Bann Konversasyon Spirityel, Zot Edifyan

“Pa les okenn parol puri sorti dan zot labus, plito tu parol ki bon pu edifye lezot, kan li neseser, pu ki li transmet seki profitab ar bann ki pe tande.”—EFEZYIN 4:29.

1, 2. (a) Kifer nu kapav dir ki don laparol ki bann imin ena, se enn don ki ena buku valer? (b) Kuma bann serviter Zeova anvi servi sa don-la?

‘BANN imin finn gayn enn don extraordiner: zot ena kapasite pu koze. Se enn kado, wi enn mirak ki Bondye inn fer. Dayer, Li tusel konn sekre ki ena deryer sa.’ Ala enn tipe seki Ludwig Koehler, enn exper dan bann mo, finn ekrir. Kitfwa nu, nu konsider sa gran kado-la kuma enn kitsoz normal. (Zak 1:17) Me, si zame nu ena enn pros ki gayn difikilte pu koz byin parski li finn atake, se lerla ki nu realize ki gran trezor sa dimunn-la finn perdi. Se seki Joan finn resanti depi ki so mari finn atake resaman. Li explike: “Nu ti ena enn bon kominikasyon ant nu, ek sa ti byin rapros nu. Asterla, sa bann konversasyon-la mank mwa buku.”

² Bann konversasyon kapav ranforsi enn lamitye, anlev bann malantandi, relev enn dimunn ki’nn abat, fortifye lafwa ek donn nu lavi plis sans. Me selman, sa bann kitsoz-la pa arive dan enn fason otomatik! Get seki Lerwa Salomon ti dir avek sazes: “Ena dimunn, kan li koze san reflesi, so bann parol kumadir kut lepe. Me, lalang bann dimunn saz li gerizon.” (Proverb 12:18) Antan ki serviter Zeova, nu pa ti pu kontan ki nu parol bles lezot, uswa fer zot ditor. Okontrer, nu anvi ki nu bann konversasyon geri zot, uswa edifye zot. Nu anvi usi servi nu bann parol pu donn Zeova luanz, ki li dan predikasyon uswa dan nu konversasyon avek lezot. Dan enn psom, ekrivin-la ti sante: “Nu pu donn Bondye laglwar tutlong lazurne ek nu pu glorifye so non pu tuletan.”—Psom 44:8.

3, 4. (a) Ki problem nu tu ena an rapor avek seki nu dir? (b) Kifer li inportan ki nu vey byin seki nu dir?

³ Disip Zak ti met nu an gard kan li ti dir: “Lalang, okenn imin pa kapav dont li.” Zak rapel nu enn kitsoz, li dir: “Nu tu, suvan nu fer erer. Si enn kikenn pa fer erer par parol, li enn dimunn parfe ki kapav kontrol usi tu so lekor.” (Zak 3:2, 8) Personn pa parfe. Akoz sa, malgre nu bann bon lintansyon, defwa nu bann parol pa edifye lezot, uswa zot pa donn luanz nu Kreater. Donk, nu bizin vey byin seki nu dir. Anplis, Zezi ti dir: “Pu sak parol initil ki dimunn dir, zot pu bizin rann kont dan Zur Zizman; parski se par to bann parol ki [Bondye] pu deklar twa zis, ek se par to bann parol usi ki [Bondye] pu kondann twa.” (Matye 12:36, 37) Wi, pu tu parol ki nu dir, nu pu bizin rann kont devan Bondye.

⁴ Nu bizin evit dir bann kitsoz ki kapav fer lezot ditor. Enn de meyer fason pu evit sa, se kan nu pran labitid pu ena bann konversasyon spirityel. Sa lartik-la pu montre kuma nu kapav fer sa. Nu pu truve lor ki bann size nu kapav koze, ek ki profi nu tire kan nu ena bann konversasyon ki edifyan.

