Eski U Demande: “Kot Zeova Ete?”

“Zot inn elwayn zot ar mwa . . . Ek zot pa’nn dir: ‘Kot Zeova ete?’”—ZEREMI 2:5, 6.

1. Pu ki rezon bann dimunn demande: “Kot Bondye ete”?

“KOT Bondye ete?” Buku dimunn inn poz sa kestyon la. Sertin parmi inn zis sey konpran kot Bondye reste? Ena lezot dimunn ki finn demann sa kestyon la apre enn gran katastrof, uswa kan zot inn gayn bann gran problem. Dan sa bann sityasyon la, zot pa ti kapav konpran kifer Bondye pa’nn fer nanyin. Ena lezot ki zame pa poz sa kestyon la parski zot pa mem krwar ki Bondye egziste.—Psom 10:4.

2. Kisannla ki reysi dan zot zefor pu rod Bondye?

² Byinsir, buku dimunn rekonet enn kantite prev ki montre ki ena enn Bondye. (Psom 19:1; 104:24) Sertin parmi sa bann dimunn la, kontant zot zis avek enn sertenn form relizyon. Me ena bann milyon lezot dimunn dan lemond, ki ena enn lamur profon pu laverite ek sa inn pus zot pu rod vre Bondye. Sa bann dimunn la pa’nn fer zefor pu nanyin, parski Li “pa lwin ar sakenn parmi nu.”—Akt 17:26-28.

3. (a) Ki kote Bondye reste? (b) Ki sa kestyon: “Kot Zeova ete?” la, inplike?

³ Kan enn dimunn vremem truv Zeova, li konpran ki “Bondye Li enn lespri” ki invizib pu bann dimunn. (Zan 4:24) Zezi ti koz lor vre Bondye kuma: ‘so Papa ki dan lesyel.’ Ki sa vedir? Sa vedir ki nu Papa dan lesyel res dan enn plas ki, dan enn sans spirityel, byin elve, parey kuma lesyel byin pli ot ki later. (Matye 12:50; Izai 63:15) Mem si nu pa kapav truv Bondye avek nu lizye, Li’nn fer nu purtan gayn posibilite pu konn Li ek pu aprann buku lor so bann proze. (Egzod 33:20; 34:6, 7) Li reponn kestyon bann dimunn sinser ki anvi kone kifer nu lor later. Li donn nu enn baz lor ki nu kapav konte, pu konn so pozisyon lor bann kitsoz ki konsern nu lavi. Li fer nu kone kuma Li truv sa bann kitsoz la ek si nu bann dezir zot an akor avek so bann proze. Li anvi ki nu fer resers ek fer bann gran zefor pu truv repons lor sa bann kitsoz ki konsern nu lavi la. Zeova ti servi profet Zeremi pu repros bann Izraelit parski zot pa ti fer sa. Zot ti konn non Bondye, me zot pa ti demande: “Kot Zeova ete?” (Zeremi 2:6) Zot pa ti interese pu konn proze Zeova. Zot pa ti rod so direksyon. Kan u bizin pran bann desizyon dan u lavi, ki li enn gran uswa enn ti desizyon, eski u demande: “Kot Zeova ete?”

Bann Seki Ti Rod Direksyon Bondye

4. David ti rod direksyon Zeova. Kuma so legzanp kapav ed nu?

⁴ Kan David, garson Zese, ti ankor zenn, li ti devlop enn lafwa solid an Zeova. Li ti konn Zeova kuma “Bondye vivan.” David personelman ti’nn truv proteksyon Zeova dan so lavi. So lafwa ek so lamur pu “non Zeova” ti pus li pu tuy Golyat, sa zean Filistin ki ti byin arme la. (1 Samyel 17:26, 34-51) Purtan, viktwar ki David ti gayne, pa ti fer li ena tro konfyans an limem. Li pa ti panse ki Zeova ti pu beni li, dan ninport ki li ti pu fer asterla. Plizir fwa, pandan bann lane ki ti vini apre, kan David ti bizin pran bann desizyon, li ti rod direksyon Zeova. (1 Samyel 23:2; 30:8; 2 Samyel 2:1; 5:19) Li ti kontiyn fer sa lapriyer la: “Fer mwa konn to fason azir O Zeova; Anseyn mwa to bann santye. Fer mwa mars dan to laverite ek anseyn mwa, parski twa mo Bondye, to sov mwa. Tutlong lazurne, mo finn gard lespwar an twa.” (Psom 25:4, 5) Se enn bon legzanp pu nu zordi!

