Ki l’influence Jésus Christ ena lor ou?

APRÉ seki nou finn examiné dan premier lartik, nou pa kapav ena okenn doute ki bann l’enseignement Jésus finn ena enn grand l’influence partout dan le monde, pa vrai? Mais question pli important, li: “Ki l’influence bann l’enseignement Jésus ena lor moi personnellement?”

Bann l’enseignement Jésus touche enn quantité sujet bien different. Bann leson ki nou tiré ladan ena valeur ek zot kapav influence chaque domaine nou la-vie. Anou examine seki Jésus inn enseigné lor bann priorité ki nou bizin fixé dan nou la-vie, lor l’amitié ki nou cultivé avek Bondié, lor bann relation ki nou etabli avek lezot, lor fason pou reglé bann problem, ek lor fason pou evite la violence.

Etabli bann priorité dan la vie

Sa lé-monde-la pé al tellement vite zordi, ki li prend tou nou lé-temps ek nou l’energie. Souvent, nou pena le temps pou bann kitsoz spirituel. Prend cas enn missié ki ena apepré 25 an ek ki nou pou appel Jerry. Mem si Jerry content bann conversation lor bann question spirituel, ek bien apprecié seki li aprann grace a sa, li dire avek regret: “Mo zis pena le temps pou consacré pou bann kitsoz spirituel touletan. Mo travail six jour par semaine. Dimanche, li mo sel jour repos. Ek apré ki mo’nn occupe tou seki mo ena pou faire, mo trop fatigué.” Si ou trouve-ou dan mem situation, ou pou kapav profite seki Jésus inn enseigné dan so Sermon lor montagne.

Jésus ti dire la foule ki ti’nn rassemblé pou ecoute li: “Arrete tracasse-zot pou zot nâme, ki zot pou mangé, ou-soit ki zot pou boire, ou-soit pou zot lekor, ki linge zot pou metté. Eski nâme pa pli important ki mangé ek lekor pli important ki linge? Observe bien bann zoiseau dan le ciel, parski zot pa planté ni recolté, ni ramasse dan bann godam, pourtant zot Papa ki dan le ciel nourri zot. Eski zot pa vaut plus ki [sa bann zoiseau-la]? . . . Alors, fodé pa ki zot tracassé ek zot dire: ‘Ki nou pou mangé?’ ou-soit, ‘Ki nou pou boire?’ ou-soit, ‘Ki nou pou metté?’ Parski c’est sa bann kitsoz-la, ki bann nation contigne rodé touletan. Mais zot Papa ki dan le ciel, koné ki zot bizin tousala. Alors, avant tou kitsoz, contigne rod le royaume ek so justice, ek, zot pou gagne aussi tou sa bann lezot kitsoz-la.” (Matthieu 6:25-33) Ki nou aprann ladan?

Jésus pa ti pé rod dire ki fodé pa nou prend compte nou bann besoin ek besoin nou famille lor plan materiel. La Bible dire: “Si enn kikenn pa donne so famille seki zot bizin, ek surtout bann ki dan so lakaz, li’nn rejette la foi ek li pire ki enn dimoune ki pena la foi.” (1 Timothée 5:8) Mais, Jésus finn promette ki si nou mette en premier dan nou la-vie bann kitsoz ki bizin vinn avant ek donne priorité bann kitsoz spirituel, Bondié pou surement faire nou gagne lezot kitsoz ki nou bizin. Leson ki nou aprann ici, c’est ki nou bizin etabli bann priorité. Si nou suive sa conseil-la, nou pou trouve bonheur, parski ‘bann dimoune ki conscient zot pauvreté spirituel, zot heureux.’—Matthieu 5:3.

