“Grand jour Jéhovah bien pré”
“Grand jour Jéhovah bien pré. Li bien pré ek li pé vini vite-vite.”—Tsephania 1:14.
1, 2. (a) Ki jour special bann chrétien pé attann? (b) Ki question nou bizin posé, ek kifer?
Enn jeune fille bien content parski li pé attann avek impatience jour so mariage. Enn femme enceinte pé prepare-li; li aussi li pé attann jour ki so ti-baba pou né. Enn travailleur ki bien fatigué, pé attann avek impatience kan so bann vacance pou commencé. Ki sa trois-la ena en commun? Toulé-trois pé attann enn jour special—enn jour ki pou ena enn grand l’effet dan zot la-vie. Zot tou ena bann sentiment bien fort, mais zot sentiment different. Sa jour ki zot pé attann-la pou vini, ek zot souhaité ki kan li arrivé, zot pou pré pou sa.
2 Zordi, bann vrai chrétien aussi pé attann avek impatience enn jour special. Zot pé attann grand “jour Jéhovah.” (Isaïe 13:9; Yoël 2:1; 2 Pierre 3:12) Ki été sa “jour Jéhovah” ki pou vini-la, ek kan li pou vini, ki l’effet li pou ena lor bann dimoune? Surtout, couma nou kapav sur ki nou pou paré kan li pou arrivé? Li bien important ki nou rod reponse sa bann question-la asterla, parski nou ena bann preuve ki sa bann parole-la zot vrai: “Grand jour Jéhovah bien pré. Li bien pré, ek li pé vini vite-vite.”—Tsephania 1:14.
“Grand jour Jéhovah”
3. Ki été “grand jour Jéhovah”?
3 Ki été “grand jour Jéhovah”? Partout dan la Bible, l’expression “jour Jéhovah” concerne bann lepok special kan Jéhovah finn amenn so jugement lor so bann l’ennemi ek kan Li finn glorifié so grand nom. Bann dimoune infidel ki ti reste dan Juda ek Jérusalem, ek bann habitant Babylone ek l’Égypte ki ti faire dominere ar lezot, zot tou ti faire face ar “jour Jéhovah” kan Li ti envoye so jugement lor zot. (Isaïe 2:1, 10-12; 13:1-6; Jérémie 46:7-10) Pourtant, pli grand “jour Jéhovah” pankor vini. C’est “jour” kot Jéhovah pou envoye so jugement lor bann dimoune ki finn sali so nom. Sa jour-la pou commencé avek destruction “Babylone la Grande,” setadir tou bann fausse religion ki ena lor la terre, ek li pou fini kan le reste sa mauvais lé-monde-la pou detruire dan la guerre Har–Maguédôn.—Révélation 16:14, 16; 17:5, 15-17; 19:11-21.
4. Kifer la plupart dimoune bizin peur jour Jéhovah ki pé vinn vite?
4 Ki bann dimoune conscient ou non ki jour Jéhovah pé vini, zot bizin peur sa jour-la. Kifer? Guette ki Jéhovah reponn a travers prophete Tsephania: “Sa jour-la, li enn jour grand colere, enn jour malheur ek la peur, enn jour cyclone ek destruction, enn jour kot faire noir ek kot pena la lumiere ditou, enn jour kot ena nuage ek enn brouillard epais.” Oui, sa jour-la pou vrai-mem faire peur! En plus, prophete Tsephania dire: “Mo pou faire bann dimoune tombe dan malheur . . . parski c’est kont Jéhovah ki zot finn faire peché.”—Tsephania 1:15, 17.
