“Kontiyn Raport Buku Frwi”

‘Kontiyn raport buku frwi ek montre ki zot mo bann disip.’—ZAN 15:8.

1. (a) Kan Zezi ti koz avek so bann zapot, ki kondisyon li ti mansyone ki enn disip bizin ranpli? (b) Ki kestyon nu bizin poz numem?

SA TI pase dan lasware avan so lamor. Zezi ti pran byin letan pu ankuraz so bann zapot dan enn konversasyon byin intim ki li ti ena avek zot. Ti sirman minwi pase, me Zezi ti kontiyn koz ar so bann bon kamarad parski li ti ena lamur pu zot. Apre, omilye so konversasyon, li ti rapel zot ankor enn lot kondisyon ki zot bizin ranpli pu zot res so bann disip. Li ti dir: “Mo papa gayn laglwar kan zot kontiyn raport buku frwi ek kan zot montre ki zot mo bann disip.” (Zan 15:8) Eski zordi nu ranpli sa kondisyon ki neseser pu vinn enn disip la? Ki vedir “raport buku frwi”? Pu nu konn sa, nu return avek konversasyon ki Zezi ti ena dan sa sware la.

2. Dan lasware avan so lamor, ki legzanp konsernan bann frwi, Zezi ti done?

² Sa konsey pu raport frwi la, fer parti dan enn legzanp ki Zezi ti rakont so bann zapot. Li ti dir: “Momem vre pye rezin ek mo Papa Li planter. Tu brans an mwa ki pa raport frwi, Li kupe ek tu brans ki raport frwi, Li netway li pu ki li raport ankor plis frwi. Me zot, zot deza prop grasa lanseynman ki mo’nn donn zot. Res ini avek mwa ek mwa, mo res ini avek zot. Enn brans pa kapav raport frwi par limem si li res separe ar pye rezin la. Zot usi, zot pa kapav raport frwi, si zot pa res ini avek mwa. Momem pye rezin ek zot, zot bann brans. . . . Mo Papa gayn laglwar kan zot kontiyn raport buku frwi ek kan zot montre ki zot mo bann disip. Parey kuma mo Papa inn kontan mwa ek mwa mo’nn kontan zot, res dan mo lamur. Si zot obeir mo bann komannman, zot pu res dan mo lamur.”—Zan 15:1-10.

3. Ki bann disip Zezi bizin fer pu zot kapav raport frwi?

³ Dan sa legzanp la, se Zeova ki planter ek Zezi li, li reprezant pye rezin. Bann zapot avek ki Zezi ti pe koze, reprezant bann brans. Tanki bann zapot fer zefor pu “res ini” ar Zezi, zot pu raport bann frwi. Apre, Zezi ti explike kuma bann zapot kapav reysi gard sa linite ki byin inportan la. Li ti dir: “Si zot obeir mo bann komannman, zot pu res dan mo lamur.” Plitar, lapot Zan ti ekrir preske mem parol ar bann Kretyin. Li ti dir zot: “Seki obeir komannman [Zezi], res ini avek li.”a (1 Zan 2:24; 3:24) Donk, kan zot gard bann komannman Zezi, so bann disip res atase avek li ek sa, an retur pu ed zot pu raport frwi. Ki kalite frwi eski nu bizin raporte?

Nu Kapav Fer Plis Progre

4. Ki nu aprann kan nu truve ki Zeova “kup” tu brans ki pa raport frwi?

⁴ Dan legzanp pye rezin, Zeova kup enn brans kan li pa raport frwi. Ki sa montre nu? Sa montre ki tu bann disip bizin raport frwi. Me nu aprann usi ki, dan ninport ki sityasyon zot ete uswa ninport ki kapasite zot ena, li posib pu zot fer sa. An realite, Zeova abitye azir tuzur avek buku lamur ar so bann serviter. Donk, sa pu kontrer ar lamur Zeova, si li kup enn disip, setadir diskalifye li parski li pa’nn reysi fer enn kitsoz ki li pa kapav uswa ki li pena posibilite pu fer.—Psom 103:14; Kolosyin 3:23; 1 Zan 5:3.

