La congregation bizin loué Jéhovah
“Mo pou annonce to nom ar mo bann frere; mo pou loué toi . . . dan congregation.”—HÉBREUX 2:12.
1, 2. Ki kitsoz bien important nou gagné dan la congregation, ek pou ki raison principal li existé?
TOUTE longue l’histoire, c’est dan la famille ki bann dimoune finn trouve securité ek finn profite enn bon compagnie. Mais, la Bible montré ki ena enn lot group kot beaucoup dimoune partout lor la terre pé profite enn compagnie ek enn securité extraordinaire. Sa group-la c’est congregation chrétien. Ki ou forme partie dan enn famille kot zot tou bien proche ek zot encourage zot camarade ou-soit non, ou kapav, ek ou bizin apprecié seki Bondié donne ou a travers la congregation. Bien-sur, si ou deja pé forme partie dan enn congregation bann Témoins de Jéhovah, surement ou kapav temoigné ki ou pé profite enn bon compagnie ek securité dan ou congregation.
2 Congregation li pa zis enn group kot bann dimoune joinde. Li pa enn l’association ou-soit enn club kot bann dimoune ki ena mem culture ou ki interessé ar mem sport ou-soit mem passe-temps joinde ensam. Plutot, la congregation c’est enn disposition ki’nn prend surtout pou loué Jéhovah. Touletan sa ti coumsa, pareil couma nou trouvé dan livre Psaume. Dan Psaume 35:18, nou lire: “Mo envie loué toi dan grand l’assemblée; parmi beaucoup dimoune, mo pou loué toi.” Dan Psaume 107:31, 32 aussi nou gagne sa l’encouragement-la: “Oh! ki bann dimoune remercié Jéhovah pou so l’amour fidel ek pou bann kitsoz extraordinaire ki Li’nn faire envers bann dimoune ki lor la terre! Ek ki zot glorifié Li dan congregation peuple Israël.”
3. Dapré Paul, pou ki raison la congregation existé?
3 L’apotre Paul ti montré enn lot raison important kifer la congregation existé kan li ti koz lor “lakaz Bondié, ki congregation Bondié vivant, enn colonne ek enn support pou la verité.” (1 Timothée 3:15) Ki congregation Paul ti pé kozé? Dan ki sens la Bible servi mot “congregation”? Ki l’effet sa bizin ena lor nou la-vie ek lor nou bann l’objectif ? Avant nou reponn sa bann question-la, anou examine bann different sens ki mot “congregation” ena dan la Bible.
4. Dan ki sens la plupart du temps servi mot “congregation” dan bann l’Écritures hébraïques?
4 Mot hébreu ki souvent traduire “congregation” sorti dan enn mot ki vedir “joinde ensam” ou-soit “rassemblé.” (Deutéronome 4:10; 9:10) Enn psalmiste ti servi mot “congregation” en rapport avek bann ange dan le ciel, ek kapav servi sa mot-la aussi pou koz lor enn group mauvais dimoune. (Psaume 26:5; 89:5-7) Mais, la plupart du temps, bann l’Écritures hébraïques servi sa mot-la en rapport avek bann Israélite. Bondié ti faire koné ki Jacob ti pou “vinn enn congregation bann peuple,” ek sa ti realisé. (Genèse 28:3; 35:11; 48:4) Bondié ti choisir bann Israélite pou zot vinn “congregation Jéhovah,” “congregation vrai Bondié.”—Nombres 20:4; Nehémia 13:1; Josué 8:35; 1 Samuel 17:47; Mika 2:5.
5. Ki mot grec ki souvent traduire par “congregation,” ek dan ki sens nou kapav applik sa mot-la?
5 Mot grec ékklêsia ki’nn traduire par congregation sorti dan deux mot grec ki vedir “en dehors” ek “appelé.” Li pa necessairement applik ar enn group dimoune ki rassemblé pou adore Bondié. Par exemple, la Bible dire ki Démétrius ti ‘rassemblé enn la-foule’ kont l’apotre Paul dan Éphèse. (Actes 19:32, 39, 41) Mais en general, la Bible servi sa mot-la pou congregation chrétien. Certain traduction la Bible traduire sa mot-la par “l’eglise,” mais enn dictionnaire biblik (The Imperial Bible-Dictionary) dire ki sa mot-la “jamais . . . pa vedir enn batiment kot bann chrétien rassemblé en publik pou adoré.” Mais, li bon nou remarké ki bann l’Écritures grecques chrétiennes servi mot “congregation” dan au moins quatre fason different.
