Pardonne sakenn nou camarade avek tou nou leker

1, 2. Kifer li bon ki nou examine-nou-mem pou koné si nou disposé pou pardonné?

LA BIBLE aide nou pou koné ki Jéhovah pensé lor peché ek couma Li reagir kan nou faire peché. So Parole faire nou koné aussi ki Li disposé pou pardonné. Dan lartik avant, nou ti trouvé couma l’attitude David ek Manassé ti pousse Jéhovah pou pardonne zot. Zot ti bien regretté pou seki zot ti faire ek sa ti pousse zot pou confesse zot peché, pou rejette zot bann mauvais action ek pou repenti avek tou zot leker. En retour, Jéhovah ti ré-donne zot so faveur.

² Asterla, anou guetté couma nou-mem nou kapav pardonne lezot. Ki ou ti pou ressenti si parmi bann dimoune innocent ki Manassé ti touyé ti ena enn membre ou famille? Eski ou ti pou kapav pardonne li? C’est enn question bien approprié zordi, parski nou pé vive dan enn le monde kot dimoune pa respecté la loi, zot violent ek egoïste. Alors, kifer enn chretien bizin developpe enn l’attitude ki pousse-li pou pardonné? Si ou pé souffert parski enn dimoune inn insulté ou ou-soit a cause enn l’injustice, ki kapav aide ou pou controle ou bann sentiment, pou reagir dan enn fason ki faire Jéhovah plaisir, ek disposé pou pardonné?

KIFER NOU BIZIN PARDONNÉ?

3-5. (a) Ki l’exemple Jésus ti servi pou aide bann dimoune ki ti pé ecoute li pou trouve l’importance pou pardonné? (b) Ki Jésus ti enseigne nou dan l’exemple ki ena dan Matthieu 18:21-35?

³ Nou bizin disposé pou pardonne bann dimoune ki’nn offense nou​—ki zot bann membre congregation ou-soit non. Li important ki nou faire sa pou nou garde bann bon relation avek bann membre nou famille, nou bann camarade, lezot dimoune ek avek Jéhovah. La Bible demann nou, en tant ki chretien, pou pardonne lezot dimoune n’importe ki quantité fois zot offense nou. Pou faire nou comprend bien l’importance pou pardonné, Jésus ti raconte zistoire enn esclave ki ti doit so maitre beaucoup l’argent.

⁴ Sa esclave-la ti doit so maitre enn somme ki ti vaut enn la paye 60 million jour travail; pourtant so maitre ti cancel so dette. Apré sa, kan esclave-la ti sorti dehors, li ti zwenn enn lot esclave ki ti doit li enn somme ki ti vaut zis enn la paye 100 jour travail. Esclave-la ti suppliye li pou ena patience, mais sa esclave ki ti ena enn gros dette-la, ti faire jette so camarade esclave dan prison. Sa l’attitude-la ti faire zot maitre en colere. Li ti demann esclave ki ti doit li-la: “Eski to pa ti bizin . . . ena pitié pou to camarade ki esclave couma toi, pareil couma mo-mem mo’nn ena pitié pou toi? Apré sa, dan so colere, so maitre ti livré [sa esclave ki pa ti pardonné-la] dan la main bann garde prison, ziska ki li fini paye tout seki li ti doit.”​—Mat. 18:21-34.

⁵ Ki leson Jésus ti envie enseigne nou par sa zistoire-la? Li ti tire sa conclusion-la: “Coumsa-mem mo Papa ki dan le ciel pou traite zot si sakenn pa pardonne so frere avek tou so leker.” (Mat. 18:35) Jésus faire nou bien comprend ki bann peché ki nou’nn faire pendant tou nou la vie parski nou imparfait, montré ki jamais nou pou kapav obeir Jéhovah dan enn fason parfait. Pourtant, Jéhovah disposé pou pardonne nou ek pou efface tou nou bann peché. A cause sa-mem, si nou envie vinn camarade ar Jéhovah, nou obligé pardonne sakenn nou camarade. Jésus ti dire dan so Sermon lor montagne: “Si zot pardonne bann dimoune zot peché, zot Papa ki dan le ciel aussi pou pardonne zot; mais si zot pa pardonne bann dimoune zot peché, zot Papa aussi pa pou pardonne zot.”​—Mat. 6:14, 15.

