“L’ordre Ki Jehovah Finn Tiré” Pou Réussi Sans Faute
“Laisse mo koz lor l’ordre ki Jéhovah finn tiré; Li finn dire moi: ‘To mo garçon . . . Demann moi, ek mo pou donne toi bann nations en héritage.’”—PSAUME 2:7, 8.
1. Ki grand différence éna entre projet Bondié ek projet bann nations?
JÉHOVAH éna enn projet pou l’humanité ek pou la terre. Bann nations aussi éna enn projet. Mais entre zot projet ek projet Jéhovah, éna enn bel différence! Au fait, sa pa étonne nous, parski Bondié Li-mem finn dire: “Pareil couma le ciel pli supérieur ki la terre, mo bann manières agir pli supérieur ki zot bann manières agir, et mo pensée pli supérieur ki zot pensées.” Nous kapav sûr ki projet Bondié pa pou tombe dans de l’eau, parski Li ajouté: “Pareil couma la pluie ek la neige ki sorti dans le ciel, pa retourne là-haut, sans ki zot arrose la terre ek rann li fertile, ek faire la grain germé, pou ki planteur kapav semé ek gagne so du pain, eh bien, mo parole aussi, li pa pou retourne vers moi, sans résultat. Li pou bizin réussi, là kot mo finn envoye li.”—Isaïe 55:9-11.
2, 3. Ki l’assurance Psaume 2 donne nous, mais ki bann questions ki soulevé?
2 Psaume 2 donne nous l’assurance ki projet Jéhovah concernant so lé-Roi Messianique, pou réalisé. Inspiré par Bondié, David, le roi Israël, ti compose sa psaume-la. Ladan, li ti’nn prédire ki ti pou arrive enn l’époque kot bann nations ti pou bouleversé. Zot bann dirigeants pou opposé kont Jéhovah ek kont lé-Roi ki Li finn choisir. Mais pli loin dans sa psaume-la, David dire: “Laisse mo koz lor l’ordre ki Jéhovah finn tiré; Li finn dire moi: ‘To mo garçon . . . Demann moi, ek mo pou donne toi bann nations en héritage, ek la terre entier, couma to propriété.’ ”—Psaume 2:7, 8.
3 “L’ordre ki Jéhovah finn tiré,” ki sa signifie pou bann nations? Couma sa concerne l’humanité en général? Et tou sa bann déroulements ki pou éna-la, ki sa veut dire pou bann lecteurs Psaume 2, ki éna la crainte pou Bondié?
Bann Nations Pé Bouleversé
4. Couma eski ou pou résume bann points principal Psaume 2:1, 2?
4 Concernant séki bann nations ek zot dirigeants pé faire, David commence so psaume par sa bann paroles-la: “Kifer bann nations pé bouleversé coumsa, ek kifer bann peuples pé complote enn kitsoz inutile? Bann lé-rois lor la terre pé prend zot position ek bann chefs finn rassemblé ensemble, kont Jéhovah ek kont celui ki Li’nn choisir.”—Psaume 2:1, 2.a
5, 6. Ki “kitsoz inutile” bann nations ‘pé comploté’?
5 Ki “kitsoz inutile” bann nations ‘pé comploté’ zordi? Au lieu accepté Celui ki Bondié finn choisir—le Messie ou Christ—bann nations pé ‘comploté,’ c’est-à-dire zot pé faire plan pou contigne exerce zot l’autorité. Sa bann paroles Psaume 2-la finn éna aussi enn l’autre accomplissement dans premier siècle N.L., kan bann dirigeants Juif ek Romain ti marié-piké pou touye Jésus Christ, le Roi ki Bondié ti’nn désigné. Mais, pli grand accomplissement sa prophétie-la, finn commencé en 1914 kan Jésus ti vinn le Roi dans le ciel. Depuis ki sa finn arrivé, okenn organisation politique lor la terre pa finn accepté le Roi ki Bondié finn intronisé.