5. (a) Kuma legzanp Zezi montre nu ki nu kapav fer progre pu raport plis frwi? (b) Ki de kalite frwi eski nu pu egzamine?

⁵ Legzanp Zezi montre nu enn kitsoz. Mem si nu sityasyon limite, nu bizin rod bann mwayin pu fer progre dan bann laktivite ki nu ena antan ki enn disip. Gete kuma Zezi ti dir sa: “Tu brans an mwa ki pa raport frwi, Li kupe ek tu brans ki raport frwi, Li netway li pu ki li raport ankor plis frwi.” (Zan 15:2) Ver lafin so legzanp, Zezi ti konsey so bann disip pu raport “plis frwi.” (Verse 8) Ki mesaz nu gayne isi? Antan ki bann disip, fode zame nu tro satisfe ar numem. (Revelasyon 3:14, 15, 19) Okontrer, nu bizin rod bann mwayin pu progrese dan fason ki nu raport frwi. Ki kalite frwi eski nu bizin fer zefor pu raport plis ankor? Ena de kalite: (1) “frwi lespri sin” ek (2) frwi an rapor avek Rwayom Bondye.—Galat 5:22, 23; Matye 24:14.

Frwi Ki enn Kretyin Prodir —Bann Kalite Spirityel

6. Kuma Zezi Kris ti montre valer premye frwi ki mansyone parmi frwi lespri sin?

⁶ Premye kalite ki mansyone parmi “frwi lespri sin” se, lamur. Bann Kretyin kapav prodir sa frwi la grasa lespri sin Bondye. Kifer? Parski zot obeir lord ki Zezi ti donn zot, zis avan li ti koz lor legzanp pye rezin ki prodir bann frwi. Li ti dir so bann disip: “Mo pe donn zot enn nuvo lalwa: kontan zot kamarad.” (Zan 13:34) An realite, pandan dernye nwit ki li’nn pase lor later, tutlong so konversasyon ki li ti ena avek so bann zapot, li ti kontiyn rapel zot linportans pu montre lamur.—Zan 14:15, 21, 23, 24; 15:12, 13, 17.

7. Kuma eski lapot Pyer ti montre ki raport bann frwi se montre bann kalite spirityel?

⁷ Pyer ti la sa lanwit la. Li ti konpran ki bann vre Kretyin bizin ena mem lamur ki Zezi ti montre ek ena bann kalite ki an rapor avek sa lamur la. Plizir lane apre, Pyer ti ankuraz bann Kretyin pu devlop bann bon kalite, kuma par egzanp, kapasite pu kontrol numem, lafeksyon pu nu bann frer ek lamur. Li ti azute ki kan nu fer sa, sa pu anpes nu “pu vinn inaktif uswa pu pa raport bann frwi.” (2 Pyer 1:5-8) Ninport ki nu sityasyon ete, nu tu nu ena posibilite pu montre frwi lespri sin dan nu lavi. Alor, anu fer zefor pu montre ankor plis dan nu lavi bann kalite kuma lamur, bonte, duser, ek lezot kalite spirityel. Parski “kont sa bann kitsoz la, pena okenn lalwa,” uswa limit. (Galat 5:23) Wi, anu prodir “plis frwi.”

Raport Bann Frwi Ki an Rapor Avek Rwayom Bondye

8. (a) Ki rapor ena ant frwi lespri sin ek frwi ki konsern Rwayom Bondye? (b) Ki kestyon merit nu latansyon?

