Couma la ranson sauve nou?
“Kikenn ki ena la foi dan Garson Bondié ena la vie pou touletan; mais kikenn ki desobeir Garson Bondié pa pou trouve la vie, mais colere Bondié reste lor li.”—JEAN 3:36.
1, 2. Cite enn raison kifer ti publié Le Phare de la Tour de Sion.
“N’IMPORTE ki dimoune ki etudié la Bible en profondeur kapav trouve l’importance la mort Christ.” C’est seki quatrieme numero sa periodik-la ti dire en octobre 1879. Lartik-la ti terminé avek enn conclusion bien serieux: “Anou faire attention ar n’importe ki kitsoz ki diminué valeur la mort Christ ou-soit ki faire croire ki sa la mort-la li pa enn sacrifice ki couvert bann peché.”—Lire 1 Jean 2:1, 2.
2 Enn parmi bann raison kifer ti commence publié Le Phare de la Tour de Sion en juillet 1879, c’est pou defann l’enseignement la Bible lor la ranson. Dan so bann page ti ena “nourriture dan ler ki bizin,” parski vers la fin bann l’année 1800, encore plus dimoune ki ti pretann ki zot chretien, ti pé commence ena bann doute lor la mort Jésus. Zot ti pé commence douté si vrai-mem sa la mort-la kapav donne enn ranson pou nou peché. (Mat. 24:45) Dan sa lepok-la, beaucoup ti pé commence croire dan theorie l’evolution, enn theorie ki pa en accord avek l’idée ki l’humanité inn perdi sa perfection ki li ti ena au commencement-la. Au contraire, bann evolutionniste enseigné ki dimoune ena tendance pou amelioré par li-mem ek ki li pa bizin enn ranson. Alors, sa conseil ki l’apotre Paul ti donne Timothée-la li bien approprié: “Garde bien seki finn confié toi, ek detourne-toi ar bann discours ki pena okenn sens ek ki sali seki saint, ek ar bann contradiction ki forme partie dan seki zot appel soi-disant ‘connaissance.’ Certain finn detourne-zot ar la foi, parski zot inn faire l’etalage ar sa qualité connaissance-la.”—1 Tim. 6:20, 21.
3. Ki bann question nou pou examiné asterla?
3 Surement ou bien decidé pou pa ‘detourne-ou ar la foi.’ Pou ou reussi garde ou la foi solide, li pou bon ki ou examine sa bann question-la: Kifer mo bizin la ranson? Ki sa inn coute Jéhovah ek Jésus? Couma mo kapav gagne bann bienfait ar sa disposition ki ena valeur ek ki kapav delivré moi ar colere Bondié?
Delivré ar colere Bondié
4, 5. Couma nou koné ki colere Bondié pé reste lor sa mauvais le monde-la?
4 La Bible ek l’Histoire montré ki depuis ki Adam inn tombe dan peché, colere Bondié ‘inn reste lor’ bann dimoune. (Jean 3:36) Nou trouve sa bien parski okenn dimoune pa finn kapav evite la mort. Domination Satan, ki opposé ar Bondié, pa finn reussi ditou, li pa finn kapav protege bann dimoune ar bann malheur, ek okenn gouvernement humain pa finn kapav donne tou so bann citoyen bann kitsoz de base pou zot vive. (1 Jean 5:19) Alors, l’humanité pé contigne affecté par la guerre, crime ek pauvreté.
5 Li clair ki benediction Jéhovah pa lor sa mauvais le monde-la. Paul ti dire ki “Bondié pé montré so colere depuis le ciel kont bann dimoune ki pa obeir Li.” (Rom. 1:18-20) Alors, bann ki persisté pou amenn enn la vie ki pa faire Bondié plaisir, pou paye bann consequence zot conduite. Zordi, nou trouve colere Bondié par bann message jugement ki pé versé couma bann plaie lor le monde Satan. Ek sa bann message-la parette dan beaucoup publication biblik ki nou publié.—Rév. 16:1.
6, 7. (a) Ki travail bann chretien oint pé dirigé? (b) Ki possibilité bann ki forme partie dan le monde Satan encore ena?
6 Eski sa vedir ki li trop tard pou bann dimoune sorti enba domination Satan ek gagne faveur Bondié? Non, li encore possible pou zot reconcilié avek Jéhovah. Bann chretien oint ki “bann ambassadeur dan place Christ,” pé dirige enn travail l’enseignement ek grace a sa, bann dimoune dan tou nation pé gagne l’invitation pou “reconcilié-zot avek Bondié.”—2 Cor. 5:20, 21.
