Bienvenue lor pli bon chemin ki ena!
“Si nou vive, nou vive pou Jéhovah, ek si nou mort, nou mort pou Jéhovah.”—ROM. 14:8.
1. Ki Jésus ti enseigné lor pli bon fason pou amenn nou la vie?
JÉHOVAH envie ki nou amenn pli bon la vie ki ena. Bann dimoune kapav amenn zot la vie dan different fason, mais ena zis enn sel fason vive ki pli bon. Pli bon fason ki nou kapav amenn nou la vie c’est kan nou vive en accord avek Parole Bondié ek nou aprann ar so Garson, Jésus Christ. Jésus ti enseigne so bann disciple pou adore Bondié avek l’esprit ek la verité, ek li ti donne zot mission pou faire bann disciple. (Mat. 28:19, 20; Jean 4:24) Kan nou vive en accord avek bann instruction ki Jésus ti donné, nou faire Jéhovah plaisir ek nou gagne So benediction.
2. (a) Dan premier siecle, couma eski beaucoup dimoune ti reagir kan zot ti tann message lor Royaume Bondié? (b) Ki sa ti vedir forme partie dan “sa Chemin-la”?
2 Kan bann dimoune ki ena “l’attitude ki bizin pou gagne la vie eternel” accepté la verité ek prend bapteme, nou ena bann bon raison pou dire zot: “Bienvenue lor pli bon chemin ki ena!” (Actes 13:48) Dan premier siecle nou lepok, plusieurs millier dimoune ki ti sorti dan different nation ti accepté la verité ek ti donne preuve ki zot attaché ar Bondié kan zot ti prend bapteme. (Actes 2:41) Sa bann premier disciple-la ti forme partie dan seki la Bible appel “sa Chemin-la.” (Actes 9:2; 19:23) Sa l’expression-la ti approprié parski bann ki ti vinn disciple Christ ti amenn enn la vie ki ti basé lor zot la foi en Jésus Christ ek zot ti imite so l’exemple.—1 Pierre 2:21.
3. (a) Kifer bann serviteur Jéhovah prend bapteme? (b) Comié dimoune ti prend bapteme pendant dix dernier l’année ki’nn passé?
3 L’activité pou faire bann disciple finn acceleré dan lepok dernier jour ek zordi c’est dan plus ki 230 pays ki bann Témoins pé faire sa l’activité-la. Pendant sa dix dernier l’année ki’nn passé-la, plus ki 2,700,000 dimoune finn prend decision pou servi Jéhovah ek finn prend bapteme pou montré ki zot finn voué zot la vie ar Jéhovah. Sa represente plus ki 5,000 bapteme par semaine! Zot finn prend bapteme parski zot content Bondié, zot finn gagne enn connaissance lor la Bible, ek zot ena la foi dan seki la Bible enseigné. Bapteme c’est enn grand pas dan nou la vie, parski c’est commencement bann relation bien proche ki nou kapav ena avek Jéhovah. Sa montré aussi ki nou ena confiance ki Bondié pou aide nou pou servi Li avek fidelité, pareil couma Li ti aide so bann serviteur dan le passé pou marche dan so chemin.—Is. 30:21.
Kifer ou bizin prend bapteme?
4, 5. Mentionne bann benediction ek bann bienfait ki ou gagné kan ou prend bapteme.
4 Kitfois ou finn gagne enn connaissance lor Bondié, ou finn faire bann changement dan ou la vie, ek asterla ou enn proclamateur non-baptisé. Ou kapav fiere ki ou finn faire sa bann progré-la. Mais eski ou finn voué ou la vie dan la priere ar Bondié, ek ou envie prend bapteme? Grace a ou l’etude la Bible, surement asterla ou koné ki ou bizin consacré ou la vie pou loué Jéhovah, ek pa zis pou faire ou-mem plaisir, ou-soit pou gagne bann kitsoz materiel. (Lire Psaume 148:11-13; Luc 12:15) Mais, ki bann benediction ek bann bienfait ou gagné kan ou prend bapteme?
5 Kan ou pou vinn enn chretien ki voué ar Jéhovah, ou la vie pou ena pli grand but ki kapav ena. Ou pou heureux parski ou pou faire volonté Bondié. (Rom. 12:1, 2) L’esprit saint Jéhovah pou aide ou pou developpe bann qualité couma la paix ek la foi. (Gal. 5:22, 23) Bondié pou reponn ou bann la priere ek pou beni ou bann zeffort pou vive en accord avek so Parole. Ou pou trouve la joie dan ou ministere. Kan ou pou vive dan enn fason ki Bondié content, sa pou fortifié ou l’esperance pou vive pou touletan. En plus, kan ou pou voué ou la vie ar Bondié ek prend bapteme, ou pou montré ki ou vrai-mem envie vinn enn Témoin de Jéhovah.—Is. 43:10-12.