Bann chrétien oint: “congregation Bondié”
6. Ki David ek Jésus ti faire dan la congregation?
6 L’apotre Paul ti applik seki David ti dire dan Psaume 22:22 ar Jésus kan li ti ecrire: “ ‘Mo pou annonce to nom ar mo bann frere; mo pou loué toi avek bann cantik dan congregation.’ A cause sa, li ti necessaire ki [Jésus] vinn couma so bann ‘frere’ dan tou kitsoz, pou ki li kapav vinn enn grand pretre ki ena misericorde ek ki fidel dan bann kitsoz ki concerne Bondié.” (Hébreux 2:12, 17) Dan le passé, David ti loué Bondié dan congregation bann Israélite. (Psaume 40:9) Mais, lor ki group Paul ti pé kozé kan li ti dire ki Jésus ti loué Bondié “dan congregation”? Ki été sa congregation-la?
7. Ki sens principal mot “congregation” ena dan bann l’Écritures grecques chrétiennes?
7 Seki nou lire dan Hébreux 2:12, 17 bien interessant. Sa montré ki Christ ti forme partie dan enn congregation kot li ti annonce nom Bondié ar so bann frere. Kisannla sa bann frere-la? C’est bann ki forme partie dan “descendance Abraham,” bann frere Christ ki oint ar l’esprit saint, bann “ki ena part dan l’invitation pou al dan le ciel.” (Hébreux 2:16–3:1; Matthieu 25:40) Oui, dan bann l’Écritures grecques chrétiennes, premier sens pou mot “congregation” applik ar group bann disciple Christ ki oint ar l’esprit saint. Sa bann 144,000 chrétien oint-la zot forme “congregation bann premier-né ki zot nom finn ecrire dan le ciel.”—Hébreux 12:23.
8. Couma Jésus ti annoncé a l’avance ki congregation chrétien pou formé?
8 Jésus ti montré ki sa “congregation” chrétien-la ti pré pou formé. Apepré enn an avant li mort, li ti dire enn zapotre: “To-mem Pierre, ek lor sa roche-la mo pou construire mo congregation, ek bann la-porte l’hadès pa pou ena pouvoir lor li.” (Matthieu 16:18) Pierre ek Paul toulé-deux ti bien comprend ki c’est Jésus li-mem ki ti sa roche ki ti annoncé-la. Pierre ti koz lor bann ‘roche vivant’ ki forme enn lakaz spirituel lor sa roche-la, setadir Jésus Christ. Li ti ecrire ki sa bann ‘roche vivant-la’ zot “enn peuple ki pou vinn enn di-bien special, pou ki zot annonce bann grand qualité” sa Kikenn ki finn appel zot-la.—1 Pierre 2:4-9; Psaume 118:22; Isaïe 8:14; 1 Corinthiens 10:1-4.
9. Kan eski congregation Bondié ti commence formé?
9 Kan eski ‘sa peuple ki ti pou vinn enn di-bien special-la’ ti vinn congregation chrétien? Sa ti arrivé jour la Pentecôte l’an 33 n.l., kan Bondié ti envoye l’esprit saint lor bann disciple ki ti rassemblé dan Jérusalem. Plitar pendant sa jour-la, Pierre ti donne enn joli discours devant enn group Juif ek prosélyte. Beaucoup parmi zot, zot leker ti dechiré kan li ti koz lor la mort Jésus; zot ti repenti ek zot ti prend bapteme. La Bible dire ki ti ena trois mille dimoune ki ti repenti ek ti prend bapteme ek lerla, zot ti forme partie dan sa nouveau congregation ki ti pé grandi-la. (Actes 2:1-4, 14, 37-47) Li ti pé grandi parski pli allé, ti ena beaucoup Juif ek prosélyte ki ti accepté ki peuple Israël ti nepli congregation Bondié. Mais plutot, c’est bann chrétien oint ki ti forme “l’Israël Bondié” ki ti’nn vinn vrai congregation Bondié.—Galates 6:16; Actes 20:28.
10. Ki relation ena entre Jésus ek congregation Bondié?
10 La Bible souvent faire enn difference entre Jésus ek bann chrétien oint, couma nou trouvé dan l’expression “concernant Christ ek la congregation.” Jésus li-mem li Chef sa congregation bann chrétien oint-la. Paul ti ecrire ki Bondié “ti faire [Jésus] vinn chef lor tou kitsoz pou la congregation, ki so lekor.” (Éphésiens 1:22, 23; 5:23, 32; Colossiens 1:18, 24) Zordi, reste zis enn ti group chrétien oint ki forme partie dan sa congregation-la lor la terre. Mais, nou kapav sur ki zot Chef, Jésus Christ, content zot. Nou trouve sentiment ki Jésus ena envers zot dan Éphésiens 5:25: “Christ aussi finn content la congregation ek finn donne so la-vie pou sauve li.” Li content zot parski zot bien occupé pou donne Bondié “enn sacrifice louange, setadir fruit [zot] la-levre ki faire declaration publik pou so nom,” pareil couma Jésus ti faire kan li ti lor la terre.—Hébreux 13:15.
