“Mo Pena Disan Personn lor Mo Latet”

1-3. (a) Dekrir seki arive kan Etikis mor. (b) Ki Pol fer, ek ki sa aprann nou lor Pol?

POL dan Troas ek li dan enn lasam lor letaz ki bien ranpli. Sa fer inpe letan ki Pol pe koz ar so bann frer ek ser, parski se dernie fwa ki li pou trouv zot. Inn ariv minwi. Bann-la inn alim boukou lalanp, alor fer bien so, ek ena bien tigit ler fre. Enn zenom ki apel Etikis pe asize lor rebor lafnet. Pandan ki Pol pe koze, Etikis gagn somey ek li sap depi trwaziem letaz, li tonbe!

² Lik, ki enn dokter, kitfwa parmi bann premie ki galoupe pou al gete ki’nn ariv Etikis. Pa kapav fer nanye pou li, parski ‘kan soulev li, li fini mor.’ (Zist. 20:9) Me enn mirak arive! Pol pran li ek ser li dan so lebra, ek dir lafoul: “Pa trakase, parski li vivan.” Pol inn resisit Etikis!​—Zist. 20:10.

³ Sa mirak-la montre ki kantite pouvwar lespri sin Bondie ena. Mem si se pa akoz Pol ki Etikis inn mor, kanmem sa li resisit sa zenom-la. Kifer? Pou ki sa pa gat sa moman inportan la ouswa ki bann frer ek ser perdi zot lafwa dan Zeova. Gras-a sa, bann frer ek ser gagn konsolasion ek lankourazman ki bizin pou kontign prese. Li kler ki pou Pol, lavi bann dimounn ena boukou valer. Sa fer nou rapel seki li dir dan Zistwar Bann Zapot 20:26: “Mo pena disan personn lor mo latet.” Anou gete kouma lexanp Pol kapav ed nou pou montre ki lavi ena valer pou nou.

‘Apre sa, Li Al Masedwann’ (Zist. 20:1, 2)

4. Dan ki moman difisil Pol inn pase?

⁴ Kouma nou’nn trouve dan sapit avan, Pol ti pas dan bann moman bien difisil. Kan Pol ti prese dan Efez sa ti kree enn dezord laba. Tou bann ki ti fer bann zidol pou ladorasion dees Artemis ek ki ti vann zot ti kree enn soulevman! Zistwar Bann Zapot 20:1 dir: ‘Apre ki tou inn kalme, Pol fer apel bann disip. Li ankouraz zot ek dir zot orevwar. Apre sa, li al Masedwann.’

5, 6. (a) Komie letan Pol res Masedwann, ek ki li fer pou so bann frer ek ser laba? (b) Kouma Pol konsider so bann frer ek ser?

⁵ Lor larout pou al Masedwann, Pol aret kot lepor Troas ek pas inpe letan laba. Pol espere ki Tit, ki li ti avoy Korint, pou vinn zwenn li Troas. (2 Kor. 2:12, 13) Selman, kan Pol trouve ki Tit pa pe vini, li al Masedwann kot li pas anviron enn an edmi pou ‘ankouraz bann ki laba.’a (Zist. 20:2) Finalman, Tit vinn zwenn Pol dan Masedwann, ek dir li ki bann frer ek ser dan Korint inn bien reazir ar so premie let. (2 Kor. 7:5-7) Sa pous Pol pou ekrir bann-la enn lot let ki zordi nou kone kouma 2 Korintien.

⁶ Li interesan pou trouve ki kan Pol vizit bann frer ek ser dan Efez ek Masedwann, Lik servi mo “ankouraz.” Sa mo-la montre bien kouma Pol konsider so bann frer ek ser! Pol pa ti parey kouma bann Farizien ki mepriz lezot. Li konsider so bann frer ek ser kouma so bann kamarad travay. (Zan 7:47-49; 1 Kor. 3:9) Pol pou kontign gard sa latitid-la, mem kan li pou bizin donn zot enn konsey ki bien ferm.​—2 Kor. 2:4.

7. Kouma bann ansien ek bann responsab sirkonskripsion imit Pol?

⁷ Azordi, bann ansien ek bann responsab sirkonskripsion fer boukou zefor pou imit lexanp Pol. Mem si zot bizin donn enn kikenn enn konsey ki bien ferm, zot pou esey fer li dan enn fason ki pou ankouraz dimounn-la. Olie ki zot pou ziz sa dimounn-la, zot pou esey konpran so santiman ek ankouraz li. Enn responsab sirkonskripsion ki ena boukou lexperyans dir: “Laplipar nou bann frer ek ser anvi fer seki bon, me souvan zot bizin lit kont bann santiman kouma, desepsion, laper, ek panse ki zot pena ase lafors pou regle zot problem par zotmem ek ki zot bizin led.” Bann ansien ek bann responsab sirkonskripsion kapav donn boukou kouraz sa bann frer ek ser la.​—Ebre 12:12, 13.

