“Contigne domine le mal par le bien”

“Pa laisse le mal domine toi, mais contigne domine le mal par le bien.”—ROMAINS 12:21.

1. Kifer nou kapav sur ki nou kapav domine le mal?

ESKI li possible pou tini ferme kont bann dimoune ki bien opposé ar vrai l’adoration? Eski li possible pou resisté kont bann l’influence ki essaye faire nou retourne dan sa lé-monde ki pena respé pou Bondié-la? Reponse pou toulé-deux question, li oui! Kifer? A cause seki Paul ti ecrire bann Romains: “Pa laisse le mal domine toi, mais contigne domine le mal par le bien.” (Romains 12:21) Si nou ena confiance en Jéhovah ek nou bien decidé pou pa laisse le monde domine nou, le mal ki ena tout autour nou pa pou domine nou. En plus, l’expression “contigne domine le mal” montré ki nou kapav gagne la victoire lor le mal si nou contigne faire nou la-guerre spirituel kont le mal. Sa mauvais lé-monde-la ek so mauvais chef, Satan le Diable, pou reussi domine zis bann dimoune ki arrete veillé ek ki arrete faire laguerre lor plan spirituel.—1 Jean 5:19.

2. Kifer eski nou pou examine dé-trois l’evenement ki ti arrivé dan la vie Nehémia?

² Apepré 500 an avant lepok Paul, enn serviteur Bondié ki ti reste Jérusalem, ti montré ki seki Paul ti dire lor la guerre kont le mal, li vrai. Sa serviteur Bondié-la, c’est Nehémia. Li pa ti zis resisté kont l’opposition ki li ti gagné ar bann dimoune ki pa ti servi Jéhovah, mais li ti aussi domine le mal par le bien. Ar ki bann situation difficile li ti bizin faire face? Ki ti aide li pou reussi? Couma nou kapav imite so l’exemple? Pou reponn sa bann question-la, anou examine certain l’evenement ki ti arrivé dan la vie Nehémia.a

3. Ki la Bible dire lor la vie Nehémia, ek ki kitsoz extraordinaire li ti faire?

³ Nehémia ti servi dan la cour le roi Perse, Artaxerxès. Mem si li ti vive parmi bann dimoune ki pa ti servi Jéhovah, li pa ti ‘faire pareil couma le monde’ dan sa lepok-la. (Romains 12:2) Kan ti ena enn besoin dan Juda, li ti sacrifié la vie confortable ki li ti ena, li ti faire enn voyage bien difficile pou al Jérusalem, ek li ti prend responsabilité sa grand travail-la: reconstruire muraille la ville. (Romains 12:1) Mem si li ti gouverneur Jérusalem, toulé-jour Nehémia ti travail dur ensam avek so bann frere Israélite “depuis ki soleil commence levé ziska ki bann zetoile parette.” Resultat: dan zis deux mois sa construction-la ti fini! (Nehémia 4:21; 6:15) Sa ti enn kitsoz vrai-mem extraordinaire, parski pendant sa construction-la bann Israélite ti faire face ar tou sorte qualité l’opposition. Kisannla ki ti bann adversaire Nehémia, ek ki l’objectif zot ti ena?

4. Ki l’objectif bann adversaire Nehémia ti ena?

⁴ Bann principal adversaire Nehémia ti Sânballat, Tobia ek Guéshem, bann zom puissant ki ti vive pré kot territoire Juda. Zot ti bann l’ennemi peuple Bondié, alors “pou zot, sa ti parette enn mauvais kitsoz ki [Nehémia] ti vinn rod enn kitsoz ki bon pou bann descendant Israël.” (Nehémia 2:10, 19) Bann l’ennemi Nehémia ti bien decidé pou arrete so projet pou reconstruire muraille ek zot ti mem faire bann complot pou empeche sa travail-la. Eski Nehémia ti pou laisse le mal gagne la victoire lor li?

“Li ti en colere ek li ti bien offensé”

5, 6. (a) Couma bann adversaire Nehémia ti reagir kan zot ti trouve bann Israélite construire muraille Jérusalem? (b) Kifer Nehémia pa ti laisse bannla faire li peur?

