Eski ou ena mem fason pensé ki Jéhovah lor bann kitsoz sacré?
“Faire attention . . . ki pena okenn fornicateur, ni enn kikenn ki pena respé pou bann kitsoz sacré.”—HÉBREUX 12:15, 16.
1. Ar ki l’attitude bann serviteur Jéhovah pa d’accord?
Pli allé, le monde en general pé neglige bann kitsoz sacré. Edgar Morin, enn sociologue français ti dire ki zordi bann dimoune finn commence ena bann doute lor fondation bann valeur moral—Bondié, la nature, nou pays, l’histoire ek la raison. Li ti ajouté ki “sakenn decidé ki valeur li envie suive.” Sa l’attitude-la reflete “l’esprit le monde,” ou-soit “l’esprit ki pé agir asterla dan bann garson desobeissance.” (1 Corinthiens 2:12; Éphésiens 2:2) Bann dimoune ki finn voué zot la-vie pou servi Jéhovah ek ki soumette-zot avek tou zot leker ar so domination, pa d’accord avek sa l’attitude-la. (Romains 12:1, 2) Au contraire, bann serviteur Bondié comprend ki li bien important ki zot donne Jéhovah enn l’adoration ki saint. Ki kitsoz dan nou la-vie nou bizin considere couma sacré? Sa lartik-la pou examine cinq kitsoz ki tou bann serviteur Bondié considere couma bann kitsoz sacré. Dan prochain lartik nou pou trouvé ki nou bann reunion aussi zot sacré. Mais ki sa vedir “saint”?
2, 3. (a) Couma la Bible montré bien ki Jéhovah Li saint? (b) Couma nou considere nom Jéhovah couma enn kitsoz ki sacré?
2 Dan la Bible, mot hébreu ki’nn servi pou “saint” vedir separé. Kan sa concerne l’adoration, sa mot ‘saint-la’ applik ar bann kitsoz ki finn separé ek ki pa servi dan enn fason ordinaire ou-soit zot applik ar bann kitsoz ki consideré couma sacré. Jéhovah Li saint dan enn fason parfait. La Bible appel Li “sa Kikenn ki Pli Saint-la.” (Proverbes 9:10; 30:3) Dan le passé en Israël, lor turban grand pretre ti ena enn plaque en or ek lor la ti ecrire: “Jéhovah Li saint.” (Exode 28:36, 37) La Bible montré ki bann chérubin ek bann séraphin ki debouté pré kot trone Jéhovah dire fort: “Jéhovah . . . Li saint, saint, saint.” (Isaïe 6:2, 3; Révélation 4:6-8) Sa repetition-la montré bien ki Jéhovah Li saint ek Li pur dan enn fason extraordinaire. Li-mem ki la Source tou seki saint.
3 Nom Jéhovah, li sacré, ou-soit saint. Enn ecrivain Psaume ti dire: “Laisse zot loué to nom. Li grand, li faire gagne la crainte ek li saint.” (Psaume 99:3) Jésus ti enseigne nou pou prié: “Nou Papa ki dan le ciel, ki to nom sanctifié [ou-soit “considere couma sacré ou-soit saint,” note].” (Matthieu 6:9) Marie, mama Jésus ti dire: “Mo nâme loué Jéhovah . . . sa Kikenn ki Puissant-la finn faire bann grand kitsoz pou moi, ek so nom saint.” (Luc 1:46, 49) En tant ki bann serviteur Jéhovah, nou considere so nom couma enn kitsoz sacré ek nou evite faire kitsoz ki kapav faire lezot koz en mal lor sa nom-la. En plus, nou ena mem fason pensé ki Jéhovah lor seki saint. Sa vedir ki tou bann kitsoz ki Jéhovah considere couma sacré, nou aussi nou considere sa couma sacré.—Amos 5:14, 15.
