To Kapav Anpe Malgre Bann Sitiasion Difisil

1. Ki ete “lape Bondie,” ek ki bienfe nou gagne kan nou ena sa lape-la? (Filipien 4:6, 7)

ENA enn lape ki bann dimounn dan sa lemond-la pa konn ditou. Se “lape Bondie,” setadir enn trankilite ki nou gagne kan nou ena enn bon lamitie avek Zeova. Kan nou ena lape Bondie, nou santi nou an sekirite. (Lir Filipien 4:6, 7.) Nou ena enn bon lamitie avek bann ki kontan Bondie. Ek nou ena enn bon lamitie avek Zeova, “Bondie lape.” (1 Tes. 5:23) Kan nou konn nou Papa Zeova, nou fer Li konfians, ek nou obeir Li, lape Bondie kapav kalme nou kan nou fer fas ar bann sitiasion difisil.

2. Kifer nou sir ki nou kapav gagn lape Bondie?

² Eski nou kapav vremem gagn lape Bondie kan ena bann sitiasion difisil kouma enn lepidemi, enn katastrof natirel, enn lager, ouswa persekision? Sa bann sitiasion difisil la kapav fer nou gagn per. Me Zezi ti dir so bann disip: “Pa boulverse, pa gagn per.” (Zan 14:27) Erezman ki bann frer ek ser inn swiv sa konsey-la. Avek led Zeova, zot pe kapav gagn lape malgre bann difikilte.

LAPE PANDAN ENN LEPIDEMI

3. Ki lefe enn lepidemi ouswa enn pandemi kapav ena lor nou lape?

³ Enn lepidemi ouswa enn pandemi kapav sanz nou lavi net. Par exanp, anou gete ki lefe COVID-19 inn ena lor lavi boukou dimounn. Dapre enn survey, boukou dimounn inn dir ki zot inn gagn boukou difikilte pou dormi pandan pandemi. Akoz sa pandemi-la, boukou dimounn inn bien strese. Ena ki’nn tom dan depresion, dan labwason, ouswa dan ladrog. Bann ka violans domestik inn ogmante, ek pli boukou dimounn inn rod swisid zot. Si ena enn lepidemi dan to landrwa, kouma to kapav mwins strese ek ena lape Bondie?

4. Kan nou konn profesi Zezi konsernan bann dernie zour, kouma sa kapav donn nou lape?

⁴ Zezi ti predir ki dan bann dernie zour ti pou ena bann lepidemi “dan boukou landrwa.” (Lik 21:11) Kifer nou kapav anpe kan nou konn sa? Nou pa etone ki ena bann lepidemi. Nou kone ki sa bann kitsoz-la bizin arive. Akoz sa, nou bizin swiv konsey ki Zezi inn donn bann dimounn ki viv dan lepok lafin: “Asire ki zot pa gagn per.”​—Mat. 24:6.

5. (a) Dapre Filipien 4:8, 9, pou ki kitsoz nou bizin priye pandan enn pandemi? (b) Ki bienfe to kapav gagne kan to ekout bann lanrezistreman Labib?

⁵ Enn lepidemi kapav fer bann dimounn trakase ouswa per. Se seki ti ariv enn ser ki apel Desi.b Apre ki so tonton, so kouzin, ek so dokter ti mor akoz COVID-19, li ti per tansion li gagn sa viris-la ek li donn sa so mama ki ti vie. Akoz sa pandemi-la, li ti per tansion li perdi so travay, ek li ti pe demann limem si li ti pou kapav aste manze ek pey lakaz. Li ti telman trakase ki li pa ti pe gagn somey aswar. Me Desi ti regagn lape. Kouma? Li ti fer bann lapriyer presi, ek li ti demann Zeova pou ed li pou res kalm ek pou ena bann panse pozitif. (Lir Filipien 4:8, 9.) Li ti “ekout” Zeova koz ar li kan li ti ekout bann lanrezistreman Labib. Li dir: “Sa bann lekter-la ti ena telman boukou douser dan zot lavwa, ki sa ti kalme mwa ek ti rapel mwa ki Zeova gagn mo traka.”​—Ps. 94:19.