⁵ Avek courage Nehémia ti dire le peuple: “Anou reconstruire muraille Jérusalem.” Zot ti reponn: “Nou bizin construire.” Nehémia ti faire sa remark-la: “Zot ti fortifié zot la-main pou sa bon travail-la,” mais bann opposant “ti commence bouffonne nou ek guette nou travers, ek zot ti dire: ‘Ki sa kitsoz ki zot pé faire-la? Eski c’est kont le roi ki zot pé rebellé?’ ” Mais Nehémia pa ti laisse zot bann moquerie ek zot bann fausse l’accusation faire li peur. Li ti dire so bann adversaire: “Bondié ki’nn faire le ciel, Li-mem ki pou faire nou reussi, ek nou, so bann serviteur, nou pou levé, ek nou pou bizin construire.” (Nehémia 2:17-20) Nehémia ti bien decidé pou contigne “sa bon travail-la.”

⁶ Enn parmi sa bann opposant-la, Sânballat “ti en colere ek li ti bien offensé” ek li ti insulté zot encore plus. Pou bouffonne zot, li ti dire: “Ki sa bann Juif faible-la pé faire? . . . Eski zot pou faire sa bann roche ki sorti dan bann ruine ki rempli ar la poussiere-la, regagne la vie?” Tobia li aussi ti commence bouffonne bann Israélite, li ti dire: “Si enn renard attak sa, pena doute ki li pou casse zot muraille roche.” (Nehémia 4:1-3) Couma Nehémia ti reagir?

7. Couma Nehémia ti reagir kan so bann adversaire ti faire bann fausse l’accusation?

⁷ Nehémia pa ti prend compte sa bann moquerie-la. Li ti suive commandement Bondié ek li pa ti rod tire vengeance. (Lévitique 19:18) Au contraire, li ti laisse tou dan la main Jéhovah ek li ti faire sa la-priere-la: “Ah nou Bondié, ecoute nou, parski nou finn vinn enn kitsoz ki dimoune meprisé; ek faire zot affront retourne lor zot prop la-tête.” (Nehémia 4:4) Nehémia ti mette so confiance dan sa l’assurance ki Jéhovah ti donné-la: “Vengeance ek punition pou moi.” (Deutéronome 32:35) En plus, Nehémia ek le peuple ti “contigne construire sa muraille-la.” Zot pa ti laisse personne empeche zot concentré lor zot travail. En realité, zot “ti faire muraille-la net joinde ziska la moitié so hauteur, ek le peuple ti contigne mette tou zot leker dan sa travail-la.” (Nehémia 4:6) Bann l’ennemi vrai l’adoration pa ti’nn reussi arrete construction sa muraille-la! Couma nou kapav imite Nehémia?

8. (a) Couma nou kapav imite Nehémia kan nou bann adversaire faire bann fausse accusation lor nou? (b) Raconte enn l’experience ki ou finn faire ou-soit ki ou finn tendé ki montré ki li sage pou pa rod tire vengeance.

⁸ Zordi, bann dimoune ki opposé ar nou dan lekol, dan travail, ou-soit mem dan nou lakaz kapav bouffonne nou ek faire bann fausse accusation kont nou. Pourtant, souvent nou kapav faire face ar sa bann fausse accusation-la kan nou applik sa principe la Bible-la: “Ena . . . enn lé-temps pou reste trankil.” (Ecclésiaste 3:1, 7) Alors, pareil couma Nehémia, nou pa rod tire vengeance avek bann parole blessant. (Romains 12:17) Nou prié Bondié, ek nou faire confiance sa kikenn ki’nn dire: “Moi ki pou faire zot payé.” (Romains 12:19; 1 Pierre 2:19, 20) Dan sa fason-la, nou pa pou laisse nou bann adversaire detourne nou l’attention ar travail spirituel ki nou bizin faire zordi—preche la bonne nouvelle lor Royaume Bondié ek faire bann disciple. (Matthieu 24:14; 28:19, 20) Chaque fois ki nou preché ek nou refuse laisse bann ki opposé ar nou decourage-nou, nou montré mem fidelité ki Nehémia ti ena.

