Marche couma bann dimoune ki ena la sagesse
1 Kan Jésus ti demann quatre pecheur pou suive li, zot pa ti renvoye zot decision pou plitar, mais “dé-suite . . . zot ti suive li.” (Mat. 4:18-22) Kan Saul de Tarse ti converti ek ti ré-trouve clair, li aussi li pa ti renvoye so decision pou plitar, mais “dé-suite dan bann synagogue li’nn commence preché lor Jésus, ki li-mem Garson Bondié.” (Actes 9:20) Le temps pé contigne avancé, ek enn fois li passé, li al net. Ala kifer li important nou ‘marche couma bann dimoune ki ena la sagesse’ surtout concernant fason ki nou servi nou lé-temps.—Éph. 5:15, 16.
2 Bann situation ki nou pa attann: Bann l’occasion ki nou ena zordi pou servi Jéhovah, kitfois nou pa pou gagne li demain. (Jacq. 4:14) Personne pa kapav evite “bann situation ki zot pa attann.” (Eccl. 9:11) En plus, nou tou pé vinn vié, ek dan sa systeme-la nou pa kapav empeche “bann jour difficile” vini kan l’age rentré, ek sa pa permette nou faire beaucoup dan nou service pou Jéhovah. (Eccl. 12:1) Alors, li pa sage pou renvoye nou decision pou voué-nou ar Jéhovah ou-soit attann enn pli bon moment pou faire maximum possible dan nou ministere. (Luc 9:59-62) Abraham ti trouve la paix dan so vié jour, ek li ti mort “vié ek satisfait ar so la-vie” parski li ti’nn servi so la-vie avek sagesse. Li ti consacré tou so la-vie pou servi Jéhovah.—Gen. 25:8.
3 Reste bien tigit lé-temps: Nou envie aussi servi nou la-vie avek sagesse parski “reste bien tigit lé-temps.” (1 Cor. 7:29-31) Bientot, sa vié systeme-la pou disparette. L’occasion pou al rod bann disciple pendant “recolte lor la terre” pou fini. (Rév. 14:15) Nou bizin faire attention ki bann tracas ki ena dan la vie ek bann distraction pa prend le temps ki nou ti pou passé dan ministere. (Luc 21:34, 35) Kan nou pou rappel le passé, eski sa pa pou enn vrai satisfaction pou nou, kan nou pou maziné ki nou finn bien participé pendant recolte?
4 Nou bizin touletan veillé ki nou pa rate bann l’occasion pou participe dan bann privilege ki nou kapav gagné ek ki pou faire nou gagne la joie. Anou determiné pou faire tou seki nou kapav pou servi Jéhovah “tant ki kapav appel sa ‘Zordi.’” (Héb. 3:13) Kan nou faire sa, nou pou montré ki nou vrai-mem sage, parski “celui ki faire volonté Bondié, pou reste pou toujours.”—1 Jean 2:17.