6. Kouma to letid personel ek bann renion kapav ed twa?

⁶ Pandan enn pandemi, li pa touletan posib pou kontign fer bann kitsoz kouma avan. Me fode pa to les sa anpes twa kontign fer to letid personel ouswa asiste bann renion. Lexanp nou bann frer ek ser, dan bann piblikasion ek bann video, kapav ankouraz twa parski zot osi zot pe res fidel ar Zeova malgre bann difikilte. (1 Pier 5:9) Kan to asiste bann renion, to pou tann bann kitsoz ki sorti dan Labib, ek sa pou ankouraz twa. To pou osi gagn lokazion pou ankouraz lezot ek lezot osi pou ankouraz twa. (Rom. 1:11, 12) Kan to reflesi kouma Zeova inn soutenir so bann serviter kan zot ti malad, kan zot ti per, ouswa kan zot ti tousel, sa pou fer to lafwa vinn pli for. To kapav sir ki Li pou soutenir twa osi!

7. Ki leson nou aprann ar lexanp lapot Zan?

⁷ Fer zefor pou koz ar to bann frer ek ser. Pandan enn lepidemi, kitfwa nou bizin gard distans sosial mem kan nou avek nou bann frer ek ser. Dan sa moman-la, kitfwa to kapav ena mem santiman ki lapot Zan. Li ti anvi trouv so kamarad Gais fas-a-fas. (3 Zan 13, 14) Me Zan ti kone ki pou linstan, li pa ti pou kapav trouv Gais. Alor, ki kitsoz Zan ti fer? Li ti fer seki li kapav dan sa ler-la, setadir li ti ekrir Gais enn let. Si to pa pe kapav zwenn to bann frer ek ser fas-a-fas, esey telefonn zot, fer bann video-call, ouswa avoy zot enn ti mesaz. Kan to gard kontak avek to bann frer ek ser, to pou santi twa plis an sekirite ek anpe. Kan to santi twa strese, kontakte bann ansien ek aksepte bann lankourazman ki zot pou donn twa.​—Iza. 32:1, 2.

LAPE PANDAN ENN KATASTROF

8. Ki lefe enn katastrof kapav ena lor to lape?

⁸ Eski to’nn deza viv enn sitiasion kouma enn inondasion, enn tranbleman-de-ter, ouswa enn insandi. Bann sitiasion koumsa kapav fer enn kikenn angwase pandan bien lontan. Si enn kikenn ki to kontan inn mor, ouswa si to’nn perdi to bann dibien, kitfwa to extra sagrin, to dezespere, ouswa mem to ankoler. Sa pa vedir ki to kontan bann kitsoz materyel ouswa ki to pena ase lafwa. To’nn pas dan enn sitiasion difisil ek li normal ki to ena bann panse negatif. (Zob 1:11) Me mem si to ena sa bann santiman-la, to kapav anpe. Kouma?

9. Ki Zezi ti dir pou prepar nou pou bann katastrof?

⁹ Fode pa nou bliye seki Zezi ti predir. Sertin dimounn panse ki zame zot pa pou viv enn katastrof. Me nou kone ki pou ena boukou katastrof dan nou lepok ek ki nou pou viv sertin parmi zot. Zezi ti dir so bann disip ki ti pou ena “bann tranblemandeter terib” ek bann lezot katastrof dan lepok lafin. (Lik 21:11) Li ti dir osi ki “lemal pou ogmante,” ek nou trouv sa azordi. Par exanp, ena boukou latak teroris, krim, ek violans. (Mat. 24:12) Zezi zame pa ti dir ki sa bann sitiasion-la ti pou afekte zis bann dimounn ki pa servi Zeova. Ofet, boukou serviter Zeova pe soufer akoz sa bann sitiasion-la. (Iza. 57:1; 2 Kor. 11:25) Kitfwa Zeova pa pou fer enn mirak pou protez nou kont tou sa bann katastrof-la. Selman, Li pou donn nou tou seki nou bizin pou ki nou res kalm ek anpe.

10. Kan nou prepar nou alavans pou enn katastrof, kouma sa montre ki nou ena lafwa? (Proverb 22:3)

¹⁰ Si enn katastrof arive, nou pou plis kapav res kalm si nou prepar nou alavans. Me si nou fer sa, eski savedir ki nou pena ase lafwa dan Zeova? Non. An realite, kan nou prepar nou, nou montre ki nou ena lafwa ki Zeova ena kapasite pou pran nou swin. Kifer nou dir sa? Parski Labib dir nou ki nou bizin prepar nou pou bann katastrof ki kapav arive. (Lir Proverb 22:3.) Anplis, dan bann piblikasion, bann renion, ek bann lanons, souvan lorganizasion Zeova ankouraz nou pou prepar nou pou enn katastrof.c Eski to fer Zeova konfians? Si wi, to bizin swiv sa konsey-la depi aster-la mem, avan enn katastrof arive.