Lezot sens ki mot “congregation” ena
11. Cite enn deuxieme sens ki mot “congregation” ena dan bann l’Écritures grecques chrétiennes.
11 Parfois, la Bible servi mot “congregation” dan enn sens pli limité ou-soit dan enn fason pli precis. Li pa applik li ar tou bann 144,000 chrétien oint ki forme “congregation Bondié.” Par exemple, guette seki Paul ti ecrire ar enn group chrétien: “Faire attention ki a cause zot, bann Juif ek bann Grec ek congregation Bondié, pa tombé.” (1 Corinthiens 10:32) Li clair ki si enn chrétien dan Corinthe ti faire enn mauvais kitsoz, sa ti kapav faire certain tombé. Mais eski sa vedir ki so mauvais action ti kapav faire tou bann Grec, bann Juif, ou-soit tou bann chrétien oint dan sa lepok-la ziska dan nou lepok, tombé? Non. Alors, dan sa verset-la, li parette ki l’expression “congregation Bondié” applik ar bann chrétien ki ti vive dan enn certaine lepok. A cause sa, nou kapav dire ki Bondié guide, aide, ou-soit beni la congregation, setadir tou bann chrétien dan enn certaine lepok, n’importe kot zot resté. Nou kapav koz aussi lor la joie ek la paix ki ena dan congregation Bondié zordi, setadir parmi tou bann vrai chrétien lor la terre.
12. Cite enn troisieme sens ki mot “congregation” ena dan la Bible.
12 Mot “congregation” ena enn troisieme sens dan la Bible. Li applik ar tou bann chrétien ki dan enn partie lor la terre. Nou lire par exemple: “Congregation partout dan Judée, Galilée ek Samarie ti konn enn period la paix.” (Actes 9:31) Ti ena plus ki enn sel group chrétien dan sa grand region-la, mais la Bible appel tou sa bann group ki ti dan Judée, Galilée ek Samarie-la, “congregation.” Kan nou considere sa quantité dimoune ki ti baptisé jour la Pentecôte l’an 33 nou lepok-la ek pa trop longtemps apré, li possible-mem ki ti ena plus ki enn group ki ti rassemblé regulierement dan region Jérusalem. (Actes 2:41, 46, 47; 4:4; 6:1, 7) Le roi Hérode Agrippa I ti dirige Judée ziska so la-mort en 44 n.l, ek dapré 1 Thessaloniciens 2:14, li clair ki au moins ziska l’an 50 n.l., ti ena plusieurs congregation dan Judée. Alors, kan nou lire ki Hérode ti “maltraite certain ki ti dan congregation,” kitfois sa ti faire reference ar plus ki zis enn sel group ki ti dan Jérusalem.—Actes 12:1.
13. Cite quatrieme sens ki mot “congregation” ena dan la Bible ek ki servi pli souvent.
13 Quatrieme sens ki mot “congregation” ena li pli limité encore ek nou servi li pli souvent. Sa applik ar bann chrétien ki forme partie zis dan enn congregation local, couma par exemple enn congregation ki rassemblé dan enn lakaz. Paul ti mentionne “bann congregation dan Galatie.” Ti ena plus ki enn congregation dan sa grand province romain-la. Deux fois Paul ti servi l’expression “bann congregation” en rapport avek Galatie. Dan sa province-la ti ena bann congregation ki ti dan la ville Antioche, Derbé, Lystres ek Iconium. Ti ena bann ancien qualifié ki ti’nn etabli dan sa bann congregation-la. (1 Corinthiens 16:1; Galates 1:2; Actes 14:19-23) Dapré la Bible, zot tou ti “bann congregation Bondié.”—1 Corinthiens 11:16; 2 Thessaloniciens 1:4.
14. Ki conclusion nou kapav tiré concernant sens ki mot “congregation” ena dan certain verset?
14 Dan certain cas, pa ti ena beaucoup dimoune dan bann group ki ti rassemblé pou bann reunion. Enn group ti kapav-mem rassemblé dan enn lakaz. Pourtant, parfois mot “congregation” ti applik ar sa qualité group-la. Nou koné ki ti ena bann group coumsa dan lakaz Aquila ek Prisca, Nympha, ek Philémon. (Romains 16:3-5; Colossiens 4:15; Philémon 2) Zordi, sa li enn l’encouragement pou bann congregation kot pena beaucoup dimoune ek ki kitfois-mem pé rassemblé dan enn lakaz. Jéhovah ti approuve sa bann ti congregation-la dan premier siecle, ek pena doute ki Li faire pareil zordi: Li beni zot par so l’esprit saint.
