Rod Bondye Avek U Leker ek Lespri

Vre relizyon Kretyin ankuraz pu servi leker ek lespri tulede pu konstrir lafwa ki fer Bondye plezir.

AVREDIR, fondater relizyon Kretyin, Zezi Kris, ti anseyne ki nu bizin kontan Bondye avek ‘tu nu lespri,’ uswa nu kapasite rezone, ek usi avek ‘tu nu leker’ ek ‘tu nu nam.’ (Matye 22:37) Wi, nu bann kapasite mantal bizin zwe enn rol inportan dan nu ladorasyon.

Kan Zezi ti invit bann ki ti pe ekut li pu reflesi lor so lanseynman, suvan li ti dir, “Ki zot panse?” (Matye 17:25; 18:12; 21:28; 22:42) Pareyman, lapot Pyer ti ekrir so bann konpaynon Kretyin pu ‘motiv zot kapasite reflesi ki ti kler.’ (2 Pyer 3:1) Lapot Pol, misyoner premye syek ki finn plis vwayaze, ti konsey bann Kretyin pu servi zot “kapasite pu rezone” ek pu “teste par [zotmem] volonte Bondye [ki] bon, akseptab ek parfe.” (Romin 12:1, 2) Selman kan zot abord zot bann krwayans avek enn latansyon profon kumsa, bann Kretyin kapav konstrir lafwa ki fer Bondye plezir ek ki permet zot reysi fer fas ar bann leprev ki zot gayne dan lavi.—Ebre 11:1, 6.

Pu ed lezot konstrir sa kalite lafwa la, bann predikater levanzil premye syek ‘ti rezonn avek bannla apartir bann Lekritir, ek atraver bann pasaz, zot ti explike ek pruv’ seki zot ti anseyne. (Akt 17:1-3) Sa kalite fason azir ki an akor avek larezon la ti fer bann dimunn sinser reazir enn fason favorab. Par egzanp, enn kantite dimunn dan lavil Bere an Masedwann, “ti resevwar parol [Bondye] avek enn gran lintere, zot ti egzaminn bann Lekritir tulezur pu gete si tu sa bann kitsoz [ki Pol ek so bann konpaynon ti’nn explike] la ti kumsa.” (Akt 17:11) Li vo lapenn nu not de kitsoz dan sa verse la. Premyerman, bann Berein ti inpasyan pu ekut Parol Bondye; dezyeman, zot pa ti ferm lizye ek aksepte tu seki zot ti tande san reflesi si li bon, me zot ti verifye tusala dan bann Lekritir. Avek limilite, misyoner Kretyin Lik ti felisit bann Berein pu sa, ek li ti apel zot “bann ki ena buku bon santiman.” Eski u’si, u ena bann mem bon santiman kan u abord bann kitsoz spirityel?

Lespri ek Leker Korpere

Kuma finn mansyone pli lao, vre ladorasyon inplik leker ek lespri tulede. (Mark 12:30) Reflesi lor legzanp sa pint ki site dan lartik avan, ki ti penn enn lakaz avek bann move kuler. Si li ti byin ekut bann linstriksyon so patron, li ti pu kapav met so leker ek so nam dan so travay ek ena konfyans ki so patron ti pu apruv so travay. Li parey pu nu ladorasyon usi.

Zezi ti dir: “Bann vre adorater pu ador Papa avek lespri ek laverite.” (Zan 4:23) Akoz sa mem, lapot Pol ti ekrir: “Ala akoz sa mem usi, . . . nu pa finn aret priye pu zot ek aret demande ki zot ranpli ar konesans egzak so volonte, ki zot gayn plis sazes ek zot konpran plis bann kitsoz spirityel, pu ki zot mars enn fason ki merite pu Zeova, pu fer [Li] plezir.” (Kolosyin 1:9, 10) Sa kalite “konesans egzak” la permet bann dimunn sinser met zot leker ek zot nam avek ful konfyans dan zot ladorasyon parski zot “ador seki [zot] kone.”—Zan 4:22.

Pu sa bann rezon la, bann Temwin Zeova pa batiz bann tibaba uswa bann nuvo ki pa’nn etidye Labib an profonder. Zezi ti komann so bann disip: “Fer bann disip dan tu bann nasyon, . . . anseyn zot pu pratik tu bann kitsoz ki mo finn komann zot.” (Matye 28:19, 20) Zis apre ki zot finn gayn enn konesans egzak lor volonte Bondye ki bann etidyan Labib sinser kapav pran enn desizyon baze lor konesans egzak konsernan ladorasyon. Eski u pe fer zefor pu gayn sa konesans egzak la?

Konpran Lapriyer Notre Père

Pu truv diferans ant gayn enn konesans egzak Labib ek ena enn konesans limite lor seki li dir, anu egzaminn seki normalman nu apel Notre Père, uswa Lapriyer Senyer, ki nu truve dan Matye 6:9-13.