6. Ki nou faire koné par nou bapteme?
6 Kan nou voué nou la vie ar Bondié ek nou prend bapteme, nou faire koné ki nou pou Jéhovah. L’apotre Paul ti ecrire: “En realité, personne parmi nou pa vive zis pou li-mem, ek personne pa mort zis pou li-mem; parski si nou vive, nou vive pou Jéhovah, ek si nou mort, nou mort pou Jéhovah. Alors, ki nou vive ou-soit ki nou mort, nou pou Jéhovah.” (Rom. 14:7, 8) Bondié finn honore nou kan Li finn donne nou liberté pou choisir. Kan nou prend enn decision ferme pou vive pou Li parski nou content Li, nou faire so leker content. (Prov. 27:11) Nou bapteme c’est enn symbole ki nou finn voué nou la vie ar Jéhovah ek nou montré tou dimoune ki nou reconette Li couma nou Chef. Sa montré ki nou finn prend position pou Li concernant question ki ti soulevé lor so souveraineté universel. (Actes 5:29, 32) En retour, Jéhovah reste dan nou coté. (Lire Psaume 118:6.) Bapteme ouvert aussi enn chemin ki faire nou gagne beaucoup lezot benediction asterla ek dan l’avenir.
Nou gagne enn famille spirituel ki uni par l’amour
7-9. (a) Ki Jésus ti promette bann ki’nn laisse tou kitsoz pou suive li? (b) Couma promesse ki Jésus ti faire dan Marc 10:29, 30 pé realisé zordi?
7 L’apotre Pierre ti dire Jésus: “Guetté! Nou finn quitte tou ek nou finn suive toi; alors, ki pou ena pou nou?” (Mat. 19:27) Pierre ti envie koné ki l’avenir ti reservé pou li ek pou lezot disciple. Zot ti’nn faire bann grand sacrifice pou consacré-zot net ar predication Royaume Bondié. (Mat. 4:18-22) Ki l’assurance Jésus ti donne zot?
8 Dapré mem recit ki Marc ti ecrire, Jésus ti dire ki so bann disciple ti pou forme partie dan enn grand famille spirituel. Li ti dire: “Pena personne ki finn quitte lakaz ou-soit frere ou-soit soeur ou-soit mama ou-soit papa ou-soit zenfant ou-soit karo a cause moi ek a cause la bonne nouvelle, ki pa pou gagne cent fois plus, zordi dan sa lepok-la, lakaz ek frere ek soeur ek mama ek zenfant ek karo, avek bann persecution, ek dan le monde ki pé vini, la vie eternel.” (Marc 10:29, 30) Bann chretien dan premier siecle couma Lydie, Aquila, Priscille ek Gaïus ti parmi bann ki ti donne bann “lakaz,” ek zot ti vinn bann “frere,” bann “soeur” ek bann “mama” pou bann lezot chretien, pareil couma Jésus ti promette.—Actes 16:14, 15; 18:2-4; 3 Jean 1, 5-8.
9 Seki Jésus ti dire pé konn enn pli grand realisation zordi. Bann “karo” ki so bann disciple laissé derriere zot represente bann moyen financier ki beaucoup, parmi ena bann missionnaire, bann Béthélite, bann ki travail lor construction international ek lezot encore, laissé volontairement pou avance bann l’interet Royaume Bondié dan plusieurs pays. Beaucoup frere ek soeur finn quitte zot lakaz pou zot kapav simplifié zot la vie. Sa faire nou plaisir pou tann zot raconté couma Jéhovah finn prend zot soin ek couma zot service finn rann zot heureux. (Actes 20:35) En plus, tou bann serviteur baptisé ki servi Jéhovah kapav konn sa bonheur ki ena kan zot ‘rod royaume Bondié ek so justice avant tou kitsoz’ parmi zot bann frere ek soeur ki forme enn famille mondial.—Mat. 6:33.
En securité dan “l’endroit secret”
10, 11. Ki “l’endroit secret sa Kikenn ki Pli Grand-la” representé, ek couma nou kapav rente ladan?
10 Kan nou voué nou la vie ek nou prend bapteme, sa faire nou gagne enn lot grand benediction—privilege pou reste dan “l’endroit secret sa Kikenn ki Pli Grand-la.” (Lire Psaume 91:1.) Sa l’endroit-la c’est enn place symbolik kot nou en securité lor plan spirituel, enn condition kot nou protegé kont tou bann danger spirituel. C’est enn “l’endroit secret” parski bann dimoune ki aveugle lor plan spirituel ek ki pena confiance dan Bondié, pa konn sa l’endroit-la. Kan nou vive en accord avek voeu ki nou finn faire ek kan nou ena full confiance en Jéhovah, c’est coumadir nou pé dire Li: “To-mem mo refuge ek mo forteresse, mo Bondié en ki mo pou mette mo confiance.” (Ps. 91:2) Jéhovah vinn pou nou coumadir enn place kot nou reste en securité. (Ps. 91:9) Ki nou kapav demandé plus ki sa?