⁸ Bann bon frwi mir lor enn pye ogmant bote pye la. Me valer sa bann frwi la, se pa zis pu rann enn pye zoli, li plis ki sa. Bann frwi zot inportan usi akoz zot lagrin. Se grasa bann lagrin ki kapav gayn bann lezot plant. Li parey usi konsernan frwi lespri sin. Li fer buku plis ki zis fer personalite enn Kretyin vinn zoli. Bann kalite kuma lamur ek lafwa pus nu usi pu partaz partu mesaz lor Rwayom Bondye ki truv dan so Parol. Sa mesaz la li kuma enn lagrin. Note kuma lapot Pol atir latansyon lor sa pwin la. Li dir: “Nu’si, nu ena lafwa, [enn parmi bann frwi lespri sin] akoz sa nu koze.” (2 Korintyin 4:13) Dan mem fason, Pol plitar explike ki “nu donn Bondye laglwar par nu sakrifis, setadir, frwi nu lalev”—dezyem kalite frwi ki nu bizin montre dan nu lavi. (Ebre 13:15) Eski dan nu lavi ena bann posibilite pu prodir plis frwi? Wi, eski nu kapav raport “buku frwi,” antan ki bann proklamater Rwayom Bondye?

9. Eski raport bann frwi sa vedir fer bann disip? Explike.

⁹ Pu reponn byin, nu bizin avan, konpran ki sa vedir bann frwi an rapor avek Rwayom Bondye. Eski li bon si nu dir ki raport frwi se kan nu fer bann nuvo disip? (Matye 28:19) Sa frwi ki nu pu raporte la, eski se avan tu bann dimunn ki nu ede pu vinn bann serviter Zeova batize? Non, parski si sa ti vre, bann temwin fidel ki pandan plizir lane pe pres dan bann teritwar kot pa buku dimunn aksepte laverite, ti pu byin dekuraze. Wi, sa frwi an rapor avek Rwayom Bondye la, pa reprezant bann nuvo disip. Sinon, sa bann Kretyin ki travay dir la, ti pu kuma bann brans dan legzanp Zezi ki pa prodir okenn frwi! Donk, se pa sa. Alor, ki prinsipal frwi an rapor avek Rwayom Bondye ki nu prodir dan nu servis pu Zeova?

Nu Raport Bann Frwi kan Nu Sem Lagrin Konsernan Rwayom Bondye

10. Kuma legzanp lor planter ek lor diferan kalite later, montre nu ki frwi an rapor avek Rwayom Bondye reprezante ek ki li pa reprezante?

¹⁰ Legzanp sa planter ki Zezi ti done la, donn nu enn repons. Anplis, se enn repons ki byin ankurazan pu bann temwin ki pres dan bann teritwar kot pa buku dimunn aksepte laverite. Zezi ti dir ki lagrin la reprezant mesaz lor Rwayom Bondye ki truv dan Labib. Later reprezant leker sinbolik bann dimunn. Ena lagrin ki ti “tom lor bon later ek apre ki li’nn puse, li ti prodir frwi.” (Lik 8:8) Me, ki frwi? Kan enn pye dible puse ek vinn gran, li pa prodir bann lezot ti pye dible, me li prodir bann lagrin. Se parey pu enn Kretyin. Bann frwi ki li prodir, se pa bann nuvo disip me bann nuvo lagrin konsernan Rwayom Bondye.

11. Kuma nu pu explike ki savedir frwi an rapor avek Rwayom Bondye?

¹¹ Donk, dan sa ka la, bann frwi pa reprezant ni bann nuvo disip, ni bann kalite spirityel ki enn Kretyin prodir. Lagrin la reprezant mesaz konsernan Rwayom Bondye, donk sa frwi la bizin reprezant plis lagrin setadir pli buku mesaz lor sa Rwayom la. Alor, dan sa ka la, nu raport frwi kan nu koz lor Rwayom Bondye. (Matye 24:14) Nu raport bann frwi an rapor avek Rwayom Bondye kan nu pres sa Rwayom la. Me eski nu kapav raport sa frwi la, setadir, pres labonn nuvel lor Rwayom Bondye, dan ninport ki sityasyon nu ete? Wi, nu kapav. Dan mem legzanp, Zezi explike kifer.

