanaël, ki ti appel aussi Barthélemy, ti gagne privilege pou vinn enn parmi 12 zapotre Jésus.—Marc 3:16-19.
“Enn grand pretre ki ena misericorde ek ki fidel”
14. Ki reaction Jésus ti ena en rapport avek seki Marie ti faire, ek couma so l’attitude ti different ar lezot?
14 Parski Jésus, li “reflet [Jéhovah,] Bondié ki invisible,” li toujours imite so Papa dan enn fason parfait. Sa vedir ki li aussi li ena reconnaissance pou bann dimoune ki servi Bondié avek enn leker pur. (Colossiens 1:15) Par exemple, cinq jour avant ki li ti donne so la-vie, Jésus ek certain parmi so bann disciple ti invité kot Simon, dan la ville Béthanie. Pendant la soirée, Marie, soeur Lazare ek Marthe, “ti prend enn livre de l’huile parfumé, enn l’essence nard ki pur, ki ti coute bien cher” (apepré salaire enn an) ek li ti verse sa lor la tête ek lor lipié Jésus. (Jean 12:3) Certain ti demandé: “Kifer pé faire sa gaspillage-la?” Pourtant Jésus li, li ti trouve seki Marie inn faire, dan enn lot fason. Pou li, sa ti montré ki Marie ti ena enn grand generosité, ek seki li ti faire ti ena enn grand signification en rapport avek so la-mort ek so l’enterrement ki ti pré pou arrivé. Alors, au lieu ki Jésus ti critik Marie, li ti honore li. Li ti dire: “Partout kot sa bon nouvel-la pou preché dan le monde entier, pou raconte aussi, en souvenir sa femme-la, seki li’nn faire.”—Matthieu 26:6-13.
15, 16. Couma nou tire profit ar l’experience ki Jésus inn faire en tant ki enn humain ki’nn servi Bondié lor la terre?
15 Nou vrai-mem ena enn grand privilege pou ena enn Chef couma Jésus, ki ena reconnaissance pou seki bann dimoune faire! En realité, la vie Jésus en tant ki enn humain lor la terre ti prepare li pou faire travail ki Jéhovah ti’nn reservé pou li—servi couma Grand Pretre ek le Roi. Premierement, pou congregation bann chrétien oint, apré, pou le monde entier.—Colossiens 1:13; Hébreux 7:26; Révélation 11:15.
16 Avant Jésus vinn lor la terre, li ti deja bien interessé avek bann dimoune ek li ti ena enn grand l’amour pou zot. (Proverbes 8:31) Kan li’nn vive couma enn humain lor la terre, li’nn arrivé comprend pli bien bann l’epreuve ki nou gagné dan nou service pou Bondié. L’apotre Paul ti ecrire: “Li ti necessaire ki [Jésus] vinn couma so ‘bann frere’ dan tou kitsoz, pou ki li kapav vinn enn grand pretre ki ena misericorde ek ki fidel . . . Parski li-mem li finn souffert kan li’nn passe par l’epreuve, li kapav vinn au secours bann ki pé passe par l’epreuve.” Jésus kapav “comprend nou bann faiblesse” parski li “finn passe par l’epreuve dan tou kitsoz pareil couma nou, mais seulement li pa ti ena okenn peché.”—Hébreux 2:17, 18; 4:15, 16.
17, 18. (a) Ki bann lettre ki Jésus ti adressé ar sept congregation dan l’ouest l’Asie, ti montré lor reconnaissance ki li ti ena pou so bann disciple? (b) Pou ki kitsoz bann chrétien oint ti pé gagne enn formation?
17 Apré so resurrection, li vinn pli clair ki Jésus ti comprend encore pli bien bann l’epreuve par ki so bann disciple ti passé. Prend l’exemple bann lettre ki l’apotre Jean ti ecrire, ki Jésus ti envoye sept congregation dan l’ouest l’Asie. Ar congregation Smyrne, Jésus ti dire: “Mo konn to souffrance ek to la-misere.” Coumadir Jésus ti pé dire: ‘Mo bien comprend to bann problem; mo konn bien par ki to pé passé.’ Apré sa, parski li-mem li finn souffert ziska la mort, avek beaucoup compassion, li ti donne bannla sa l’assurance-la: “Reste fidel ziska la mort ek mo pou donne toi couronne la vie.”—Révélation 2:8-10.