Cultive l’amitié avek Bondié

Bann ki conscient zot pauvreté spirituel reconette ki li necessaire ki zot cultive bann bon relation avek Bondié. Couma nou etabli bann bon relation avek kikenn? Eski nou pa essaye konn sa dimoune-la pli bien? Nou bizin prend le temps pou aprann konn so fason pensé, so l’attitude, so bann capacité, seki li’nn reussi faire, seki li content ek seki li pa content. Pou kapav ena enn l’amitié avek Jéhovah, li pareil. Nou bizin ena enn connaissance exact lor Li. Kan li ti pé prié Bondié concernant so bann disciple, Jésus ti dire: “Sa-mem ki vedir la vie eternel: aprann konn toi, sel vrai Bondié, ek celui ki to finn envoyé, Jésus Christ.” (Jean 17:3) Oui, pou nou kapav cultive l’amitié avek Bondié, nou bizin aprann konn Li. La Bible, Parole inspiré Bondié, li sel place kot nou kapav gagne sa connaissance-la. (2 Timothée 3:16) Nou bizin reserve enn lé-temps pou etudié la Bible.

Mais, la connaissance li tousel pa assez. Dan mem la-priere, Jésus ti dire: “Zot (so bann disciple) finn suive to parole.” (Jean 17:6) Fodé pa ki nou zis aprann konn Bondié, mais nou bizin aussi agir en accord avek sa connaissance-la. Sinon nou pa pou kapav vinn camarade Bondié. Nou pa kapav vrai-mem attann ki nou l’amitié avek kikenn pou grandi si, volontairement, nou faire kitsoz ki contraire ar so bann l’idée ek so bann principe. Alors, bann pensée ek bann principe Bondié bizin dirige tou nou bann pas dan la vie. Anou guetté couma deux parmi so bann principe appliké dan relation ki nou ena avek lezot.

Etabli bann bon relation avek lezot

Enn jour, Jésus ti raconte enn ti zistoire pou enseigne enn leson ki ena beaucoup valeur lor bann relation entre bann dimoune. Li ti koz lor enn lé-roi ki ti envie reglé compte avek so bann serviteur. Mais, enn ladan, ti ena enn gros dette ek li pa ti ena okenn moyen pou rembourse sa dette-la. Le roi ti donne l’ordre pou ki vann missié-la, so madame ek so bann zenfant pou paye so dette. Sa missié ki ti doit le roi-la ti tombe dan lipié lé-roi ek ti supplié li: “Ena patience avek moi ek mo pou rann toi tou seki mo doit toi.” So maitre ti ena pitié pou li ek ti cancel so dette. Mais kan li ti sorti kot so maitre, li ti trouve enn so compagnon esclave ki ti doit li enn tigit l’argent, ek li ti exigé ki li rembourse li. Mem si so compagnon esclave ti supplié li pou ena pitié, premier esclave-la ti faire jette li dan prison ziska ki li ti rembourse tou seki li ti doit. Kan le roi ti tann sa, li ti en colere. Li ti demann esclave-la: “Eski to pa ti bizin . . . ena pitié pou to compagnon esclave, pareil couma moi aussi, mo finn ena pitié pou toi?” Ek li ti faire mette sa esclave ki pa ti oulé pardonné-la dan prison ziska ki li ti rembourse tou seki li ti doit. Pou tire enn leson, Jésus ti dire: “Coumsa mem mo Papa pou traite zot, si zot pa pardonne zot frere avek tou zot leker.”—Matthieu 18:23-35.

En tant ki bann dimoune imparfait, nou ena enn quantité defaut. Jamais nou pou kapav rembourse Bondié sa gros dette ki nou finn accumulé-la parski nou finn offense Li. Tou seki nou kapav faire, c’est demann Li so pardon. Ek Jéhovah paré pou pardonne tou nou bann faute, si nou pardonne nou bann frere pou bann peché ki zot inn commette kont nou. Sa c’est enn bon leson pou nou, pa vrai? Jésus inn enseigne so bann disciple pou prié: “Pardonne-nou nou bann dette, pareil couma nou pardonne bann ki doit nou.”—Matthieu 6:12.

Resoudre bann problem dan zot racine

Jésus ti expert dan comprend nature bann dimoune. Bann conseil ki li ti donné, montré couma pou resoudre bann problem dan zot racine. Anou guette deux l’exemple.