Fer Tu Seki Nu Kapav pu Donn Bondye Laglwar

12. Eski tu Kretyin kapav raport frwi ki an rapor avek Rwayom Bondye? Explike.

¹² “Konsernan lagrin ki ti seme lor bon later,” Zezi ti dir ki “ena raport san, lot swasant, ek sertin trant.” (Matye 13:23) Lagrin ki seme dan enn karo, kapav prodir diferan kantite frwi, tu depann lor bann sirkonstans. Li parey pu nu’si. Kantite ki nu kapav fer pu pres labonn nuvel, depann lor nu sityasyon, ek Zezi ti montre ki li konpran sa. Ena sertin ki ena plis posibilite; ena lezot ki ena enn pli bon lasante ek plis lafors. Donk, li posib ki seki nu kapav fer, li plis uswa mwins ki seki lezot fer. Me, tanki se sa mem tu ki nu kapav donn Zeova, Li kontan. (Galat 6:4) Kitfwa nu limite akoz vyeyes uswa maladi ek nu pa kapav fer buku dan predikasyon. Me mem sa, nu kapav sir ki nu bon Papa Zeova, ki konpran nu, truv nu kuma enn kikenn ki pe “kontiyn raport buku frwi.” Kifer? Parski nu donn Li ‘tu seki nu ena’—nu servi Li avek tu nu nam.b—Mark 12:43, 44; Lik 10:27.

13. (a) Ki rezon prinsipal nu ena pu “ale” ek raport frwi ki konsern Rwayom Bondye? (b) Ki pu ed nu pu kontiyn raport frwi dan bann teritwar kot pena buku dimunn ki aksepte laverite? (Get lankadre paz 21.)

¹³ Ninport ki kantite nu kapav fer pu pres Rwayom Bondye, si nu rapel kifer nu pe fer sa, nu pu anvi “ale ek kontiyne raport frwi” an rapor avek sa Rwayom la. (Zan 15:16) Zezi ti mansyonn enn rezon prinsipal: “Mo Papa gayn laglwar, kan zot kontiyn raport buku frwi.” (Zan 15:8) Wi, nu predikasyon donn non Zeova laglwar devan tu dimunn. (Psom 109:30) Honor, enn Temwin fidel ki ena apepre 75 an, dir: “Mem dan bann teritwar kot pena buku dimunn ki aksepte laverite, li enn gran privilez pu reprezant nu Gran Bondye.” Claudio, enn Temwin fidel depi 1974, pres dan enn teritwar kot pena buku dimunn ki ekute. Kan ti demann li kifer li kontiyne prese, li ti sit Zan 4:34, kot nu lir bann parol Zezi: “Mo manze, se fer volonte sa kikenn ki finn avoy mwa la ek fini so travay.” Claudio azute: “Parey kuma Zezi, mo anvi pa selman kumans travay ki mo ena antan ki enn proklamater Rwayom, me usi fini li.” (Zan 17:4) Bann temwin Zeova dan lemond antye pans parey kuma li.—Get lankadre “Kuma pu ‘Raport Frwi Avek Landirans,’ ” dan paz 21.

Prese ek Anseyne

14. (a) Ki travay an de parti, Zan Batis ek Zezi ti ena pu fer? (b) Kuma eski u pu explike ki laktivite enn Kretyin ena zordi?

¹⁴ Premye proklamater Rwayom Bondye ki mansyone dan bann Levanzil, se Zan Batis. (Matye 3:1, 2; Lik 3:18) Rezon prinsipal kifer li ti prese, se pu donn enn temwanyaz. Li ti fer sa avek enn gran lafwa ek avek lespwar ki “tu sort kalite dimunn kapav sape.” (Zan 1:6, 7) An realite, sertin dimunn avek ki Zan ti prese, ti vinn bann disip Zezi. (Zan 1:35-37) Donk, Zan ti prese ek li ti fer bann disip usi. Zezi usi ti prese ek li ti usi enn anseynan. (Matye 4:23; 11:1) Li pa etonan alor ki Zezi pa ti zis donn so bann disip lord pu pres mesaz lor Rwayom Bondye. Me usi, li ti donn zot lord pu ed bann dimunn pu aksepte sa mesaz la ek pu vinn so bann disip. (Matye 28:19, 20) Sa vedir ki nu travay zordi, se fer tulede, prese ek anseyne.

