Soutenir Ou Lasanble

Ena bann milyon dimounn dan lemond ki pe servi Zeova avek lazwa dan bann milye lasanble. Zot ena boukou rekonesans pou lansegnman ek formasion ki zot gagne dan zot lasanble, ek zot kontan pou soutenir zot lasanble dan diferan fason. Eski ou osi ou resanti sa?

1. Kouma ou kapav servi ou letan ek ou lenerzi pou soutenir ou lasanble?

Nou tou nou kapav ede dan lasanble. Par exanp, eski ena sertin dan ou lasanble ki aze ouswa ki ena enn andikap? Eski ou kapav ed zot pou vinn renion? Ouswa eski ou kapav ed zot dan bann lezot fason? Par exanp, eski ou kapav al aste bann kitsoz pou zot? Ouswa mem ed zot pou fer zot louvraz lakaz? (Lir Zak 1:27.) Nou kapav osi donn enn koudme pou netway nou Lasal Renion ek pou fer bann travay mintenans. Personn pa fors nou pou fer sa bann kitsoz-la. Se nou lamour pou Bondie ek pou nou bann frer ek ser ki pous nou pou “port [nou] volonter.”​—Psom 110:3, NW.

Bann Temwin ki batize kapav soutenir lasanble dan lezot fason ankor. Bann frer ki ranpli bann kondision ki ena dan Labib, kapav ede dan lasanble kouma bann asistan ministeryel ouswa ansien. Bann frer ek ser kapav soutenir pli bien travay predikasion kan zot fer pionie. Sertin Temwin kapav ede pou konstrir bann batiman kot nou ador Zeova. Ouswa ena kapav demenaze pou al ede dan enn lasanble kot bizin led.

2. Kouma nou kapav servi nou kas ek seki nou ena pou soutenir lasanble?

Nou “onor Zeova avek [nou] bann kitsoz ki ena valer.” (Proverb 3:9) Pou nou se enn loner pou fer bann kontribision, ek donn bann lezot kitsoz ki nou ena, pou soutenir nou lasanble ek travay predikasion ki pe fer dan lemond antie. (Lir 2 Korintien 9:7.) Nou bann kontribision kapav osi ede pou soutenir bann frer ek ser kan ena bann katastrof. Boukou swazir pou “met dekote enn som larzan” pou ki zot kapav fer bann kontribision regilierman. (Lir 1 Korintien 16:2.) Nou kapav fer bann kontribision lor sit donate.jw.org ouswa kan nou met kas dan bann bwat kontribision ki ena dan nou bann Lasal Renion. Kan nou swazir pou servi nou bann kitsoz materyel dan sa fason-la, nou montre Zeova ki nou kontan Li.

ANOU GET INPE PLIS

3. Nou kapav servi nou bann kitsoz materyel

Zeova ek Zezi kontan bann ki kontan done. Par exanp, Zezi ti koz an bien lor enn vev ki ti pov, me ki kanmem sa ti fer enn kontribision. Lir Lik 21:1-4, ek apre sa, get sa bann kestion-la ansam:

• Eski pou fer Zeova kontan nou bizin donn boukou kas?

• Ki Zeova ek Zezi resanti kan nou donn avek tou nou leker?

Pou kone kouma servi nou bann kontribision, zwe VIDEO-la. Apre sa, get sa kestion-la ansam:

VIDEO: ‘Enn Kado dan Nou Lame pou Zeova’ (4:47)

• Kouma servi nou bann kontribision pou ed tou bann lasanble dan lemond?

4. Nou kapav port nou volonter pou ede

Dan lepase, bann adorater Zeova ti fer boukou zefor pou gard dan enn bon leta plas kot zot ti ador Zeova. Me zot ti fer plis ki zis donn kas. Lir 2 Kronik 34:9-11, ek apre sa, get sa kestion-la ansam:

• Kouma sak Izraelit ti kapav ede pou gard lakaz Zeova, setadir plas kot ti pe ador Li, dan enn bon leta?

Pou trouve kouma bann Temwin Zeova swiv sa lexanp-la, zwe VIDEO-la. Apre sa, get sa kestion-la ansam:

VIDEO: Pran Swin Nou Bann Lasal Renion (3:31)

• Kifer li inportan ki nou gard bann Lasal Renion prop ek dan enn bon leta?

• Sit sertin fason kouma ou kapav ede.

5. Bann frer kapav fer plis dan lasanble

Labib ankouraz bann frer pou fer zefor pou fer plis pou soutenir lasanble. Pou trouv enn lexanp, zwe VIDEO-la. Apre sa, get sa kestion-la ansam:

VIDEO: Frer​—Fer Zefor pou Fer enn Bon Travay (5:19)

• Dapre sa video-la, kouma Ryan finn fer zefor pou fer plis pou soutenir so lasanble?

Labib explike seki bann frer bizin fer pou ki zot kapav servi kouma asistan ministeryel ek ansien. Lir 1 Timote 3:1-13, NW, ek apre sa, get sa bann kestion-la ansam:

• Ki bann frer bizin fer pou servi kouma asistan ministeryel ek ansien?

• Ki kitsoz bann manb zot fami osi bizin fer?​—Get verse 4 ek 11.

• Kan bann frer fer zefor pou fer sa bann kitsoz-la, kouma zot tou dan lasanble gagn bann bienfe?

SEKI NOU’NN APRANN

Pou Zeova, sa ena boukou valer ki nou fer zefor pou donn nou letan, nou lenerzi, ek nou bann kitsoz materyel pou soutenir lasanble.

Eski Ou Rapel?

• Kouma nou kapav servi nou letan ek nou lenerzi pou soutenir nou lasanble?

• Kouma nou kapav servi nou bann kitsoz materyel pou soutenir nou lasanble?

• Kouma ou ti pou kontan soutenir ou lasanble?

DEKOUVER

Gete kifer Bondie nepli demann so bann adorater pou donn ladim.

“Ki Labib Dir lor Ladim?” (Lartik lor jw.org)

Labib koz lor bann responsabilite ki bann frer asime. Me ki arive kan se enn ser ki bizin asim sa bann responsabilite-la?

“Lotorite ki Bann Ansien Ena dan Lasanble” (Latour Degard, Fevriye 2021)

Gete kouma bann frer fer bann gran sakrifis pou ki zot bann frer ek ser kapav gagn bann piblikasion.

Kouma Distribie Bann Piblikasion dan Kongo? (4:25)

Gete kouma fason ki nou finans nou laktivite li bien diferan ar lezot relizion.

“Kouma Bann Temwin Zeova Finans Zot Laktivite?” (Lartik lor jw.org)