5, 6. Kuma eski Yeosafat ti rod Zeova dan diferan moman so lavi?

⁵ Lerwa Yeosafat ti sinkyem lerwa dan desandans rwayal David. Dan so lepok, larme trwa nasyon ti zwenn ansam pu fer lager kont Zida. Dan sa sityasyon kritik kot so peyi ti ete la, Yeosafat ti “turn li ver Zeova pu rod Li.” (2 Kronik 20:1-3) Sa pa ti premye fwa ki li ti rod Zeova. Alor ki rwayom lenor Izrael ti’nn tom net dan ladorasyon Baal, lerwa Yeosafat li, li ti rezet sa ladorasyon la ek li ti swazir pu servi Zeova. (2 Kronik 17:3, 4) Me asterla, kan li ti bizin fer fas ar enn sityasyon kritik, kuma eski Yeosafat ti ‘rod Zeova’?

⁶ Dan sa sityasyon kritik la, li ti fer enn lapriyer an piblik dan Zerizalem. Yeosafat ti dir ki li ti rapel gran puvwar ki Zeova ena. Zeova ti’nn montre ki ti so lintansyon kan Li ti pus lezot nasyon ek Li ti donn Izrael sertin peyi an eritaz. Yeosafat ti reflesi byin lor la. Lerwa ti rekonet ki li ti bizin led Zeova. (2 Kronik 20:6-12) Eski Zeova ti les Yeosafat truv li dan sa moman la? Wi. Par enn Levit ki ti apel Yaazyel, Zeova ti donn bann linstriksyon byin presi, ek landemin, Li ti donn So pep enn gran viktwar. (2 Kronik 20:14-28) Kuma eski u kapav sir ki Zeova pu les u truv Li, kan u turn ver Li pu rod so direksyon?

7. Lapriyer kisannla eski Bondye ekute?

⁷ Zeova pa fer preferans. Li invit bann dimunn ki sorti dan tu nasyon pu rod Li dan lapriyer. (Psom 65:2; Akt 10:34, 35) Li pran kont seki ena dan leker bann dimunn ki priye Li. Li donn nu lasirans ki Li tann lapriyer bann dimunn drwat. (Proverb 15:29) Ena sertin dimunn ki okumansman pa ti interese ar Li, me ki asterla rod so direksyon avek limilite. Zeova les sa bann dimunn la truv Li. (Izai 65:1) Li mem tann lapriyer bann dimunn ki’nn arive dezobeir so lalwa, me ki asterla repanti avek limilite. (Psom 32:5, 6; Akt 3:19) Me selman, kan leker enn dimunn pa sumet ar Bondye, lapriyer sa dimunn la, li initil. (Mark 7:6, 7) Nu get detrwa legzanp.

Zot Ti Priye, me Zot Pa’nn Gayn enn Repons

8. Kifer Zeova pa ti aksepte lapriyer Lerwa Sail?

⁸ Apre ki profet Samyel ti dir Lerwa Sail ki Bondye finn rezet li akoz so dezobeisans, Sail ti prostern devan Zeova. (1 Samyel 15:30, 31) Me, li ti fer sa zis pu lizye dimunn. Seki Sail ti anvi, se pa obeir Bondye, me gayn loner devan lepep. Plitar, kan bann Filistin ti vinn lager kont Izrael, Sail ti demann Zeova so direksyon zis parski ti bizin fer li. Me, kan li pa’nn gayn okenn repons, li ti al get enn sorsye, mem si li ti kone ki sa ti kondane par Zeova. (Deteronom 18:10-12; 1 Samyel 28:6, 7) Dan 1 Kronik 10:14 ena enn rezime lor sa levennman la, nu lir lor Sail: “Li pa ti kestyonn Zeova.” Kifer? Parski Sail pa ti ena lafwa kan li ti priye Zeova. Alor, se kumadir li pa’nn priye ditu.