6. Kifer li pa toujours facile pou pardonne lezot?

⁶ Kitfois ou d’accord ki nou bizin pardonne lezot, mais ou pensé ki li pli facile pou dire ki faire. Souvent, c’est parski nou senti-nou bien affecté kan enn kikenn offense nou. Li kapav arrivé ki nou en colere, nou ena l’impression ki lezot inn trahir nou, nou envie ki dimoune-la payé pou seki li’nn faire, ou-soit-mem nou envie tire vengeance. En realité, certain ena sentiment ki jamais zot pou kapav pardonne sa dimoune ki finn offense zot-la. Si ou aussi ou ena sa sentiment-la, couma ou kapav aprann pou pardonne lezot pareil couma Jéhovah demandé?

ANALYSE OU BANN SENTIMENT

7, 8. Ki kapav aide ou pou pardonné si lezot finn offense ou?

⁷ Li possible ki nou bien en colere si enn kikenn inn offense nou ou-soit si nou ena l’impression ki enn kikenn inn mal agir envers nou. Enn l’etude ki finn faire lor la colere mentionne l’exemple enn jeune missié ki raconté seki ti arrive li: “Enn jour . . . mo ti tellement en colere, ki mo ti quitte lakaz ek mo ti faire serment ki jamais mo pou retourne la encore. Sa jour-la, nou ti en été ek ti ena enn joli le temps dehors. Sa chemin ki mo ti prend-la ti trankil ek ti bien joli, mo ti marche enn bon boute ek tigit par tigit sa ti calmé moi ek ti faire moi di-bien. [Inpé plitar], mo ti rente kot moi, mo ti regretté ki mo ti en colere coumsa.” Sa l’experience-la montré ki si ou prend le temps pou calmé-ou ek pou reflechi lor ou situation, sa kapav aide ou pou pardonné ek evite reagir dan enn fason ki plitar ou kapav regretté.​—Ps. 4:4; Prov. 14:29; Jacq. 1:19, 20.

⁸ Mais ki ou pou faire si, malgré sa, ou toujours en colere? Essayé comprend kifer ou en colere. Eski c’est parski sa dimoune-la finn traite ou dan enn fason injuste, kitfois mem li’nn agir brite ar ou? Ou-soit ou pensé ki li’nn rod blesse ou par expré? Eski seki li’nn faire vrai-mem mauvais sa quantité-la? Si ou analyse ek comprend kifer ou en colere, sa pou aide ou pou koné ki pli bon fason pou agir, enn fason agir ki en accord avek la Bible. (Lire Proverbes 15:28; 17:27.) Sa analyse-la kapav aide ou pou reflechi plus lor ou situation ki lor ou sentiment, ek lerla ou pou pli disposé pou pardonné. Mem si li difficile pou faire sa, ou pé laisse Parole Bondié examine “bann pensée ek bann l’intention ki ena dan [ou] leker.” Sa pou aide ou aussi pou imite Jéhovah, ki disposé pou pardonné.​—Héb. 4:12.

ESKI OU BIZIN OFFENSE VITE?

9, 10. (a) Couma kitfois ou pou reagir si ou ena sentiment ki enn dimoune inn offense ou? (b) Couma ou kapav change fason ki ou considere enn offense si ou ena enn l’attitude positif ek ou pré pou pardonné?

⁹ Beaucoup situation dan la vie pousse nou pou en colere. Par exemple, supposé ki ou pé conduire ek enn lot l’auto manké tape avek ou l’auto. Couma ou pou reagir? Surement ou’nn deja tendé couma plusieurs fois la colere inn pousse enn chauffeur pou batte enn lot chauffeur. Mais en tant ki chretien, pena doute ki nou pa envie ena sa qualité reaction-la.

¹⁰ Li pou beaucoup pli bon ki ou prend enn ti moment pou analyse sa situation-la. Kitfois, ou en parti responsable pou seki’nn arrivé parski ou ti distrait lor la route. Ou-soit, li possible aussi ki lot chauffeur-la finn ena enn probleme mechanik avek so l’auto. Mais point important dan sa l’exemple-la, c’est ki nou kapav diminué nou colere ou-soit lezot sentiment negatif kan nou essaye comprend enn situation, ena enn l’esprit ouvert, ek disposé pou pardonné. Ecclésiaste 7:9 dire: “Pa pressé pou to offensé dan to l’esprit; parski offense vite c’est sa-mem ki trouve dan leker bann dimoune bete.” Pa prend probleme-la couma enn l’attak personnel. Dan beaucoup situation, kitfois nou pensé ki lezot inn offense nou par expré, mais en realité li pa coumsa; c’est zis l’imperfection ou enn malentendu ki’nn faire zot agir coumsa. Essaye ena enn l’esprit ouvert si ou pensé ki enn kikenn inn dire ou-soit inn faire kitsoz pou offense ou, ek laisse l’amour pousse ou pou pardonné. Ou pou pli heureux si ou faire sa.​—Lire 1 Pierre 4:8.

