“Vive en paix avek tou dimoune”
“Si possible, autant ki sa depann lor zot, vive en paix avek tou dimoune.”—ROM. 12:18.
1, 2. (a) Ki l’avertissement Jésus ti donne so bann disciple? (b) Kot nou kapav gagne bann conseil pou koné couma pou reagir kan nou gagne l’opposition?
JÉSUS ti averti so bann disciple ki zot ti pou gagne l’opposition ar bann nation dan sa le monde-la, ek dan la soirée avant so la mort, li ti dire zot kifer. Li ti dire so bann zapotre: “Si zot ti faire partie dan le monde, le monde ti pou content seki pou li. Mais parski zot pa faire partie dan le monde, ek ki mo finn choisir zot dan le monde, a cause sa le monde ena la haine pou zot.”—Jean 15:19.
2 L’apotre Paul ti trouvé par li-mem ki sa bann parole Jésus-la zot vrai. Dan deuxieme lettre ki li ti ecrire so jeune compagnon Timothée, Paul ti dire: “To’nn suive bien mo l’enseignement, mo maniere vive, mo l’objectif, mo la foi, mo patience, mo l’amour, mo l’endurance, mo bann persecution, mo bann souffrance.” Apré sa Paul ti ajouté: “En realité, tou bann ki envie reste attaché avek Bondié, en tant ki disciple Christ Jésus pou gagne persecution zot aussi.” (2 Tim. 3:10-12) Dan lettre ki li ti ecrire bann Romain, dan chapitre 12, Paul ti donne bann bon conseil couma zot ti bizin reagir kan zot gagne l’opposition. So bann parole kapav aide nou dan sa lepok la fin-la.
“Mazinn pou faire seki bien”
3, 4. Couma nou kapav applik conseil ki nou gagné dan Romains 12:17 (a) dan enn lakaz kot certain pa dan la verité? (b) dan nou relation avek nou bann voisin?
3 Lire Romains 12:17. Paul ti expliké ki, kan nou gagne l’opposition, fodé pa ki nou rod rann la pareil. Sa conseil-la li bien important surtout dan bann famille kot pa zot tou ki dan la verité. Si conjoint ki pa dan la verité-la dire enn parole blessant, so conjoint ki enn chretien pou resisté kont tentation pou reponn ou-soit pou faire enn kitsoz pou rann li la pareil. Nou pa gagne nanyin de bon kan nou ‘rann le mal pou le mal.’ Au contraire, enn l’attitude coumsa, li zis faire situation-la vinn pli grave.
4 Paul conseil enn pli bon fason pou agir: “Mazinn pou faire seki bien devant lizié tou dimoune.” Dan enn lakaz, si enn mari faire so femme enn remark blessant lor so croyance ek femme-la montré enn vrai bonté envers li, sa kapav empeche situation-la vinn pli pire. (Prov. 31:12) Carlos, ki asterla membre dan famille Béthel, raconté couma so mama ti faire kan so papa ti bien opposé. So mama ti contigne montré-li bon ek li ti prend bien soin zot lakaz. Carlos raconté: “Li ti encourage nou, bann zenfant, pou nou touletan respecté [nou papa]. Li ti insisté ki mo joué pétanque avek mo papa, mem si sa pa ti mo joué preferé. Mais, sa ti faire mo papa plaisir.” Avek le temps, papa Carlos ti commence etudié la Bible ek li ti prend bapteme. Concernant “faire seki bien devant lizié tou dimoune,” bann Témoins de Jéhovah souvent inn surmonte bann prejugé kan zot inn aide zot bann voisin, apré enn catastrophe.
Faire l’opposition fonn avek bann “la braise difé”
5, 6. (a) Dan ki sens nou kapav mette enn tas “la braise difé” lor la tête nou bann l’ennemi? (b) Raconte enn l’experience local ki montré couma, kan nou applik conseil ki trouve dan Romains 12:20, sa kapav amenn bann bon resultat.