9. Ki kitsoz ki pa ti bon kan Sidkiya ti sipliy Zeova pu gayn So direksyon?

⁹ Ti ena mem sityasyon kan destriksyon rwayom Zida ti pe koste. Bann dimunn ti pe priye Zeova pli buku ek zot ti pe al get So bann profet. Selman, lepep ti pe deklar ador Zeova, me an mem tan zot ti pe usi ador bann zidol. (Sefanya 1:4-6) Mem si zot rod direksyon Bondye par rutinn, zot pa ti prepar zot leker pu sumet ar so volonte. Lerwa Sidkiya ti sipliy Zeremi pu kestyonn Zeova pu li. Zeova ti deza fini dir li ki li ti bizin fer. Me li ti mank lafwa an Zeova ek li ti sede parski li ti per bann dimunn. Akoz sa, Lerwa Sidkiya pa ti obeir lavwa Zeova, ek Zeova pa ti donn li enn lot repons ki li ti pu anvi tande.—Zeremi 21:1-12; 38:14-19.

10. Ki pa ti bon dan fason ki Yoanann ti rod direksyon Zeova, ek ki nu aprann lor so erer?

¹⁰ Apre destriksyon Zerizalem, larme Babilonn ti amenn bann prizonye Zwif dan zot peyi, an Babilon. Apre sa, Yoanann ti prepar li pu amenn an Ezip, enn ti grup Zwif ki ti reste dan Zida. Zot ti fini fer zot plan. Me avan zot kit Zida, zot ti demann Zeremi pu priye Zeova pu zot ek pu rod So direksyon. Selman, kan zot pa’nn gayn repons ki zot ti anvi, zot ti kanmem fer seki zot ti’nn fini deside, dapre zot plan. (Zeremi 41:16–43:7) Eski dan sa bann levennman la ena leson ki u kapav tire? Eski sa kapav ed u pu azir enn fason ki, kan u rod led Zeova, Li pu les u truv Li?

“Kontiyn Verifye”

11. Kifer eski nu bizin met an pratik seki dir dan Efezyin 5:10?

¹¹ Vre ladorasyon vedir plis ki pran batem, al reynion ek partisip dan predikasyon. Sa konsern tu nu fason viv. Tulezur ena bann presyon lor nu, ena presyon ki surnwa, me ena ki pli direk. Sa bann presyon la kapav deturn nu ar enn kondwit ki an akor avek latasman pu Bondye. Kuma eski nu pu reazir fas ar tu sa bann presyon la? Kan lapot Pol ti ekrir bann Kretyin fidel ki ti res Efez, li ti ankuraz zot par sa bann parol la: “Kontiyn verifye byin seki nu Senyer aksepte.” (Efezyin 5:10) Ena buku sityasyon ki’nn raporte dan Labib ki montre ki li saz pu fer sa.

12. Kifer eski Zeova ti ankoler kan David ti transfer lars lalyans dan Zerizalem?

¹² Apre ki lars lalyans ti return an Izrael, li ti res Kiryat-yearim pandan plizir lane. Lerwa David ti anvi transfer li dan Zerizalem. Li ti koz sa avek bann sef parmi lepep, ek li ti dir ki Lars pu transfer, “si zot truv sa bon ek si Zeova aksepte.” Me David ti negliz pu verifye byin ki volonte Zeova lor sa size la pu li kapav sir ki seki li pe fer bon. Si li ti verifye volonte Zeova, zame li pa ti pu met Lars lor enn saret. Se bann Levit Koatit ki ti pu sarye Lars lor zot zepol, parey kuma Bondye ti dir dan bann linstriksyon kler ki Li ti done. Mem si David suvan ti demann Zeova So direksyon, me dan sa lokazyon la, li pa ti fer sa kuma bizin. Sa ti amenn enn rezilta terib. Plitar, David ti rekonet: “Zeova nu Bondye ti turn kont nu, parski nu pa ti rod Li parey kuma nu abitye fer.”—1 Kronik 13:1-3; 15:11-13; Nonm 4:4-6, 15; 7:1-9.

13. Kan finalman zot finn reysi sarye Lars san problem, ki rapel ti ena dan enn kantik?

¹³ Kan finalman bann Levit ti sarye Lars depi lakaz Obed-edom ziska Zerizalem, ti sant enn kantik ki David ti konpoze. Dan sa kantik la, ti ena enn rapel sinser: “Rod Zeova ek so lafors, rod Li tuletan. Rapel so bann aksyon extraordiner ki Li’nn fer, so bann mirak ek bann zizman ki sorti dan so labus.”—1 Kronik 16:11, 12.

