Parole Jéhovah vivant

APEPRÉ 77 an inn passé depuis ki bann Juif inn sorti en exil dan Babylone, ek inn retourne dan zot pays. Sa faire 55 an ki gouverneur Zorobabel inn reconstruire temple. Bann Juif ti retourné surtout pou retabli vrai l’adoration dan Jérusalem. Seulement, zot mank zèle pou l’adoration Jéhovah. Zot bien bizin enn l’encouragement, ek c’est sa-mem ki livre premier Chroniques pou donne zot.

Apart la liste bann descendant ki ena dan premier livre Chroniques, livre-la couvert enn period apepré 40 an, depuis la mort le roi Saül ziska la mort le roi David. Beaucoup dimoune pensé ki c’est pretre Ezra ki’nn ecrire sa livre-la en 460 a.n.l. Premier livre Chroniques, li utile pou nou parski li aide nou pou comprend pli bien couma l’adoration dan temple ti passé, ek li donne nou detail lor bann ancetre Messie. So message forme partie dan Parole inspiré Bondié ek sa fortifié nou la-foi ek aide nou pou comprend pli bien la Bible.—Hébreux 4:12.

ENN LA-LISTE IMPORTANT BANN NOM

(1 Chroniques 1:1–9:44)

Sa la-liste detaillé bann descendant ki Ezra inn etabli-la, li necessaire pou au moins trois raison: pou faire sur ki zis bann ki ena sa droit-la kapav servi couma pretre, pou permette konn l’heritage chaque tribu, ek pou garde detail descendance ki amenn ziska Messie. Sa la-liste-la faire bann Juif remonte bien loin dan zot l’histoire ziska premier zom. Ena dix generation entre Adam ek Noé, ek encore dix generation amenn nou ziska Abraham. Apré ki li’nn mentionne nom bann garson Yishmaël, bann garson ki Abraham ti gagné avek so concubine Qetoura, ek bann garson Ésaü, Ezra donne bann detail lor descendance 12 garson Israël.—1 Chroniques 2:1.

Ezra donne bien detail lor tribu Juda parski c’est zot bann descendant ki vinn le roi a partir David. Ena 14 generation depuis Abraham ziska David, ek encore 14 generation ziska ki deporte bann Juif, ek amenn zot Babylone. (1 Chroniques 1:27, 34; 2:1-15; 3:1-17; Matthieu 1:17) Apré sa, Ezra donne enn la-liste descendant bann tribu ki dan coté l’est la riviere Jourdain, ek apré la liste descendant tribu Lévi. (1 Chroniques 5:1-24; 6:1) Ensuite, Ezra faire enn resumé lor descendant certain tribu ki dan coté l’ouest la riviere Jourdain, mais li donne plus detail lor bann descendant Benjamin. (1 Chroniques 8:1) Ezra donne aussi la liste bann premier Juif ki vinn reste dan Jérusalem apré ki zot sorti en captivité dan Babylone.—1 Chroniques 9:1-16.

Reponse pou bann question biblik:

1:18—Kisannla ti papa Shélah: Qaïnân ou-soit Arpakshad? (Luc 3:35, 36) Arpakshad ti papa Shélah. (Genèse 10:24; 11:12) Mot “Qaïnân” ki nou trouvé dan Luc 3:36, li kitfois enn deformation mot “Chaldéens.” Alors, dan text original, kitfois ti ecrire, “garson Arpakshad ki ti Chaldéen.” Ou-soit li possible ki Qaïnân ek Arpakshad, zot enn sel ek mem dimoune. Nou bizin aussi pa blié ki dan certain manuscrit nou pa trouve expression “garson Qaïnân.”—Luc 3:36, note.

2:15—Eski David ti septieme garson Jessé? Non. Jessé ti ena huit garson, ek David ti pli jeune. (1 Samuel 16:10, 11; 17:12) Li parette ki enn garson Jessé ti mort sans zenfant. Ezra pa mentionne li parski sa garson-la pa ti pou affecté la liste bann descendant.

3:17—Kifer Luc 3:27 presente Shéaltiel ki ti garson Yekonia couma garson Néri? Yekonia ti papa Shéaltiel. Mais, li parette ki Néri ti marié so tifi avek Shéaltiel. Luc ti presente gendre Néri couma garson Néri pareil couma li ti presente Joseph couma garson Héli, papa Marie.—Luc 3:23.

3:17-19—Couma eski Zorobabel, Pedaïa ek Shéaltiel ti tombe famille? Zorobabel ti enn garson Pedaïa, ki li, ti frere Shéaltiel. Pourtant, parfois la Bible presente Zorobabel couma garson Shéaltiel. (Matthieu 1:12; Luc 3:27) Kitfois Pedaïa ti mort ek c’est Shéaltiel ki ti elevé Zorobabel. Ou-soit kitfois Shéaltiel ti mort sans ki li gagne okenn zenfant, ek lerla Pedaïa ti marié avek veuve Shéaltiel, so frere, ek apré zot mariage, zot ti gagne enn premier garson, Zorobabel.—Deutéronome 25:5-10.