5. Ki l’attitude positif plusieurs million dimoune ena lor jour Jéhovah, ek kifer?
5 Mais ena plusieurs million dimoune ki pé attann avek impatience kan jour Jéhovah pou vini. Kifer? Parski zot koné ki sa jour-la pou enn jour kot bann dimoune droite pou sauvé ek pou gagne la delivrance. C’est enn jour kot Jéhovah pou glorifié Li-mem dan enn fason extraordinaire ek so nom pou sanctifié. (Yoël 3:16, 17; Tsephania 3:12-17) Maniere ki bann dimoune pé amenn zot la-vie zordi, c’est sa ki pou faire zot soit peur sa jour-la ou-soit attann sa jour-la avek impatience. Couma ou considere sa jour ki pé vini-la? Eski ou pré pou sa? Parski sa jour-la derriere la porte, eski depuis asterla-mem sa pé influence ou la-vie toulé-jour?
“Pou ena bann moqueur avek zot moquerie”
6. Couma la plupart dimoune considere “jour Jéhovah,” ek kifer bann vrai chrétien pa etonné par sa?
6 Malgré ki la fin pé kosté, la plupart dimoune lor la terre pa pé prend compte ki “jour Jéhovah” pé vini. Zot bouffonne bann dimoune ki pé averti zot ki sa jour-la pré pou vini. Bann vrai chrétien pa etonné par sa. Zot rappel l’avertissement ki l’apotre Pierre ti donné: “Zot konn sa avant tou: ki dan dernier jour pou ena bann moqueur avek zot moquerie, ki pou agir dapré zot prop desir ek ki pou dire: ‘Kot sa presence ki ti promette-la? Oui, depuis la mort nou bann ancetre, tou kitsoz pé contigné pareil couma zot ti été depuis commencement creation.’ ”—2 Pierre 3:3, 4.
7. Ki pou aide nou garde bien dan nou l’esprit ki jour Jéhovah pré pou vini?
7 Ki pou aide nou pou resisté kont enn l’attitude negatif coumsa ek garde bien dan nou l’esprit ki sa jour-la pré pou vini? Pierre dire nou: “Par enn rappel, mo pé reveille zot capacité pou reflechi ki deja clair, pou ki zot mazinn bann parole ki bann saint prophete ti dire longtemps ek commandement nou Seigneur ek Sauveur, ki zot bann zapotre finn transmette.” (2 Pierre 3:1, 2) Kan nou prend compte bann l’avertissement prophetik, sa pou aide nou pou ‘reveille nou capacité pou reflechi ki deja clair.’ Kitfois nou finn tann sa bann rappel-la plusieurs fois, mais li bien important ki asterla, plus ki jamais, nou contigne prend compte sa bann l’avertissement-la.—Isaïe 34:1-4; Luc 21:34-36.
8. Kifer beaucoup dimoune pa prend compte bann rappel ki ena dan la Bible?
8 Kifer certain pa prend compte sa bann rappel-la? Guette ki Pierre contigne dire: “Pareil couma zot envie, zot finn blié ki par parole Bondié ti ena bann lé-ciel depuis lepok longtemps ek ti ena enn la-terre ki ti sorti net dan de l’eau ek ki ti au milieu de l’eau; ek par sa bann moyen-la, le monde dan sa lepok-la ti detruire kan li ti couvert ar de l’eau.” (2 Pierre 3:5, 6) Oui, ena certain ki pa content ki jour Jéhovah arrivé. Zot pa envie ki nanyin vinn derange zot la-vie. Zot pa envie rann compte Jéhovah pou fason egoïste ki zot pé vive! Pareil couma Pierre ti dire, zot pé vive “dapré zot prop desir.”
9. Ki l’attitude bann dimoune dan lepok Noé ek Lot ti ena?
9 A cause seki “zot envie,” sa bann moqueur-la prefere pa prend compte ki Jéhovah finn deja faire bann jugement kont bann dimoune dan le passé. Jésus Christ ek l’apotre Pierre toulé-deux ti koz lor deux jugement coumsa, jugement dan “lepok Noé” ek dan “lepok Lot.” (Luc 17:26-30; 2 Pierre 2:5-9) Avant deluge, bann dimoune pa ti prend compte l’avertissement ki Noé ti donne zot. Li pareil aussi dan lepok Sodome ek Gomorrhe. Lot “ti coumadir enn kikenn ki ti pé badiné” pou so bann gendre.—Genèse 19:14.