Pran Kont Seki Nu Ena dan Nu Leker

5. Ki rol inportan nu leker zwe pu nu kapav ena bann konversasyon edifyan?

⁵ Pu pran labitid dir bann kitsoz ki edifyan, dabor nu bizin rekonet ki nu parol reflet seki ena dan nu leker. Zezi ti dir: “Seki enn zom ena an abondans dan so leker, se sa ki so labus koze.” Sa vedir ki an zeneral, nu kontan koz lor bann kitsoz ki inportan pu nu. Donk, li bon ki nu demann numem: ‘Ki mo bann konversasyon montre an rapor avek seki ena dan mo leker? Kan mo avek mo fami uswa avek lezot frer ek ser, ki mo bann size konversasyon? Eski se bann kitsoz spirityel? Ubyin, eski se tuletan spor, labiyman, fim, manze, bann dernye kitsoz ki mo’nn aste, uswa lezot kitsoz banal?’ Petet, san ki nu realize, nu lavi ek nu panse pe turn otur bann kitsoz ki pa tro inportan. Alor, si nu sanz nu bann priorite, sa pu amelyor nu konversasyon ek nu lavi usi.—Filipyin 1:10.

6. Kuma meditasyon ed nu pu ena bann bon konversasyon?

⁶ Enn lot fason pu amelyor nu konversasyon, se pran letan pu medit lor seki nu aprann, ek gete kuma nu kapav aplik sa dan nu lavi. Si nu fer zefor par numem pu reflesi lor bann kitsoz spirityel, nu pu truve ki bann konversasyon spirityel pu vini natirelman. Se seki Lerwa David ti rekonet kan li ti sante: “Les bann parol ki sorti dan mo labus ek meditasyon mo leker, fer twa plezir, A Zeova.” (Psom 19:14) Azaf, dan so kote, ti dir dan enn psom: “Mo pu medit lor tu to bann aksyon, ek mo pu pran kont manyer ki to’nn azir [dan lepase].” (Psom 77:12) Si nu les bann verite ki ena dan Parol Bondye, ranpli nu leker ek nu lespri, bann konversasyon edifyan pu vini natirelman. Profet Zeremi pa ti kapav anpes li koz lor seki Zeova ti anseyn li. (Zeremi 20:9) Nu’si nu kapav ena mem santiman ki Zeremi, si regilyerman, nu reflesi an profonder lor bann kitsoz spirityel.—1 Timote 4:15.

7, 8. Lor ki bann size edifyan nu kapav koze?

⁷ Si nu swiv enn bon program spirityel, nu pu ena enn kantite size edifyan lor ki nu kapav koze. (Filipyin 3:16) Bann lasanble ek reynion ki nu asiste, bann piblikasyon ki nu fek resevwar, legzamin tex dizur, tusala donn nu bann trezor spirityel ki nu kapav partaz avek lezot. (Matye 13:52) Pa fini! Si nu ena bann lexperyans ki nu’nn fer dan nu minister, sa usi kapav byin motiv lezot lor plan spirityel.

⁸ Lerwa Salomon ti byin atire par gran varyete zarb, zanimo, zwazo ek pwason ki li ti admire an Izrael. (1 Lerwa 4:33) Li ti pran plezir pu koz lor bann kitsoz ki Bondye inn kre. Nu’si nu kapav fer parey. Bann serviter Bondye kontan koz lor enn varyete size. Me, bann size spirityel tuletan relev valer konversasyon enn dimunn ki interese ar bann kitsoz spirityel.—1 Korintyin 2:13.

“Kontiyn Pran Byin Kont Sa Bann Kitsoz-La”

9. Ki konsey Pol ti donn bann Filipyin?

⁹ Lor ninport ki size nu koze, nu bann konversasyon pu edifyan, si nu swiv konsey ki Pol ti donn kongregasyon Filip. Li ti ekrir: “Tu kitsoz ki vre, tu kitsoz ki serye, tu kitsoz ki drwat, tu kitsoz ki prop, tu kitsoz ki merit lamur, tu kitsoz ki dimunn koz an byin, tu kitsoz ki moralman bon ek ki merit luanz, kontiyn pran byin kont sa bann kitsoz-la.” (Filipyin 4:8) Sa bann kitsoz ki Pol inn mansyone-la, zot telman inportan, ki li dir “kontiyn pran byin kont.” Wi, nu bizin ranpli nu leker ek nu lespri avek sa bann kitsoz-la. Donk, anu gete kuma kan nu pran kont sa wit kitsoz ki Pol inn site-la, sa kapav amelyor nu bann konversasyon.

