Eski U Parmi Bann Dimunn Ki Bondye Kontan?

“Seki ena mo bann komannman ek ki obeir sa, limem ki kontan mwa. An retur, mo Papa pu kontan sa kikenn ki kontan mwa la.”—ZAN 14:21.

1, 2. (a) Kuma eski Zeova finn montre so lamur pu limanite? (b) Ki Zezi ti etabli lanwit le 14 Nizan, lane 33 N.L.?

ZEOVA kontan bann dimunn ki Li finn kre. Dayer, Li telman kontan lemond bann dimunn “ki Li finn donn so sel Garson ki finn kre direk par Li, pu ki tu seki ena lafwa an Li pa mor, me gayn lavi pu tuletan.” (Zan 3:16) Amezir ki zur selebrasyon Memoryal lamor Zezi Kris pe koste, bann vre Kretyin bizin plis ki zame konsyan ki Zeova “finn kontan nu ek finn avoy so Garson kuma enn sakrifis pu kuver nu bann pese.”—1 Zan 4:10.

² Lanwit le 14 Nizan, lane 33 N.L., Zezi ti reyni avek so 12 zapot dan enn lasam lao, dan Zerizalem pu selebre Pak, an memwar delivrans bann Izraelit dan Lezip. (Matye 26:17-20) Apre ki zot finn fini selebre sa fet Zwif la, Zezi finn fer Zida Iskaryot ale. Lerla, li finn etabli enn repa ki ti pu reprezant Memoryal so lamor ek ki bann Kretyin ti pu bizin tuletan selebre.a Zezi ti servi dipin san levin ek divin ruz kuma bann sinbol pu reprezant so lekor fizik ek so disan. Li finn partaz sa repa la ansam avek so 11 zapot ki ti’nn reste. Bann ekrivin Levanzil kuma Matye, Mark ek Lik, ki ti ekrir bann mem ranseynman lor sa levennman la, finn donn bann detay, parey kuma lapot Pol, lor manyer ki Zezi ti fer sa selebrasyon la. Zot ti apel sa “repa diswar Senyer.”—1 Korintyin 11:20; Matye 26:26-28; Mark 14:22-25; Lik 22:19, 20.

3. Dan ki bann fason seki lapot Zan ti ekrir lor bann dernye ler ki Zezi ti pase avek so bann disip dan sa lasam lao la, li diferan avek seki bann lezot ekrivin ti ekrir?

³ Li interesan pu note ki lapot Zan pa rakont sa pasaz dipin ek divin la, kitfwa akoz lepok li ti ekrir so levanzil (ver 98 N.L.), sa ti fini byin etabli parmi bann premye Kretyin. (1 Korintyin 11:23-26) Me, avek linspirasyon Bondye, Zan tusel finn donn nu bann ranseynman inportan lor seki Zezi ti dir ek fer zis avan ek apre ki Li ti etabli Memoryal So lamor. Sa bann detay interesan la truv dan plizir sapit Levanzil Zan. Zot montre nu klerman ki kalite dimunn Bondye kontan. Anu egzaminn Zan sapit 13 ziska 17.

Aprann Avek Legzanp Lamur Zezi

4. (a) Kuma eski Zan ti byin fer resorti tem prinsipal sa reynion ki Zezi ti ena avek so bann disip kan li ti etabli Memoryal? (b) Donn enn rezon inportan kifer Zeova kontan Zezi.

⁴ Dan sa bann sapit la, Zezi ti donn so bann disip bann konsey avan li ale. Me tu seki Zezi ti anseyn zot ti turn otur lamur; sa mem ti so tem santral. Dayer, sa mo “lamur” la uswa, so bann diferan form paret 31 fwa ladan. Sa bann sapit la fer resorti plis ki lezot sapit lamur profon ki Zezi ena pu so Papa, Zeova, ek pu so bann disip. Li vre ki kan nu lir resi tu bann Levanzil, nu dekuver lamur ki Zezi ena pu Zeova. Me, selman Zan ki finn ekrir sa bann parol direk ki Zezi ti dir la: “Mo kontan mo Papa.” (Zan 14:31) Zezi ti dir usi ki Zeova kontan li ek li ti explike kifer. Li ti dir: “Parey kuma mo Papa finn kontan mwa ek mo finn kontan zot, res dan mo lamur. Si zot swiv mo bann komannman, zot pu res dan mo lamur, parey kuma mo finn swiv bann komannman mo Papa ek mo finn res dan so lamur.” (Zan 15:9, 10) Wi, Zeova kontan so Garson parski li finn obeir Li dan tu kitsoz. Sa li enn bon leson pu tu bann disip Zezi Kris!