10. Ki Jéhovah pensé lor bann dimoune ki pa prend compte bann l’avertissement?
10 Li pareil aussi zordi. Pourtant, guetté ki Jéhovah pensé lor bann dimoune ki pa prend compte bann l’avertissement: “Mo pou prend compte bann zom ki pa bougé kot zot été couma di-vin ki’nn laissé lor so la-mare ki’nn deposé dan fond ek ki pé dire dan zot leker: ‘Jéhovah pa pou faire seki bon ek Li pa pou faire seki mauvais.’ Ek lezot pou kokin zot richesse, ek zot lakaz pou vinn enn place desert. Zot pou range bann lakaz, mais zot pa pou reste ladan; ek zot pou plante bann pié raisin, mais zot pa pou boire di-vin sa bann raisin-la.” (Tsephania 1:12, 13) Bann dimoune kapav contigne faire seki zot habitué faire toulé-jour, mais zot pa pou gagne okenn bienfait permanent pou travail dur ki zot faire. Kifer? Parski jour Jéhovah pou arrive enn sel coute, ek n’importe ki richesse ki kitfois zot finn ramassé, pa pou kapav sauve zot.—Tsephania 1:18.
“Contigne attann li”
11. Ki conseil nou bizin rappel?
11 Nou pa’lé faire pareil couma le monde ki autour nou. Au contraire, nou rappel conseil ki prophete Habaqouq ti donné: “Vision-la encore pou le temps fixé, ek li pé contigné vini vite-vite ziska la fin, ek li pa pou koz menti. Mem si li tardé, contigne attann li; parski pena doute ki li pou realisé. Li pa pou en retard.” (Habaqouq 2:3) Mem si sa jour-la parette pé tardé—kitfois nou ena sa l’impression-la parski nou imparfait—nou bizin rappel ki Jéhovah pa tardé pou realise so promesse. So jour pou vinn exactement dan l’heure, enn l’heure ki bann dimoune pa pé attann.—Marc 13:33; 2 Pierre 3:9, 10.
12. Ki l’avertissement Jésus ti donné, ek couma bann disciple ki reste fidel ti montré ki zot different?
12 Jésus ti montré l’importance pou attann jour Jéhovah ek li ti averti ki mem certain parmi so bann disciple pou nepli prend compte ki la fin pré pou vini. Concernant sa bann disciple-la, li ti dire: “Si jamais sa mauvais esclave-la dire dan so leker: ‘Mo maitre pé tardé,’ ek li commence batte so bann camarade ki esclave couma li, ek li al mangé-boire avek bann soulard, maitre sa esclave-la pou vinn enn jour ki li pa attann ek dan enn l’heure ki li pa koné, ek li pou donne li enn punition bien severe.” (Matthieu 24:48-51) Parkont, group l’esclave fidel et avisé pa blié ki la fin pré pou vini. Sa group-la contigne veillé ek montré ki li’nn paré. Jésus inn mette li en charge “tou so bann di-bien” ki lor la terre.—Matthieu 24:42-47.
Li important ki nou pa blié ki la fin pré
13. Couma Jésus ti montré so bann disciple ki li ti important pou zot pa blié ki la fin ti pré pou arrivé?
13 Li ti bien important ki bann chrétien premier siecle pa blié ki la fin ti bien pré. Zot ti bizin degazé sauvé ek quitte Jérusalem kan zot ti trouve sa la-ville-la ‘entouré par bann l’armée ki ti pé campé’ tout autour. (Luc 21:20, 21) Sa ti arrivé en l’an 66 n.l. Remarké couma Jésus ti montré ki li important ki so bann disciple dan sa lepok-la pa blié ki la fin ti pré pou vini. Li ti dire: “Sa dimoune ki la-haut lor so lakaz-la bizin pa desann pou prend di-bien ki li ena dan so lakaz; ek sa dimoune ki dan karo-la bizin pa retourne dan so lakaz pou prend so manteau.” (Matthieu 24:17, 18) Mem si l’histoire montré ki Jérusalem inn resisté pendant encore quatre an, kifer bann chrétien pa ti bizin tardé pou prend compte conseil Jésus en l’an 66 n.l.?