Plizir milyon dimunn resit lapriyer model Zezi regilyerman dan legliz. Me komye finn gayn lanseynman lor so sinifikasyon, sirtu lor premye parti lapriyer la, kot li koz lor non Bondye ek so Rwayom? Sa bann size la telman inportan ki Zezi ti met zot an premye dan sa lapriyer la.

Lapriyer la kumans kumsa: “Nu Papa dan lesyel, ki to non sanktifye,” ki vedir vinn sin. Note ki Zezi ti dir priye pu ki non Bondye sanktifye. Pu buku dimunn sa sulev omwin de kestyon. Premyerman, ki non Bondye? Ek dezyeman, kifer bizin sanktifye li?

Nu kapav truv repons premye kestyon la dan plis ki 7,000 plas dan Labib dan so bann lang orizinal. Enn plas la se dan Psom 83:18: “Pu ki bann dimunn kone ki twa, ki apel Zeova, to tusel Pli Ot lor later antye.” Konsernan non Bondye, Zeova, Egzod 3:15 dir: “Sa mem mo non pu tuletan, ek sa mem mo memwar pu zenerasyon apre zenerasyon.”a Me kifer eski bizin sanktifye non Bondye, non pli pir ek pli sin ki kapav ena? Parski depi kumansman listwar imin finn dezonor sa non la ek finn sali so repitasyon.

An Edenn, Bondye ti dir Adan ek Ev ki zot ti pu mor si zot ti manz frwi ki ti defann zot manze. (Zenez 2:17) Satan ti kontredir Bondye uvertman, kan li ti dir Ev: “Non, zot pa pu mor.” Alor, Satan ti akiz Bondye ki Li enn manter. Anplis, li pa finn aret la mem. Li finn sali plis non Bondye, kan li ti dir Ev ki Bondye ti pe priv li, dan enn fason inzis, konesans ki ena buku valer. “Parski Bondye kone ki zur zot manz sa frwi [pye konesans bon ek move] la zot lizye pu uver ek zot pu vinn parey kuma Bondye, zot pu konn seki bon ek seki move.” Sa ti enn mansonz!—Zenez 3:3, 4.

Kan zot finn manz frwi ki ti defann zot manze, Adan ek Ev finn pran pozisyon dan kote Satan. Depi sa, laplipar dimunn, volonterman uswa involonterman, finn ogmant plis sa dezoner ki ti’nn zete lor non Bondye dan kumansman la , kan zot rezet bann prinsip drwat Bondye. (1 Zan 5:19) Dimunn dezonor Bondye ankor kan zot rann Li responsab zot bann sufrans—mem si kitfwa zot gayn sufrans akoz bann move semin ki zotmem zot swiv. Proverb 19:3 dir: “Kan dimunn met limem betman dan enn move sityasyon, li turn so koler kont Bondye.” (Bible en français courant) Eski u kapav konpran kifer Zezi, ki ti vremem kontan so Papa, ti priye ki So non sanktifye?

“Ki To Rwayom Vini”

Apre ki li ti’nn priye ki non Bondye sanktifye, Zezi ti dir: “Ki to rwayom vini. Ki to volonte fer lor later parey kuma dan lesyel.” (Matye 6:10) Konsernan sa pasaz la, nu kapav demande: ‘Ki ete Rwayom Bondye? Ki rapor lefet ki li pu vini, ena avek lefet ki volonte Bondye fer lor later?’

Dan Labib, mo “rwayom” vedir prinsipalman enn “dominasyon par enn lerwa.” Donk, li lozik ki Rwayom Bondye ti pu vedir enn dominasyon, uswa enn guvernman, par Bondye, avek enn lerwa ki Li’nn swazir. Sa Lerwa la se Zezi Kris ki finn resisite—li ki “Lerwa bann lerwa ek Senyer bann senyer.” (Revelasyon 19:16; Danyel 7:13, 14) Konsernan Rwayom Mesi Bondye ki dan lamin Zezi Kris, profet Danyel ti ekrir: “Dan bann zur sa bann lerwa la [bann guvernman imin ki pe dirize asterla], Bondye lesyel pu etabli enn rwayom ki zame pa pu ranverse. Ek pa pu permet okenn lot pep gayn sa rwayom la. Li pu kraz tu sa bann lezot rwayom la ek li pu fini zot net, ek limem pu res la pu enn long peryod letan,” setadir, pu leternite.—Danyel 2:44.

Wi, Rwayom Bondye pu ena ful kontrol lor later, kan li pu debaras li avek tu bann move dimunn ek kan li pu dirize “pu enn long peryod letan.” Kumsa, Rwayom Bondye li mwayin ki Zeova pu servi pu sanktifye so non, kot li pu anlev tu dezoner ranpli ar mansonz ki Satan ek bann move dimunn finn zete lor so non.—Ezekyel 36:23.