5 Lire Romains 12:20. Kan Paul ti choisir bann parole ki trouve dan sa verset-la, surement li ti pé pense seki nou lire dan Proverbes 25:21, 22: “Si sa dimoune ki ena la haine pou toi-la, li faim, donne li di-pain pou mangé; ek si li soif, donne li de l’eau pou boire. Parski c’est bann la braise ki to pé mette en tas lor so la tête, ek Jéhovah Li-mem pou recompense toi.” Kan nou considere bann conseil ki Paul donne nou dan Romains chapitre 12, nou comprend ki dan verset 20, li pa ti rod dire ki sa bann la braise-la represente punition ki nou donne enn dimoune ki persecute nou ou-soit la honte ki nou faire li gagné. Au contraire, sa proverbe-la—ek aussi bann parole ki Paul dire dan Romains chapitre 12—kitfois faire reference ar enn ancien methode ki bann dimoune ti servi pou fonn bann metal. Charles Bridges, enn Anglais ki ti enn specialiste lor la Bible ek ki’nn vive dan 19eme siecle ti faire sa remark-la: “Entoure sa metal dur-la enba ek la-haut; pa zis mette li lor difé, mais mette enn tas la braise difé lor li. Pena beaucoup leker ki dur sa quantité-la, pou ki zot pa fonn enba pouvoir extraordinaire patience, sacrifice ek enn grand l’amour.”
6 Pareil couma bann “la braise difé,” nou bann bon action kapav touche leker nou bann opposant ek kitfois faire zot la haine pou nou, fonn. Bann bon action kapav influence bann dimoune ek faire zot change zot l’attitude envers bann serviteur Jéhovah ek envers message ki zot preché. L’apotre Pierre ti ecrire: “Garde enn bon conduite parmi tou dimoune, pou ki, kan bannla koz kont zot ek dire ki zot bann mauvais dimoune, sa bann dimoune-la kapav, a cause zot bann bon action ki zot inn trouvé avek zot prop lizié, donne Bondié la gloire jour ki Li pou faire so inspection.”—1 Pierre 2:12.
“Vive en paix avek tou dimoune”
7. Ki été la paix ki Christ laisse avek so bann disciple, ek ki sa bizin pousse-nou pou faire?
7 Lire Romains 12:18. Pendant dernier soirée ki Jésus ti passé avek so bann zapotre, li ti dire zot: “Mo laisse zot la paix, mo donne zot mo la paix.” (Jean 14:27) La paix ki Christ laisse avek so bann disciple c’est enn calme ki zot ressenti au fond zot-mem kan zot senti ki Jéhovah ek so Garson content zot ek approuve zot. Sa la paix-la bizin pousse-nou pou vive en paix avek lezot. Bann vrai chretien content la paix ek faire tou seki zot kapav pou vive en paix avek zot prochain.—Mat. 5:9, note.
8. Couma nou kapav vinn bann dimoune ki faire la paix dan nou famille ek dan congregation?
8 Enn fason ki nou kapav faire la paix dan la famille, c’est kan nou reglé bann desaccord pli vite possible au lieu ki nou laisse bann situation vinn pli pire. (Prov. 15:18; Éph. 4:26) Nou bizin faire sa aussi dan congregation. L’apotre Pierre ti montré ki ena enn rapport entre rod la paix ek controle nou la langue. (1 Pierre 3:10, 11) Jacques aussi ti donne bann conseil ferme lor bon fason ki nou bizin servi nou la langue ek l’importance pou rejette jalousie ek enn tendance pou laguerre. Apré sa li ti ecrire: “Sagesse ki sorti la-haut li avant tou pur, apré li pacifik, li raisonnable, li disposé pou obeir, li rempli ar misericorde ek bann bon fruit, li pa faire preference, li pa hypocrite. En plus, la grain fruit la justice li semé dan la paix pou bann ki faire la paix.”—Jacq. 3:17, 18.
9. Alors ki nou pé essaye “vive en paix avek tou dimoune,” ki nou bizin rappel?
9 Dapré seki Paul ecrire dan Romains 12:18, li pa zis dire ki nou bizin vive en paix dan la famille ek dan congregation, li dire aussi ki nou bizin “vive en paix avek tou dimoune.” Sa implik nou bann voisin, nou bann collegue travail, bann camarade lekol, ek bann dimoune ki nou joinde dan predication. Mais avek so conseil, Paul ti ajouté: “Si possible, autant ki sa depann lor zot.” Sa vedir ki nou pou faire tou seki nou kapav dan enn fason raisonnable pou “vive en paix avek tou dimoune” mais pa ziska al kont bann principe droite Bondié.
Vengeance pou Jéhovah
10, 11. Dan ki sens nou “laisse place pou colere,” ek kifer li bon nou faire sa?