11 Si nou finn reussi rente dan “l’endroit secret” Jéhovah, sa vedir ki Jéhovah finn beni nou ek finn donne nou privilege pou developpe bann relation bien personnel avek Li. Mais pou gagne sa privilege-la, avant nou bizin voué nou la vie ar Li ek prend bapteme. Apré, nou faire nou relation avek Li vinn pli solide kan nou approche-nou ar Li par l’etude la Bible, par la priere sincere ek kan nou obeir Li dan tou kitsoz. (Jacq. 4:8) Personne jamais pa finn vinn aussi proche ar Jéhovah ki Jésus. Jamais so confiance en so Createur pa ti diminué. (Jean 8:29) Alors, fodé jamais ki nou ena doute lor Jéhovah ou-soit lor so desir ek so capacité pou aide nou pou reste fidele envers nou voeu. (Eccl. 5:4) Bann disposition spirituel ki Bondié inn prend pou so bann serviteur, prouvé dan enn fason sur ki Li vrai-mem content nou ek ki Li envie nou reussi servi Li.
Enn paradis spirituel ki ena valeur pou nou
12, 13. (a) Ki été paradis spirituel? (b) Couma nou kapav aide bann nouveau?
12 Kan nou voué-nou ar Jéhovah ek nou prend bapteme, sa donne nou aussi possibilité pou reste dan enn paradis spirituel. Pena enn paradis coumsa encore. C’est enn l’environnement spirituel kot ena bann frere ek soeur ki en paix avek Jéhovah ek entre zot. (Ps. 29:11; Is. 54:13) Pena nanyin dan le monde ar ki nou kapav compare nou paradis spirituel. Nou trouve sa surtout pendant bann l’assemblée international kot bann frere ek soeur ki sorti dan beaucoup pays, ki koz different langue, ek ki ena different culture joinde ensam dan enn l’ambiance kot ena la paix, l’unité ek l’amour.
13 Ena enn grand difference entre paradis spirituel ek bann mauvais condition ki ena dan le monde zordi. (Lire Isaïe 65:13, 14.) Kan nou annonce message lor Royaume Bondié, nou ena privilege pou invite lezot pou rente dan sa paradis spirituel-la. C’est aussi enn benediction pou aide bann ki’nn fek commence frequente la congregation ek ki bizin gagne enn formation dan ministere. Dapré bann disposition ki bann ancien inn prend, kitfois nou pou ena la joie pou aide certain nouveau, pareil couma Aquila ek Priscille ti “explik [Apollos] chemin Bondié dan enn fason pli exact.”—Actes 18:24-26.
Contigne aprann ar Jésus
14, 15. Ki bann bon raison nou ena pou contigne aprann ar Jésus?
14 Nou ena bann bon raison pou nou contigne aprann ar Jésus. Avant li ti vinn lor la terre, Jésus ti passe plusieurs millier l’année pou travail avek so Papa dan le ciel. (Prov. 8:22, 30) Li ti koné ki pli bon fason pou amenn so la vie c’est pou servi Bondié ek pou rann temoignage lor la verité. (Jean 18:37) Li ti clair pou Jésus ki enn lot fason vive ti pou egoïste ek ti pou montré ki li pa ti pense seki pou arrivé dan l’avenir. Li ti koné ki li ti pou bizin passe par bann l’epreuve bien difficile ek apré, mort. (Mat. 20:18, 19; Héb. 4:15) En tant ki nou l’Exemple, li’nn montré nou couma nou kapav garde nou l’integrité.
15 Enn tipé apré bapteme Jésus, Satan ti tente li pou abandonne sa fason ki li ti pé vive-la—mais Satan pa ti reussi. (Mat. 4:1-11) Sa montré nou ki malgré n’importe ki kitsoz ki Satan faire, nou kapav garde nou l’integrité. Li possible ki li vise surtout bann ki pré pou prend bapteme ou-soit ki’nn fek baptisé. (1 Pierre 5:8) Nou kapav gagne l’opposition aussi ar bann membre nou famille ki ena bann bon l’intention mais ki pa bien informé lor bann Témoins de Jéhovah. Selman, sa bann l’epreuve-la donne nou l’occasion pou manifesté bann qualité spirituel, couma par exemple, respé ek tact kan nou reponn bann question ek nou donne temoignage. (1 Pierre 3:15) Tousala kapav ena enn bon l’effet lor bann ki ecoute nou.—1 Tim. 4:16.