6 Le psalmiste ti pose sa question-la: “Kifer bann peuples pé complote enn kitsoz inutile?” Ki li ti pé rode dire? Projet bann nations li inutile; c’est enn projet dans vide, ki pa pou abouti. Zot pa pé kapav établi la paix ek l’harmonie lor la terre. Pourtant, zot opposé ar règne Bondié. À vrai dire, zot tou ensemble finn prend enn position agressif pou laguerre kont le Très-Haut ek kont so lé-Roi. C’est enn bel erreur ki zot pé faire!
Le Roi Ki Jéhovah Inn Établi, Pou Remporte la Victoire
7. Couma bann premier disciples Jésus ti applique Psaume 2:1, 2 dans enn la-prière?
7 Bann disciples Jésus ti applique bann paroles Psaume 2:1, 2 ar Jésus li-mem. Parski zot ti pé persécuté pou zot la-foi, zot ti prié: “Souverain Seigneur [Jéhovah], c’est toi ki’nn faire le ciel, la terre, la mer, ek tou kitsoz ki existé. Par moyen l’esprit saint, to finn dire par la bouche nou ancêtre David, to serviteur: ‘Kifer bann nations pé bouleversé coumsa, ek kifer bann peuples pé complote bann kitsoz inutile? Bann lé-rois lor la terre pé prend zot position ek bann chefs finn rassemblé ensemble, kont Jéhovah ek kont celui ki Li finn choisir.’ Oui, Hérode [Antipas] ek Ponce Pilate ti rassemblé ensemble dans sa la-ville-la, avec bann étrangers ek bann Israélites aussi, pou combatte kont to saint serviteur Jésus, ki to finn choisir.” (Actes 4:24-27; Luc 23:1-12)b Oui, dans premier siècle bannla ti monte enn complot kont Jésus, le serviteur ki Bondié finn choisir. Mais, sa psaume-la ti pou éna enn l’autre accomplissement plusieurs siècle plitar.
8. Couma eski Psaume 2:3 applique ar bann nations zordi?
8 Kan Israël ti dirigé par enn lé-roi, par exemple David, bann nations païen ek bann dirigeants ti rassemblé ensemble pou combatte kont Bondié ek kont le roi ki Li ti’nn choisir. Mais, eski li toujours pareil zordi? Zordi, bann nations pa’lé faire séki Jéhovah ek le Messie pé demann zot. C’est comme-ci zot pé dire: “Anou coupe zot la-cordes, ek jette sa loin ar nous!” (Psaume 2:3) Oui, bann nations ek zot dirigeants oppose tou restrictions ki Bondié ek so lé-Roi mette lor zot. Mais bien-sûr, n’importe ki zeffort zot faire pou coupe sa bann la-cordes-la, li pou dans vide.
Jéhovah Moque Zot
9, 10. Kifer Jéhovah moque bann nations?
9 Jéhovah pa prend compte okenn zeffort ki bann nations faire pou établi zot propre souveraineté. Psaume 2 contigné: “Celui ki pé assizé dans le Ciel pou rié; Jéhovah Li-mem pou moque zot.” (Psaume 2:4) Jéhovah pé alle de l’avant avec so projet; pou Li, bann nations pa dire Li nanyin! Li riye zot arrogance ek Li moque zot. Zot kapav flatte zot bann projet quantité ki zot envie, mais pou Jéhovah, zot tou simplement enn kitsoz ki faire Li rié. Oui, Li riye zot parski zot l’opposition li dans vide.
10 Dan so bann lézot psaumes aussi, David koz lor bann l’ennemis Bondié ek lor bann nations. Li dire: “Toi, Oh Jéhovah des armées, to-mem Bondié Israël. Ouver to lizié s’il te plaît pou guetté ki bann nations pé faire. Pa donne sa bann traîtres-la to faveur. À-soir, zot contigne revini, zot pa arrête zapé couma li-chien ek zot faire le tour la ville. Guetté! Zot la-bouche rempli ar paroles; éna l’épée lor zot la-lèvre, parski kisannla ki pé écouté? Mais toi, Oh Jéhovah, to pou riye zot; to pou moque tou bann nations.” (Psaume 59:5-8) Jéhovah riye tou sa vantard ki bann nations pé faire-la ek confusion ki éna entre zot, dans zot l’opposition kont Li.