7 L’apotre Paul ti dire ki Jésus “delivré nou ar sa colere ki pé vini-la.” (1 Thess. 1:10) Finalement, Jéhovah pou exprime so colere kan Li pou amenn enn destruction eternel lor tou bann dimoune ki faire peché ek ki pa’lé repenti. (2 Thess. 1:6-9) Kisannla ki pou sapé? La Bible dire: “Kikenn ki ena la foi dan Garson Bondié ena la vie pou touletan; mais kikenn ki desobeir Garson Bondié pa pou trouve la vie, mais colere Bondié reste lor li.” (Jean 3:36) Oui, kan sa le monde-la pou fini, tou dimoune ki pou vivant ek ki pou ena la foi en Jésus ek dan la ranson, pa pou detruire kan Bondié pou manifesté so colere.
Lor ki principe la ranson basé
8. (a) Ki joli l’avenir ti ena devant Adam ek Ève? (b) Couma Jéhovah inn montré ki Li ena enn justice parfait?
8 Bondié ti crée Adam ek Ève parfait. Si zot ti contigne obeir Li, zordi la terre ti pou’nn rempli ar zot descendant ek zot ti pou kapav vive heureux ensam dan enn paradis. Mais malheureusement, nou premier parent ti desobeir l’ordre Bondié volontairement. A cause sa, Bondié ti condamne zot a mort pou touletan, ek ti pousse zot en dehors Paradis. Kan Adam ek Ève ti gagne bann zenfant, zot ti deja bann dimoune imparfait. Toulé-deux ti’nn vinn vié ek apré zot inn mort. Sa montré ki Jéhovah tini so parole. En plus, Li enn Bondié ki ena enn justice parfait. Jéhovah ti averti Adam ki si li mange fruit ki Li ti defann, li ti pou mort, ek vrai-mem sa inn arrivé.
9, 10. (a) Kifer bann descendant Adam zot mort? (b) Couma nou kapav delivré ar enn la mort eternel?
9 En tant ki bann descendant Adam, nou finn herite enn lekor imparfait ki faire peché ek ki finalement mort. Kan Adam ti faire peché, dan enn certain sens, nou, so bann descendant, nou ti encore dan so lé-rein. Alors, nou aussi nou ti condamné pou mort. Si Jéhovah ti elimine la vieillesse ek la mort sans paye enn ranson, Li pa ti pou fidele ar so parole. Oui, Paul ti koz pou nou tou kan li ti dire: “Nou koné ki la Loi li spirituel; mais moi, mo charnel, ek finn vann moi pou vinn esclave peché. Mo enn dimoune desesperé! Kisannla pou delivré moi ar sa lekor ki’nn condamné pou konn sa la-mort-la?”—Rom. 7:14, 24.
10 Zis Jéhovah ki ti kapav donne enn fondement legal ki ti pou permette Li, en accord avek la justice, pardonne nou bann peché ek libere nou ar condamnation enn la mort eternel. Li ti faire sa kan Li ti envoye so Garson lor la terre pou né couma enn dimoune parfait, ki ti pou kapav donne so la vie en ranson pou nou. Jésus pa ti faire pareil couma Adam. Li, li ti reste parfait. Oui, “li pa ti commette okenn peché.” (1 Pierre 2:22) Jésus ti ena possibilité pou vinn papa enn descendance parfait. Pourtant, li ti laisse so bann l’ennemi touye li, pou li kapav adopté bann descendant Adam. Coumsa, li’nn donne possibilité bann ki ena la foi en li pou gagne la vie eternel. La Bible explik sa: “Ena enn sel Bondié, ek enn sel mediateur entre Bondié ek bann dimoune, enn zom, Christ Jésus, ki finn donne so la vie couma enn ranson ki corresponn pou sauve tou dimoune.”—1 Tim. 2:5, 6.
11. (a) Ki l’exemple nou kapav prend pou explik bann bienfait ki nou gagné ar la ranson? (b) Kisannla aussi pou gagne bann bienfait grace a la ranson?