Bann congregation loué Jéhovah
15. Couma l’esprit saint ti manifesté dan certain congregation dan premier siecle?
15 Nou ti trouvé la-haut ki Jésus ti realise Psaume 22:22: li ti loué Bondié dan congregation. (Hébreux 2:12) So bann disciple fidel aussi ti bizin faire pareil. Dan premier siecle, kan bann vrai chrétien ti oint par l’esprit saint pou vinn bann garson Bondié ek bann frere Christ, certain ti gagne bann don special grace a l’esprit saint. Zot ti gagne bann don l’esprit saint ki ti donne zot bann capacité extraordinaire. Certain ti gagne don special pou koz avek sagesse ou-soit don la connaissance, ou-soit pouvoir pou gueri bann dimoune ou-soit pou prophetisé, ou-soit mem pou koz dan bann langue ki zot pa ti koné.—1 Corinthiens 12:4-11.
16. Cite enn raison kifer ti ena bann don l’esprit saint.
16 En rapport avek don pou koz en langue, Paul ti dire: “Mo pou chante bann louange avek don l’esprit saint, mais mo pou chante aussi bann louange avek mo l’intelligence.” (1 Corinthiens 14:15) Li ti trouve l’importance ki lezot comprend seki li ti pé dire pou ki zot kapav gagne l’enseignement. Paul ti ena l’objectif pou loué Jéhovah dan la congregation. Li ti donne sa l’encouragement-la tou bann ki ti ena don l’esprit saint: “Rod gagne sa bann don-la en abondance pou fortifié la congregation,” setadir congregation kot zot ti été ek kot zot ti servi sa bann don-la. (1 Corinthiens 14:4, 5, 12, 23) Li clair ki Paul ti interessé ar bann congregation local parski li ti koné ki dan chaque congregation, bann chrétien ti pou gagne l’occasion pou loué Bondié.
17. Dan nou lepok, ki nou kapav sur en rapport avek bann congregation local?
17 Jéhovah contigne servi ek aide so congregation. Li pé beni group bann chrétien oint ki lor la terre zordi. Nou kapav trouve sa par sa quantité mangé ki nou gagné lor plan spirituel-la. (Luc 12:42) Li pé beni famille international nou bann frere ek soeur. Li pé beni bann congregation kot sakenn parmi nou été, ek kot nou loué nou Createur, par nou action ek par nou bann commentaire bien encourageant. Dan nou congregation, nou gagne enn l’enseignement ek enn formation pou ki nou kapav loué Bondié dan bann lezot l’occasion kan nou pa dan congregation.
18, 19. Ki bann chrétien sincere ki dan n’importe ki congregation envie faire?
18 Rappel ki conseil l’apotre Paul ti donne bann chrétien dan congregation Philippe ek Macédoine: “Ala seki mo contigne demandé dan mo bann la-priere, . . . ki zot rempli avek fruit la justice, ki nou produire grace a Jésus Christ, pou la gloire Bondié ek pou loué Li.” Parmi bann kitsoz ki bann chrétien ti bizin faire, zot ti bizin koz ar lezot dimoune, setadir bann ki pa ti forme partie dan congregation, lor zot la-foi en Jésus Christ ek lor zot l’esperance extraordinaire. (Philippiens 1:9-11; 3:8-11) A cause sa, Paul ti conseil bann chrétien: “A travers [Jésus], anou touletan offert Bondié enn sacrifice louange, setadir fruit nou la-levre ki faire declaration publik pou so nom.”—Hébreux 13:15.
19 Eski ou content loué Bondié “dan congregation,” pareil couma Jésus ti faire, ek servi ou la-levre pou loué Jéhovah devant bann dimoune ki pankor aprann pou konn Li ek pou loué Li? (Hébreux 2:12; Romains 15:9-11) Nou reponse kapav depann en partie lor fason ki nou considere role ki nou congregation joué dan projet Bondié. Dan prochain lartik, nou pou guetté couma Jéhovah pé dirige ek pé servi nou congregation ek ki role nou congregation bizin ena dan nou la-vie.
Eski ou rappel?
• Couma “congregation Bondié” kot ena bann chrétien oint, inn existé?
• Cite trois lezot different sens ki mot “congregation” ena dan la Bible.
• Concernant congregation, ki David, Jésus ek bann chrétien premier siecle ti envie faire, ek ki l’effet sa bizin ena lor nou?
[Zimage, page 9]
Jésus ti fondement ki congregation?
[Zimage, page 10]
Bann group chrétien local ti rassemblé en tant ki “bann congregation Bondié”
[Zimage, page 12]
Pareil couma bann chrétien dan Bénin, nou kapav loué Jéhovah parmi bann la-foule rassemblé