15. Ki mem reaksyon bann dimunn ena anver laktivite predikasyon ki ti fer dan premye syek ek ki pe fer zordi?

¹⁵ Dan premye syek N.L., bann dimunn ti tann Pol prese ek anseyne. Sertin ti “kumans krwar bann kitsoz ki’nn dir; me lezot ti refize pu krwar.” (Akt 28:24) Zordi usi parey. Malerezman, laplipar lagrin, setadir mesaz lor Rwayom Bondye, tom lor bann later ki pa prodir. Me kan mem sa, ena lagrin ki tom lor bon later, zot fer rasinn ek zot puse, parey kuma Zezi ti dir. An realite, dan lemond antye, sak semenn par an, ena enn mwayenn 5,000 dimunn ki vinn bann vre disip Zezi! Mem si laplipar dimunn pa ekute, sa bann nuvo disip la zot, zot “krwar bann kitsoz ki’nn dir.” Ki’nn ed zot pu ki zot leker aksepte mesaz lor Rwayom Bondye? Suvan se parski bann Temwin inn interese personelman avek zot, kumadir, zot inn aroz sa lagrin ki’nn fek seme la—se sa ki’nn fer enn gran diferans. (1 Korintyin 3:6) Anu get zis de parmi buku legzanp.

Sa Fer enn Gran Diferans kan Nu Montre enn Lintere Personel

16, 17. Kifer li inportan pu montre enn lintere personel ar bann dimunn ki nu zwenn dan predikasyon?

¹⁶ Karolien, enn zenn Temwin ki res Belgique, ti pres ar enn vye madam ki pa ti interese ar mesaz lor Rwayom Bondye. Lamin sa madam la ti anture ar enn bandaz, alor Karolien ek sa ser ki ti avek li la, ti propoz madam la pu ed li. Me, madam la ti refize. De zur apre, sa de Temwin la ti revizit madam la pu demann li so nuvel. Karolien dir: “Sa ti fer enn gran diferans. Madam la ti etone parski li’nn truve ki nu ti vremem interese ar li. Li ti invit nu pu rant kot li, ek nu’nn kumans enn letid Labib ar li.”

¹⁷ Sandi, enn Temwin ki res an Amérique, li usi interes li personelman ar bann dimunn avek ki li prese. Li get bann lanons dan lagazet, lor bann nesans ki ena. Lerla, li al vizit bann nuvo paran la ek ofer zot enn liv Recueil d’histoires bibliques.c Lapliparditan, mama la, li lakaz, ek li fyer pu montre bann viziter so tibaba. Suvan, kapav gayn enn konversasyon avek li. Sandi explike: “Mo koz ar bann paran lor linportans pu lir ar zot tibaba, parski sa permet pu kree enn relasyon ant zot.” Apre, mo koz lor difikilte ki bann paran gayne pu elve enn zanfan dan sa lemond ki nu pe viv zordi la.” Fek la, akoz bann vizit kumsa, enn madam avek so sis zanfan finn kumans servi Zeova. Nu’si, nu bizin deside pu fer kitsoz ek interes nu personelman avek bann dimunn. Lerla, nu kapav gayn bann rezilta parey kumsa ki pu fer nu ena lazwa dan predikasyon.

18. (a) Kifer li posib pu nu tu, ‘raport buku frwi’? (b) Ki trwa kondisyon ki enn disip bizin ranpli, mansyone dan Levanzil Zan, ki u byin deside pu ranpli?