14. Kuma eski nu kapav profit bon legzanp ki Salomon inn donn nu ek usi tir leson ar bann erer ki li ti fer plitar dan so lavi?

¹⁴ Avan li mor, David ti donn sa konsey la Salomon, so garson: “Si to rod [Zeova], Li pu les twa truv Li.” (1 Kronik 28:9) Kan Salomon ti vinn lerwa, li ti al Gibeonn, kot ti ena latant reynion ek li ti fer bann sakrifis pu Zeova. La, Zeova ti dir Salomon: “Demann mwa! Ki mo bizin donn twa?” Pu realiz seki Salomon ti demande, Zeova ti donn li sazes ek konesans an abondans, pu ziz Izrael. Anplis, Li ti azut larises ek laglwar. (2 Kronik 1:3-12) Salomon ti servi plan ki Zeova ti donn David, ek li ti konstrir enn zoli tanp. Me konsernan so lavi maryaz, Salomon pa ti rod direksyon Zeova. Li ti marye ar bann madam ki pa ti ador Zeova. Dan so vye zur, zot ti deturn so leker lwin ar Zeova. (1 Lerwa 11:1-10) Nu kapav paret inportan, saz uswa ena enn gran konesans. Me, ninport kuma nu kapav ete, li inportan ki nu “kontiyn verifye byin seki nu Senyer aksepte”!

15. Kan enn Etyopyin ki ti apel Zera ti vinn lager kont Zida, kifer eski Aza ti kapav priye Zeova avek konfyans ki Li ti pu delivre Zida?

¹⁵ Seki ti ariv lerwa Aza, aryer ti zanfan Salomon, montre nu ankor plis kuma sa li inportan. Onz an apre ki Aza ti vinn lerwa, Zera enn Etyopyin, ti kondir enn larme enn milyon zom kont Zida. Eski Zeova ti pu delivre Zida? Plis ki 500 an avan, Zeova ti dir klerman ki so pep ti pu kapav atann si zot ti ekut Li ek si zot ti gard so bann komannman. Li ti fer zot kone usi ki zot ti pu kapav atann, si zot pa ti fer sa. (Deteronom 28:1, 7, 15, 25) Dan kumansman so reyn, Aza ti’nn anlev bann lotel ek bann poto ki ti servi dan fos ladorasyon, dan so rwayom. Li ti’nn ankuraz lepep pu “rod Zeova.” Aza pa ti’nn atann gayn enn maler pu li fer sa. Donk, Aza ti kapav priye Zeova avek lafwa pu demann Li ed zot. Ki rezilta sa finn ena? Zeova ti fer Zida gayn enn viktwar extraordiner.—2 Kronik 14:2-12.

16, 17. (a) Mem si Aza ti gayn laviktwar, ki Zeova ti rapel li? (b) Kan Aza pa ti azir enn fason rezonab, ki led li ti gayne, me kuma eski li ti reazir? (c) Kan nu egzaminn kondwit Aza, kuma eski sa kapav profit nu?

¹⁶ Purtan, kan Aza ti returne apre so viktwar, Zeova ti avoy Azarya pu zwenn li ek pu dir: “Ekut mwa, Aza, ek tu pep Zida ek Binzamin! Zeova avek zot, tanki zot avek Li. Si zot rod Li, Li pu les zot truv Li, me si zot kit Li, Li usi Li pu kit zot.” (2 Kronik 15:2) Aza ti gayn plis zel pu favoriz vre ladorasyon. Me 24 an plitar, kan Aza ti bizin real lager, li pa ti rod Zeova. Li pa ti egzaminn Parol Bondye, ek li pa ti rapel seki Zeova ti’nn fer kan larme Etyopyin ti atak Zida. Li pa ti montre li rezonab kan li ti fer enn lalyans avek Siri.—2 Kronik 16:1-6.