Bann Zwif “Fer enn Konplo Kont Li” (Zist. 20:3, 4)

8, 9. (a) Kifer Pol desid pou pa al Siri? (b) Kifer sirman bann Zwif ena laenn pou Pol?

⁸ Pol kit Masedwann ek al Korint.b Apre ki li pas trwa mwa laba, li anvi al Sankre, kot li pe plann pou pran enn bato pou al Siri. Depi laba, li pou kapav al Zerizalem, ek kit bann kontribision pou bann frer ek ser ki bizin led.c (Zist. 24:17; Rom. 15:25, 26) Malerezman enn kitsoz arive ek sa fors Pol pou sanz so bann plan. Zistwar Bann Zapot 20:3 dir: ‘Bann Zwif fer enn konplo kont li’!

⁹ Sa pa etonn nou ki bann Zwif ena laenn pou Pol, parski pou zot li enn aposta. Inpe letan avan, kan Pol ti pres dan Korint, Krispis, prezidan sinagog sa lavil-la, ti vinn enn Kretien. (Zist. 18:7, 8; 1 Kor. 1:14) Enn lot fwa, bann Zwif dan Korint ti amenn Pol devan Galion, gouverner Akai, ek ti met bann sarz lor li. Me Galion ti dismis case-la ek sa ti fer bann Zwif bien ankoler. (Zist. 18:12-17) Bann Zwif dan Korint kitfwa kone, ouswa panse ki Pol biento pou pran bato pre kot Sankre, alor zot plann pou atann li laba pou touy li. Anou gete ki Pol pou fer.

10. Eski Pol enn kapon parski li pa al Sankre? Explike.

¹⁰ Pol desid pou pa al Sankre, me pou repas par mem sime ki li ti vini, setadir par Masedwann. Li fer sa pou protez so lavi ek bann kontribision ki bann frer ek ser inn donn li. Biensir refer sa sime-la apie, kapav danzere. Sa lepok-la ti abitie ena boukou voler lor sime. Mem bann ti lotel kot bann vwayazer ti reste pou dormi, ti danzere. Kanmem sa, Pol panse ki li mwin riske pou fer sa larout-la, ki al Sankre. Erezman, Pol pa pe vwayaz tousel, ena Aristark, Gais, Sekoundis, Sopater, Timote, Trofim, ek Tisik ki pe akonpagn li.​—Zist. 20:3, 4.

11. Azordi, kouma bann Kretien pran bann dispozision ki rezonab pou protez zot, ek ki lexanp Zezi inn kite pou nou?

¹¹ Parey kouma Pol, azordi bann Kretien pran bann dispozision pou protez zot kan zot pe prese. Par exanp, dan sertin landrwa zot pres an group ouswa a-de, me pa tousel. Me ki nou kapav fer kan nou gagn persekision? Antan-ki Kretien, nou konpran ki nou pa kapav evit bann persekision. (Zan 15:20; 2 Tim. 3:12) Kanmem sa, nou fer atansion kan nou prese. Anou get lexanp Zezi. Enn fwa, dan Zerizalem, bann lennmi ti ramas ros pou avoy lor li, lerla “Zezi ti kasiet ek ti sorti dan tanp.” (Zan 8:59) Plitar, bann Zwif ti fer enn konplo pou touy Zezi, ek akoz sa li “ti nepli mars an piblik parmi bann Zwif. Me li ti kit sa landrwa-la pou al dan enn rezion pre ar dezer.” (Zan 11:54) Alor, tanki sa pa ti al kont volonte ki Bondie ti ena pou li, Zezi ti pran bann dispozision ki rezonab pou protez li. Azordi osi, bann Kretien fer parey.​—Mat. 10:16.

Zot “Bien Kontan” (Zist. 20:5-12)

12, 13. (a) Ki lefe rezireksion Etikis ena lor lasanble? (b) Ki lesperans rekonfort nou azordi?

¹² Apre ki zot travers Masedwann ansam, kitfwa Pol ek so bann konpagnon separe. Me zot tou rezwenn dan Troas.d Labib dir: ‘Dan mwins ki sink zour nou zwenn zot dan Troas.’e (Zist. 20:6) Kouma nou’nn gete dan koumansman sa sapit-la, se dan sa lavil-la ki Pol resisit Etikis. Mazinn lazwa ki bann frer ek ser dan sa lavil-la resanti kan Etikis resisite! Kouma Labib dir, zot “bien kontan.”​—Zist. 20:12.