11. Ki pou arrivé si bann nations essaye boycotte projet Bondié?
11 Bann paroles Psaume 2 augmente nou la-foi ki Bondié kapav relève n’importe ki défi. Nous kapav éna confiance ki touletan Li accompli so volonté, ek jamais Li pa abandonne so bann fidèle serviteurs. (Psaume 94:14) Mais ki pou arrivé si bann nations essaye boycotte projet Jéhovah? Sa psaume-la dire nous ki “dans so colère, [Bondié] pou koz avec zot,” couma enn gros coup-de-l’orage. Oui, “dans so grand colère, Li pou troublé zot,” pareil couma enn grand coup-de-zéclaire.—Psaume 2:5.
Bondié Finn Installe So lé-Roi
12. Ar ki intronisation Psaume 2:6 appliqué?
12 Asterla, dans sa psaume-la, Jéhovah dire enn kitsoz ki sûrement troublé bann nations. Li dire: “Moi, mo finn installe mo lé-roi lor Sion, mo montagne saint.” (Psaume 2:6) Sion ti enn colline dans Jérusalem kot David ti établi couma le roi lor Israël. Mais bien-sûr, le Roi Messianique li, li pa pou assise lor enn trône ki trouve dans sa la-ville-la, ni dans okenn place lor la terre d’ailleurs. Au fait, Jéhovah finn fini installe Jésus Christ, so lé-Roi Messanique, lor Montagne Sion ki trouve dans le ciel.—Révélation 14:1.
13. Ki l’alliance Jéhovah ti faire avec so Garçon?
13 Asterla, c’est le Roi Messianique li-mem ki kozé. Li dire: “Laisse mo koz lor l’ordre ki Jéhovah [ki’nn faire enn alliance avec So Garçon pou enn Royaume] finn tiré; Li [Jéhovah] finn dire moi: ‘To mo garçon; moi zordi, mo finn vinn to papa.’ ” (Psaume 2:7) C’est sa l’alliance pou enn Royaume la-mem, ki Christ ti pé pensé, kan li ti dire so bann apôtres: “C’est zot ki finn contigne reste avec moi dans mo bann l’épreuves. Mo pé faire enn alliance avec zot, pareil couma mo Papa finn faire enn alliance avec moi, pou enn royaume.”—Luc 22:28, 29.
14. Kifer nous kapav dire ki Jésus éna tou droit pou vinn le roi?
14 En accord avec prophétie Psaume 2:7, Jéhovah ti confirmé ki Jésus li So Garçon. Li ti faire sa au moment so baptême ek kan Li ti ressuscite li pou vive couma enn l’esprit. (Marc 1:9-11; Romains 1:4; Hébreux 1:5; 5:5) Oui, le Roi Royaume Bondié, li-mem Fils unique Bondié, ki Li’nn crée directement. (Jean 3:16) Étant donné ki Jésus faire partie dans descendance royal le Roi David, li éna tou droit pou vinn le roi. (2 Samuel 7:4-17; Matthieu 1:6, 16) D’après sa psaume-la, Bondié dire so Garçon: “Demann moi, ek mo pou donne toi bann nations en héritage, ek la terre en entier, couma to propriété.”—Psaume 2:8.
15. Kifer Jésus demann bann nations en héritage?
15 Le Roi—Garçon Bondié—occupe position ki pli proche ar Bondié. Jésus finn prouve so fidélité dans bann l’épreuves, et donc, Jéhovah éna enn bel confiance en li. En plus, Jésus éna droit à l’héritage en tant ki Garçon Premier-né Bondié. Oui, Jésus Christ li “l’image Bondié ki invisible, li-mem premier-né de toute la création.” (Colossiens 1:15) Donc, li suffi ki li demann Bondié, ek dé-suite Bondié ‘donne li bann nations en héritage, ek la terre en entier, couma so propriété.’ Si Jésus inn demann bann nations en héritage, c’est parski ‘li bien attaché avec bann humains,’ et aussi parski li envie sincèrement accompli volonté so Papa vis-à-vis la terre ek l’humanité.—Proverbes 8:30, 31.