11 Nou kapav explik role ki la ranson finn joué par enn l’exemple. Faire coumadir bann proprietaire enn la banque inn faire fraude. Zot inn kokin tou kass ki bann dimoune inn mette dan zot la banque, ek lerla sa bann dimoune-la pena kass pou paye zot bann dette. Bien sur, la loi condamne sa bann proprietaire la banque-la ek mette zot dan prison pou plusieurs l’année. Mais ki arrive sa bann dimoune innocent-la? Zot vinn misere ek pena okenn l’espoir pou zot, a moins ki enn bon missié ki bien riche ré-acheté la banque-la, rann sa bann victime-la tou seki zot inn perdi, ek rembourse zot dette. Dan mem fason, Jéhovah ek so Garson inn ré-acheté bann descendant Adam ek inn cancel zot dette, setadir zot peché, lor base sacrifice ki Jésus inn donné kan li’nn verse so di-sang. C’est a cause sa ki Jean Baptiste ti kapav dire lor Jésus: “Guetté, l’Agneau Bondié ki tire peché le monde!” (Jean 1:29) Le monde ici pa concerne zis bann dimoune vivant, mais aussi bann dimoune ki’nn mort.
Ki la ranson inn coute Jéhovah ek Jésus?
12, 13. Ki nou aprann ar l’exemple Abraham ki ti disposé pou offert Isaac?
12 Li impossible pou nou pou comprend exactement seki la ranson inn coute nou Papa ki dan le ciel ek so garson ki Li bien content. Mais la Bible raconte bann l’exemple ki aide nou pou medite lor la. Par exemple, essaye maziné ki Abraham ti ressenti pendant sa trois jour ki li ti pé voyagé pou al Moria apré ki Bondié ti donne li sa l’ordre-la: “S’il te plait, prend to garson, to sel garson ki to bien content, Isaac, ek al dan direction pays Moria, ek la offert li couma enn sacrifice lor enn parmi bann montagne ki mo pou montré toi.”—Gen. 22:2-4.
13 Finalement, Abraham ti arrive dan l’endroit kot Bondié ti dire li. Maziné ki quantité so leker ti dechiré kan li ti bizin attache la main ek lipié Isaac ek faire li allonge lor sa l’autel ki Abraham li-mem ti’nn faire-la! Ek ki quantité sa ti dur pou li pou leve so couteau pou touye so garson! Mazinn sentiment Isaac kan li ti pé allongé lor sa l’autel-la, li ti pé attann sa douleur terrible ki li ti pou gagné-la ziska li mort. Ange Jéhovah ti arrete Abraham zis a temps! Seki Abraham ek Isaac ti faire sa jour-la, aide nou pou comprend seki sa inn bizin coute Jéhovah pou laisse bann agent Satan touye so Garson. Isaac ti soumette ek ti coopere avek Abraham; sa montré couma Jésus aussi ti pou disposé pou souffert ek pou mort pou nou.—Héb. 11:17-19.
14. Ki l’evenement dan la vie Jacob aide nou pou apprecié seki la ranson inn coute Jéhovah?
14 Enn l’evenement dan la vie Jacob kapav aussi aide nou pou comprend seki la ranson inn coute Jéhovah. Parmi tou so bann garson, Jacob ti pli content Joseph. Malheureusement, bann frere Joseph ti jaloux ek ti detesté li. Pourtant, kan so papa ti demann li pou al prend nouvelle so bann frere, Joseph ti accepté pou allé. Sa jour-la, so bann frere ti pé veille troupeau Jacob apepré 100 km dan nord Hébrôn, kot zot ti pé vive. Mazinn douleur ki Jacob ti ressenti kan so bann garson ti retourné avek linge Joseph ki ti rempli ar di-sang. Li ti criyé: “Longue linge mo garson sa! Surement enn mauvais zanimo sauvage inn devore li! Pena doute ki li’nn dechire Joseph boute-boute!” Sa malheur-la ti affecté Jacob beaucoup, ek li ti garde deuil pou Joseph pendant plusieurs jour. (Gen. 37:33, 34) Jéhovah pa reagir exactement pareil couma bann dimoune imparfait. Pourtant, kan nou medite lor sa l’evenement ki ti arrivé dan la vie Jacob-la, sa kapav aide nou pou comprend enn tipé ki Bondié ti’nn ressenti kan so Garson ti gagne maltraité ek ti mort lor la terre.
Couma nou kapav gagne bann bienfait ar la ranson
15, 16. (a) Couma Jéhovah ti montré ki Li ti accepté la ranson? (b) Couma ou finn gagne bann bienfait grace a la ranson?