¹³ Li vre ki azordi nepli ena sa kalite mirak-la. Kanmem sa, kan enn kikenn ki pros ar nou mor, nou gagn rekonfor gras-a lesperans rezireksion ki ena dan Labib. (Zan 5:28, 29) Anou reflesi lor enn kitsoz: Parski Etikis inparfe, li ti pou mor ankor enn fwa. (Rom. 6:23) Me bann ki Bondie pou resisite dan lemond nouvo, zot pou gagn lesperans pou viv pou touletan! Anplis, bann ki pou resisite pou regn ansam avek Zezi dan lesiel, pa pou mor zame. (1 Kor. 15:51-53) Azordi gras-a lesperans rezireksion, bann Kretien ki pou al dan lesiel ek bann ki form parti “lezot mouton,” ena bann bon rezon pou “kontan” ek pou gagn rekonfor.​—Zan 10:16.

“An Piblik ek Lakaz-Lakaz” (Zist. 20:13-24)

14. Ki Pol dir bann ansien dan Efez kan li zwenn zot Mile?

¹⁴ Depi Troas, Pol ek so bann konpagnon al Asos, apre sa zot al Mitilenn, Kios, Samos, ek Mile. Pol anvi ariv Zerizalem vit pou Fet Lapantkot, alor li pa pran enn bato ki pas par Efez. Kanmem sa, li anvi koz avek bann ansien dan Efez, alor li demann zot pou vinn zwenn li Mile. (Zist. 20:13-17) Kan bann ansien arive, Pol dir zot: “Zot konn bien kouma mo’nn amenn mo lavi parmi zot depi premie zour ki mo’nn met lipie dan provins Lazi. Mo’nn travay kouma enn esklav pou Lesegner avek boukou limilite; boukou larm mo finn verse ek mo’nn pas par enn kantite leprev akoz konplo bann Zwif. Mo pa’nn ezite pou anons zot tou bann kitsoz ki ti bon pou zot ek pou ansegn zot an piblik ek lakaz-lakaz. Me mo’nn rann temwaniaz afon ar bann Zwif ek bann Grek toule-de pou ki zot repanti ek retourn ar Bondie ek ena lafwa dan nou Segner Zezi.”​—Zist. 20:18-21.

15. Sit sertin rezon kifer nou prese lakaz-lakaz.

¹⁵ Azordi, nou servi diferan metod pou pres bon nouvel. Parey kouma Pol, nou fer zefor pou pres avek bann dimounn ninport kotsa zot ete, lor bann bis stop, lor sime, ouswa dan bazar. Me metod prinsipal ki bann Temwin Zeova servi pou prese se lakaz-lakaz. Kifer? Enn rezon se parski sa permet ki regilierman tou dimounn gagn lokazion pou tann mesaz ki ena dan Labib ek sa montre ki Bondie pa fer preferans. Enn lot rezon, se ki sa permet nou donn bann dimounn ki sinser led ki zot bizin. Anplis, predikasion lakaz-lakaz fer nou lafwa vinn pli for ek ed nou pou ena landirans. Azordi, bann dimounn rekonet bann vre Kretien parski zot prese “an piblik ek lakaz-lakaz” avek boukou devouman.

16, 17. Kouma Pol montre ki li ena kouraz, ek azordi kouma bann Kretien imit Pol?

¹⁶ Pol explik bann ansien dan Efez ki li pa kone ki bann danze pe atann li kan li pou retourn Zerizalem. Li dir zot: “Me selman, mo pa konsider mo prop lavi kouma enn kitsoz ki ena valer pou mwa. Seki inportan pou mwa, se fini mo lekours ek akonpli travay ki Lesegner Zezi inn donn mwa, setadir pou anons afon bon nouvel lor bonte extraordiner Bondie.” (Zist. 20:24) Pol ena boukou kouraz, parski li pa les okenn sitiasion, ki li enn move lasante ouswa persekision, anpes li akonpli so mision.

¹⁷ Azordi osi, bann Kretien fer fas ar diferan problem. Par exanp, dan sertin pei bann gouvernman interdi nou laktivite ek persekit nou. Ena bann frer ek ser, ki avek kouraz, pe fer fas ar enn move lasante ouswa bann problem emosionel. Nou bann zenn pe bizin fer fas ar bann presion ki ena dan lekol. Azordi, parey kouma Pol, bann Temwin Zeova pa les okenn sitiasion destabiliz zot ek zot determine pou ‘anons bon nouvel afon.’

