Marche dapré l’esprit pou ou gagne la vie ek la paix
“Pa marche dapré la chair, mais dapré l’esprit.”—ROM. 8:4.
1, 2. (a) Ki danger ena kan nou pa concentré alors ki nou pé conduire? (b) Ki danger ena si nou distrait lor plan spirituel?
ENN kikenn ki travail dan gouvernement États-Unis ti dire: “Sa pé vinn coumadir enn l’epidemie ki bann dimoune faire lezot kitsoz en mem temps ki zot pé conduire ek sa situation-la pé vinn pli pire chaque l’année.” Portable li enn parmi bann gadget ki kapav deconcentré bann chauffeur kan zot pé conduire. Dapré enn sondage, plus ki enn tiers bann dimoune finn dire ki zot finn faire accident ou-soit zot ti manké faire accident zis a cause lot chauffeur-la ti pé servi so portable kan li ti pé conduire. Kitfois nou pensé ki nou kapav faire plusieurs kitsoz a la fois alors ki nou pé conduire, mais consequence-la kapav bien grave.
2 Enn chauffeur ki distrait, riské pa trouve bann danger ki ena lor la route. Li pareil pou nou aussi, si nou distrait lor plan spirituel, sa kapav enn danger pou nou. Paul ti dire ki nou la foi kapav endommagé pareil couma enn bateau kapav casse-cassé pendant enn naufrage. (1 Tim. 1:18, 19) L’apotre Paul ti donne sa l’avertissement-la so bann compagnon chretien dan Rome: “Kan pense bann kitsoz ki ena enn rapport avek la chair, sa vedir la mort, mais kan pense bann kitsoz spirituel, sa vedir la vie ek la paix.” (Rom. 8:6) Ki Paul ti pé rod dire? Couma nou kapav evite “pense bann kitsoz ki ena enn rapport avek la chair” ek faire zeffort pou “pense bann kitsoz spirituel”?
“Pena okenn condamnation” pou zot
3, 4. (a) Lor ki la lutte personnel Paul ti kozé? (b) Kifer nou bizin interesse-nou ar Paul so situation?
3 Dan lettre ki Paul ti ecrire bann Romains, li ti koz lor enn la lutte ki li-mem li’nn koné dan so la vie. Li dire ki li ti ena l’impression ki so lekor ti pé laguerre ar so l’esprit. (Lire Romains 7:21-23.) Paul pa ti pé dire sa pou justifié li-mem ou-soit pou pitié li-mem coumadir li pa ti ena enn lot choix a part faire peché. Apré tou, li ti enn chretien oint ki mur, ki finn choisir pou vinn “enn zapotre pou bann nation.” (Rom. 1:1; 11:13) Alors, kifer Paul ti koz lor so prop la lutte?
4 Paul ti reconette ki par li-mem, li pa ti kapav faire volonté Bondié couma li, li ti envie. Pou ki raison? Li dire: “Tou dimoune inn faire peché ek zot pa reussi arrive ziska la gloire Bondié.” (Rom. 3:23) En tant ki enn descendant Adam, Paul ti imparfait ek li ti ena bann mauvais desir. Nou kapav comprend so situation parski nou aussi nou imparfait ek nou ena pou amenn mem la lutte toulé-jour. En plus, ena beaucoup kitsoz ki kapav faire nou distrait ek faire nou al loin ar ‘chemin ki serré ki amenn vers la vie.’ (Mat. 7:14) Mais, Paul pa ti enn cas desesperé ek nou aussi pareil.
5. Couma Paul ti gagne l’aide ek soulagement?
5 Paul ti ecrire: “Kisannla pou delivré moi . . . ? Merci Bondié, par Jésus Christ nou Seigneur!” (Rom. 7:24, 25) Apré sa, li’nn koz ar bann ki “en union avek Christ Jésus”—bann chretien oint. (Lire Romains 8:1, 2.) Par so l’esprit saint, Jéhovah adopté zot couma so bann garson, ek Li appel zot “bann coheritier Christ.” (Rom. 8:14-17) L’esprit Bondié ek la foi ki zot ena dan sacrifice Jésus couma enn ranson faire zot sorti vainker dan sa la lutte ki Paul ti faire mention-la. Alors, “pena okenn condamnation” pou zot. Zot liberé “ar la loi peché ek la mort.”
