Enn chef riche faire enn mauvais choix

SA JEUNE chef riche-la ti enn dimoune ki ti droite, li ti obeir la loi ek li ti religieux. Kan li ti vinn vers Jésus, li ti tombe a genou ek li ti demann Jésus: “Bon Enseignant, ki mo bizin faire pou gagne la vie pou touletan?”

Dan so reponse, Jésus ti montré ki sa jeune homme-la ti bizin obeir bann commandement Bondié pou li gagne la vie eternel. Kan sa chef-la ti demann Jésus plus detail, Jésus ti dire: “ ‘Fodé pa to touye dimoune,’ ‘Fodé pa to faire l’adultere,’ ‘Fodé pa to kokin,’ ‘Fodé pa to donne fausse temoignage,’ ‘Honore to papa ek to mama,’ ek, ‘Fodé to content to prochain couma to-mem.’ ” Sa ti bann commandement ki ti pli important dan la Loi ki Bondié ti donne Moïse. Lerla missié-la ti dire: “Tousala mo’nn faire; ki mo bizin faire encore?”—Matthieu 19:16-20.

Jésus “ti ressenti l’amour pou li” ek ti dire li: “To mank enn sel kitsoz: Allé, vann tou seki to ena, ek donne sa bann pauvre, ek to pou gagne enn tresor dan le ciel, apré vini, suive moi.”—Marc 10:17-21.

Enn sel coute sa jeune chef-la ti trouve-li devant enn grand decision. Ki li ti pou faire? Eski li ti pou disposé pou abandonne tou so bann richesse materiel ek vinn enn disciple Jésus, ou-soit eski li ti pou reste attaché ar seki li ti ena? Eski li ti pou rod bann tresor lor la terre, ou-soit eski li ti pou rod bann tresor dan le ciel? Surement sa pa ti facile pou li faire so choix! Li ti clair ki li ti interessé ar so spiritualité parski li ti obeir la Loi ek li ti demandé ki li ti bizin faire encore pou gagne faveur Bondié. Ki decision li ti prend? Li “ti allé bien triste, parski li ti ena beaucoup di-bien.”—Marc 10:22.

Sa jeune chef-la pa ti prend enn bon decision. Si li ti’nn vinn enn disciple Jésus ek li ti’nn reste fidel, li ti pou’nn gagne seki li ti pé rodé—la vie eternel. La Bible pa dire nou ki’nn arrive sa jeune homme-la. Mais nou koné ki 40 an plitar, l’armée romain ti detruire Jérusalem ek enn bon partie Judée. Beaucoup Juif ti perdi zot bann richesse ek zot la-vie aussi.

Parkont l’apotre Pierre ek bann lezot disciple pa ti faire couma sa jeune chef-la: zot, zot ti faire enn bon choix. Zot ti “quitte tou” ek zot ti suive Jésus. Sa decision-la ti dan zot l’avantage! Jésus ti dire zot ki zot ti pou gagne beaucoup fois plus ki seki zot ti quitté par derriere. En plus, zot ti pou gagne la vie eternel. Plitar, zot pa ti ena okenn raison pou regrette decision ki zot ti’nn prend.—Matthieu 19:27-29.