Jéhovah Finn Tire enn l’Ordre Kont Bann Nations
16, 17. D’après Psaume 2:9, ki pé atann bann nations devant?
16 Étant donné ki Psaume 2 pé réalisé zordi, pendant présence invisible Jésus Christ, ki pé atann bann nations devant? Très bientôt, le Roi pou accompli séki Bondié finn dire li: “To pou casse zot [bann nations] avec enn sceptre en fer, ek to pou craze zot parey couma [craze] enn récipient la terre.”—Psaume 2:9.
17 Dans le passé, le sceptre ti enn instrument ki ti symbolise l’autorité ki bann lé-rois éna. Certains ti en fer, pareil couma séki mentionné dans sa psaume-la. Sa description-la montré avec ki facilité le Roi, Jésus Christ, pou détruire bann nations. Pensé ki pou arrive enn récipient la terre si donne li enn grand coup-de-sceptre ki en fer! Li pou vinn boute-boute.
18, 19. Pou gagne faveur Bondié, ki bann lé-rois lor la terre pou bizin faire?
18 Eski bann dirigeants humain encore kapav évite sa destruction fracassant-la? Oui. Guetté ki conseil le psalmiste donne zot: “Asterla, zot bann lé-rois, montré zot perspicace. Zot, bann juges lor la terre, accepté correction.” (Psaume 2:10) Bondié pé encourage bann lé-rois lor la terre pou prend bien compte zot situation, ek pou montré zot perspicace. Zot bizin prend conscience ki, contrairement ar séki Royaume Bondié pou faire pou l’humanité, zot, zot bann plans pa pou servi nanyin.
19 Pou gagne faveur Bondié, bann lé-rois lor la terre pou bizin change zot manière agir. Zot encouragé pou “servi Jéhovah avec crainte ek montré zot joyeux avec tremblement.” (Psaume 2:11) Ki pou arrivé si zot faire sa? Eh bien, au lieu zot bouleversé, zot pou heureux kan zot pense séki le Roi Messianique pou faire. Mais, zot pou bizin abandonne l’orgueil ek l’arrogance ki zot manifesté kan zot exerce zot l’autorité. En plus, fodé ki zot changé sans tardé. Zot pou bizin éna la perspicacité pou comprend ki souveraineté Jéhovah li pli supérieur ki tou, péna so deuxième, ek ki personne pa kapav résisté kont pouvoir ki Bondié ek so lé-Roi Messianique, zot éna.
“Embrasse le Fils”
20, 21. Ki veut dire “embrasse le fils”?
20 Asterla, Psaume 2 lance bann dirigeants bann nations enn invitation, ki reflète la miséricorde. Au lieu zot rassemblé ensemble kont Jéhovah, zot bizin suive sa conseil-la: “Embrasse le Fils, pou ki colère [Jéhovah] pa enflammé ek pou ki zot pa détruire, parski so colère flambe enn coup.” (Psaume 2:12a) Kan Souverain Seigneur Jéhovah tire enn l’ordre, bizin prend sa bien compte. Donc, kan Bondié ti faire so Garçon vinn le roi, bann dirigeants lor la terre ti bizin arrête “complote enn kitsoz inutile.” Zot ti bizin plutôt accepté sa lé-Roi-la tout de suite ek obéir tou séki Li dire.
21 Kifer bizin “embrasse le fils”? À l’époque, kan ti compose sa psaume-la, embrassé ti enn signe d’amitié, ek sa ti enn façon pou accueillir bann invités pou offer zot l’hospitalité. Embrassé ti aussi enn marque de fidélité. (1 Samuel 10:1) Donc, dans sa verset Psaume 2-la, Jéhovah pé ordonne bann nations pou embrasse so Garçon, pou accueillir lé-Roi ki Li’nn choisir.