6. Kifer tou bann serviteur Bondié bizin prend compte seki Paul ti dire?
6 Li vrai ki Paul ti pé koz ar bann chretien oint kan li ti pé dire sa bann parole-la. Mais, seki li ti dire concernant l’esprit Bondié ek sacrifice Christ couma enn ranson, kapav faire tou bann serviteur Jéhovah gagne bann bienfait, n’importe ki l’esperance zot ena. C’est par l’inspiration Bondié ki Paul ti donne sa conseil-la bann chretien oint. Alors, li bien important ki tou bann serviteur Bondié comprend seki li ti ecrire ek faire bann grand zeffort pou suive sa conseil-la.
Couma Bondié “inn condamne peché dan la chair”
7, 8. (a) Dan ki sens, “par rapport ar la chair, [la Loi] ti faible”? (b) Ki Bondié inn accompli a travers so l’esprit ek la ranson?
7 Dan Romains chapitre 7, Paul reconette ki peché ena pouvoir lor nou, bann humain imparfait. Dan chapitre 8, li koz lor pouvoir l’esprit saint. L’apotre Paul explik nou couma l’esprit saint Bondié kapav aide bann chretien dan zot la lutte kont pouvoir ki peché ena. Li aide nou aussi pou ki nou kapav vive en accord avek volonté Jéhovah ek gagne so faveur. L’apotre Paul montré nou couma Bondié servi So l’esprit saint ek sacrifice Jésus pou accompli enn kitsoz ki la loi Mosaïk pa ti kapav faire.
8 La Loi ti condamne bann ki faire peché parski li ti impossible pou bann dimoune obeir tou sa bann commandement-la. En plus, bann grand pretre dan Israël ki ti pé servi enba la Loi ti imparfait ek zot pa ti kapav offert enn sacrifice ki egal ar peché ki finn faire. Alors, c’est dan sa sens-la ki “par rapport ar la chair, [la Loi] ti faible.” Mais “kan Bondié finn envoye so prop Garson dan ressemblance bann humain ki faire peché” ek Li’nn offert li couma enn ranson, Li ti “condamne peché dan la chair.” Coumsa, Li’nn accompli sa “kitsoz ki la Loi pa ti ena pouvoir pou faire[-la].” Ki resultat sa finn amené? Bondié considere bann chretien oint couma bann dimoune juste parski zot ena la foi dan sacrifice Jésus. L’apotre Paul encourage zot pou “pa . . . marche dapré la chair, mais dapré l’esprit.” (Lire Romains 8:3, 4.) Zot bizin reste fidele ziska ki zot termine zot la vie lor la terre pou ki zot kapav gagne “couronne la vie.”—Rév. 2:10.
9. Dan Romains 8:2, ki signification mot “la loi” ena?
9 En plus ki li mentionne “la Loi,” Paul ti mentionne aussi “la loi l’esprit” ek “la loi peché ek la mort.” (Rom. 8:2) Ki sa bann la loi-la sa? Ici mot “la loi” pa faire reference ar certain regle, pareil couma bann regle ki ti ena dan la loi Mosaïk. Enn livre reference dire: “Mot grec ki’nn servi ici pou la loi vedir enn principe ki bann dimoune ena en zot-mem—soit bon soit mauvais—ki controle zot couma enn la loi. Sa mot-la represente aussi bann principe ki dirige la vie enn dimoune.”
