Kestion Bann Lekter

Kisannla ti bann gardien tanp ek ki responsabilite zot ti ena?

Sertin Levit ki pa ti servi kouma pret ti ena lezot responsabilite, par exanp, zot ti pe servi kouma gardien. Se responsab tanp ki ti ansarz sa bann gardien-la. Enn ekrivin Zwif, ki apel Philon, ti explike seki sa bann gardien-la ti bizin fer. Li ti dir: “Sertin parmi sa bann Levit-la ti gardien bann laport kot bann dimounn ti bizin pase pou rant dan tanp. Lezot ti dan tanp lamem ek zot ti gardien batiman kot ena parti ki Sin ek parti ki Pli Sin. Zot ti fer sir ki se zis bann dimounn ki ti gagn drwa rant laba ki rantre. Zot ti anpes lezot pou rantre, mem si sa bann dimounn-la pa ti fer sa par expre. Sertin ti osi fer bann shift pou fer letour tanp lanwit-lizour.”

Sanedrin ti kapav demann sa bann gardien-la pou ed zot. Se zis bann gardien tanp ki ti gagn permision gouvernman Romin pou sarye bann zarm.

Enn spesialis Labib, Joachim Jeremias, ti explike ki kan bann ofisie ti vinn aret Zezi, li ti demann zot kifer zot pa ti aret li kan li ti pe ansegne dan tanp. Zezi pa ti pou poz zot sa kestion-la si zot pa ti bann gardien tanp. Sa spesialis-la panse osi ki se bann gardien tanp mem ki ti anvi aret Zezi inpe letan avan. (Zan 7:32, 45, 46) Plitar, Sanedrin ti demann responsab tanp ek sertin gardien tanp pou amenn bann zapot devan zot. Kitfwa osi se bann gardien tanp ki ti trenn lapot Pol andeor tanp.​—Zist. 4:1- 3; 5:17- 27; 21:27- 30.