10. Kuma nu kapav inklir bann kitsoz ki vre dan nu konversasyon?

¹⁰ Enn kitsoz vre, se pa zis enn linformasyon ki egzak ek ki pa fos. Non, li vedir plis ki sa. Enn kitsoz ki vre se usi enn kitsoz ki onet ek ki nu kapav fer konfyans, kuma par egzanp laverite ki ena dan Parol Bondye. Alor, kan nu partaz bann verite ki ena dan Labib avek lezot, kan nu koz lor bann diskur ki’nn relev nu uswa lor enn konsey Labib ki’nn ed nu, ebyin nu montre ki nu pe pran byin kont bann kitsoz ki vre. An mem tan, nu rezet ‘bann fos “konesans” ’ ki paret swadizan vre. (1 Timote 6:20) Ek nu evit repet bann palab, uswa bann fe predikasyon ki nu’nn tande kumsa, me ki nu pa kapav verifye si zot vre.

11. Ki bann kitsoz ki serye nu kapav koze?

¹¹ Bann kitsoz ki serye, se bann kitsoz ki ena enn sertenn linportans, pa bann kitsoz banal. Sa konsern, par egzanp, bann diferan laspe nu minister Kretyin, lepok difisil kot nu pe viv, ek nesesite pu gard enn bon kondwit. Se bann size ki serye. Ek kan nu koz lor la, sa ranforsi nu determinasyon pu res lor nu gard lor plan spirityel, pu gard nu latasman fidel avek Bondye, ek pu kontiyn pres labonn nuvel. Wi, dan nu minister nu gayn buku lexperyans interesan, ek tulezur nu truv bann evennman ki rapel nu ki nu pe viv dan dernye zur. Donk, ala bann kitsoz ki kapav fer nu gayn bann konversasyon byin ankurazan.—Akt 14:27; 2 Timote 3:1-5.

12. Ki nu bizin evite dan nu konversasyon, si nu anvi pran kont konsey Pol lor bann kitsoz ki drwat ek prop?

¹² Mo drwat vedir seki drwat devan lizye Bondye—setadir respekte So kod kondwit. Prop isi konsern nu bann panse ek nu kondwit. Dan nu bann konversasyon, fode pa nu fer palab lor lezot. Fode pa usi ki nu rakont bann joke ki grosye ek ki ena dub sans. (Efezyin 5:3; Kolosyin 3:8) Dan travay uswa dan lekol, kan enn konversasyon kumans gate, avek sazes bann Kretyin leve, zot ale.

13. Donn legzanp bann konversasyon ki turn otur bann kitsoz ki merit lamur ek bann kitsoz ki dimunn koz an byin.

¹³ Pol konsey usi pu pran byin kont bann kitsoz ki merit lamur. Isi, Pol pe pans bann kitsoz ki fer plezir ek ki agreab. Wi, Pol konsey nu pu dir bann kitsoz ki ankuraz lamur, pa bann kitsoz ki provok laenn, ni ki fer enn kikenn vinn amer uswa gayn dezakor avek so prosin. Pol mansyonn usi bann kitsoz ki dimunn koz an byin. Ki sa bann kitsoz-la? Se bann ranseynman ki ena valer. Sa kapav bann zoli lexperyans nu bann frer ek ser fidel ki Latur Degard ek Réveillez-vous ! site regilyerman. Kan nu’nn lir bann lartik ki fortifye nu lafwa, eski nu pa kapav partaz sa ar lezot? Enn lot kitsoz ki ankuraz nu ankor, se kan nu tann seki lezot pe akonpli lor plan spirityel! Wi, sa bann kalite konversasyon-la ranforsi lamur ek linite dan kongregasyon.

14. (a) Kuma nu kapav met an pratik seki moralman bon? (b) Kuma nu kapav inklir bann kitsoz ki merit luanz dan nu konversasyon?