“Vrai-mem nou pou touye zot”

9. Ki qualité l’opposition bann Israélite inn gagné sans ki zot attann, ek couma Nehémia ti reagir?

⁹ Kan bann ki ti opposé ar vrai l’adoration dan lepok Nehémia ti tann dire ki “reparation muraille Jérusalem ti’nn progressé,” zot ti prend zot l’epée pou al “laguerre kont Jérusalem.” Situation-la ti parette bien critik pou bann Juif. Ti ena bann Samaritain dan le nord, bann Ammonite dan l’est, bann Arabe dan le sud, ek bann Ashdodite dan l’ouest. Jérusalem ti entouré par bann l’ennemi; bann travailleur ti coumadir dan enn piege! Ki zot ti pou faire? Nehémia dire: “Nou ti prié nou Bondié.” Bann l’ennemi ti faire sa menace-la: “Vrai-mem nou pou touye zot, ek nou pou faire sa travail-la arreté.” Ki Nehémia ti faire lerla? Li ti demann bann travailleur defann la ville “avek zot l’epée, zot lance ek zot l’arc.” Li vrai ki, nou bann humain, kan nou considere sa situation-la nou kapav pensé ki bann Juif pa ti ena okenn chance kont sa grand quantité l’ennemi-la, mais Nehémia ti dire zot: “Pa peur . . . Pense Jéhovah, sa Bondié ki grand ek ki nou bizin peur-la.”—Nehémia 4:7-9, 11, 13, 14.

10. (a) Couma enn coute situation ti’nn changé parmi bann l’ennemi Nehémia? (b) Ki disposition Nehémia ti prend?

¹⁰ Mais enn coute, situation ti’nn changé. Bann l’ennemi ti’nn arrete zot l’attak. Kifer? Nehémia dire: “Vrai Bondié ti empeche zot plan reussi.” Selman, Nehémia ti realisé ki sa bann l’ennemi-la ti toujours enn menace pou zot. Alors, par precaution, li ti faire certain changement dan method travail bann ki ti pé construire. Depuis sa jour-la, “sakenn ti pé travail avek enn la-main, ek avek lot la-main, li ti pé tini so zarme.” Nehémia ti aussi etabli enn zom ki ti bizin “soufflé cor” pou averti bann travailleur si bann l’ennemi vinn attaké. Mais pli important encore, Nehémia ti donne sa l’assurance-la le peuple: “Nou Bondié Li-mem pou laguerre pou nou.” (Nehémia 4:15-20) Parski bann travailleur ti senti-zot encouragé ek zot ti’nn paré pou faire face ar l’attak zot l’ennemi, zot ti contigne travail. Ki leson nou kapav tiré ar sa l’evenement-la?

11. Dan bann pays kot travail predication interdit, ki permette bann vrai chrétien pou resisté kont seki mauvais, ek couma zot domine le mal par le bien?

¹¹ Parfois, bann vrai chrétien faire face ar enn l’opposition bien violent. En realité, dan certain pays, bann dimoune ki bien opposé ar vrai l’adoration zot forme enn grand la-force kont nou. Si nou considere sa situation-la en tant ki humain, nou bann frere dan sa bann pays-la pena okenn chance kont zot bann l’ennemi. Mais, sa bann Témoins-la ena confiance ki ‘Bondié pou laguerre pou zot.’ Oui, bann ki gagne persecution a cause zot croyance, finn souvent trouvé couma Jéhovah finn reponn zot la-priere ek finn empeche plan zot bann l’ennemi ki bien puissant, reussi. Mem dan bann pays kot l’activité lor Royaume Bondié interdit, bann chrétien trouve bann moyen pou contigne preche la bonne nouvelle. Pareil couma bann travailleur dan Jérusalem ti’nn change zot method travail, zordi bann Témoins de Jéhovah montré-zot prudent ek faire bann changement dan zot method predication kan ena l’opposition. Bien sur, zot pa servi bann vrai zarme dan sa situation-la. (2 Corinthiens 10:4) Mem si zot bann l’ennemi menace pou faire zot di-tort lor plan physik, sa pa faire zot arrete preché. (1 Pierre 4:16) Au contraire, sa bann frere ek soeur ki ena courage-la, “contigne domine le mal par le bien.”

“Vini, ek anou joinde”

12, 13. (a) Ki complot bann adversaire Nehémia ti faire? (b) Kifer Nehémia ti refuse l’invitation pou al joinde so bann adversaire?

¹² Kan bann l’ennemi Nehémia ti realisé ki zot l’attak direct pa finn marché, zot ti essaye bann lezot tactik. Zot ti essaye trois plan. Ki sa bann plan-la sa?

