“Veye”!

“Seki mo dir zot, mo dir ar tu: Veye.” —MARK 13:37.

1, 2. (a) Ki leson enn misye finn tire lor fason protez so dibyin? (b) Dan legzanp enn voler ki Zezi finn done, ki nu aprann konsernan res lor nu gard?

JUAN ti gard so bann dibyin kot li. Li ti kasyet zot anba so lili. Dapre li, sa mem landrwa ki pli sir dan so lakaz. Me, enn nwit, pandan ki li ek so madam ti pe dormi, enn voler finn rant dan lasam. Pa bizin dir, voler la finn avoy so lamin dan landrwa egzak. San fer tapaz, li’nn tir tu dibyin ki ti ena anba lili, ek li finn pran usi larzan ki Juan ti lese dan tirwar so tabdenwi. Gramatin, Juan dekuver ki voler inn pas kot li. Zame li pa pu bliye sa move leson ki li’nn tire la: Enn dimunn ki pe dormi pa kapav protez so dibyin.

² Lor plan spirityel usi li parey. Nu pa kapav protez nu lesperans ek nu lafwa, si nu dormi. Ala kifer, Pol ti donn sa konsey la: “Fode pa ki nu dormi kuma lezot pe fer, me fode ki nu res lor nu gard ek ki nu gard nu bann kapasite pu rezone.” (1 Tesalonisyin 5:6) Pu montre ki kantite li inportan ki nu res lor nu gard, Zezi ti sit legzanp enn voler. Li ti pe dekrir bann levennman ki ti pu arive ziska ki li vini pu zize. Ek lerla, li ti donn sa lavertisman la: “Donk, veye parski zot pa kone ki zur zot Senyer pe vini. Ekut sa, si propryeter lakaz ti kone dan ki parti lanwit voler la pe vini, ebyin li pa ti pu dormi ek li ti pu anpes voler la kokin kot li. Alor zot usi parey, prepar zot, parski se dann enn ler ki zot pa atann ki [zot Senyer] pu vini.” (Matye 24:42-44) Enn voler pa kol lafis avan li vini. Li vinn dan enn ler ki personn pa atann. Parey kumsa mem, kuma Zezi ti dir, lafin sa lemond la pu vini ‘dan enn ler ki nu pa atann.’

“Res lor Zot Gard, Tini Ferm dan Lafwa”

3. Zezi ti sit legzanp bann esklav ki ti pe atann zot met sorti enn maryaz. Kuma eski atraver sa legzanp la, Zezi finn montre linportans pu res lor nu gard?

³ Dan Levanzil Lik, Zezi ti konpar bann Kretyin ar bann esklav ki ti pe atann zot met sorti enn maryaz. Sa bann esklav la ti bizin res lor zot gard pu ki kan zot met vini, zot kapav pre pu akeyir li. Alor pareyman, Zezi ti dir: “Dan enn ler ki zot pa atann, ki sa Garson ki’nn ne kuma enn imin lor later la pu vini.” (Lik 12:40) Sertin ki pe servi Zeova depi plizir lane, kitfwa nepli truv lafin sa lemond la pre. Kitfwa zot panse ki ena ankor buku letan avan sa vini. Sa fason panse la kapav amenn nu negliz bann kitsoz spirityel ek konsantre plis lor bann obzektif materyel ek lor distraksyon. Ek sa kapav fer nu gayn somey lor plan spirityel.—Lik 8:14; 21:34, 35.

4. Ki lasirans pu motiv nu pu veye, ek kuma Zezi finn montre sa?

⁴ Nu kapav tir enn lot leson dan sa legzanp ki Zezi ti site la. Bann esklav la pa ti kone ki ler zot met ti pu vini. Me, zot ti kone ki lanwit li ti pu vini. Wi, li ti pu difisil pu zot res lor zot gard tutlong sa lanwit la, si zot ti panse ki zot met ti kapav vini pandan enn lot lanwit. Me non, zot ti kone ki lanwit li ti pu vini. Sa finn motiv zot pu res lor zot gard. Pareyman, bann profesi Labib montre ki nu pe viv dan lepok lafin. Me, zot pa dir nu ki zur uswa ki ler lafin pu vini. (Matye 24:36) Kan nu kone ki lafin pu vini, sa ed nu pu res lor nu gard. Me, si nu ena lasirans ki zur Zeova li vremem pre, ebyin nu pu plis motive pu veye.—Sefanya 1:14.