Kifer nou ena enn grand respé pou Jésus
4. Kifer la Bible appel Jésus “enn kikenn ki saint”?
4 Jésus “sel Garson ki [Jéhovah] inn crée direct,” ti saint kan Bondié ti crée li. (Jean 1:14; Colossiens 1:15; Hébreux 1:1-3) A cause sa, la Bible appel li “sa Kikenn ki Saint-la, ki sorti kot Bondié.” (Jean 6:69) Li ti reste toujours saint kan Jéhovah ti transfere so la-vie lor la terre, parski c’est grace a pouvoir l’esprit saint ki Marie ti gagne Jésus. Enn ange ti dire Marie: “L’esprit saint pou vinn lor toi . . . pou appel sa kikenn ki pou né-la, saint, Garson Bondié.” (Luc 1:35) Kan bann chrétien Jérusalem ti prié Jéhovah, deux fois zot ti appel Garson Bondié: “To serviteur ki saint, Jésus.”—Actes 4:27, 30.
5. Ki mission sacré Jésus ti accompli lor la terre, ek kifer so di-sang ena enn grand valeur?
5 Kan Jésus ti lor la terre, li ti ena enn mission sacré pou li accompli. Kan li ti prend bapteme en l’an 29 n.l., li ti oint, setadir ki Jéhovah ti choisir li pou vinn Grand Pretre dan So grand temple spirituel. (Luc 3:21, 22; Hébreux 7:26; 8:1, 2) En plus, li ti bizin donne so la-vie en sacrifice. Grace a di-sang ki li’nn versé, sa ti permette Jéhovah donne enn ranson pou sauve bann dimoune ki faire peché. (Matthieu 20:28; Hébreux 9:14) Alors, nou considere di-sang Jésus couma enn kitsoz ki sacré, enn kitsoz “ki ena grand valeur.”—1 Pierre 1:19.
6. Ki l’attitude nou bizin ena envers Jésus Christ, ek kifer?
6 Pou montré ki nou ena enn grand respé pou nou lé-Roi ek nou Grand Pretre Jésus Christ, l’apotre Paul ti ecrire: “Bondié finn donne li enn pli grand position ek finn content pou donne li enn nom ki pli grand ki tou lezot nom, pou ki au nom Jésus tou genou pliyé dan le ciel ek lor la terre ek enba la terre, ek dimoune ki koz tou langage reconette en publik ki Jésus Christ, li-mem Seigneur pou la gloire Bondié nou Papa.” (Philippiens 2:9-11) Nou montré ki nou ena mem fason pensé ki Jéhovah lor bann kitsoz sacré kan nou soumette-nou avek la joie ar nou Guide ek nou lé-Roi Jésus Christ, ki Chef congregation chrétien.—Matthieu 23:10; Colossiens 1:18.
7. Couma nou montré ki nou soumette ar Christ?
7 Nou montré ki nou soumette ar Jésus Christ kan nou montré respé ki bizin pou bann zom ki li servi pou prend la tête dan travail ki li pé dirigé asterla. Nou tou nou bizin accepté ki, bann chrétien oint ki forme partie dan College central ek bann ancien ki zot etabli dan bann filiale, bann district, bann circonscription, ek bann congregation, zot ena enn responsabilité ki sacré. Alors, nou bizin ena enn grand respé pou sa disposition-la, ek soumette-nou ar sa bann zom-la.—Hébreux 13:7, 17.
Enn peuple ki saint
8, 9. (a) Dan ki sens bann Israélite ti enn nation saint? (b) Couma Jéhovah ti faire bann Israélite comprend l’importance seki saint?
8 Jéhovah ti faire enn l’alliance avek nation Israël. Relation ki sa nation-la ti ena avek Jéhovah ti faire li gagne enn position special. Zot ti saint ou-soit separé. Jéhovah Li-mem ti dire zot: “Zot bizin montré ki zot saint pou moi, parski moi Jéhovah, mo saint; ek mo pé separe zot ar bann peuple, pou zot vinn pou moi.”—Lévitique 19:2; 20:26.