11. Ki nou aprann ar lexanp Margaret?

¹¹ Anou get lexanp enn ser ki apel Margaret. Bann lotorite ti donn li lord pou kit so lakaz parski ti ena enn dife dan lafore pre kot li ti pe reste. Boukou dimounn ti pe sove anmemtan. Akoz sa, ti ena boukou loto lor sime ek sime ti bloke net. Ti ena enn gro lafime bien nwar, ek pandan enn moman, Margaret pa ti kapav sorti dan so loto. Selman, li’nn reisi sap so lavi parski li ti bien prepar li. Dan so ti sak, li ti touletan gard enn map. Alor, li ti servi sa map-la pou li trouv enn lot sime. Li ti mem deza fer sa bann sime-la pou li kone ki sime li bizin pran si ena enn irzans. Margaret ti reisi sap so lavi parski li ti prepar li.

12. Kifer nou bizin swiv bann instriksion ki nou gagne pou nou sekirite?

¹² Pou ki nou res an sekirite, bann lotorite kapav demann nou pou pa sorti kot nou apre enn sertenn ler. Zot kapav osi demann nou pou kit nou lakaz, ouswa pou fer bann lezot kitsoz. Sertin dimounn tarde pou obeir sa bann instriksion-la parski zot pa anvi abandonn zot bann dibien. Me kouma bann Kretien bizin reazir? Labib dir nou: “Akoz Lesegner, aksepte lotorite bann institision imin; mem lotorite Anperer ki ena lotorite siprem; lotorite bann gouverner, ki li finn avoye.” (1 Pier 2:13, 14) Lorganizasion Zeova osi donn nou bann instriksion pou ki nou res an sekirite. Bien souvan, lorganizasion rapel nou ki nou bizin donn bann ansien, bann linformasion kouma nou nimero telefonn ek nou ladres, pou ki zot kapav kontakte nou kan ena enn irzans. Eski to’nn fer sa? Nou kapav gagn bann linstriksion pou kit nou lakaz, ouswa pou res kot nou. Nou kapav osi gagn bann linstriksion lor kouma nou pou gagn bann kitsoz debaz kouma manze, bwar, ek medsinn, ek osi lor kouma ek kan nou kapav ed lezot. Si nou pa obeir sa bann linstriksion-la, nou kapav met nou lavi ek lavi bann ansien an danze. Pa bliye ki sa bann zom-la pe vey lor nou! (Ebre 13:17) Margaret dir: “Mo’nn reisi sap mo lavi parski mo’nn swiv bann instriksion ki lorganizasion ek bann ansien inn done.”

13. Ki kitsoz inn ed bann Kretien pou gard zot lazwa ek res anpe mem si zot inn bizin kit zot lakaz?

¹³ Boukou frer ek ser ki’nn kit zot lakaz akoz enn katastrof ouswa enn lager, inn fer zot best pou adapte zot ar zot nouvo sitiasion, ek zot inn fer zot maximum pou kontign servi Zeova. Parey kouma bann Kretien dan premie siek ki ti bizin kit zot lakaz akoz persekision, zot pe kontign “proklam Bonn Nouvel.” (Zistwar Bann Zapot 8:4) Predikasion inn ed zot pou res konsantre lor Rwayom Bondie, olie ki zot konsantre zot lor zot bann difikilte. Gras-a sa, zot inn reisi gard zot lazwa ek res anpe.

LAPE PANDAN PERSEKISION

14. Ki lefe persekision kapav ena lor nou lape?

¹⁴ Kan nou gagn persekision, nou kapav perdi boukou kitsoz ki ed nou pou res anpe. Nou bien kontan kan nou lib pou zwenn nou bann frer ek ser, pou prese, ek pou fer bann kitsoz ki nou abitie fer toulezour san ki nou per ki bann lotorite aret nou. Si nou nepli kapav fer sa bann kitsoz-la, nou kapav strese ek nou per seki kapav arive. Li normal ki nou ena sa bann santiman-la. Selman, nou bizin fer bien atansion. Kifer? Parski Zezi ti dir ki sertin kapav abandonn Zeova akoz persekision. (Zan 16:1, 2) Alor, kouma nou kapav res anpe malgre bann persekision?