¹³ Premier plan ki zot ti faire, zot ti rod embete Nehémia. Zot ti dire li: “Vini, ek anou joinde ensam lor enn rendez-vous dan bann village ki trouve dan vallée Ono.” Ono ti trouve entre Jérusalem ek Samarie. Bann l’ennemi Nehémia ti propose li pou joinde zot la moitié-chemin entre sa deux la-ville-la pou reglé sa desaccord ki ti ena entre zot-la. Kitfois Nehémia ti kapav pensé: ‘Seki zot pé proposé parette raisonnable. Vaut mieux kozé ki laguerre.’ Mais Nehémia pa ti accepté pou allé. Li ti dire kifer: “Zot ti pé comploté pou faire moi di-tort.” Li ti’nn fini konn zot l’intention ek li pa ti tombe dan zot piege. Quatre fois li ti dire so bann adversaire: “Mo pa pou kapav desann. Kifer sa travail-la bizin arreté pendant ki mo quitte li pou desann pou vinn guette zot?” Plan ki sa bann l’ennemi-la ti faire pou ki Nehémia tombe enn l’accord avek zot ti tombe dan de l’eau. Li ti reste concentré lor travail construction.—Nehémia 6:1-4.

14. Couma Nehémia ti reagir kan so bann l’ennemi ti faire bann fausse l’accusation kont li?

¹⁴ Bann l’ennemi Nehémia ti ena enn deuxieme plan: zot ti fann bann fausse rumeur lor li. Zot ti accuse li ki li ti ‘pé comploté pou rebelle’ kont le roi Artaxerxès. Encore enn fois, zot ti dire Nehémia: “Anou joinde pou kozé.” Mais encore enn fois, Nehémia ti refusé parski li ti fini comprend ki l’intention so bann l’ennemi ti ena. Nehémia ti expliké: “Zot tou ti pé rod faire nou gagne peur, zot ti dire: ‘Zot la-main pou fatigué ar sa travail-la, ek travail-la pa pou faire.’ ” Pourtant sa fois-la, Nehémia ti reponn l’accusation so bann l’ennemi. Li ti dire: “Sa bann kitsoz ki to pé dire-la, pa finn arrivé, mais to pé invente sa par to-mem.” En plus, Nehémia ti rod l’aide Jéhovah ek li ti faire sa la-priere-la: “Fortifié mo la-main.” Li ti ena confiance ki avek l’aide Jéhovah, li ti pou kapav contourne sa mauvais plan-la ek faire construction muraille avancé.—Nehémia 6:5-9.

15. Ki conseil enn fausse prophete ti donne Nehémia, ek kifer li pa ti accepté so conseil?

¹⁵ Troisieme plan ki bann l’ennemi Nehémia ti servi c’est enn traitre, enn Israélite ki ti appel Shemaïa, pou essaye faire Nehémia desobeir la Loi Bondié. Shemaïa ti dire Nehémia: “Anou joinde lor enn rendez-vous dan lakaz vrai Bondié, dan temple, ek anou ferme bann la-porte temple; parski zot pé vinn touye toi.” Shemaïa ti pretann ki bann l’ennemi Nehémia ti pé vinn touye li ek ki li ti pou kapav sap so la-vie si li ti al cachiette dan temple. Mais selman, Nehémia pa ti enn pretre. Li ti pou faire enn peché si li ti al cachiette dan lakaz Bondié. Eski li ti pou desobeir la Loi Bondié pou essaye sap so la-vie? Nehémia ti reponn: “Ki dimoune ki pareil couma moi kapav rente dan temple ek contigne vive? Non, mo pa pou rentré!” Kifer Nehémia pa ti tombe dan sa piege-la? Parski li ti koné ki, mem si Shemaïa ti enn Israélite couma li, “c’est pa Bondié ki ti’nn envoye li.” En realité, jamais enn vrai prophete ti pou conseil li pou desobeir la Loi Bondié. Encore enn fois, Nehémia pa ti laisse le mal gagne la victoire lor li. Enn tipé apré, li ti kapav dire: “A la fin, muraille-la ti’nn fini vingt-cinquieme jour mois Éloul, dan cinquante-deux jour.”—Nehémia 6:10-15; Nombres 1:51; 18:7.

16. (a) Ki l’attitude nou bizin ena envers bann fausse camarade, bann dimoune ki fane bann fausse l’accusation kont nou, ek bann fausse frere? (b) Couma ou montré ki ou refuse pou desobeir ou bann croyance dan lakaz, dan lekol ou-soit dan travail?