9 Kan Jéhovah ti forme nation Israël, Li ti faire zot bien comprend l’importance seki saint. Pendant sa l’occasion-la, zot pa ti mem gagne droit touche montagne kot Li ti’nn donne zot les Dix Commandement, sinon zot ti pou mort. Dan enn sens, zot ti bizin considere montagne Sinaï couma sacré. (Exode 19:12, 23) Zot ti bizin considere aussi bann pretre, tabernacle ek bann meuble ki ti dan tabernacle couma bann kitsoz sacré. (Exode 30:26-30) Mais ki nou kapav dire lor congregation chrétien?
10, 11. Kifer nou kapav dire ki congregation bann chrétien oint li sacré, ek ki l’effet sa ena lor “lezot brebis”?
10 Congregation bann chrétien oint, li sacré pou Jéhovah. (1 Corinthiens 1:2) En realité, mem si bann chrétien oint zot-mem zot pa grand temple spirituel Jéhovah, mais zot tou ki lor la terre en tant ki group dan n’importe ki lepok, zot couma enn temple sacré. Jéhovah reste dan sa temple-la par moyen so l’esprit saint. L’apotre Paul ti ecrire: “Dan l’unité avek [Jésus Christ], tou sa construction-la li bien rassemblé ensam, ek li grandi pou vinn enn temple ki saint pou Jéhovah. Dan l’unité avek li, zot aussi zot pé rassemblé ensam pou vinn enn place kot Bondié resté par l’esprit.”—Éphésiens 2:21, 22; 1 Pierre 2:5, 9.
11 Inpé pli loin, Paul ti dire bann chrétien oint: “Eski zot pa koné ki zot temple Bondié, ek ki l’esprit Bondié reste dan zot? . . . Temple Bondié, li saint, ek sa temple-la c’est sa-mem ki zot été.” (1 Corinthiens 3:16, 17) Par so l’esprit saint, Jéhovah “reste” parmi bann chrétien oint, ek “marche parmi zot.” (2 Corinthiens 6:16) Li contigne guide so “l’esclave” fidel. (Matthieu 24:45-47) Bann membre “lezot brebis” apprecié grand privilege ki zot ena pou travail ensam avek sa ‘temple-la’ setadir avek bann chrétien oint.—Jean 10:16; Matthieu 25:37-40.
Bann kitsoz sacré dan la vie bann chrétien
12. Ki bann kitsoz ki sacré dan nou la-vie, ek kifer?
12 Li normal ki beaucoup kitsoz dan la vie bann chrétien oint ek zot bann compagnon, zot sacré. Nou relation avek Jéhovah c’est enn kitsoz sacré. (1 Chroniques 28:9; Psaume 36:7) C’est enn kitsoz ki ena tellement valeur pou nou, ki nou pa laisse nanyin ni personne affaibli sa relation-la. (2 Chroniques 15:2; Jacques 4:7, 8) La priere, c’est enn kitsoz bien important ki aide nou pou garde bann relation bien proche avek Jéhovah. Daniel ti considere la priere couma enn kitsoz tellement sacré ki li ti contigne garde so l’habitude pou prié Jéhovah, mem kan so la-vie ti en danger. (Daniel 6:7-11) La Bible compare la priere “bann saint” setadir bann chrétien oint, couma l’encens ki ti servi dan temple. (Révélation 5:8; 8:3, 4; Lévitique 16:12, 13) Si servi sa symbol-la pou represente la priere, sa montré ki quantité la priere li sacré. Oui, nou ena vrai-mem enn grand privilege pou koz avek pli grand lé-Roi dan l’univers! Pena okenn doute ki nou bizin considere la priere couma enn kitsoz sacré dan nou la-vie!