¹⁴ Pol koz usi lor bann kitsoz ki moralman bon. Nu bizin vey byin ki seki nu dir, li an akor avek bann prinsip Labib. Fode pa ki nu bann parol devye enn tipe ar seki drwat, prop ek moralman bon. Apre sa, Pol dir ki nu bizin pran byin kont bann kitsoz ki merit luanz, uswa ki merit “felisitasyon.” Si u’nn ekut enn bon diskur uswa u’nn remark enn bon legzanp fidelite dan kongregasyon, al ver sa dimunn-la. Koz sa ar li, ek koz sa ar lezot usi. Lapot Pol ti abitye felisit so bann konpaynon Kretyin pu zot bann bon kalite. (Romin 16:12; Filipyin 2:19-22; Filemon 4-7) Ek byinsir, bann kitsoz ki nu Kreater inn fer, sa usi merit luanz. Wi, dan lakreasyon, ena enn kantite kitsoz edifyan lor ki nu kapav koze.—Proverb 6:6-8; 20:12; 26:2.

Gayn Bann Konversasyon Ki Edifyan

15. Ki komannman Biblik obliz bann paran pu gayn bann konversasyon ki profitab, avek zot zanfan?

¹⁵ Deteronom 6:6, 7 dir: “Sa bann parol ki mo pe dir twa zordi-la, bizin lor to leker. To bizin fer sa rant dan latet to garson ek koz sa, kan to asiz dan to lakaz, kan to mars lor semin, kan to dormi ek kan to leve.” Isi, Zeova pe demann bann paran pu gayn bann konversasyon spirityel ki profitab, avek zot zanfan.

16, 17. Ki bann paran Kretyin kapav aprann ar legzanp Zeova ek Abraam?

¹⁶ Kan Zezi ti dan lesyel avek so Papa, sirman li ti ena bann long konversasyon avek Zeova an rapor avek so misyon lor later. Avredir, Zezi ti dir so bann disip: “Mo Papa ki’nn avoy mwa, Limem ki’nn donn mwa enn komannman lor seki mo bizin dir.” (Zan 12:49; Deteronom 18:18) Abraam usi finn bizin sirman pas buku lertan pu rakont Izaak, so garson, kuma Zeova finn beni zot ek zot bann anset. Nu pena dut ki sa bann kalite konversasyon-la finn byin ed Zezi ek Izaak pu sumet zot avek limilite ar volonte Bondye.—Zenez 22:7-9; Matye 26:39.

¹⁷ Nu zanfan usi bizin bann konversasyon ki edifyan. Malgre ki bann paran ena enn lavi byin sarze, zot bizin truv letan pu koz avek zot zanfan. Par egzanp, eski u kapav pran enn repa an fami omwin enn fwa par zur? U pu truve ki pandan ek apre repa, u pu kapav gayn bann diskisyon edifyan ki pu protez lasante spirityel u fami.

18. Rakont enn lexperyans ki montre bon rezilta ki gayne kan ena enn bon kominikasyon ant paran ek zanfan.

¹⁸ Alejandro, li enn pyonye ki ena inpe plis ki 20 an. Li ankor rapel bann dut ki ti pe fatig li, kan li ti ena 14 an. Li rakonte: “Akoz linflyans bann profeser ek bann kamarad lekol, mo ti kumans dut legzistans Bondye ek dute si Labib vre. Me, mo bann paran finn pas buku lertan avek mwa; avek pasyans, zot inn sey rezonn avek mwa. Sa bann konversasyon-la pa finn zis anlev mo bann dut dan sa peryod difisil-la, me finn usi ed mwa pu pran bann bon desizyon dan mo lavi.” Ek zordi? Alejandro kontiyn rakonte: “Mo ankor viv avek mo bann paran. Avek nu program byin sarze, mo papa ek mwa pa tro gayn letan pu ena konversasyon ansam. Alor, seki nu fer, nu pran enn repa ansam enn fwa par semenn, dan so travay. Mo byin apresye sa bann konversasyon ki nu gayne-la.”