10. Couma eski la loi peché ek la mort ena enn controle lor nou?
10 L’apotre Paul ti ecrire: “Par enn sel zom, peché finn rente dan le monde ek peché finn amenn la mort, ek coumsa tou dimoune passe par la mort parski zot tou ti’nn faire peché.” (Rom. 5:12) En tant ki bann descendant Adam, la loi peché ek la mort ena enn controle lor nou. Nou la chair touletan pé pousse nou pou faire bann kitsoz ki pa faire Bondié plaisir, avek la mort couma recompense. Dan so lettre ki li ti envoye congregation Galates, Paul ti cite bann mauvais action ek conduite ki nou “la chair produire.” Apré li ti ajouté: “Bann ki pratik sa bann kitsoz-la pa pou herite royaume Bondié.” (Gal. 5:19-21) Bann dimoune ki faire sa bann kitsoz-la zot marche “dapré la chair.” (Rom. 8:4) “Principe ki bann dimoune ena en zot-mem” ek ‘principe ki dirige zot la vie’ li net dapré la chair. Mais eski c’est zis bann ki commette fornication, pratik l’idolatrie ek spiritisme, ou-soit bann ki faire bann lezot peché grave ki marche dapré la chair? Non, parski seki la chair produire implik aussi bann defaut dan nou personnalité couma jalousie, crise colere, dispute, ek envié lezot. Kisannla ki kapav dire ki li’nn libere-li net ar tendance pou marche dapré la chair?
11, 12. Ki disposition Jéhovah inn prend pou ki nou liberé ar la loi peché ek la mort, ek ki nou bizin faire pou gagne faveur Bondié?
11 Nou bien content ki Jéhovah inn donne nou possibilité pou nou liberé ar la loi peché ek la mort, pa vrai? Jésus ti dire: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” Kan nou accepté l’amour Bondié ek nou ena la foi dan sacrifice Jésus Christ nou kapav liberé ar condamnation ki nou finn gagné a cause peché ki nou finn herité. (Jean 3:16-18) Nou kapav ena mem sentiment ki Paul kan li ti dire: “Merci Bondié, par Jésus Christ nou Seigneur!”
12 Nou situation pareil ar enn dimoune ki pé gagne enn traitement pou enn maladie bien grave. Si li envie gueri net, li bizin suive seki docteur dire li. Nou la foi dan la ranson kapav libere nou ar la loi peché ek la mort, mais selman, nou encore imparfait ek nou faire peché. Pou nou contigne ena bann bon relation avek Jéhovah ek gagne so faveur, nou bizin faire plus ki sa. Si nou envie gagne enn guerison ar l’imperfection ki couma enn maladie, Paul dire ki nou bizin marche dapré l’esprit.
Couma nou kapav marche dapré l’esprit
13. Ki sa vedir marche dapré l’esprit Bondié?
13 Kan nou pou al kit part, nou contigne avancé vers sa l’endroit-la. Pou marche dapré l’esprit, nou bizin faire bann progré lor plan spirituel. (1 Tim. 4:15) Mem si nou pa kapav faire sa dan enn fason parfait, chaque jour nou bizin faire nou maximum pou marche ou-soit pou vive dapré direction l’esprit Bondié. Si nou “marche par l’esprit” nou pou faire Bondié plaisir.—Gal. 5:16.
14. Couma eski bann dimoune ki “vive dapré la chair” pensé ek agir?
14 Dan lettre ki li ti ecrire bann Romain, Paul koz aussi lor bann dimoune ki ena deux qualité fason pensée ki bien different. (Lire Romains 8:5.) Ici mot “la chair” pa represente zis nou lekor physik. Dan la Bible, parfois sa mot-la kapav faire reference ar nou bann imperfection. A cause sa ena enn laguerre entre la chair ek l’esprit ki Paul ti mentionné enn tipé avant. Paul li, li ti laguerre kont so la chair, ou-soit so bann imperfection. Mais beaucoup dimoune zordi pa mem essaye faire zeffort pou lutté kont zot bann mauvais desir, alors zot pé “vive dapré la chair.” Zot pa pense lor seki Bondié envie zot faire, ek zot pa mem demann Li so l’aide pou reussi gagne sa la lutte-la. Bien souvent zot “pense bann kitsoz ki ena enn rapport avek la chair” ek seki zot envie c’est zis satisfaire zot bann desir physik. Mais, bann ki “vive dapré l’esprit” zot pense “bann kitsoz spirituel,” setadir bann disposition spirituel ki Jéhovah inn prend ek tou seki ena enn rapport avek zot service pou Li.