14, 15. Kifer li ti bien important ki bann chrétien premier siecle agir sans tardé kan zot ti trouve Jérusalem entouré par bann l’armée?
14 Li vrai ki c’est en l’an 70 n.l. ki l’armée romain finn detruire Jérusalem, mais pendant sa quatre an avant-la, pa ti ena ditou la-paix. Pendant sa bann l’année-la, ti ena la violence ek beaucoup dimoune ti mort. Enn historien dire ki dan sa lepok-la dan Jérusalem ti ena “enn la-guerre civil ki ti faire bien peur ek ki ti faire beaucoup di-sang coulé, ek bann dimoune ti pé agir sans pitié ek dan enn fason horrible.” Ti pé prend bann jeune-gens pou fortifié muraille la ville, pou prend bann zarme ek pou servi dan l’armée. Zot ti pé faire bann l’exercice militaire toulé-jour. Dan sa lepok-la, ti ena aussi bann disposition ki pa ti raisonnable ek bann ki pa ti d’accord avek sa, ti considere zot couma bann traitre. Si bann chrétien ti reste pli longtemps dan Jérusalem, zot ti pou trouve-zot dan enn situation bien dangereux.—Matthieu 26:52; Marc 12:17.
15 Li bon nou remarké ki Jésus ti dire ki “bann ki [ti] dan Judée,” ek pa zis dan Jérusalem, ti bizin commence sauvé. Sa ti bien important parski dé-trois mois apré ki zot ti quitte Jérusalem, l’armée romain ti ré-vinn laguerre. Premierement, li ti prend Galilée en 67 n.l., ek enn an apré, li ti prend bann la-ville Judée enn derriere lot. A cause sa, ti ena beaucoup souffrance partout dan pays. Li ti vinn bien difficile aussi pou n’importe ki Juif sorti dan Jérusalem-mem. Ti ena bann garde kot la porte la ville, ek si enn kikenn ti rod sauvé, bannla ti accuse li ki li pé abandonne bann Juif pou al soutenir bann Romain.
16. Ki l’attitude bann chrétien premier siecle ti bizin ena pou gagne la vie sauve dan zot lepok difficile?
16 Kan nou considere tou sa bann kitsoz-la, nou comprend kifer Jésus ti encourage so bann disciple pou pa blié ki la fin ti bien pré. Bann chrétien ti bizin pré pou faire bann sacrifice ek pa laisse-zot distraire par bann kitsoz materiel. Zot ti bizin kapav “dire adieu ar tou [zot] di-bien” pou obeir l’ordre ki Jésus ti donné. (Luc 14:33) Bann ki ti obeir dé-suite ek ti sauvé pou al lot coté la riviere Jourdain, ti gagne la vie sauve.
Rappel toujours ki la fin bien pré
17. Kifer nou bizin garde bien dan nou l’esprit ki la fin pré?
17 Bann prophetie la Bible montré ki nou pé vive lepok la fin. Plus ki avant, nou bizin garde bien dan nou l’esprit ki la fin pré. Dan lepok la paix, enn soldat pa senti mem tension ek mem danger ki ena dan lepok la guerre. Mais, si a cause sa sentiment-la li pa trouve l’importance pou reste lor so garde ek ki enn coup appel li pou al laguerre, kitfois li pa pou pré ek sa pou ena bann consequence bien grave. Li pareil aussi pou nou ki pé faire enn la-guerre spirituel zordi. Si nou blié ki la fin bien pré, kitfois nou pa pou pré pou defann nou-mem kont bann l’attak ki vinn lor nou. Finalement, jour Jéhovah kapav vinn lor nou sans ki nou attann. (Luc 21:36; 1 Thessaloniciens 5:4) Si ena certain ki finn ‘vire zot ledo ar Jéhovah ek finn arrete suive Li,’ inn arrive l’heure ki zot ré-rod Li.—Tsephania 1:3-6; 2 Thessaloniciens 1:8, 9.