5. Kuma eski nu kapav swiv konsey: “Res lor zot gard”?

⁵ Kan Pol ti ekrir bann Korintyin, li ti donn zot sa konsey la: “Res lor zot gard, tini ferm dan lafwa.” (1 Korintyin 16:13) Wi, res lor nu gard ek tini ferm dan lafwa, se de kitsoz ki mars ansam. Kuma eski nu kapav res lor nu gard? Se kan nu gayn enn pli gran konesans Parol Bondye. (2 Timote 3:14, 15) Si nu ena bann bon labitid letid personel ek si nu asiste reynion, sa pu ed nu pu fortifye nu lafwa. Enn kitsoz ki inportan an rapor avek nu lafwa, se gard zur Zeova byin prezan dan nu lespri. Donk, fode pa ki nu bliye bann ranseynman inportan ki nu’nn aprann konsernan lafin sa lemond la.a Pu sa, li bon ki detanzantan nu reget bann prev ki sorti dan Labib, ki montre ki nu pe viv lepok lafin. Li bon usi ki nu pran kont bann evennman ki pe arive dan lemond ek ki pe realiz bann profesi Labib. Enn frer dan l’Allemagne ti ekrir: “Sak fwa mo get linformasyon—lager, tranblemandeter, vyolans, polisyon nu planet—li konvink mwa ankor plis, ki lafin byin pre.”

6. Kuma eski, atraver enn legzanp, Zezi finn montre ki nu kapav kumans kas ku lor plan spirityel amezir letan pase?

⁶ Dan Mark sapit 13, nu truv enn lot moman ankor kot Zezi ti ankuraz so bann disip pu res lor zot gard. Dapre sa sapit la, Zezi ti konpar zot sityasyon ar sityasyon enn gardyin laport ki ti pe atann so met returne depi vwayaz. Gardyin laport la pa ti kone ki ler so met ti pu returne. Li ti bizin sinpleman veye. Dapre Zezi, met la ti kapav vini pandan kat diferan kar ki gardyin la pe veye. Dernye kar la pran depi trwazer dimatin, li al ziska soley leve. Pandan sa dernye kar la, li ti pu byin fasil pu gardyin la gayn somey. Li paret ki dapre bann solda, meyer moman pu may enn lennmi par sirpriz, se zis avan soley leve. Pareyman, dan sa dernye kar kot nu pe viv la, lemond dan enn gran somey lor plan spirityel. Ek nu, nu bizin lite pu res lor nu gard. (Romin 13:11, 12) Ala kifer, dan sa legzanp ki li’nn site la, Zezi finn repet sa plizir fwa: “Atansyon, res lor zot gard . . . Veye . . . Seki mo dir zot, mo dir ar tu dimunn: Veye.”—Mark 13:32-37.

7. Ki danze reel pe get nu? Ek an rapor avek sa, ki lankurazman nu lir suvan dan Labib?

⁷ Plizir fwa pandan so minister ek apre so rezireksyon, Zezi ti ankuraz so bann disip pu res lor zot gard. Avredir, sak fwa ki Labib koz lor lafin sa lemond la, nu truv lavertisman pu res lor nu gard uswa pu kontiyn veye.b (Lik 12:38, 40; Revelasyon 3:2; 16:14-16) Wi, li enn vre danze pu nu, si nu gayn somey lor plan spirityel. Nu tu byin bizin sa bann warning la!—1 Korintyin 10:12; 1 Tesalonisyin 5:2, 6.