15, 16. (a) Kan enn dimoune pense enn kitsoz, ki l’effet sa kapav ena lor li? (b) Ki kitsoz ki interesse plus bann dimoune zordi?
15 Lire Romains 8:6. Avant ki bann dimoune faire enn kitsoz, ki li bon ou-soit mauvais, d’abord zot pense sa kitsoz ki zot envie faire-la. Si enn dimoune touletan pense bann kitsoz ki ena enn rapport avek la chair, resultat: li pou envie faire sa bann kitsoz-la. Dan so la tête pou ena zis sa-mem, zis sa ki pou interesse-li, ek so leker pou zis lor la.
16 Ki kitsoz interesse bann dimoune zordi? L’apotre Jean ti ecrire: “Tou seki ena dan le monde—desir la chair, desir lizié, enn kikenn ki faire l’etalage ar seki so moyen permette li ena—tousala pa sorti kot nou Papa, mais sorti dan le monde.” (1 Jean 2:16) Sa bann desir-la implik bann kitsoz couma l’immoralité, desir pou vinn enn grand dimoune, ek envie gagne toujours plus. Bann livre, magazine, la gazette, film, programme television, ek Internet debordé ar sa bann qualité kitsoz-la. Kifer? Surtout parski dan l’esprit bann dimoune ena zis sa-mem ek c’est sa ki zot vrai-mem envie. Mais Paul ti dire ki “pense bann kitsoz ki ena enn rapport avek la chair, sa vedir la mort.” Sa kapav faire nou perdi nou relation avek Bondié, ek dan l’avenir nou kapav mem perdi nou la vie. Kifer? “Si enn dimoune pense bann kitsoz ki ena enn rapport avek la chair sa vedir ki li vinn l’ennemi Bondié, parski la chair li pa soumette ar la loi Bondié, ek li pa kapav mem faire li. Alors, bann ki vive dapré la chair pa kapav faire Bondié plaisir.”—Rom. 8:7, 8.
17, 18. (a) Couma nou kapav contigne pense bann kitsoz spirituel? (b) Ki nou pou gagné si nou faire sa?
17 Mais de lot coté “pense bann kitsoz spirituel, sa vedir la vie ek la paix.” La vie, setadir la vie eternel dan l’avenir, ek la paix, setadir la paix endan nou-mem ek la paix avek Bondié asterla mem. Couma nou kapav montré ki nou pé “pense bann kitsoz spirituel”? Si nou touletan suive direction Bondié ek so l’esprit saint, nou pou developpe enn fason pensée ki pareil ar fason pensée Bondié. A mesure ki nou faire sa, nou pensée pou “soumette ar la loi Bondié” ek li pou en accord avek bann pensée Bondié. Lerla kan nou retrouve-nou devant enn tentation, nou pa pou tatonn-tatonné parski nou pa pou koné ki nou bizin faire. Nou pou senti-nou poussé pou faire choix ki bizin, setadir choix ki en accord avek l’esprit Bondié.
18 Alors, li bien important ki nou pense bann kitsoz spirituel. Nou faire sa kan nou ‘prepare nou l’esprit pou agir,’ setadir kan nou faire bann activité spirituel regulier ki implik la priere, lecture ek l’etude la Bible, assisté bann reunion ek preché. (1 Pierre 1:13) Au lieu ki nou distrait par bann kitsoz ki ena enn rapport avek la chair, anou pense bann kitsoz spirituel. Coumsa nou pou marche dapré l’esprit. Si nou faire sa nou pou gagne bann benediction parski pense bann kitsoz spirituel vedir la vie ek la paix.—Gal. 6:7, 8.
Eski ou pou kapav expliké?
• Lor ki kitsoz “la Loi pa ti ena pouvoir,” ek ki Bondié finn faire?
• Ki été “la loi peché ek la mort,” ek couma nou kapav liberé ar sa?
• Ki nou bizin faire pou nou “pense bann kitsoz spirituel”?
[Zimage page 16]
Eski ou pé marche dapré la chair ou-soit dapré l’esprit?