15 Jéhovah ti ressuscite so Garson ek ti donne li enn lekor spirituel rempli ar la gloire. (1 Pierre 3:18) Apré so resurrection, pendant 40 jour, Jésus ti apparette ar so bann disciple, li ti fortifié zot la foi ek ti prepare zot pou enn grand travail predication ki ti pé attann zot. Apré sa, li ti monte dan le ciel. La, li ti presente Bondié valeur so di-sang ki li ti versé en faveur bann dimoune ki ti pou ena la foi dan so sacrifice. Jéhovah ti montré ki Li ti accepté la ranson kan Li ti donne Jésus responsabilité pou donne l’esprit saint so bann disciple ki ti rassemblé dan Jérusalem jour la Pentecôte l’an 33 nou lepok.—Actes 2:33.
16 Desuite sa bann disciple ki ti oint ar l’esprit saint-la, ti encourage zot prochain pou prend bapteme lor nom Jésus Christ pou ki Bondié kapav pardonne zot peché ek pou zot kapav sapé kan Bondié pou manifesté so colere. (Lire Actes 2:38-40.) Depuis sa jour historik-la ziska zordi, plusieurs million dimoune ki sorti dan tou nation finn attiré vers Bondié ek finn developpe bann bon relation avek Li grace a zot la foi dan sacrifice Jésus. (Jean 6:44) Aster ki nou finn arrive la dan nou l’etude, li bon ki nou examine deux question: Eski nou finn gagne l’esperance la vie eternel grace a bann bon kitsoz ki nou finn faire? Eski li possible ki nou perdi sa grand l’esperance-la apré ki nou finn gagne li?
17. Couma nou bizin considere sa grand privilege pou vinn camarade ar Bondié-la?
17 La ranson c’est enn don ki nou pa merité ditou. Mais plusieurs million dimoune ki’nn mette zot la foi dan la ranson finn vinn camarade ar Bondié, ek finn gagne l’esperance pou vive pou touletan dan enn paradis lor la terre. Selman, pa parski enn dimoune inn vinn camarade ar Bondié ki c’est enn garantie ki li pou reste so camarade. Pou nou reussi sapé jour ki Bondié pou manifesté so colere, nou bizin contigne montré enn grand reconnaissance pou “ranson ki Christ Jésus inn payé.”—Rom. 3:24; lire Philippiens 2:12.
Contigne ena la foi dan la ranson
18. Ki sa impliké pou ena la foi dan la ranson?
18 Verset-clé sa lartik-la, Jean 3:36, montré ki, ena la foi en Jésus Christ implik aussi obeir li. Nou reconnaissance pou la ranson bizin pousse-nou pou vive en accord avek bann l’enseignement Jésus, parmi ena seki li ti enseigné lor la moralité. (Marc 7:21-23) “Colere Bondié pé vinn” lor tou seki pa’lé repenti ek ki pratik fornication, ki faire bann badinage grossier, ek ki pratik “l’impureté dan n’importe ki forme,” parmi ena l’habitude pou guette pornographie.—Éph. 5:3-6.
19. Cite bann fason positif couma nou kapav montré ki nou ena la foi dan la ranson.
19 Nou reconnaissance pou la ranson bizin pousse nou pou reste occupé avek ‘bann action ki montré ki nou ena l’attachement pou Bondié.’ (2 Pierre 3:11) Anou reserve assez le temps pou prié Jéhovah regulierement ek avek tou nou leker, pou etudié la Bible personnellement, pou assisté reunion, pou etudié en famille, ek pou preche Royaume Bondié avek zele. ‘Pa blié aussi pou faire di-bien ek partage avek lezot, parski c’est bann sacrifice coumsa ki faire Bondié plaisir.’—Héb. 13:15, 16.
20. Ki benediction bann ki ena la foi dan la ranson kapav attann pou gagné?
20 Kan Jéhovah pou manifesté so colere kont sa mauvais le monde-la, ki quantité nou pou content ki nou finn ena la foi dan la ranson, ek ki nou finn contigne ena reconnaissance pou sa disposition-la! Ek dan le monde nouveau ki Bondié inn promette, nou pou ena reconnaissance pou touletan pou sa bon disposition ki finn sauve nou ar colere Bondié-la.—Lire Jean 3:16; Révélation 7:9, 10, 13, 14.
Couma ou pou reponn?
• Kifer nou bizin la ranson?
• Ki la ranson inn coute Jéhovah ek Jésus?
• Ki bienfait nou gagné grace a la ranson?
• Couma nou kapav montré ki nou ena la foi dan sacrifice Jésus?
[Zimage page 19]
Li encore possible pou reconcilié avek Jéhovah
[Zimage page 21]
Kan nou medite lor seki’nn arrive Abraham, Isaac ek Jacob, sa kapav aide nou pou comprend tou seki la ranson inn coute Jéhovah ek Jésus