‘KI ZOT LA PAIX RETOURNE AR ZOT’

11. Couma nou bizin reagir ar n’importe ki reaction bann dimoune ena dan predication?

¹¹ Couma ou kapav controle-ou si enn kikenn koz brite ar ou dan predication? Kan Jésus ti envoye 70 disciple preché, li ti dire zot souhaite la paix chaque famille ki zot ti visité. Jésus ti dire: “Si la ena enn dimoune ki content la paix, zot la paix pou repose lor li. Mais sinon, la paix-la pou retourne ar zot.” (Luc 10:1, 5, 6) Nou content kan bann dimoune accepté nou message dan predication, parski sa kapav faire zot gagne bann bienfait. Mais parfois, pa tou dimoune ki koz bien ar nou. Ki nou pou faire lerla? Jésus ti dire ki la paix ki nou ti souhaite sa bann dimoune-la pou reste ar nou. Alors, n’importe couma enn dimoune agir ar nou, nou bizin kapav quitte chaque lakaz avek la paix dan nou leker. Si nou en colere ek nou reagir brite kan enn dimoune provok nou, nou pa pou kapav garde nou la paix.

12. Dapré seki Paul ti dire dan Éphésiens 4:31, 32, couma nou bizin reagir?

¹² Faire zeffort pou garde ou la paix dan n’importe ki situation, pa zis kan ou dan predication. Bien sur, pardonne lezot pa vedir ki ou bizin d’accord ar zot mauvais conduite ou-soit ferme lizié lor di-tort ki zot inn faire. Mais kan ou pardonné, sa vedir ki ou bizin tire tou rancune ki ou ena dan ou leker ek garde ou la paix. Si ou contigne ena bann pensée negatif ek ou pa fini blié couma lezot finn traite ou, ou pou laisse conduite lezot empeche ou pou ena la paix. Pa laisse bann pensée coumsa controle ou. Rappel ki ou pa pou kapav heureux tant ki ou contigne ena rancune pou enn kikenn. Alors, pardonné!​—Lire Éphésiens 4:31, 32.

REAGIR DAN ENN FASON KI FAIRE JÉHOVAH PLAISIR

13. (a) Couma eski enn chretien “mette enn tas la braise difé” lor la tête so l’ennemi? (b) Ki kapav arrivé si nou reagir avek douceur kan enn dimoune koz brite ar nou?

¹³ Parfois, ena bann situation kot enn dimoune ki pa dan la verité agir brite ar nou. Mais nou kapav aide li pou apprecié bann principe la Bible. L’apotre Paul ti ecrire: “‘Si to l’ennemi faim, donne li mangé; si li soif, donne li boire; parski kan to faire sa, to pou mette enn tas la braise difé lor so la tête.’ Pa laisse le mal domine toi, mais contigne domine le mal par le bien.” (Rom. 12:20, 21) Kan nou garde nou calme ek nou gentil, mem devant enn dimoune ki koz brite ar nou, sa kapav adouci li, faire li change so l’attitude ek mem agir bien avek nou. Kan nou essaye comprend sa dimoune ki’nn offense nou-la, nou essaye mette-nou dan so place, ek mem nou ena compassion pou li, kitfois nou kapav aide li pou aprann bann verité ki ena dan la Bible. N’importe ki reaction dimoune-la ena, kan nou agir avek douceur, sa donne li l’occasion pou reflechi lor nou bon conduite.​—1 Pierre 2:12; 3:16.