¹⁶ Pareil couma Nehémia, nou aussi nou kapav faire face ar different forme l’opposition ki nou gagné ar bann fausse camarade, ar bann dimoune ki faire bann fausse l’accusation kont nou, ou-soit ar bann fausse frere. Certain dimoune kapav invite nou pou coumadir joinde zot la moitié chemin, setadir accepté pou casse contour ar bann principe biblik. Zot kapav essaye convaink nou ki, si nou servi Jéhovah avek enn tipé moins zèle, nou pou kapav en mem temps, realise bann l’objectif ki le monde proposé. Mais, parski Royaume Bondié ena priorité dan nou la-vie, nou refuse pou cedé ek pou desobeir la loi Bondié. (Matthieu 6:33; Luc 9:57-62) Nou bann adversaire fann aussi bann fausse l’accusation kont nou. Dan certain pays, certain dire ki nou enn menace pou gouvernement, pareil couma bann l’ennemi Nehémia ti accuse li ki li ti pé rebellé kont le roi. Nou finn mem bizin al devant la cour a cause certain l’accusation, ek nou finn gagne bann victoire. Mais n’importe ki resultat nou gagné lor plan individuel, nou prié avek confiance ki Jéhovah pou dirige bann l’evenement en accord avek so volonté. (Philippiens 1:7) Nou kapav gagne l’opposition aussi ar bann ki pretann servi Jéhovah. Pareil couma enn Juif ti essaye convaink Nehémia pou desobeir la Loi Bondié pou sauve so la-vie, enn ancien Témoin ki’nn vinn enn apostat, kapav essaye influence nou pou desobeir Jéhovah dan certaine fason. Mais nou rejette bann apostat parski nou koné ki, c’est kan nou obeir bann la-loi Bondié ki nou pou sauve nou la-vie, pa kan nou desobeir so bann la-loi! (1 Jean 4:1) Oui, avek l’aide Jéhovah, nou kapav domine le mal dan n’importe ki forme li été.

Partage la bonne nouvelle malgré bann l’attak Satan

17, 18. (a) Ki Satan ek so bann agent bien decidé pou faire? (b) Mais ki ou, ou bien decidé pou faire, ek kifer?

¹⁷ Parole Bondié dire concernant bann frere oint Jésus Christ: “Zot inn gagne la victoire lor [Satan] grace a . . . zot temoignage.” (Révélation 12:11) Alors, ena enn lien direct entre gagne la victoire lor Satan—la source le mal—ek preche Royaume Bondié. Sa pa etonne nou ki Satan pa pé arrete attak bann chrétien oint ek bann membre ‘la grande foule’ kan li faire zot gagne l’opposition!—Révélation 7:9; 12:17.

¹⁸ Couma nou finn trouvé, nou kapav gagne different forme l’opposition: bann dimoune dire bann parole pou attak nou ou-soit zot menace pou faire nou di-tort lor plan physik ou-soit zot servi lezot tactik. Dan n’importe ki fason, Satan ena mem l’objectif—arrete travail predication. Mais li pa pou reussi ditou parski le peuple Bondié imite l’exemple Nehémia. Zot bien decidé pou “contigne domine le mal par le bien.” Zot pou faire sa kan zot contigne preche la bonne nouvelle ziska ki Jéhovah dire ki sa travail-la inn fini!—Marc 13:10; Romains 8:31; Philippiens 1:27, 28.

[Note]

Eski ou rappel?

• Ki qualité l’opposition bann serviteur Bondié ti gagné dan le passé ek pé gagné dan nou lepok?

• Ki ti principal l’objectif bann l’ennemi Nehémia, ek ki l’objectif bann l’ennemi Bondié ena zordi?

• Zordi, couma nou contigne domine le mal par le bien?

[L’encadré, page 31]

Bann leson ki trouve dan livre Nehémia

Bann serviteur Bondié faire face ar

• bann moquerie

• bann menace

• bann tromperie

Nou trompé par

• bann fausse camarade

• bann dimoune ki faire bann fausse l’accusation

• bann fausse frere

Bann serviteur Bondié domine le mal kan

• zot reste attaché ar travail ki Bondié inn donne zot

[Zimage, page 32]

Bann vrai chrétien pa peur pou preche la bonne nouvelle