18, 19. Ki pou aide nou pou garde bien dan nou l’esprit “presence jour Jéhovah”?
18 Nou pa etonné ki l’apotre Pierre ti encourage nou pou garde bien dan nou l’esprit “presence jour Jéhovah”! Couma nou kapav faire sa? Enn fason c’est kan nou faire “bann action ki montré [nou] conduite saint ek [nou] l’attachement pou Bondié.” (2 Pierre 3:11, 12) Si nou reste bien occupé dan sa bann activité-la, sa pou aide nou pou attann avek impatience kan “jour Jéhovah” pou vini. Mot grec ki finn traduire par ‘garde touletan dan nou l’esprit’ vedir “acceleré.” En realité, nou pa kapav faire le temps ki resté ziska ki jour Jéhovah vini, passe pli vite. Mais seulement, sa lé-temps-la pou parette pé passe pli vite, si nou bien occupé dan service Bondié.—1 Corinthiens 15:58.
19 Si nou medite lor Parole Bondié ek nou reflechi lor so bann rappel, sa aussi pou aide nou pou ‘attann avek impatience (attann ek accelere) jour Jéhovah;’ oui, nou pou “contigne attann sa.” (2 Pierre 3:12, The Amplified Bible; The New Testament, par William Barclay) Dan bann rappel ki ena dan la Bible, ena beaucoup prophetie ki pa zis annoncé ki jour Jéhovah pé vini, mais ki annonce aussi bann grand benediction ki bann dimoune ki ‘pé attann Jéhovah’ pou gagné.—Tsephania 3:8.
20. Ki conseil nou bizin prend compte?
20 Nou pé vive vrai-mem enn lepok kot nou tou nou bizin prend compte sa conseil ki nou gagné par prophete Tsephania-la: “Avant ki grand colere Jéhovah vinn lor zot, avant ki jour colere Jéhovah vinn lor zot, rod Jéhovah, zot tou bann dimoune humble lor la terre, ki finn mette en pratik So jugement. Rod la justice, rod l’humilité. Kitfois lerla, zot pou sapé kan jour colere Jéhovah vini.”—Tsephania 2:2, 3.
21. Ki bann serviteur Bondié pou bien decidé pou faire pendant l’année 2007?
21 Alors, text ki finn choisir pou l’année 2007, li bien approprié. Sa text-la dire: “Grand jour Jéhovah bien pré.” Bann serviteur Bondié sur ki sa jour-la “bien pré, ek ki li pé vini vite-vite.” (Tsephania 1:14) “Li pa pou en retard.” (Habaqouq 2:3) Alors ki nou pé attann sa jour-la, fodé jamais nou blié dan ki lepok nou pé vive, ek nou bizin reste lor nou garde ek contigne rappel ki dan encore enn tigit lé-temps, sa bann prophetie-la pou konn enn l’accomplissement final.
Eski ou kapav reponn?
• Ki été “grand jour Jéhovah”?
• Kifer beaucoup dimoune pa prend compte ki la fin bien pré?
• Kifer bann chrétien dan premier siecle ti bizin agir ek pa blié ki la fin ti bien pré?
• Couma eski nou kapav bien conscient ki la fin pré?
[L’encadré, page 12]
Text pou l’année 2007: “Grand jour Jéhovah bien pré.” —Tsephania 1:14.
[Zimage, page 9]
Pareil couma dan lepok Noé, Jéhovah pou faire so jugement vinn lor bann moqueur sans ki zot attann
[Zimage, page 10]
Bann chrétien ti bizin agir sans tardé kan zot ti trouve Jérusalem ‘entouré par bann l’armée ki ti pé campé’