5. Kuma eski Zezi ti montre so lamur pu so bann disip?

⁵ Kan Zan finn kumans rakont sa dernye reynion ki Zezi ti ena avek so bann disip la, deswit li finn atir latansyon lor lamur profon ki Zezi ti ena pu so bann disip. Zan ti rakonte: “Asterla, parski li ti kone avan fet pak ki so ler ti finn arive pu li kit sa lemond la ek al kot so Papa, Zezi, ki finn kontan bann ki ti pu li dan lemond, finn kontan zot ziska lafin.” (Zan 13:1) Dan sa sware memorab la, Zezi finn anseyn zot enn leson ki zame zot pa ti pu bliye lor fason servi lezot avek lamur. Li ti lav zot lipye. Purtan, sa ti enn kitsoz ki sakenn parmi zot ti bizin pre pu fer pu Zezi ek pu zot bann frer, me zot pa finn fer li. Apre ki li finn fer sa travay ki demann limilite la, Zezi finn dir so bann disip: “Si mwa, mem ki mo Senyer ek Anseynan, mo finn lav zot lipye, zot usi, zot bizin lav lipye zot kamarad. Parski mo finn donn zot legzanp, pu ki, parey kuma mwa mo finn fer pu zot, zot usi zot fer parey.” (Zan 13:14, 15) Bann vre Kretyin bizin dispoze ek pran plezir pu servi zot bann frer.—Matye 20:26, 27, not; Zan 13:17.

Swiv Nuvo Komannman

6, 7. (a) Ki detay inportan Zan done dan so resi lor Memoryal? (b) Ki nuvo komannman Zezi ti donn so bann disip, ek ki ti nuvo ar sa komannman la?

⁶ Dan so resi lor seki finn pase dan sware le 14 Nizan dan sa lasam lao la, selman Zan ki presize ki Zida Iskaryot ti leve, li ti ale. (Zan 13:21-30) Kan nu rasanble tu bann resi Levanzil ansam, nu truve ki Zezi ti etabli Memoryal So lamor zis apre ki sa tret la ti fini ale. Apre sa, li finn koz pandan enn bon but letan avek so bann zapot fidel. Li finn donn zot bann bon konsey ek bann bon linstriksyon avan li kit zot. Kan nu pu prepar nu pu asiste Memoryal, nu bizin montre enn gran lintere pu seki Zezi ti dir dan sa lokazyon la, ek sirtu parski nu anvi truv nu parmi bann ki Bondye kontan.

⁷ Premye linstriksyon ki Zezi ti donn so bann disip apre ki li ti’nn etabli Memoryal so lamor ti enn kitsoz nuvo. Li ti dir: “Mo pe donn zot enn nuvo komannman, kontan zot kamarad; parey kuma mwa mo finn kontan zot, zot usi, kontan zot kamarad kumsa mem. Par sa tu pu kone ki zot mo bann disip, si zot ena lamur ant zot.” (Zan 13:34, 35) Ki ti nuvo dan sa komannman la? Inpe plitar dan sa sware la, Zezi ti eklersi sa size la kan li ti dir: “Ala mo komannman, kontan sakenn parmi zot parey kuma mo finn kontan zot. Personn pena enn pli gran lamur ki sa, enn kikenn ki donn so nam pu so bann kamarad.” (Zan 15:12, 13) Lalwa Moiz ti demann bann Izraelit pu ‘kontan zot prosin kuma zot mem.’ (Levitik 19:18) Me komannman Zezi ti al pli lwin. Bann Kretyin ti bizin kontan zot bann kamarad parey kuma Kris finn kontan zot. Sa vedir ki zot ti bizin pre pu sakrifye mem zot lavi pu zot bann frer.