14. Kifer fodé pa nou garde rancune mem si enn dimoune inn faire nou di-tort?

¹⁴ Dan certain cas, li pa pou approprié ki enn chretien frequente certain dimoune. Sa implik bann dimoune ki ti forme parti dan congregation mais ki finn faire peché, pa finn repenti ek finn exclu. Si sa dimoune-la inn faire ou di-tort, kitfois li pou bien difficile pou pardonne li mem si li repenti. Kifer? Parski li finn blesse ou sentiment ek sa prend le temps pou gueri. Dan enn situation coumsa, kitfois ou bizin contigne demann Jéhovah pou aide ou pou pardonne sa dimoune ki’nn repenti-la. Apré tou, couma ou kapav koné ki ena dan leker sa dimoune-la? Jéhovah Li, Li koné. Li examine bann sentiment bien profond enn dimoune ek Li ena patience avek bann dimoune ki faire peché. (Ps. 7:9; Prov. 17:3) A cause sa-mem la Bible dire: “Pa rann personne le mal pou le mal. Mazinn pou faire seki bien devant lizié tou dimoune. Si possible, autant ki sa depann lor zot, vive en paix avek tou dimoune. Pa tire vengeance zot-mem, mo bann frere ki mo bien content, mais laisse place pou colere; parski finn ecrire: ‘Jéhovah dire: ‘Vengeance pou moi; moi ki pou faire zot payé.’” (Rom. 12:17-19) Eski ou ena droit juge enn lot dimoune? Non. (Mat. 7:1, 2) Mais ou kapav sur ki Jéhovah juge avek justice.

15. Ki pou aide nou pou senti-nou moins en colere kont enn dimoune ki’nn offense nou?

¹⁵ Si nou pensé ki nou finn victime enn l’injustice, ek ki nou trouve difficile pou pardonne enn kikenn ki’nn offense nou, mais ki finn repenti, li bon nou rappel ki sa dimoune-la aussi, li enn victime. Li aussi li pé lutté kont l’imperfection. (Rom. 3:23) Jéhovah ena compassion pou tou bann dimoune imparfait. Alors, li bon ki nou prié pou sa dimoune ki’nn offense nou-la. Lerla, kitfois nou pa pou contigne en colere kont enn dimoune pou ki nou pé prié. Jésus ti faire nou bien comprend ki fodé pa nou garde rancune mem kont bann dimoune ki’nn faire nou di-tort. Li ti dire: “Contigne content zot bann l’ennemi ek prié pou bann ki persecute zot.”​—Mat. 5:44.

16, 17. Couma ou bizin reagir si bann ancien inn trouvé ki enn dimoune inn repenti, ek kifer?

¹⁶ En accord avek so volonté, Jéhovah finn confié bann ancien responsabilité pou traite cas bann ki’nn faire peché dan congregation. Sa bann frere-la pena mem connaissance ki Bondié lor chaque situation, mais zot faire tou pou prend enn decision ki en accord avek la Bible ek avek l’aide l’esprit saint. Alors, kan zot prié Jéhovah avant ki zot prend enn decision, nou kapav sur ki decision-la pou en accord avek fason pensé Jéhovah.​—Mat. 18:18.

¹⁷ C’est dan enn situation coumsa ki nou bizin montré-nou fidele. Si bann ancien inn trouvé ki enn dimoune inn repenti, eski ou pou pardonne li ek montré ou l’amour pou li? (2 Cor. 2:5-8) Kitfois sa pa pou facile pou ou, surtout si sa dimoune-la finn faire ou, ou-soit enn membre ou famille di-tort. Selman, si ou mette ou confiance en Jéhovah ek dan fason ki Li reglé bann probleme dan congregation, ou pou agir avek sagesse. Ou pou montré ki vrai-mem ou pardonne avek tou ou leker.​—Prov. 3:5, 6.

18. Ki bann bienfait ou pou gagné si ou pardonne avek tou ou leker?

¹⁸ Bann specialiste lor la santé mental reconette ki ena bann bienfait kan enn dimoune disposé pou pardonné. Sa faire enn dimoune senti-li soulagé parski li nepli laisse la colere ek bann sentiment negatif domine li. Lerla, li ena enn pli bon la santé ek bann pli bon relation avek lezot. Parkont, si nou pa disposé pou pardonné, sa kapav faire nou malade, detruire bann bon relation, faire nou stressé ek nou pa pou ena enn bon communication avek lezot. Mais pli grand benediction ki nou kapav gagné kan nou pardonné, c’est bann bon relation avek nou Papa ki dan le ciel, Jéhovah.​—Lire Colossiens 3:12-14.