Trwa Zapot Ki Ti Dormi

8. Dan zardin Zetsemane, ki sa trwa zapot la ti fer, alor ki Zezi ti dir zot kontiyn veye?

⁸ Pu nu res lor nu gard, li pa sifi ki nu ena bann bon lintansyon. Se seki nu truve dan legzanp Pyer, Zak ek Zan. Sa bannla ti bann zom spirityel. Zot finn tuletan swiv Zezi ek zot ti ena buku lafeksyon pu li. Me purtan, lanwit le 14 Nizan, lane 33 N.L., zot pa finn kapav res lor zot gard. Apre ki zot ti’nn kit sa lasam kot zot ti selebre Pak la, sa trwa zapot la ti akonpayn Zezi dan zardin Zetsemane. Laba, Zezi ti dir zot: “Mo nam telman tris ki li pre pu mor. Res isi ek kontiyn veye avek mwa.” (Matye 26:38) Trwa fwa, Zezi finn priye so Papa avek tu so leker, ek trwa fwa li’nn return get so bann kamarad, selman li’nn truv zot pe dormi.—Matye 26:40, 43, 45.

9. Pu ki rezon kitfwa bann zapot ti gayn somey?

⁹ Kifer sa bann zapot fidel la ti desevwar Zezi sa lanwit la? Enn parmi bann rezon, se ki zot ti fatige. Ti byin tar, kitfwa ti minwi pase ek “zot lizye ti lur ar somey.” (Matye 26:43) Mem sa, Zezi ti dir zot: “Kontiyn veye ek priye pu ki zot pa tante. Byinsir, lespri ena bon volonte, me lekor feb.”—Matye 26:41.

10, 11. (a) Malgre ki li ti fatige, ki ti permet Zezi res lor so gard dan zardin Zetsemane? (b) Ki leson nu tire dan seki ti ariv sa trwa zapot ki pa ti veye la?

¹⁰ Pena dut ki sa lanwit markan la, Zezi usi ti fatige. Me olye li ti gayn somey, li ti profit so bann dernye moman liberte ki li ti ena pu priye Bondye avek tu so leker. Detrwa zur avan, li ti ankuraz so bann disip pu priye, kan li ti dir zot: “Donk, res lor zot gard, fer tuletan bann siplikasyon pu ki zot reysi sape dan tu bann kitsoz ki pu bizin arive, ek ki zot kapav debut devan sa Garson ki’nn ne kuma enn imin lor later la .” (Lik 21:36; Efezyin 6:18) Nu bizin pran kont konsey Zezi ek swiv so bon legzanp an rapor avek lapriyer. Lerla, kan nu sipliy Zeova avek tu nu leker, sa pu ed nu pu res lor nu gard lor plan spirityel.

¹¹ Byinsir, Zezi ti konpran ki ti pu aret li ek ki li ti pu kondane pu mor. Me dan sa ler la, so bann disip zot, zot pa ti konpran sa. Avredir, Zezi ti pu konn plizir leprev ziska ki finalman li mor lor enn poto martir. Li ti fer so bann zapot konn sa bann kitsoz la, me zot pa ti konpran seki li ti pe dir. Akoz sa, zot ti gayn somey, alor ki li, li ti pe priye. (Mark 14:27-31; Lik 22:15-18) Parey kuma bann zapot, nu’si nu ena bann febles. Ena kitsoz ki nu pa kone. Kan mem sa, si nu bliye ki lafin pre, nu kapav gayn somey lor plan spirityel. Se akondisyon ki nu veye, ki nu kapav res lor nu gard.

Trwa Kalite Ki Byin Neseser

12. Ki trwa kalite ki Pol ti site pu kapav ed nu pu res lor nu gard?

¹² Kuma eski nu kapav kontiyn mazine ki lafin byin pre? Nu finn deza truve ki li inportan priye ek gard zur Zeova prezan dan nu lespri. Apart sa, Pol mansyonn trwa kalite ki byin neseser ki nu bizin devlope. Li dir: “Me nu ki dan lizur, anu gard nu kapasite pu rezone. Anu pran lafwa ek lamur kuma enn bukliye, ek lesperans delivrans kuma enn elmet.” (1 Tesalonisyin 5:8) San rant dan detay, anu gete kuma lafwa, lesperans, ek lamur ed nu pu res lor nu gard lor plan spirityel.