5:1, 2—Joseph ti gagne droit premier-né. Ki sa ti representé pou li? Sa ti faire Joseph gagne double part l’heritage. (Deutéronome 21:17) C’est coumsa ki li ti vinn papa deux tribu—Éphraïm ek Manassé, alors ki bann lezot garson Israël ti vinn papa enn sel tribu.

Bann leson pou nou:

1:1–9:44. La liste bann ancetre ek descendant bann dimoune ki finn vrai-mem existé, sa li enn preuve ki tou bann disposition ki concerne vrai l’adoration, zot basé lor la realité, pa lor bann zistoire.

4:9, 10. Dan enn la-priere sincere, Yabets ti demann Jéhovah faire li reussi agrandi so territoire dan la paix. Coumsa ti pou ena place pou pli beaucoup dimoune ki adore Bondié. Jéhovah ti ecoute so la-priere. Nou aussi, nou bizin faire bann la-priere sincere pou ki bann adorateur Jéhovah augmenté, pendant ki nou participe avek zèle dan travail pou faire bann disciple.

5:10, 18-22. Dan lepok le roi Saül, bann tribu ki ti trouve dan l’est la riviere Jourdain ti remporte la victoire lor bann Hagrite mem si bannla ti deux fois pli beaucoup ki zot. Zot ti reussi faire sa parski bann soldat ki dan sa bann tribu-la ti mette zot confiance en Jéhovah ek zot ti rod so l’aide. Anou ena enn confiance total en Jéhovah alors ki nou lutté dan sa la-guerre spirituel kont bann l’ennemi ki beaucoup plus ki nou-la.—Éphésiens 6:10-17.

9:26, 27. Bann Lévite ki ti portier ti ena enn travail ki ti donne zot enn grand responsabilité. Zot ti gagne la clé ki ti donne accès dan bann partie temple ki ti saint. Toulé-jour zot ti faire zot travail couma bizin. Nou, nou finn gagne responsabilité pou joinde maximum dimoune dan nou territoire ek pou aide zot pou vinn adore Jéhovah. Eski nou pa bizin, pareil couma sa bann portier-la, montré ki kapav compte lor nou?

DAVID DIRIGÉ EN TANT KI LE ROI

(1 Chroniques 10:1–29:30)

Partie historik premier livre Chroniques commence avek la mort le roi Saül ek so trois garson dan la guerre kont bann Philistin lor mont Guilboa. David, garson Jessé, vinn le roi lor tribu Juda. Bann zom ki sorti dan tou bann tribu vinn Hébrôn ek faire li vinn le roi lor Israël entier. (1 Chroniques 11:1-3) Inpé lé-temps apré sa, li prend la ville Jérusalem. Plitar, bann Israélite amenn l’arche de l’alliance dan Jérusalem ‘zot crié dan la joie, avek son cor, ek zot joué bann l’instrument la musik a corde ek la harpe bien fort.’—1 Chroniques 15:28.

David faire Jéhovah konn so desir pou construire enn lakaz pou Li. Jéhovah garde sa privilege-la pou Salomon, mais li faire enn l’alliance avek David pou enn royaume. Jéhovah faire David gagne bann victoire enn lor lot dan campagne ki li amené kont bann l’ennemi Israël. Soixante-dix mille dimoune mort a cause enn recensement ki Jéhovah pa ti autorisé. Apré ki en ange inn donne l’ordre pou construire enn l’autel pou Jéhovah, David acheté enn boute la terre avek Ornân, enn Yebousite. Li commence faire “enn quantité preparation” dan sa l’endroit-la pou construire enn lakaz pou Jéhovah ki “mille fois pli joli” ki lezot batiment ki existé. (1 Chroniques 22:5) David organise travail bann Lévite, ek c’est dan premier livre Chroniques ki nou trouve plus detail lor la, ki dan n’importe ki lot livre la Bible. Le roi ek le peuple faire beaucoup contribution pou temple. Apré ki li’nn regné pendant 40 an, David mort ‘satisfait ar la vie, la richesse ek la gloire, ek Salomon so garson commence regne dan so place.’—1 Chroniques 29:28.

Reponse pou bann question biblik:

11:11—Kifer li dire ki quantité dimoune ki ti touyé ti 300, alors ki 2 Samuel 23:8 dire ki ti ena 800? Yashobéam, ou-soit Yosheb-Bashébeth ti chef parmi sa trois zom pli fort ki David ti ena-la. Lezot deux zom fort-la ti appel Éléazar ek Shamma. (2 Samuel 23:8-11) Li possible ki ena enn difference dan bann chiffre parski sa deux verset-la pé koz lor deux cas different kot Yashobéam inn remporte la victoire.

11:20, 21—Ki position Abishaï ti ena par rapport ar sa trois zom pli fort ki David ti ena-la? Abishaï pa ti enn parmi sa trois zom-la. Mais, couma nou trouvé dan 2 Samuel 23:18, 19, li ti chef lor 30 soldat ek li-mem ki bann dimoune ti plus koné parmi sa trente-la. Zot ti konn li autant ki zot ti konn sa trois zom pli fort-la, parski li ti deja gagne enn grand la-victoire pareil couma Yashobéam.