22. Ki warning bann dirigeants humain éna intérêt prend bien compte?
22 Bann ki refuse reconnaite l’autorité sa lé-Roi-la, zot pé insulté Jéhovah. Zot montré ki zot rejette souveraineté universel Jéhovah, so l’autorité, ek droit ki Li éna pou choisir meilleur lé-Roi ki kapav éna pou l’humanité. Bann dirigeants humain pou trouvé ki colère Bondié pou vinn enn coup en-traître lor zot, au moment ki zot pé rode réalise zot propre plans. Oui, “so colère flambe enn coup” vite, ek pa kapav résisté kont sa. Bann dirigeants lor la terre ena intérêt accepté sa warning-la avec reconnaissance ek agir en harmonie avec sa. C’est enn question de vie ou de mort.
23. Ki bann dimoune encore toujours kapav faire?
23 Sa psaume dramatique-la termine avec sa bann mots-la: “Heureux bann ki refugié en [Jéhovah].” (Psaume 2:12b) Si enn dimoune envie gagne la vie sauve, éna encore toujours le temps. N’importe ki dirigeant sa lé-monde-la, ki pou le moment pé faire plan avec bann nations, li aussi li kapav sapé. Zot kapav sauvé, al vers Jéhovah; Li donne nous refuge sous le règne de so Royaume. Mais, zot bizin faire sa avant ki le Royaume Messianique fracasse bann nations ki pé opposé.
24. Couma nous kapav vive pli bien malgré ki sa lé-monde troublé?
24 Si nous sérieux dans nou l’étude de la Bible ek si nous applique so conseil dans nou la-vie, nous kapav vive pli bien depuis asterla-mem dans sa lé-monde troublé-la. Kan nous applique bann conseils la Bible, nous konn le bonheur dans la famille ek nous libéré ar enn quantité tracas ek craintes ki pé englouti sa lé-monde-la. Kan nous respecté bann principes Biblique, sa donne nous l’assurance ki nous pé faire plaisir nou Créateur. Personne, à part le Souverain l’Univers, pa kapav garanti nous ‘enn la-vie heureuse asterla ek dans l’avenir,’ kan Li pou débarasse la terre de tou bann ki finn refuse soumette ar règne Royaume Bondié.—1 Timothée 4:8.
25. Étant donné “l’ordre ki Jéhovah finn tiré” pou réussi sans faute, ki nous kapav atann dans nou l’époque?
25 “L’ordre ki Jéhovah finn tiré” pou réussi sans faute. En tant ki Créateur, Li koné ki pli bon pou bann humains. Li pou réalise so projet en zot faveur. Lerla tou dimoune ki obéir Li pou konn la paix, la satisfaction ek enn sécurité durable kan Christ pou régné. Concernant nou l’époque, prophète Daniel ti écrire: “Dans l’époque sa bann lé-rois-la, Bondié ki dans le ciel pou établi enn royaume ki jamais pa pou renversé. . . . Li pou craze tou bann lézot royaumes, ek li-mem ki pou régné pou enn lé-temps indéfini.” (Daniel 2:44) Donc, c’est le moment ou jamais pou “embrasse le fils” ek pou servi nou Souverain Seigneur, Jéhovah!
[Note]
a Sa l’époque-la, l’expression “celui ki Li’nn choisir” ti applique avec le Roi David, ek “bann lé-rois lor la terre” ti représente bann lé-rois Philistins ki ti rassemblé zot l’armées kont li.
b Éna lézot versets dans les Écritures Grecques Chrétiennes ki montré ki l’expression “celui ki Bondié finn choisir” dans Psaume 2:7, applique bel et bien ar Jésus. Compare Psaume 2:7 par exemple avec Actes 13:32, 33 ek Hébreux 1:5; 5:5. Guette aussi Psaume 2:9 ek Révélation 2:27.
Ki Ou Pou Réponn?
• Ki “kitsoz inutile” bann nations ‘finn comploté’?
• Kifer Jéhovah moque bann nations?
• Ki l’ordre Bondié finn tiré kont bann nations?
• Ki veut dire “embrasse le fils”?
[Zimage lor page 15]
Bann dirigeants ek le peuple Israël ti monte enn complot kont Jésus Christ
[Zimage lor page 16]
Christ finn intronisé couma le Roi lor Montagne Sion ki dans le ciel