LESON 37
Seki Labib Dir lor Travay ek Kas
Eski ou finn deza gagn traka akoz travay ouswa akoz kas? Li kapav difisil pou gagn seki nou bizin pou viv ek anmemtan ador Zeova avek tou nou leker. Me Labib donn nou bann bon konsey ki kapav ed nou.
1. Ki Labib dir lor travay?
Bondie anvi ki nou kontan nou travay. Labib dir ki “pena nanye ki pli bon pou enn zom . . . ki li gagn lazwa ar travay dir ki li’nn fer.” (Ekleziast 2:24) Zeova travay dir. Kan nou imit Li ek travay dir nou osi, nou fer Li kontan ek nou pou gagn lazwa ar seki nou’nn fer.
Travay li inportan. Me fode pa ki nou les nou travay vinn pli inportan ki nou ladorasion pou Zeova. (Zan 6:27) Li promet ki si nou fer Li pas an premie, Li pou donn nou seki nou bizin pou viv.
2. Kouma nou bizin konsider kas?
Labib rekonet ki “larzan li enn proteksion,” me li osi averti nou ki se pa gras-a larzan ki nou pou ere. (Ekleziast 7:12) Labib pa ankouraz nou pou kontan kas me pou ‘kontant nou avek seki nou ena.’ (Lir Ebre 13:5.) Kan nou kontant nou ar seki nou ena, nou pa pou agase ouswa ankoler parski nou panse ki nou pena ase kitsoz. Anplis, nou pou evit fer bann det initil. (Proverb 22:7) Ek nou pou evit osi danze ki ena ar bann zwe kas ek investi dan bann kitsoz ki swadizan fer nou vinn ris pli vit.
3. Kouma nou kapav servi nou kas ek montre nou zenere?
Zeova, Li enn Bondie ki zenere, ek nou imit Li kan nou “fer bann don ek partaze.” (1 Timote 6:18) Nou kapav servi nou larzan dan enn fason zenere kan nou soutenir lasanble ek kan nou ed bann ki bizin led, sirtou nou bann frer ek ser. Seki pli inportan pou Zeova, se pa ki kantite nou pe done, me avek ki lintansion nou pe done. Kan nou donn avek tou nou leker nou pou ere ek nou pou fer Zeova plezir.—Lir Zistwar Bann Apot 20:35.
ANOU GET INPE PLIS
Gete ki bann bienfe nou gagne kan nou konsider travay dan fason ki bizin ek kan nou kontant nou ar seki nou ena.
4. Donn Zeova loner ar fason ki ou travay
Nou lamitie avek Zeova bizin ena enn linflians lor fason ki nou konsider nou travay. Zwe VIDEO-la, ek apre sa, get sa bann kestion-la ansam:
Dan sa video-la, ki kitsoz finn tous ou dan latitid ek konportman ki Jason ti ena dan so travay?
Ki li ti fer pou gard so travay dan plas ki bizin?
Lir Kolosien 3:23, 24, ek apre sa, get sa kestion-la ansam:
Kifer fason ki nou konsider travay li inportan?
Se vre ki travay li inportan. Me fode zame ki nou les nou travay vinn pli inportan ki nou ladorasion pou Zeova
5. Nou gagn bann bienfe kan nou kontant nou ar seki nou ena
Boukou dimounn pe esey fer tou seki zot kapav pou gagn pli boukou kas. Me Labib ankouraz nou pou fer enn lot kitsoz. Lir 1 Timote 6:6-8, ek apre sa, get sa kestion-la ansam:
Ki Labib ankouraz nou pou fer?
Mem si nou ena enn tigit kas, nou kapav ere. Zwe VIDEO-la, ek apre sa, get sa kestion-la ansam:
Mem si sa bann fami-la ti ena enn tigit kas, ki kitsoz ti rann zot ere?
Ki nou pou fer si nou ena boukou kas ek ki nou anvi gagn ankor plis? Zezi ti servi enn lexanp pou montre ki danze ena kan nou ena sa latitid-la. Lir Lik 12:15-21, ek apre sa, get sa kestion-la ansam:
Ki ou finn aprann dan lexanp ki Zezi inn servi?—Get verse 15.
Lir Proverb 10:22 ek 1 Timote 6:10. Apre sa, get sa bann kestion-la ansam:
Dapre ou, ki kitsoz ki pli inportan? Nou lamitie avek Zeova ouswa ena boukou kas? Kifer?
Ki problem nou kapav gagne kan nou galoup deryer larzan?
6. Zeova pou donn nou seki nou bizin
Kan nou gagn bann problem akoz nou travay ouswa parski nou pena ase kas, sa kapav ed nou pou kone si nou vremem ena konfians an Zeova ouswa non. Zwe VIDEO-la pou kone seki nou kapav fer kan nou gagn sa bann problem-la, ek apre sa, get sa bann kestion-la ansam:
Dan sa video-la, ki bann difikilte sa frer-la ti gagne?
Ki li ti fer pou sirmont sa bann difikilte-la?
Lir Matie 6:25-34, ek apre sa, get sa kestion-la ansam:
Ki Zeova promet pou fer pou bann ki met Li an premie dan zot lavi?
SERTIN DIMOUNN DIR: “Mo bizin travay dir pou donn mo fami seki zot bizin. Mo pa kapav asiste tou bann renion sak semenn.”
Ki verse konvink ou ki met ou ladorasion pou Zeova an premie, se meyer desizion ki ou kapav pran?
SEKI NOU’NN APRANN
Li inportan pou travay ek gagn kas, me fode zame ki sa bann kitsoz-la anpes nou pou res konsantre lor nou servis pou Zeova.
Eski Ou Rapel?
Ki kitsoz kapav ed ou pou ena enn bon fason panse konsernan ou travay?
Ki bienfe ou kapav gagne kan ou kontant ou ar seki ou ena?
Kouma ou kapav montre ki ou ena konfians dan promes ki Zeova pou pran swin so bann serviter?
DEKOUVER
Dapre Labib, eski larzan li enn move kitsoz?
Aprann kouma nou kapav servi nou kas dan enn fason ki fer Bondie plezir.
Eski bann zwe kas zot zis enn divertisman?
« D’après la Bible : Les jeux d’argent » (Leve!, Mars 2015, an Franse)
Gete seki’nn motiv enn misie ki ti enn zougader ek enn voler pou sanz so lavi.
« Les courses de chevaux étaient ma passion » (Latour Degard, 1e Novam 2011, an Franse)