12:8—Dan ki sens eski figure bann soldat dan tribu Gad ti couma “figure bann lion”? Sa bann zom ki ti ena bien courage-la ti avek David dan desert. Zot cheveux ti’nn vinn longue. Zot la-tête ti faire zot parette feroce couma bann lion.

13:5—Ki été “fleuve l’Égypte”? Certain inn pensé ki c’est enn la-riviere ki sorti dan la riviere Nil. Mais, pli beaucoup pensé ki c’est plutot “ouadi l’Égypte,” setadir enn longue vallée ki trouve lor bord sud-ouest la Terre promise.—Nombres 34:2, 5; Genèse 15:18.

16:30—Ki vedir “bann grand douleur a cause” Jéhovah? Mot “douleur”servi ici pou montré dan enn sens symbolik la crainte ek grand respé ki nou bizin donne Jéhovah.

16:1, 37-40; 21:29, 30; 22:19—Ki bann disposition concernant l’adoration ti reste en vigueur depuis jour ki ti amenn l’arche de l’alliance dan Jérusalem ziska ki construire temple? Kan David ti amenn l’Arche dan Jérusalem ek ti mette li dan la tente ki li ti’nn faire, sa ti faire beaucoup lé-temps ki l’Arche ti nepli dan tabernacle. Apré ki ti’nn amenn l’Arche dan Jérusalem, li ti reste là-mem dan sa la-tente-la. Tabernacle ti trouve dan Guibéôn, kot grand pretre Tsadoq ek so bann frere ti offert bann sacrifice ki la Loi ti demandé. Sa disposition-la ti contigné ziska ki termine construction temple Jérusalem. Kan temple ti paré, ti tire tabernacle Guibéôn ek ti amenn li Jérusalem, ek ti mette l’Arche dan le Très-Saint dan temple.—1 Rois 8:4, 6.

Bann leson pou nou:

13:11. Au lieu ki nou en colere ar Jéhovah ek faire Li bann reproche kan nou pa reussi faire seki nou ti envie, nou bizin analyse la situation ek essaye koné kifer nou pa finn reussi. Surement David ti faire sa. Li ti tire leson ar so erreur ek plitar li ti reussi amenn l’Arche dan Jérusalem dan fason ki ti bizin.a

14:10, 13-16; 22:17-19. Nou bizin toujours prié Jéhovah ek rod so direction avant ki nou faire n’importe ki kitsoz ki kapav affecté nou spiritualité.

16:23-29. L’adoration ki nou donne Jéhovah bizin occupe premier place dan nou la-vie.

18:3. Jéhovah toujours realise so bann promesse. Par moyen David, Li finn realise so promesse pou donne descendance Abraham pays Canaan en entier, “depuis la riviere l’Égypte ziska grand la-riviere, la riviere l’Euphrate.”—Genèse 15:18; 1 Chroniques 13:5.

21:13-15. Jéhovah ti donne l’ordre so ange pou arrete sa l’epidemie-la parski kan so peuple souffert, sa faire Li kitsoz. Vrai-mem “Li ena misericorde en abondance.”b

22:5, 9; 29:3-5, 14-16. Mem si Jéhovah pa ti donne li mission pou construire temple, David ti faire bann don en quantité. Kifer? Parski li ti reconette ki li ti’nn gagne tou seki li ti possedé a cause bonté Jéhovah. La reconnaissance bizin pousse nou aussi pou faire bann don.

24:7-18. David ti etabli bann pretre en 24 division, ek sa ti toujours en vigueur kan ange Jéhovah ti apparette ar Zekaria, papa Jean Baptiste pou annonce li naissance Jean. Dan sa moment-la, ti tour Zekaria en tant ki membre “division Abiya,” pou servi dan temple. (Luc 1:5, 8, 9) Dan l’histoire vrai l’adoration, bann personnage ki mentionné ti vrai-mem existé; zot pa zis bann personnage ki dimoune finn inventé. Zordi, nou gagne beaucoup benediction kan nou coopere avek fidelité ar “l’esclave fidel et avisé” en rapport avek l’adoration Jéhovah ki bien organisé.—Matthieu 24:45.

Servi Jéhovah avek “enn nâme ki rempli ar la joie”

Premier livre Chroniques pa zis donne bann la-liste ancetre ek descendant. Li aussi raconté couma David ti amenn l’arche de l’alliance dan Jérusalem, couma li ti gagne bann grand la-victoire, couma li ti prepare construction temple ek li ti etabli bann division pretre dan tribu Lévi. Surement bann Israélite ti bien profite tou seki Ezra raconté dan premier livre Chroniques; sa finn aide zot pou retrouve zot zèle pou l’adoration Jéhovah dan so temple.

David inn vrai-mem donne nou enn bon l’exemple dan fason ki li’nn touletan mette l’adoration Jéhovah en premier dan so la-vie! Au lieu ki li ti rod bann privilege special pou li, David ti plus envie faire volonté Bondié. Anou suive so conseil pou servi Jéhovah “avek enn leker complet ek enn nâme ki rempli ar la joie.”—1 Chroniques 28:9.

[Note]

[Tableau, page 8] Guette publication