¹⁸ Se enn gran lankurazman kan nu kone ki li posib pu nu, pu “kontiyn raport buku frwi”! Ki nu zenn uswa nu vye, ki nu ena enn bon lasante uswa nu malad, ki nu pres dan bann teritwar kot dimunn ekute uswa non, nu tu nu kapav raport buku frwi. Kuma? Kan nu montre ankor plis dan nu lavi ki nu prodir frwi lespri sin. Ek usi, kan nu fer tu seki nu kapav pu pres partu mesaz lor Rwayom Bondye. An mem tan, nu fer zefor pu ‘kontiyn obeir parol Zezi’ ek pu ‘ena lamur ant numem.’ Wi, nu bizin ranpli sa trwa kondisyon inportan ki enn disip bizin ranpli ek ki mansyone dan Levanzil Zan. Kifer? Parski lerla, nu pu montre ki nu ‘vremem bann disip Kris.’—Zan 8:31; 13:35.

[Not anba paz]

Kestyon Revizyon

• Ki kalite frwi nu bizin raport pli buku?

• Kifer li posib pu nu, pu “raport buku frwi”?

• Ki trwa kondisyon inportan ki enn disip bizin ranpli, mansyone dan Levanzil Zan, nu finn egzamine?

[Lankadre/Zimaz lor paz 29]

KUMA PU “RAPORT FRWI AVEK LANDIRANS”

KI ED u pu kontiyn prese avek fidelite dan bann teritwar kot pena buku dimunn ki aksepte laverite? Nu donn u detrwa repons ki pu ed u konsernan sa kestyon la.

“Kan nu kone ki Zezi byin sutenir nu, sa ankuraz nu pu gard enn lespri pozitif ek pu kontiyne, ninport ki reaksyon bann dimunn dan teritwar ena.”—Harry, 72 an; batize an 1946.

“Tex 2 Korintyin 2:17 tuletan ankuraz mwa. Li dir ki nu prese ‘devan lizye Bondye, ansam avek Kris.’ Kan mo dan predikasyon, mo apresye konpayni mo bann pli bon kamarad.”—Claudio, 43 an; batize an 1974.

“Mo dir fran, predikasyon vremem difisil pu mwa. Me, bann parol dan Psom 18:29 dir: ‘Grasa mo Bondye, mo kapav grinp lor enn miray.’ Mo’nn fer lexperyans ki sa bann parol la, zot vre.”—Gerard, 79 an; batize an 1955.

“Si mo kapav lir zis enn verse Labib dan predikasyon, mo satisfe parski enn kikenn inn gayn lokazyon pu les Labib egzaminn so leker.”—Eleanor, 26 an; batize an 1989.

“Mo kontiyn servi diferan lintrodiksyon pu koz avek bann dimunn. Ena telman buku lintrodiksyon, ki dan mo lavi, mo pa pu kapav servi tu.”—Paul, 79 an; batize an 1940.

“Kan bann dimunn pale ekute, mo pa pran sa kuma enn ofans personel. Mo esey ena enn konversasyon amikal avek zot ek mo ekut zot lopinyon.”—Daniel, 75 an; batize an 1946.

“Mo finn zwenn bann Temwin ki’nn fek batize, zot inn dir mwa ki, se an parti grasa mo predikasyon ki zordi zot dan laverite. Mo pa konn zot, me inn ena kikenn ki apre inn zwenn zot, inn etidye Labib avek zot ek inn ed zot pu progrese. Sa fer mwa kontan pu kone ki nu servis se enn travay lekip.”—Joanne, 66 an; batize an 1954.

Ki’nn ed u pu “raport frwi avek landirans”?—Lik 8:15.

[Zimaz lor paz 28]

Kan nu prodir frwi lespri sin ek kan nu pres mesaz lor Rwayom Bondye, nu raport buku frwi

[Zimaz lor paz 31]

Ki Zezi ti rod dir kan li ti dir so bann zapot: “Kontiyn raport buku frwi”?