15. Kifer fode pa nou per persekision? (Zan 15:20; 16:33)

¹⁵ Labib dir: “Tou dimoun ki vremem oule viv dan Lekris pou gagn persekision dan zot lavi.” (2 Tim. 3:12) Kan nou laktivite ti interdi dan so pei, enn frer ki apel Andrei ti gagn difikilte pou aksepte ki tou bann Temwin ti pou gagn persekision. Li ti dir: ‘Ena tro boukou Temwin dan nou pei. Kouma bann lotorite pou kapav aret nou tou?’ Me sa fason panse-la pa ti ed Andrei pou gagn lape. Okontrer, li ti plis strese. Parkont, bann lezot frer ti fer Zeova konfians ek zot ti kone ki bann lotorite ti kapav aret zot. Akoz sa, zot ti mwin strese ki Andrei. Alor, Andrei ti fer zefor pou pans parey kouma zot ek li ti fer Zeova full konfians. Bien vit, li ti santi li anpe, ek aster-la, li zwaye mem si li ankor pe bizin fer fas ar boukou difikilte. Parey kouma Andrei, nou osi nou kapav anpe ek res zwaye malgre bann difikilte. Kifer? Parski mem si Zezi inn dir ki nou pou gagn bann persekision, li’nn osi dir nou ki nou kapav res fidel.​—Lir Zan 15:20; 16:33.

16. Kan nou gagn persekision, ki bann instriksion nou bizin swiv?

¹⁶ Kan nou laktivite interdi ouswa lor restriksion, kitfwa nou pou gagn bann instriksion ar biro nasional ek ar bann ansien. Zot donn nou sa bann instriksion-la pou protez nou, pou nou kontign gagn manze spiritiel, ek pou ki nou kapav kontign fer nou best pou prese. Fer to maximum pou swiv tou bann instriksion ki to gagne, mem si to pa touletan konpran kifer pe donn sa bann instriksion-la. (Zak 3:17) Anplis, fode zame to donn bann linformasion lor nou bann frer ek ser, ouswa lor bann laktivite ki fer dan bann lasanble, ar bann dimounn ki pa gagn drwa gagn sa bann linformasion-la.​—Ekle. 3:7.

17. Parey kouma bann zapot dan premie siek, ki nou bien deside pou fer?

¹⁷ Enn parmi bann rezon prinsipal kifer Satan pe lager kont pep Bondie, se parski nou “bann disip Zezi.” (Rev. 12:17) Fode pa to les Satan ek so lemond fer twa gagn per. Si nou kontign prese ek ansegn bann dimounn, mem si nou pe gagn persekision, sa pou fer nou gagn lazwa ek lape. Dan premie siek, bann lotorite Zwif ti donn bann zapot lord pou aret prese. Kanmem sa, sa bann zom fidel-la inn swazir pou obeir Bondie. Zot ti kontign prese ek sa ti donn zot boukou lazwa. (Zist. 5:27-29, 41, 42) Biensir, kan nou laktivite lor restriksion, nou bizin fer bien atansion kan nou prese. (Mat. 10:16) Me si nou fer nou maximum, nou pou gagn lape parski nou pe fer Zeova plezir ek parski nou pe partaz enn mesaz ki kapav sap lavi bann dimounn.

“BONDIE LAPE POU RES AVEK ZOT”

18. Ar kisann-la nou kapav gagn vre lape?

¹⁸ Nou kapav sir ki mem si nou pas dan bann sitiasion difisil, nou kapav gagn lape. Dan sa bann moman-la, nou bizin rapel ki lape ki nou bizin, se lape Bondie, setadir lape ki zis Zeova tousel kapav donn nou. Alor, kont lor Zeova kan ena bann sitiasion kouma enn lepidemi, enn katastrof, ouswa persekision. Res pros ar so lorganizasion. Get pli devan ek mazinn sa zoli lavenir ki pe atann twa la. Kan to fer sa, “Bondie lape pou res avek [twa].” (Fil. 4:9) Dan prosin lartik, nou pou gete kouma nou kapav ed nou bann frer ek ser ki pe gagn persekision pou ki zot osi zot gagn lape Bondie.