10 Lire Romains 12:19. Nou pou contigne ‘controle nou-mem kan lezot faire nou di-tort’ ek nou pou agir “avek douceur” mem envers “bann ki pa bien disposé” envers nou l’activité ek nou message, parmi ena bann ki opposé ar nou dan enn fason direct. (2 Tim. 2:23-25) Paul conseil bann chretien pou pa tire vengeance zot-mem mais pou “laisse place pou colere.” Paul ti pé faire reference ar colere kisannla? Nou sur ki li pa ti pé rod dire ki nou bizin laisse nou prop colere explosé. Li clair ki nou pou laisse place pou colere Bondié. En tant ki chretien, nou koné ki c’est pa nou ki bizin tire vengeance. Enn psalmiste ti ecrire: “Rejette la colere ek la rage; pa bouilli ar colere zis pou faire seki mauvais.” (Ps. 37:8) Salomon ti donne sa conseil-la: “Pa dire: ‘Mo pou rann le mal!’ Mette to l’espoir en Jéhovah, ek Li pou sauve toi.”—Prov. 20:22.
11 Si nou bann l’ennemi faire nou di-tort, li pou sage ki nou laisse Jéhovah decidé si Li pou puni zot ek kan Li pou faire sa. Pou montré ki li ti pé pense colere Jéhovah, Paul ti ajouté: “Finn ecrire: ‘Jéhovah dire: Vengeance pou moi; moi ki pou faire zot payé.’ ” (Compare avek Deutéronome 32:35.) Si nou essaye tire vengeance nou-mem, nou pou agir avek l’orgueil, nou pou faire enn kitsoz ki Jéhovah inn reservé couma enn kitsoz ki zis Li tousel gagne droit faire. En plus, nou pou montré ki nou pena assez la foi dan sa promesse Jéhovah-la: “Moi ki pou faire zot payé.”
12. Kan Jéhovah pou montré so colere, ek couma?
12 Dan commencement lettre ki Paul ti ecrire bann Romains, li ti dire: “Parski Bondié pé montré so colere depuis le ciel kont bann dimoune ki pa obeir Li, bann ki injuste ek ki touffe la verité dan enn fason injuste.” (Rom. 1:18) Jéhovah pou montré so colere depuis le ciel par moyen so Garson kan pou ena “la grande tribulation.” (Rév. 7:14) Sa pou “enn preuve ki jugement Bondié li juste,” pareil couma Paul ti expliké dan enn lot lettre ki li ti inspiré pou ecrire: “Bondié pé agir avek justice kan Li rann tribulation bann ki pé faire zot passe par tribulation; mais, pou zot ki pé souffert la tribulation, Li pou donne zot soulagement ensam avek nou, pendant revelation nou Seigneur Jésus depuis le ciel avek so bann ange puissant dan enn grand difé, kan li pou tire vengeance lor bann ki pa konn Bondié ek lor bann ki pa obeir la bonne nouvelle concernant nou Seigneur Jésus.”—2 Thess. 1:5-8.
Domine le mal par le bien
13, 14. (a) Kifer nou pa etonné kan bann dimoune opposé ar nou? (b) Couma nou kapav beni bann ki persecute nou?
13 Lire Romains 12:14, 21. Nou ena full confiance ki Jéhovah pou realise so bann promesse, a cause sa nou kapav faire tou nou zeffort pou faire travail ki Li’nn donne nou—preche “sa bon nouvelle lor royaume-la. . . partout kot dimoune resté lor la terre.” (Mat. 24:14) Nou koné ki sa l’activité spirituel-la pou provok colere nou bann l’ennemi, parski Jésus ti donne nou sa l’avertissement-la: “Tou bann nation pou ena la haine pou zot a cause mo nom.” (Mat. 24:9) Alors, nou pa etonné, ni nou decouragé kan nou gagne l’opposition. L’apotre Pierre ti ecrire: “Mo bann frere ki mo bien content, pa etonné a cause sa difé ki ena parmi zot-la, ek ki pé vinn lor zot pou testé zot, coumadir c’est enn kitsoz drole ki pé arrive zot. Au contraire, contigne ena la joie parski zot pé participe dan bann souffrance Christ.”—1 Pierre 4:12, 13.