13. Kuma lafwa ed nu pu res lor nu gard?

¹³ Nu bizin ena enn lafwa ferm ki Zeova egziste ek ki Li “rekonpans bann ki vremem rod Li.” (Ebre 11:6) Profesi Zezi lor lafin ti realize pu premye fwa dan premye syek. Alor, sa fortifye nu lafwa ki sa profesi la pu konn enn pli gran realizasyon dan nu lepok. Ek nu lafwa fer nu atann zur Zeova avek inpasyans. Nu sir ki “[vizyon profetik] pu realize san fot. Li pa pu an retar.”—Abakuk 2:3.

14. Kuma eski lesperans li neseser si nu’le res lor nu gard?

¹⁴ Kan nu ena enn lesperans ki sir, sa tini nu for parey kuma lank enn bato. Li permet nu siport bann difikilte, mem si nu bizin atann bann promes Bondye, ki nu sir Li pu realize. (Ebre 6:18, 19) Margaret, enn ser ki ena lesperans pu al viv dan lesyel, ena plis ki 90 an. Li’nn batize depi plis ki 70 an. Get seki li rekonet: “Kan mo mari ti pe mor avek enn kanser an 1963, mo ti panse ki li ti pu vremem bon si lafin ti kapav vini vit. Me asterla, mo realize ki mo ti pe get zis mo bann lintere personel. Sa lepok la, nu pa ti kone ki kantite, travay predikasyon ti pu ogmante partu dan lemond. Mem zordi, ena tuzur bann landrwa kot travay predikasyon finn fek demare. Alor, mo kontan ki Zeova finn ena pasyans.” Lapot Pol donn nu sa lasirans la: ‘Landirans fer nu gayn enn kondisyon ki Bondye apruve. Ek sa kondisyon ki Bondye apruve la donn nu lesperans, ek lesperans li, zame li pa desevwar nu.’—Romin 5:3-5.

15. Mem si nu ena linpresyon ki nu pe atann lafin depi byin lontan, kuma eski lamur kapav motiv nu?

¹⁵ Lamur Kretyin se enn kalite byin spesyal, parski sa mem lafors ki motiv nu pu tu kitsoz ki nu fer. Nu servi Zeova parski nu kontan Li, ek sa lamur la pa depann lor kalandriye ki Li’nn fixe. Lamur pu nu prosin pus nu pu pres labonn nuvel lor Rwayom Bondye. Ek nu fer sa tanki Bondye anvi nu prese ek mem si nu bizin fer bann mem lakaz plizir fwa. Akoz sa, Pol ti ekrir: “Sa trwa la reste, lafwa, lesperans ek lamur. Me seki pli gran ladan, se lamur.” (1 Korintyin 13:13) Lamur ed nu pu kontiyn servi Zeova ek li ed nu pu res lor nu gard. “[Lamur] esper tu kitsoz, siport tu kitsoz. Lamur pa disparet zame.”—1 Korintyin 13:7, 8.

“Kontiyn Tini Byin Ferm Seki To Ena”

16. Olye ki nu ralanti, ki latitid nu bizin devlope?

¹⁶ Nu pe viv enn lepok byin inportan. Bann evennman ki pe arive dan lemond, pe kontiyn rapel nu ki nu pe viv dan faz final bann dernye zur. (2 Timote 3:1-5) Se pa enn ler pu nu ralanti, me pu ‘kontiyn tini ferm seki nu ena.’ (Revelasyon 3:11) Si nu “res lor nu gard pu priye” ek si nu devlop lafwa, lesperans, ek lamur, nu pu montre ki nu pre pu fer fas kan ler leprev pu sone. (1 Pyer 4:7) Nu ena buku pu fer dan travay nu Senyer. Si nu res okipe avek bann aksyon ki montre nu latasman ar Bondye, sa pu ed nu pu res lor nu gard.—2 Pyer 3:11.