Christ ti dire: “Zot finn tendé ki ti dire avek bann ki ti vive dan lepok longtemps, ‘Fodé pa to touye dimoune; mais sa kikenn ki touye enn dimoune-la pou bizin rann compte devant la cour. Mais, moi mo dire zot ki tou dimoune ki contigne en colere avek so frere pou bizin reponn devant la cour.” (Matthieu 5:21, 22) Ici, Jésus ti montré ki c’est pa tellement crime-la li-mem ki racine problem-la, mais c’est surtout seki finn pousse dimoune-la pou faire sa crime-la—c’est bann tendance ki sa criminel-la inn cultivé dan so leker. Si bann dimoune pa ti garde zot prochain dan leker ou-soit si zot pa ti laisse la colere grandi dan zot, violence bien calculé d’avance ti pou disparette. Sa quantité di-sang-la pa ti pou versé, si ti applik sa l’enseignement-la.

Remarké couma Jésus al ziska racine enn lot problem ki cause beaucoup chagrin. Li ti dire la foule: “Zot inn tendé ki finn dire, ‘Fodé pa to commette l’adultere.’ Mais moi mo dire zot ki enn dimoune ki contigne guette enn femme enn fason ki li gagne enn desir pou li, finn fini commette l’adultere avek li, dan so leker. Alors, si to lizié droite kapav faire toi tombé, tire li ek jette li loin ar toi.” (Matthieu 5:27-29) Jésus ti montré ki problem-la al pli loin ki sa conduite immoral-la li-mem. La cause problem-la, c’est seki arrivé avant, setadir bann desir immoral. Si enn dimoune pa laisse so l’esprit fixé lor bann mauvais desir ek ki li ‘tire zot’ dan so l’esprit, lerla li pou kapav evite ena enn conduite immoral.

“Remette to l’epée dan so place”

La nuit ki ti trahir ek ti arrete Jésus, enn so bann disciple ti tire so l’epée pou defann Jésus. Jésus ti donne li sa l’ordre-la: “Remette to l’epée dan so place, parski tou bann ki prend l’epée pou mort par l’epée.” (Matthieu 26:52) So lendemain matin, Jésus ti dire Ponce Pilate: “Mo royaume pa faire partie dan sa lé-monde-la. Si mo royaume ti faire partie dan sa lé-monde-la, mo bann serviteur ti pou laguerre pou ki pa livré moi ar bann Juif. Mais, mo royaume pa sorti ici.” (Jean 18:36) Eski sa l’enseignement-la pa kapav servi nou?

Couma eski bann premier chrétien ti considere bann l’enseignement Jésus ki ti montré ki fodé pa servi violence. Livre La position des premiers chrétiens à l’égard de la guerre (en anglais) dire: “Parski [bann l’enseignement Jésus] ti defann servi tou qualité violence ek blesse lezot, sa ti impliké clairement ki pa ti gagne droit participe dan la guerre. . . . Bann premier chrétien ti suive exactement seki Jésus ti dire, ek zot ti comprend ki so bann l’enseignement ti vedir ki zot ti bizin vrai-mem ena la douceur ek pa faire resistance avek violence. Zot ti associé zot religion bien pré avek la paix; zot ti condamne severement la guerre a cause di-sang ki ti versé.” L’histoire lé-monde ti pou enn lot si tou bann ki ti dire zot chrétien, ti suive sa l’enseignement-la!

Bann l’enseignement Jésus kapav utile pou ou

Tou bann l’enseignement Jésus ki nou finn guetté, zot bon, zot simple, ek zot puissant. Si bann dimoune aprann sa bann l’enseignement-la ek mette zot en pratik, sa kapav utile pou zot.a

Bann Témoins de Jéhovah dan ou l’endroit pou content pou montré ou couma pou tire profit ar bann l’enseignement pli sage ki jamais okenn dimoune inn deja donné. Nou invite ou pou prend contact avek zot ou-soit pou ecrire lor enn bann l’adresse ki ena lor page 2 sa periodik-la.

[Note]

[Zimage, page 5]

“Zot Papa ki dan le ciel nourri zot”

[Zimage, page 7]

Bann l’enseignement Jésus kapav ena enn bon l’influence lor ou la-vie