8. (a) Ki nu konpran par enn lamur ki dispoze pu fer sakrifis? (b) Kuma eski zordi bann Temwin Zeova montre enn lamur ki dispoze pu fer sakrifis?

⁸ Lepok Memoryal li enn bon lepok pu nu egzaminn nu mem lor plan individyel ek antan ki enn kongregasyon, pu gete si vremem nu ena sa mark ki rekonet bann vre Kretyin la—lamur parey kuma Kris ti ena. Sa kalite lamur la li pre pu fer sakrifis, ek donk defwa pu enn Kretyin sa vedir riske so lavi olye li trayir so bann frer. Ek sa mem ki sertin finn deza fer. Me pli suvan, sa vedir ki nu pre pu sakrifye nu bann lintere personel pu nu kapav ed ek servi nu bann frer ek bann lezot dimunn usi. Lapot Pol ti enn bon legzanp dan sa domenn la. (2 Korintyin 12:15; Filipyin 2:17) Partu dan lemond, bann Temwin Zeova finn fer zot enn repitasyon pu zot lespri sakrifis. Zot ed zot bann frer ek zot prosin, ek zot donn tu zot letan pu transmet laverite ki ena dan Labib ar lezot.b—Galat 6:10.

Bann Relasyon Ki Ena Buku Valer pu Nu

9. Pu nu gard nu relasyon ki ena buku valer avek Bondye ek so Garson, ki nu pu kontan fer?

⁹ Nanyin pena plis valer pu nu ki lamur ki Zeova ek so garson Zezi Kris ena pu nu. Me, pu ena ek pu resanti sa lamur la, nu bizin fer kitsoz. Dan sa dernye sware ki li ti pas avek so bann disip la, Zezi ti dir: “Seki ena mo bann komannman ek ki obeir sa, limem ki kontan mwa. An retur, mo Papa pu kontan sa kikenn ki kontan mwa la.” (Zan 14:21) Pwiski pu nu, nu relasyon avek Bondye ek avek so Garson ena buku valer, nu obeir zot bann komannman avek lazwa. Alor, nu obeir usi sa nuvo komannman la kan nu montre enn lespri sakrifis ranpli ar lamur. Nu obeir usi lord ki Zezi Kris ti donn so bann disip apre so rezireksyon “pu pres ar bann dimunn ek pu donn enn temwaynaz konple,” ek fer zefor pu “fer bann disip” ar bann ki aksepte labonn nuvel.—Akt 10:42; Matye 28:19, 20.

10. Ki relasyon ki ena gran valer bann manb 144,000 lor later ek bann “lezot muton” ena?

¹⁰ Plitar dan lasware, Zezi ti reponn enn kestyon ki Zida (Tade), enn zapot fidel ti poz li. Li ti dir li: “Si kikenn kontan mwa, li pu swiv mo parol, ek mo Papa pu kontan li, ek nu pu vinn ver li ek nu pu res kot li.” (Zan 14:22, 23) Mem ki zot ankor lor later, bann Kretyin ki’nn gayn linvitasyon pu al reyne avek Kris dan lesyel, ena enn relasyon byin pros avek Zeova ek avek so Garson. (Zan 15:15; 16:27; 17:22; Ebre 3:1; 1 Zan 3:2, 24) Me zot bann konpaynon, bann “lezot muton” ki ena lespwar pu viv lor later, zot usi zot ena enn relasyon ki ena gran valer avek zot “sel berze,” Zezi Kris, ek avek zot Bondye Zeova, me akondisyon ki zot kontiyn obeir.—Zan 10:16; Psom 15:1-5; 25:14.

“Zot Pa Fer Parti dan Lemond”

11. Ki lavertisman serye Zezi ti donn so bann disip?

¹¹ Avan li mor, dan sa dernye reynion ki li ti ena avek so bann disip fidel la, Zezi ti donn enn lavertisman serye: Si Bondye kontan enn dimunn, lemond pu ayir li. Dayer, li finn dir: “Si lemond ena laenn pu zot, zot kone ki avan li ayir zot li finn ayir mwa. Si zot ti fer parti dan sa lemond la, lemond ti pu kontan seki pu li. Asterla parski zot pa fer parti dan sa lemond la, me mwa mo finn swazir zot dan lemond, akoz sa, lemond ena laenn pu zot. Rapel parol ki mo ti dir zot, Enn esklav pa pli gran ki so met. Si bannla finn persekit mwa, abe bannla pu persekit zot usi; si bannla finn pran kont mo parol, bannla pu pran kont zot parol usi.”—Zan 15:18-20.