17. (a) Mem si parfwa nu kapav gayn bann desepsyon an rapor avek, kifer fode pa ki sa dekuraz nu? (Get lankadre lor paz 21.) (b) Kuma eski nu kapav imit Zeova, ek ki benediksyon pe atann bann ki fer sa?

¹⁷ Zeremi ti ekrir: “Zeova Li mo par. Ala kifer, mo pu atann Li. Zeova bon anver kikenn ki ena lespwar an Li ek ki kontiyn rod Li. Li bon atann trankil delivrans ki Zeova pu amene.” (Lamantasyon 3:24-26) Sertin parmi nu pe atann depi pa tro lontan. Me, ena ki finn atann depi plizir lane pu truv delivrans Zeova. Me, sa letan ki nu’nn atann la li vremem kurt konpare ar leternite ki pe atann nu devan, pa vre? (2 Korintyin 4:16-18) Pandan ki nu atann ler ki Zeova inn fixe, nu kapav devlop bann kalite Kretyin ki inportan. Nu kapav usi ed lezot pu profit pasyans Zeova ek pu vinn dan laverite. Alor, nu tu, anu kontiyn veye. Anu imit Zeova ek montre pasyans. Nu bizin rekonesan pu lesperans ki Li’nn donn nu. Wi, anu kontiyn res lor nu gard lor plan spirityel ek tini byin ferm lesperans lavi eternel. Lerla, sa bann promes ki ti anonse la pu aplik pu nu: “[Zeova] pu fer twa enn loner, Li pu fer later vinn pu twa. Kan bann move pu detrir, to pu truve.”—Psom 37:34.

[Not anba paz]

Kuma Eski U Pu Reponn?

• Kuma nu kapav ogmant nu lasirans ki lafin sa lemond la pre?

• Ki nu kapav aprann dan legzanp Pyer, Zak, ek Zan?

• Ki trwa kalite pu ed nu pu res lor nu gard lor plan spirityel?

• Kifer eski inn ler pu nu ‘tini byin ferm seki nu ena’?

[Lankdre ek Zimaz lor paz 31]

“Ere Sa Kikenn Ki Kontiyn Veye La.”—Danyel 12:12

Fer kumadir enn gardyin kone ki enn voler pu vinn kokin dan propryete kot li travay. Kan finn fini fer nwar, gardyin la uver byin so zorey pu ekut ninport ki ti tapaz. Pangar voler la sa! Plis ler pase, li uver plis so lizye ek so zorey. Li fasil pu konpran ki ninport ki fos alert kapav anbet li—tapaz ki enn gro divan for fer dan bann brans zarb, uswa enn sat ki ranvers enn kitsoz.—Lik 12:39, 40.

Sa mem kapav ariv bann ki “pe atann avek inpasyans revelasyon nu Senyer Zezi Kris.” (1 Korintyin 1:7) Bann zapot ti panse ki Zezi ti pu ‘retabli rwayom Izrael’ deswit apre so rezireksyon. (Akt 1:6) Detrwa lane apre, ti bizin rapel bann Kretyin dan Tesalonik ki Zezi ti pu prezan inpe plitar dan lavenir. (2 Tesalonisyin 2:3, 8) Me malgre sa, bann fos alert an rapor avek zur Zeova pa ti fer bann premye disip abandonn semin ki amenn ver lavi.—Matye 7:13.

Zordi, nu kapav gayn linpresyon ki lafin sa lemond la pe tarde, ek sa dekuraz nu. Me fode pa ki sa fer nu aret veye. Enn bon gardyin kapav les enn fos alert anbet li. Me li bizin kontiyn veye. Sa mem so travay. Li parey pu bann Kretyin usi.

[Zimaz lor paz 29]

Bann reynion, lapriyer, ek bann bon labitid letid ed nu pu res lor nu gard