14 Au lieu ki nou amer kont bann dimoune ki persecute nou, nou essaye enseigne zot, parski nou realisé ki kitfois certain parmi zot pé agir par ignorance. (2 Cor. 4:4) Nou faire zeffort pou suive conseil Paul: “Contigne beni bann ki persecute zot; beni ek pa maudit.” (Rom. 12:14) Enn fason ki nou beni nou bann l’ennemi c’est kan nou prié pou zot. Dan so Sermon lor montagne, Jésus ti dire: “Contigne content zot bann l’ennemi, faire seki bien envers bann ki ena la haine pou zot, beni bann ki maudit zot, prié pou bann ki insulté zot.” (Luc 6:27, 28) L’apotre Paul ti koné par so prop l’experience ki enn persecuteur kapav vinn enn disciple Christ ki fidele ek servi Jéhovah avek zele. (Gal. 1:13-16, 23) Dan enn lot lettre, Paul ti dire: “Kan dimoune insulté nou, nou beni zot; kan zot persecute nou, nou supporté; kan dimoune sali nou reputation, nou suppliyé.”—1 Cor. 4:12, 13.
15. Ki pli bon fason nou kapav domine le mal par le bien?
15 Alors, enn vrai chretien prend compte dernier verset Romains chapitre 12: “Pa laisse le mal domine toi, mais contigne domine le mal par le bien.” C’est Satan le Diable ki responsable tou le mal ki ena zordi. (Jean 8:44; 1 Jean 5:19) Dan revelation ki li ti donne l’apotre Jean, Jésus ti faire koné ki so bann frere oint finn “gagne la victoire lor [Satan], par di-sang l’Agneau ek par zot temoignage.” (Rév. 12:11) Sa montré nou ki pli bon fason pou gagne la victoire lor Satan ek lor mauvais l’influence ki li ena lor sa le monde-la, c’est kan nou faire seki bon par nou l’activité predication, kan nou preche la bonne nouvelle lor Royaume Bondié.
Trouve la joie dan l’esperance
16, 17. Ki Romains chapitre 12 enseigne nou concernant (a) fason ki nou bizin vive? (b) fason ki nou bizin agir dan congregation? (c) fason ki nou bizin traite bann ki opposé ar nou?
16 Dan sa ti resumé lor chapitre 12 dan lettre ki Paul ti ecrire bann Romain, nou finn gagne bann rappel lor beaucoup kitsoz. Nou finn aprann ki, en tant ki bann serviteur ki finn voué nou la vie pou servi Jéhovah, nou bizin disposé pou faire bann sacrifice. Grace a l’esprit Bondié ki motive nou, nou pou faire bann sacrifice volontairement parski nou capacité pou raisonné finn convaink nou ki seki nou pé faire c’est sa volonté Bondié. Nou zelé grace a l’esprit saint ek nou servi bann don different ki nou ena, avek zele. Nou servi avek humilité ek modestie, ek nou faire tou seki nou kapav pou garde l’unité entre nou. Nou contigne montré l’hospitalité, ek nou montré ki nou comprend lezot.
17 Romains chapitre 12 donne nou beaucoup conseil lor fason ki nou bizin reagir kan bann dimoune opposé ar nou. Fodé pa nou rann le mal pou le mal. Nou bizin essaye surmonte l’opposition par bann bon action. Autant ki possible, sans ki nou al kont bann principe biblik, nou bizin faire zeffort pou vive en paix avek tou dimoune. Sa applik dan nou famille, dan congregation, avek nou bann voisin, dan travail, dan lekol, ek dan predication. Mem kan nou gagne l’opposition direct, nou faire tou seki nou kapav pou domine le mal par le bien, ek en mem temps nou rappel ki vengeance pou Jéhovah.
18. Ki trois lezot conseil nou gagné dan Romains 12:12?
18 Lire Romains 12:12. Avek tou sa bann bon conseil pratik-la, Paul donne trois lezot conseil. Nou koné ki jamais nou pou kapav faire tousala sans l’aide Jéhovah, a cause sa Paul conseil nou pou “perseveré dan la priere.” Sa pou permette nou pou suive sa lot conseil-la: “Enduré dan l’epreuve.” Finalement, nou bizin garde nou l’esprit fixé lor l’avenir ki Jéhovah promette nou ek “trouve la joie dan l’esperance” la vie eternel, ki li dan le ciel ou-soit lor la terre.
Revision
• Couma nou bizin faire face ar l’opposition?
• Dan ki domaine nou bizin essayé faire la paix, ek couma?
• Kifer fodé pa ki nou rod tire vengeance nou-mem?
[Zimage lor page 16]
Kan nou aide nou bann voisin dan enn fason pratik, sa kapav surmonte bann prejugé ki zot ena envers nou
[Zimage lor page 17]
Eski ou faire tou seki ou kapav pou vinn enn kikenn ki faire la paix dan congregation