“Vey Bien lor Zotmem ek lor Troupo An-Antie” (Zist. 20:25-38)

18. Dan ki sans Pol pena disan personn lor so latet, ek kouma bann ansien dan Efez kapav fer parey?

¹⁸ Pol servi so prop lexanp pou donn bann ansien dan Efez bann konsey ki kler. Pou koumanse, li fer zot kone ki kitfwa se dernie fwa ki zot pou zwenn. Apre sa li dir zot: “Mo pena disan personn lor mo latet, parski mo pa’nn ezite pou anons zot tou kitsoz lor volonte Bondie.” Kouma bann ansien dan Efez kapav imit Pol ek pena disan personn lor zot latet? Li dir zot: “Vey bien lor zotmem ek lor troupo an-antie, parski lespri sin inn etabli zot kouma responsab sa troupo-la, pou pran swin lasanble Bondie, ki li’nn aste avek disan so prop Garson.” (Zist. 20:26-28) Pol averti zot ki pou ena “bann loulou ki fer dominer” ki pou rant dan lasanble ek “pou deform laverite pou fer bann disip swiv zot.” Ki bann ansien bizin fer? Pol dir: “Kontign veye, ek rapel ki pandan trwa-z-an, lanwit-lizour, zame mo pa finn aret donn sakenn parmi zot konsey avek larm.”​—Zist. 20:29-31.

19. Kouma lapostazi ti rant dan lasanble dan premie siek, ek ki ti arive bann santenn lane apre?

¹⁹ “Bann loulou ki fer dominer” ti rant dan lasanble anviron 60 an apre lamor Zezi. Ver lane 98 N.L., lapot Zan ti ekrir: “Depi aster-la mem ena boukou antikris ki finn aparet . . . Zot finn sorti parmi nou, me zot pa ti parey kouma nou; parski si zot ti parey kouma nou, zot ti pou res avek nou.” (1 Zan 2:18, 19) Anviron 200 an apre lamor Zezi, bann ansien ki ti tom dan lapostazi ti konsider zotmem kouma enn group spesial, ki ti pli siperyer ki bann lezot dan lasanble, ek se zot ki ti form fos relizion Kretien. Apre sa, anviron 100 an apre, Lanperer romin Konstantin ti fer sa fos relizion Kretien la vinn legal. Bann sef relizie aposta ti “deform laverite.” Zot ti melanz bann lansegnman ki ena dan Labib avek bann krwayans ek koutim bann payin, pou ki sa bann koutim ek krwayans payin la paret koumadir bann lansegnman Kretien. Azordi, bann legliz ankor swiv sa bann fos lide ek koutim la.

20, 21. Kouma Pol montre ki li ena lespri sakrifis, ek azordi kouma bann ansien kapav imit li?

²⁰ Fason ki Pol amenn so lavi bien diferan ar sa bann ansien ki’nn vinn aposta la, ki plitar, pou explwat lasanble. Pol travay pou ki li gagn seki li bizin, koumsa li pa vinn enn fardo pou lezot. Kan Pol fer bann kitsoz pou so bann frer ek ser, li pa atann nanye avek zot. Li ankouraz bann ansien dan Efez pou servi zot bann frer ek ser san ki zot atann kitsoz an retour. Li dir zot: “Zot bizin ed bann ki feb ek zot bizin rapel bann parol Lesegner Zezi, kan limem li ti dir: ‘Ena plis lazwa kan done ki kan resevwar.’”​—Zist. 20:35.

²¹ Parey kouma Pol, bann ansien ena lespri sakrifis. Bann ansien ki ena responsabilite pou “pran swin lasanble Bondie,” zot pa kouma bann sef relizie ki bann swadizan Kretien ek ki bat bis zot troupo. Okontrer, zot pran swin lasanble san ki zot atann kitsoz an retour. Lorgey ek lanbision pena zot plas dan lasanble, parski bann ki rod zot “prop laglwar” pa pou reisi. (Prov. 25:27) Bann dimounn orgeye ek ki fer bann kitsoz ki zot pa gagn drwa fer, pou gagn zis dezoner.​—Prov. 11:2.

22. Kifer bann ansien dan Efez ena boukou lafeksion pou Pol?

²² Pol vremem kontan so bann frer, ek se akoz sa ki bann-la ena boukou lafeksion pou li. Alor, kan ariv ler pou li ale, ‘zot tou bien plore, may Pol, ek anbras li avek boukou lafeksion.’ (Zist. 20:37, 38) Bann frer ek ser vremem apresie ek kontan bann ansien, parski parey kouma Pol, sa bann ansien-la donn zot letan, zot lenerzi, ek zot bann dibien, pou ed zot bann frer ek ser, san ki zot atann kitsoz an retour. Apre ki nou’nn examinn zoli lexanp Pol, eski to pa pou dakor pou dir ki li pa ti exazere ouswa flat limem kan li ti dir: “Mo pena disan personn lor mo latet”?​—Zist. 20:26.