12. (a) Kifer eski Zezi ti averti so bann disip ki lemond ti pu ayir zot? (b) Pwiski Memoryal pe koste, lor ki kitsoz li bon ki nu tu nu reflesi?

¹² Zezi ti donn sa lavertisman la pu ki so 11 zapot ek tu bann vre Kretyin ki ti pu vini apre, zot pa dekuraze ek zot pa abandone akoz lemond ayir zot. Li ti azute: “Mo finn dir zot sa bann kitsoz la pu ki zot pa tonbe. Bann zom pu met zot deor dan sinagog. Wi, ler pe vini kot ninport ki dimunn ki pu tuy zot pu panse ki li’nn ofer Bondye enn servis sakre. Me zot pu fer sa bann kitsoz la parski zot pa finn konn ni mo Papa ni mwa.” (Zan 16:1-3) Enn diksyoner lor Labib explike ki enn form sa verb ki servi isi pu “tonbe” la vedir “fer enn dimunn kumans mank konfyans ek deturne ar enn dimunn ki li sipoze fer konfyans ek obeir; fer li abandone.” Pwiski lepok Memoryal pe koste, nu tu nu bizin reflesi lor lavi bann dimunn fidel dan lepase ek dan nu lepok. Dan bann problem, nu bizin res ferm parey kuma bannla. Pa les lopozisyon uswa persekisyon deturn u ar Zeova ek Zezi, me u bizin byin determine pu fer zot konfyans ek obeir zot.

13. Dan enn lapriyer ki Zezi ti fer ar so Papa, ki li ti demande an faver so bann disip?

¹³ Dan so lapriyer final avan li kit sa lasam lao dan Zerizalem la, Zezi ti dir so Papa: “Mo finn donn zot to parol, me lemond finn ayir zot, parski zot pa fer parti dan lemond, parey kuma mwa mo pa fer parti dan lemond. Mo pa pe demann twa tir zot dan lemond, me vey lor zot akoz sa kikenn ki move la. Zot pa fer parti dan lemond, parey kuma mwa mo pa fer parti dan lemond.” (Zan 17:14-16.) Nu kapav sir ki Zeova vey lor bann ki Li kontan, ek Li fortifye zot tank ki zot res separe ar lemond.—Izai 40:29-31.

Res dan Lamur Papa ek dan Lamur Garson

14, 15. (a) An konparezon avek ‘pye rezin ki pe al mor,’ ar ki Zezi ti konpar limem? (b) Kisannla ki reprezant “bann brans” “vre pye rezin”?

¹⁴ Dan sa konversasyon intim ki li ti gayne avek so bann fidel disip lanwit le 14 Nizan, Zezi ti konpar limem ar enn “vre pye rezin.” Li diferan ar Izrael infidel ki li, li kuma enn ‘pye rezin ki pe al mor’. Li ti dir: “Mwa, mo vre pye rezin, ek mo Papa li, Li planter la.” (Zan 15:1) Plizir syek avan, profet Zeremi ti dir sa bann parol Zeova la avek so lepep rebel: “Mo finn plant twa kuma enn pye rezin ruz meyer kalite . . . Alor kuma eski to finn sanze anver mwa pu vinn bann [brans] enn pye etranze ki pe al mor?” (Zeremi 2:21) Ek profet Osea finn ekrir: “Izrael li enn pye rezin ki pe mor. Li kontiyn raport frwi pu limem. . . . Zot leker finn vinn ipokrit.”—Osea 10:1, 2.

¹⁵ Olye raport frwi vre ladorasyon, Izrael finn vinn aposta ek li finn raport frwi pu limem. Trwa zur avan so dernye reynion avek so bann disip fidel, Zezi ti dir bann sef Zwif ipokrit: “Mo dir zot, pu tir Rwayom Bondye ar zot ek pu donn li enn lot nasyon ki pu raport bann frwi.” (Matye 21:43) Sa nuvo nasyon la li “Izrael Bondye,” kot ena 144,000 Kretyin ki Bondye finn swazire. Zot konpare ar “bann brans” sa “vre pye rezin” la, setadir Kris Zezi.—Galat 6:16; Zan 15:5; Revelasyon 14:1, 3.