Parey kuma tu guvernman, Rwayom Bondye ena bann dimunn lor ki li dirize. Kisannla zot ete? Labib reponn: “Bann ki sumet pu gayn later, ek vremem zot pu gayn buku plezir dan labondans lape.” (Psom 37:11) Pareyman, Zezi ti dir: “Ere bann dimunn dus, parski zot pu erit later.” Byinsir, sa bann dimunn la ena konesans egzak lor Bondye, ek sa li enn kondisyon pu gayn lavi.—Matye 5:5; Zan 17:3.

Eski u kapav mazinn later antye ranpli avek bann dimunn ki sumet, dus ek ki vremem kontan Bondye ek kontan zot prosin? (1 Zan 4:7, 8) Pu sa mem ki Zezi ti priye kan li ti dir: “Ki to Rwayom vini. Ki to volonte fer lor later parey kuma dan lesyel.” Eski u konpran kifer Zezi ti anseyn so bann disip pu priye sa fason la? Pli inportan ankor, eski u truve kuma lakonplisman sa lapriyer la kapav inflyans u personelman?

Zordi Plizir Milyon Dimunn Pe Rezonn lor Labib

Zezi ti predir enn kanpayn ledikasyon spirityel lor later antye ki ti pu anonse ki Rwayom Bondye pe vini. Li ti dir: “Sa bonn nuvel lor rwayom la pu prese partu kot dimunn reste lor later kuma enn temwaynaz pu bann nasyon; ek lerla lafin [sa lemond la, uswa sa sistem la] pu vini.”—Matye 24:14.

Ena plis ki sis milyon Temwin Zeova partu dan lemond ki pe partaz sa bonn nuvel la avek zot prosin. Zot invit u pu aprann plis lor Bondye ek lor so Rwayom kan u servi u kapasite rezone pu “egzaminn Labib avek latansyon.” Si u fer sa, u lafwa pu fortifye ek sa pu fer u kontan kan u pans lesperans pu viv dan enn paradi lor later, ki pu “ranpli avek konesans Zeova kuma delo ki kuver lamer.”—Izai 11:6-9.

[Not anba paz]

[Lankadre/Zimaz lor paz 8]

IMIT GRAN ANSEYNAN

Suvan Zezi ti anseyne kan li ti atir latansyon lor bann size Labib presi. Par egzanp, apre so rezireksyon li ti explik so rol dan proze Bondye ar so de disip ki ti gayn difikilte pu konpran so lamor. Lik 24:27 dir: “Li finn kumans par Moiz ek bann lezot Profet pu li interpret bann kitsoz ki truv dan tu bann Lekritir konsernan li.”

Note ki Zezi ti swazir enn size presi—“limem,” Mesi—ek ki dan so konversasyon, li ti sit bann verse “ki truv dan tu bann Lekritir.” Vremem, Zezi ti met bann pasaz Labib interesan ansam parey kuma enn puzzle, ki ti permet so bann disip pu truv enn model kler laverite spirityel. (2 Timote 1:13) Rezilta: Sa pa ti zis ekler zot, me ti usi tus zot buku. Resi la dir nu: “Zot ti dir sakenn ant zot: ‘Eski nu leker pa ti pe brile andan nu kan li ti pe koz ar nu lor semin, letan li ti pe revel nu bann Lekritir afon?’”—Lik 24:32.

Bann Temwin Zeova fer zefor pu imit bann metod Zezi dan zot minister. Zot ena brosir Ki Bondye Pe Demann Nu? ek liv Konesans Ki Amenn ver Lavi pu Tuletan kuma bann led prinsipal pu fer letid. Zot koz lor enn kantite size interesan ki ena dan Labib, parey kuma: “Kisannla Bondye?,” “Kifer Eski Bondye Permet Sufrans?,” “Kuma Eski U Kapav Truv Vre Relizyon?,” “Nu Pe Viv Dan Bann Dernye Zur!,” ek “Konstrir enn Fami Ki Donn Bondye Loner.” Dan sak leson ena enn kantite pasaz Labib.

Nu invit u pu kontakte bann Temwin Zeova dan u landrwa, uswa ekrir lor ladres ki lor paz 2 sa magazinn la pu u gayn enn letid Labib gratis lor sa bann size la ek lor lezot size ankor.

[Zimaz]

Pu tus leker u etidyan, atir so latansyon lor bann size presi dan Labib

[Zimaz lor paz 7]

Eski u sezi sinifikasyon lapriyer model Zezi?

“Nu Papa dan lesyel, ki to non sanktifye . . .”

“Ki to rwayom [ki’nn konfye ar Mesi] vini . . .”

“Ki to volonte fer lor later parey kuma dan lesyel”