19. Kifer nu tu, nu byin bizin bann konversasyon spirityel?

¹⁹ Nu byin apresye usi konversasyon spirityel ki nu gayne avek nu bann frer ek ser dan kongregasyon. Sa fer nu buku dibyin. Ki bann lokazyon nu gayne pu fer sa? Dan reynion, dan predikasyon, dan bann moman detant, ek kan nu pe vwayaze. Pol ti pe atann avek inpasyans kan li ti pu kapav koz avek bann Kretyin dan Rom. Li ti ekrir zot sa bann mo-la: “Mo byin anvi truv zot, . . . pu ki ena enn esanz lankurazman parmi zot, kot [sakenn lerla li ankuraze] par lafwa so kamarad, zot lafwa ek mo lafwa usi.” (Romin 1:11, 12) Enn ansyin ki apel Johannes fer sa remark-la: “Bann konversasyon spirityel avek lezot frer ek ser, sa se enn zafer ki nu byin bizin. Sa tus nu leker ek diminye nu bann fardo. Suvan, mo demann bann frer ek ser aze pu rakont mwa zot lavi ek seki finn permet zot res fidel. Par sa fason fer-la, mo’nn gayn lokazyon koz ar buku pandan plizir lane. Ek sakenn finn donn mwa enn tipe zot sazes, ki’nn anrisi mo lavi.”

20. Ki nu kapav fer si nu pe koz avek enn dimunn ki timid?

²⁰ Ki u pu fer, si kan u kumans koz lor enn kitsoz spirityel, u truve ki dimunn-la pa montre okenn lintere? Fode pa ki u abandone. Kitfwa, plitar u pu gayn enn lot pli bon lokazyon. Salomon ti dir: “Enn parol ki [nu] dir dan bon moman, li kuma bann pom an or lor enn plato an arzan.” (Proverb 25:11) U bizin usi konpran bann dimunn ki timid. “Konsey dan leker enn zom parey kumadir delo ki byin fon. Me enn zom ki ena bon zizman, pu kapav tir sa deor.”a (Proverb 20:5) Avredir, zame pa les latitid lezot dimunn anpes u pu koz lor bann kitsoz ki’nn tus u leker.

Bann Konversasyon Spirityel Donn Buku Byinfe

21, 22. Ki byinfe nu gayne kan nu ena bann konversasyon spirityel?

²¹ Ala konsey ki Pol ti done: “Pa les okenn parol puri sorti dan zot labus, plito tu parol ki bon pu edifye lezot, kan li neseser, pu ki li transmet seki profitab ar bann ki pe tande.” (Efezyin 4:29; Romin 10:10) Pu diriz nu konversasyon lor bann size edifyan, sa demann zefor. Me nu pu tir buku profi. Bann konversasyon spirityel permet nu partaz nu lafwa avek lezot ek sa konsolid nu fraternite.

²² Donk, anu servi don laparol ki nu ena, pu edifye lezot ek pu donn Bondye luanz. Nu pu gayn satisfaksyon dan sa bann kalite konversasyon-la ek sa pu ankuraz lezot. Seki pli inportan ankor, sa pu fer leker Zeova byin kontan parski Li pran kont nu bann konversasyon. Ek Li kontan kan nu servi nu lalang kuma bizin. (Psom 139:4; Proverb 27:11) Kan nu ena bann konversasyon spirityel, nu sir ki Zeova pa pu bliye nu. Konsernan bann dimunn ki pe servi Zeova dan nu lepok, Labib dir: “Sa lepok-la, bann ki ti ena lakrint pu Zeova finn koz sakenn ant zot, sakenn ar so kamarad, ek Zeova ti pe kontiyn pran kont ek kontiyn ekute. Ek finn kumans ekrir enn liv suvenir devan Li pu bann ki ena lakrint pu Zeova ek pu bann ki mazinn so non.” (Malaki 3:16; 4:5) Wi, li byin inportan ki nu bann konversasyon edifye lezot lor plan spirityel!

[Notes]

Ki U Pu Reponn?

• Ki nu bann konversasyon revele lor nu?

• Lor ki bann kitsoz edifyan nu kapav koze?

• Ki rol inportan konversasyon zwe dan lafami ek dan kongregasyon Kretyin?

• Ki byinfe nu gayne kan nu ena bann konversasyon edifyan?

[Zimage page 12]

Bann konversasyon spirityel santre lor . . .

“tu kitsoz ki vre”

“tu kitsoz ki serye”

“tu kitsoz ki merit luanz”

“tu kitsoz ki dimunn koz an byin”

[Credit line 12]

Foto lor kaset video, Stalin: Foto U.S. Army; Kuvertir liv Créateur, Nébuleuse de l’Aigle: J. Hester and P. Scowen (AZ State Univ.), NASA

[Zimage page 13]

Kan nu pran repa ansam, se bann bon moman pu gayn bann konversasyon spirityel