16. Ki Zezi ti ankuraz so 11 zapot fidel pu fer, ek ki nu kapav dir lor leres bann manb 144,000 ki fidel dan sa lepok lafin la?

¹⁶ Zezi ti dir so 11 zapot ki ti prezan avek li dan sa lasam lao la: “Li kup tu brans dan mwa ki pa pe raport frwi, ek Li netway tu brans ki pe raport frwi, pu ki li raport plis frwi. Res ini avek mwa, ek mo pu ini avek zot. Parey kuma enn brans pa kapav raport frwi par limem amwin li res ansam avek pye rezin la, kumsa mem zot usi zot pa pu kapav raport bann frwi si zot pa res ini avek mwa.” (Zan 15:2, 4) Listwar modern lepep Zeova montre ki sa ti grup bann manb 144,000 ki fidel lor later la finn res ini avek zot Sef, Kris Zezi. (Efezyin 5:23) Zot finn aksepte ki netway zot ek tay zot. (Malaki 3:2, 3) Depi 1919, zot pe raport bann frwi Rwayom an abondans. Premyerman zot finn rasanble bann lezot manb ki pu al viv dan lesyel, ek apre, depi 1935, zot finn rasanble enn “gran laful” ki pli ale pe kontiyn ogmante.—Revelasyon 7:9; Izai 60:4, 8-11.

17, 18. (a) Ki bann parol Zezi ed leres bann manb 144,000 ek bann lezot muton pu res dan lamur Zeova? (b) Kuma eski nu pu tir profi kan nu asiste Memoryal?

¹⁷ Sa bann parol Zezi la aplik ar leres bann manb 144,000 ek zot konpaynon: “Mo Papa gayn laglwar kan zot kontiyn raport buku frwi ek kan zot montre ki zot mo bann disip. Parey kuma mo Papa finn kontan mwa, ek mo finn kontan zot, res dan mo lamur. Si zot swiv mo bann komannman, zot pu res dan mo lamur, parey kuma mo finn swiv bann komannman mo Papa ek mo finn res dan so lamur.”—Zan 15:8-10.

¹⁸ Nu tu nu anvi res dan lamur Bondye, ek sa pus nu pu vinn bann Kretyin ki raport bann frwi. Nu fer sa kan nu sezi tu lokazyon nu ena pu pres “labonn nuvel lor rwayom.” (Matye 24:14) Nu fer usi tu nu posib pu manifeste “frwi lespri” dan nu lavi personel. (Galat 5:22, 23) Asiste Memoryal lamor Kris pu fortifye nu dan nu desizyon pu fer sa, parski Memoryal pu rapel nu gran lamur ki Bondye ek Zezi Kris ena pu nu.—2 Korintyin 5:14, 15.

19. Ki lot led nu pu egzamine dan prosin lartik?

¹⁹ Apre ki li finn etabli Memoryal, Zezi ti promet so bann fidel disip ki so Papa ti pu avoy zot enn “asistan, lespri sin.” (Zan 14:26) Dan prosin lartik nu pu gete kuma sa lespri la ed bann manb 144,000 lor later ek bann lezot muton pu res dan lamur Zeova.

[Not anba paz]

Kestyon Revizyon

• Ki leson pratik lor fason servi lezot avek lamur Zezi ti donn so bann disip?

• An rapor avek ki kitsoz Memoryal li enn lepok apropriye pu egzaminn nu mem?

• Kifer eski nu bizin pa dekuraze kan Zezi ti averti ki lemond pu ayir nu ek li pu persekit nu?

• Kisannla “vre pye rezin”? Kisannla “bann brans,” ek ki demann zot fer?

[Zimaz lor paz 23]

Zezi ti donn so bann zapot enn leson ki zot pa ti pu kapav bliye lor fason servi lezot avek lamur

[Zimaz lor paz 24]

Bann disip Kris obeir so komannman pu montre enn lamur ki dispoze pu fer sakrifis