13. Ki la force ki sacré, ek ki nou bizin faire pou laisse li agir dan nou la-vie?
13 Ena enn la-force dan la vie bann chrétien oint ek bann membre lezot brebis ki zot considere couma sacré; sa la-force-la c’est l’esprit saint. Sa l’esprit-la c’est la force ki Bondié servi pou faire kitsoz. Li touletan agir en accord avek volonté nou Bondié ki saint, a cause sa nou kapav appel li “l’esprit saint” ou-soit enn “l’esprit ki saint.” (Jean 14:26; Romains 1:4) Par so l’esprit saint, Jéhovah donne so bann serviteur la force pou preche la bonne nouvelle. (Actes 1:8; 4:31) Jéhovah donne so l’esprit “bann ki obeir Li couma enn chef,” bann ki “contigne marche par l’esprit,” pa par bann mauvais desir. (Actes 5:32; Galates 5:16, 25; Romains 8:5-8) Sa la-force ki puissant-la permette bann chrétien pou manifesté “fruit l’esprit,” setadir bann bon qualité. Li permette zot aussi pou faire “bann action ki montré zot conduite saint ek zot l’attachement pou Bondié.” (Galates 5:22, 23; 2 Pierre 3:11) Si l’esprit saint li enn kitsoz ki sacré pou nou, nou pou evité faire n’importe ki kitsoz ki pou kapav faire sa l’esprit-la, la peine ou-soit ki kapav empeche li agir dan nou la-vie.—Éphésiens 4:30.
14. Ki privilege eski bann chrétien oint considere couma sacré, ek couma bann membre lezot brebis partage sa privilege-la?
14 Privilege ki nou ena pou porte nom Jéhovah, nou Bondié ki saint, ek pou represente Li couma so bann Témoin, c’est enn lot kitsoz ki sacré pou nou. (Isaïe 43:10-12, 15) Jéhovah finn qualifié bann chrétien oint pou vinn “bann ministre enn nouveau l’alliance.” (2 Corinthiens 3:5, 6) A cause sa, zot inn gagne mission pou preche ‘la bonne nouvelle lor royaume’ Bondié ek pou “faire bann disciple parmi bann dimoune dan tou bann nation.” (Matthieu 24:14; 28:19, 20) Zot pé rempli sa mission-la avek fidelité, ek plusieurs million dimoune pé reagir dan enn bon fason. Coumadir sa bann dimoune-la pé dire bann chrétien oint: “Nou pou al avek zot parski nou finn tann dire ki Bondié avek zot.” (Zekaria 8:23) Dan enn sens spirituel, sa bann dimoune-la pé travail couma bann “planteur” ek bann ‘ki occupe plantation raisin’ pou bann chrétien oint, bann “ministre nou Bondié.” Dan sa fason-la, bann membre lezot brebis aide bann chrétien oint beaucoup pou accompli zot ministere lor la terre entier.—Isaïe 61:5, 6.
15. Ki l’activité l’apotre Paul ti considere couma sacré, ek kifer nou bizin ena mem fason pensé ki li?
15 L’apotre Paul, par exemple ti considere so ministere publik couma enn kitsoz sacré, ou-soit saint. Li ti dire ki li-mem li “enn serviteur publik Jésus Christ pou bann nation, ki pé faire enn travail sacré pou annonce bon nouvel Bondié.” (Romains 15:16) Kan li ti ecrire bann chrétien dan Corinthe, Paul ti koz lor so ministere couma enn “tresor.” (2 Corinthiens 4:1, 7) Par nou ministere publik, nou faire konn bann “declaration sacré ki Bondié inn donné.” (1 Pierre 4:11) Alors, ki nou enn chrétien oint ou-soit enn membre lezot brebis, nou considere sa couma enn privilege sacré pou rann temoignage lor la verité.
“Vinn saint dan la crainte pou Bondié”
16. Couma nou kapav evité vinn bann dimoune ki “pena respé pou bann kitsoz sacré”?
16 L’apotre Paul ti dire bann chrétien faire attention ki zot pa vinn bann dimoune ki “pena respé pou bann kitsoz sacré.” Au contraire, li ti conseil zot pou ‘reste saint,’ pou “faire attention . . . ki okenn racine ki empoisonné pa poussé ek crée problem, ek ki sa pa contamine beaucoup parmi zot.” (Hébreux 12:14-16) L’expression “racine ki empoisonné” represente enn tigit dimoune dan congregation ki kitfois critik fason ki habitué faire bann kitsoz. Par exemple, li possible ki zot pa d’accord lor seki Jéhovah pensé lor mariage, ki enn disposition sacré. Ou-soit, zot pa trouve sa important pou reste pur lor plan moral. (1 Thessaloniciens 4:3-7; Hébreux 13:4) Kitfois aussi, zot fann bann l’idée apostat, “bann discours ki pena sens ek ki sali seki saint,” bann l’enseignement ki sorti ar bann dimoune ki “finn detourne-zot ar la verité.”—2 Timothée 2:16-18.