¹⁷ Akoz sa, Zeova ti avoy Anani ki ti enn vwayan, pu repros Aza. Mem dan sa moman la, kan ti explik Aza kuma Zeova ti konsider seki’nn arive, li pa ti tro tar pu li profit bann konsey ki ti pe donn li. Me li ti ofanse, ek li ti anferm Anani dan prizon. (2 Kronik 16:7-10) Byin tris seki’nn arive! Ki nu kapav dir lor nu? Eski nu rod Bondye, me apre nu refiz pu aksepte bann konsey? Kuma nu reazir kan enn ansyin ki atansyone ek ki ena konsiderasyon pu nu, servi Labib pu donn nu enn konsey parski nu pe kumans les lemond inflyans nu? Eski nu apresye sa led ki li donn nu avek lamur la, led ki fer nu kone “seki nu Senyer aksepte”?

Pa Bliye Demande: “Kot Zeova Ete?”

18. Kuma eski nu kapav profit bann parol ki Eliu inn dir Zob?

¹⁸ Enn dimunn finn kapav fer bann bon aksyon dan servis Zeova avan, me kan ena presyon lor li, li kapav arive fer enn kitsoz ki pa fer Zeova plezir. Zob ti gayn enn maladi degutan, li ti perdi so bann zanfan ek usi so dibyin ek so bann kamarad ti met bann fos lakizasyon lor li. Kan tusala ti ariv li, li ti kumans konsantre so latansyon zis lor limem. Eliu ti fer li rapel enn kitsoz, kan li ti dir li sa bann parol la: “Personn pa’nn dir: ‘Kot Bondye, mo Gran Kreater?’ ” (Zob 35:10) Zob ti bizin diriz so latansyon ver Zeova ek gete kuma Li konsider sa sityasyon la. Avek limilite, Zob ti aksepte sa konsey la, ek so legzanp kapav ed nu pu fer parey.

19. Ki lepep Izrael ti suvan manke fer?

¹⁹ Pep Izrael ti kone kuma Zeova ti azir avek zot nasyon. Me tro suvan, dan bann sityasyon presi dan zot lavi, zot pa ti rapel tu seki Zeova inn fer dan lepase. (Zeremi 2:5, 6, 8) Kan zot ti bizin pran bann desizyon dan zot lavi, zot ti kontiyn rod zot prop plezir olye ki zot demande: “Kot Zeova ete?”—Izai 5:11, 12.

Kontiyne Demande: “Kot Zeova Ete?”

20, 21. (a) Kisannla zordi inn montre mem latitid ki Elisa ek inn rod direksyon Zeova? (b) Kuma nu kapav imit zot lafwa ek kuma sa kapav ed nu?

²⁰ Minister ki Eliya ti fer an piblik ti’nn termine ek linz ofisyel ki ti ena lor li ti’nn tonbe. Lerla, Elisa so asistan ti pran sa linz la, li ti al dan bor larivyer Zurdin, li ti tap delo avek sa linz la ek li ti demande: “Kot Zeova, Bondye Eliya, wi Limem?” (2 Lerwa 2:14) Zeova ti donn enn repons kan Li ti montre ki asterla so lespri lor Elisa. Ki nu aprann par sa levennman la?

²¹ Enn sityasyon ki parey inn arive dan nu lepok. Sertin parmi bann serviter Zeova ki’nn swazire pu al dan lesyel, ek ki ti pran latet dan predikasyon, finn mor. Bann seki ti pe diriz lorganizasyon lerla, ti egzaminn Labib ek zot ti priye Zeova pu gayn So direksyon. Zot ti tuletan demande: “Kot Zeova ete?” Rezilta: Zeova finn kontiyne diriz so pep ek fer zot laktivite prospere. Eski nu imit zot lafwa? (Ebre 13:7) Si wi, nu pu res pros ar lorganizasyon Zeova ek nu pu swiv direksyon sa lorganizasyon la. Nu pu partisip byin dan travay ki li pe fer, travay ki Zezi pe dirize.—Zekarya 8:23.

Kuma Eski U Pu Reponn?

• Avek ki lintansyon nu bizin demann: “Kot Zeova ete?”

• Kuma eski zordi nu kapav truv repons pu kestyon: “Kot Zeova ete?”

• Kifer Bondye pa reponn lapriyer sertin ki demann Li So direksyon?

• Ki legzanp ki sorti dan Labib, montre nu linportans pu “kontiyn verifye seki nu Senyer aksepte”?

[Zimaz lor paz 18]

Kifer eski Sail ti al get enn sorsye?

[Zimaz lor paz 20]

Priye, etidye, ek medite pu u kapav verifye “Kot Zeova ete”