Reste attaché ar pli bon la vie ki nou finn choisir!
16, 17. (a) Ki trois condition pou gagne la vie, Deutéronome 30:19, 20 mentionné? (b) Couma Jésus, Jean ek Paul ti confirme seki Moïse ti ecrire?
16 Apepré 1,500 an avant ki Jésus ti vinn lor la terre, Moïse ti conseil bann Israélite pou choisir pli bon fason vive ki ti ena dan sa lepok-la. Li ti dire: “Zordi, mo prend le ciel ek la terre couma bann temoin kont zot, ki mo finn mette la vie ek la mort devant toi, benediction ek malediction; ek to bizin choisir la vie pou ki to contigne vive, toi ek to descendance, kan to content Jéhovah to Bondié, kan to ecoute so la voix ek kan to reste attaché ar Li.” (Deut. 30:19, 20) Bann Israélite pa ti reste fidele envers Bondié, mais sa trois condition pou gagne la vie ki Moïse ti cité-la, pa finn changé. Jésus ek lezot ti ré-mentionne zot.
17 Premierement, ‘nou bizin content Jéhovah nou Bondié.’ Nou montré ki nou content Bondié kan nou agir en accord avek so bann principe ki juste. (Mat. 22:37) Deuxiemement, ‘nou bizin ecoute la voix Jéhovah’ kan nou etudié Parole Bondié ek kan nou obeir so bann commandement. (1 Jean 5:3) Sa vedir ki nou bizin assisté reunion regulierement, enn place kot nou examine la Bible. (Héb. 10:23-25) Troisiemement, ‘nou bizin reste attaché ar Jéhovah.’ N’importe ki l’epreuve nou kapav gagné, anou ena touletan la foi en Bondié ek suive so Garson.—2 Cor. 4:16-18.
18. (a) Couma La Tour de Garde ti koz lor la verité en 1914? (b) Ki sentiment nou bizin ena zordi concernant la lumiere ki nou finn gagné lor la verité?
18 C’est vrai-mem enn benediction pou vive en accord avek la verité ki trouve dan la Bible! En 1914, La Tour de Garde ti publié sa declaration bien important-la: “Eski nou pa enn peuple ki beni ek heureux? Nou Bondié, eski Li pa fidele? Si enn kikenn konn enn kitsoz ki pli bon, bien bon pou li. Si enn parmi zot trouve enn kitsoz ki pli bon, nou souhaité ki li pou dire nou. Nou, nou pa konn nanyin ki pli bon, pa mem enn quart ki seki nou finn trouvé dan Parole Bondié. . . . Li impossible pou decrire la paix, la joie ek bann benediction ki enn connaissance bien clair lor vrai Bondié inn amené dan nou leker ek dan nou la vie. Recit lor Sagesse, Justice, Puissance ek l’Amour Bondié inn donne nou leker ek nou l’esprit enn grand satisfaction. Nou pa pou rod plus ki sa. Pena nanyin encore ki nou envie gagné, a part enn bon connaissance lor nou Bondié.” (La Tour de Garde 15 décembre 1914, page 377-378, en anglais) Nou aussi nou ena mem reconnaissance pou la lumiere spirituel ek pou la verité. En realité, asterla nou ena encore plus raison pou content ki nou pé “marche dan la lumiere Jéhovah.”—Is. 2:5; Ps. 43:3; Prov. 4:18.
19. Kifer bann ki rempli condition pou prend bapteme bizin faire sa sans tardé?
19 Si ou envie “marche dan la lumiere Jéhovah” mais ki ou pankor voué ou la vie ek prend bapteme, pa tardé pou faire sa. Faire tou seki bizin pou rempli bann condition pou ou kapav prend bapteme—c’est sel fason ki nou kapav montré nou reconnaissance pou seki Bondié ek Christ inn faire pou nou. Donne Jéhovah seki ena plus valeur pou ou—ou la vie. Montré ki ou envie faire volonté Bondié kan ou suive so Garson. (2 Cor. 5:14, 15) Pena okenn doute, sa-mem pli bon fason vive ki kapav ena!
Couma ou pou reponn?
• Ki nou montré par nou bapteme?
• Ki bann benediction nou gagné kan nou voué nou la vie ar Bondié ek nou prend bapteme?
• Kifer li bien important ki nou aprann ar Jésus?
• Ki pou aide nou pou reste attaché ar pli bon fason vive ki ena?
[Zimage page 29]
Par ou bapteme, ou montré ki ou finn choisir pli bon fason vive ki kapav ena
[Zimage page 31]
Eski ou en securité dan “l’endroit secret”?