17. Kifer bann chrétien oint bizin contigne faire zeffort pou ena mem fason pensé ki Jéhovah lor bann kitsoz sacré?
17 Guette ki Paul ti ecrire so bann frere oint: “Mo bann frere ki mo bien content . . . anou tire tou kitsoz ki sali nou lekor ek nou l’esprit pou nou kapav purifié nou, ek pou ki nou kapav reussi vinn saint dan la crainte pou Bondié.” (2 Corinthiens 7:1) Sa bann parole-la montré ki bann chrétien oint ki “gagne l’invitation pou al dan le ciel,” bizin contigne faire bann grand zeffort pou montré ki zot ena mem fason pensé ki Jéhovah lor bann kitsoz sacré dan tou domaine dan zot la-vie. (Hébreux 3:1) Pierre aussi ti encourage so bann frere oint ek li ti dire zot: “Pareil couma bann zenfant ki obeir, arrete suive bann desir ki zot ti ena avant kan zot ti dan l’ignorance, mais en accord avek sa Kikenn ki Saint ek ki finn appel zot-la, vinn saint zot aussi dan tou zot conduite.”—1 Pierre 1:14, 15.
18, 19. (a) Couma bann membre ‘la grande foule’ montré ki zot ena mem fason pensé ki Jéhovah lor bann kitsoz sacré? (b) Ki kitsoz encore dan nou la-vie en tant ki chrétien, nou pou examiné dan prochain lartik?
18 Ki nou kapav dire lor bann membre ‘la grande foule’ ki pou reussi traverse “la grande tribulation”? Zot aussi zot bizin montré ki zot ena mem fason pensé ki Jéhovah lor bann kitsoz sacré. Livre Révélation decrire zot couma bann dimoune ki pé donne Jéhovah enn “service sacré” dan la cour terrestre so temple spirituel. Zot finn mette zot la-foi dan sacrifice Jésus, coumadir dan enn sens symbolik, zot “finn lave zot robe ek finn faire sa vinn blanc dan di-sang l’Agneau.” (Révélation 7:9, 14, 15) Sa faire zot vinn pur devant Jéhovah ek oblige zot pou ‘tire tou kitsoz ki sali zot lekor ek zot l’esprit pou zot kapav purifié zot, ek pou ki zot kapav reussi vinn saint dan la crainte pou Bondié.’
19 Enn kitsoz ki ena enn place important dan la vie bann chrétien oint ek bann membre lezot brebis, c’est assisté reunion regulierement pou adore Jéhovah ek etudié so Parole. Jéhovah considere bann reunion ek bann l’assemblée couma bann kitsoz sacré. Couma ek kifer nou bizin ena mem fason pensé ki Jéhovah lor bann kitsoz sacré dan sa domaine important-la? Nou pou examine sa question-la dan prochain lartik.
Revision
• Avek ki fason pensé ki ena dan le monde, bann serviteur Jéhovah pa d’accord?
• Kifer Jéhovah Li-mem la Source tou seki saint?
• Couma nou montré ki nou considere Jésus Christ couma enn kikenn ki saint?
• Ki bann kitsoz ki nou bizin considere couma sacré dan nou la-vie?
[Zimage, page 23]
Dan le passé, bann Israélite ti considere bann pretre, tabernacle ek bann meuble ki ti dan tabernacle couma bann kitsoz sacré
[Zimage, page 24]
Bann chrétien oint lor la terre zot forme enn temple sacré
[Zimage, page 25]
La priere ek nou ministere publik, zot bann privilege sacré