18 Dan bann lettre ki Jésus ti adressé ar sept congregation, so bann parole montré ki li ti bien conscient bann problem ki so bann disciple ti pé gagné ek ki li ti bien reconnaissant pou zot fidelité. (Révélation 2:1–3:22) Pa blié ki Jésus ti pé koz ar bann chrétien oint ki ti ena l’esperance pou al règne avek li dan le ciel. Pareil couma zot Seigneur, sa bann l’epreuve-la ti pé prepare-zot pou grand responsabilité ki ti pé attann zot, setadir aidé pou applik bann bienfait sacrifice Jésus ar l’humanité ki pé souffert, avek enn grand compassion.—Révélation 5:9, 10; 22:1-5.
19, 20. Couma bann membre la ‘grande foule’ inn montré zot reconnaissance pou Jéhovah ek so Garson?
19 Bien-sur Jésus pena l’amour zis pou bann chrétien oint. Li ena aussi l’amour pou bann membre “lezot brebis” ki fidel. Parmi, ena plusieurs million ki forme “enn grand la-foule . . . ki sorti dan tou nation” ek ki pou survive pendant “la grande tribulation.” (Jean 10:16; Révélation 7:9, 14) Zot pé vinn dan coté Jésus parski zot ena reconnaissance pou sacrifice ki li’nn faire ek pou l’esperance la vie eternel ki zot ena. Couma eski zot montré zot reconnaissance? Kan zot “rann [Bondié] enn service sacré la-nuit li-jour.”—Révélation 7:15-17.
20 Rapport mondial pou l’année service 2006 ki trouve dan page 27-30, montré bien ki sa bann ministre fidel-la pé vrai-mem rann Jéhovah enn “service sacré la-nuit li-jour.” En realité, pendant sa l’année-la, bann membre la grande foule, ensam avek sa ti group chrétien oint ki encore lor la terre-la, ti passe en tou 1,333,966,199 l’heure dan zot ministere publik, coumadir zot inn passe plus ki 150,000 l’année dan sa service-la.
Contigne montré reconnaissance!
21, 22. (a) En rapport avek reconnaissance, kifer bann chrétien bizin faire bien attention zordi? (b) Ki nou pou examiné dan prochain lartik?
21 Jéhovah ek so Garson montré enn reconnaissance extraordinaire envers bann dimoune imparfait. Mais malheureusement, la plupart dimoune pa prend compte Bondié, zot prefere occupe zot prop zaffaire. Kan Paul ti koz lor bann dimoune ki pou vive “dan dernier jour,” li ti ecrire: “Bann dimoune pou content zis zot-mem, zot pou content l’argent . . . zot pa pou ena reconnaissance.” (2 Timothée 3:1-5, Liénart, edition 1952) Sa bann dimoune-la bien different ar bann vrai chrétien! Bann vrai chrétien zot, zot faire bann la-priere sincere, zot obeir Bondié ek zot servi Li avek tou zot nâme. Kifer? Parski zot envie montré zot reconnaissance pou tou seki Bondié inn faire pou zot.—Psaume 62:8; Marc 12:30; 1 Jean 5:3.
22 Dan prochain lartik, nou pou ré-guette certain parmi bann disposition ki Jéhovah finn prend pou aide nou lor plan spirituel. Pendant ki nou pou medite lor sa bann ‘joli don-la,’ anou contigne augmente nou reconnaissance pou tou seki Jéhovah inn faire pou nou.—Jacques 1:17.
Couma ou pou reponn?
• Couma eski Jéhovah inn montré ki Li enn Bondié ki ena reconnaissance?
• Kan nou tousel, couma nou kapav faire leker Jéhovah content?
• Dan ki fason eski Jésus ti montré reconnaissance?
• Couma l’experience ki Jésus inn faire en tant ki enn humain, finn aide li pou vinn enn lé-roi ki ena compassion ek reconnaissance?
[Zimage, page 19]
Pareil couma enn parent apprecié enn simple cadeau, Jéhovah apprecié tou seki nou kapav faire