Femme—Ena enn profond respé pou zot mari

“Femme soumette ar zot mari.”—Éphésiens 5:22.

1. Kifer souvent li difficile pou bann femme respecté zot mari?

Dan beaucoup pays, kan enn couple marié, la-marié faire enn voeu: li promette pou ena enn profond respé pou so mari. Mais, fason ki bann mari traite zot femme, pou faire ki li facile ou-soit difficile pou zot femme respecté sa l’engagement-la. Pourtant, mariage ti ena enn bon commencement. Bondié ti prend enn cote ar Adam, premier zom, ek Li ti faire enn femme. Adam ti dire avek la joie: “Enfin, sannla li lezo mo lezo ek la chair mo la-chair.”—Genèse 2:19-23.

2. Ki situation finn developpé en rapport avek bann femme ek mariage dan nou lepok?

² Alors, mariage ti ena enn bon commencement. Pourtant, au commencement bann l’année 60, en Amérique bann femme ki ti essaye libere-zot ar domination bann zom ti crée enn mouvement pou liberation bann femme. Sa lepok-la, ti ena apepré 300 zom kont 1 femme ki ti abandonne zot famille. A la fin bann l’année 60, ti ena 100 kont 1. Zordi, li parette ki bann femme zot aussi zot zouré, boire, fumé ek ena enn conduite immoral, pareil couma bann zom. Mais eski sa inn faire bann femme pli heureux? Non. Dan certain pays, apepré la moitié bann dimoune ki marié, zot divorcé apré. Bann zeffort ki certain femme inn faire pou ameliore condition bann femme marié, eski sa inn ameliore zot situation ou-soit sa inn faire li vinn pli pire?—2 Timothée 3:1-5.

3. Ki problem principal ki affecté bann mariage?

³ Ki problem principal ki affecté bann mariage? Dan enn certain sens, c’est problem ki existé depuis ki enn ange rebelle ti trompe Ève. Sa ange-la, li-mem “sa serpent originel-la, ki appel Diable ek Satan.” (Révélation 12:9; 1 Timothée 2:13, 14) Satan finn faire bann l’enseignement Bondié perdi so valeur tigit par tigit. Par exemple, li’nn faire croire ki la vie mariage li dur ek ki kan enn dimoune marié, li perdi tou so liberté. A travers radio, television, la gazette ek Internet ki ena dan le monde ki li pé dirigé, li fane bann fausse l’information ki faire bann l’instruction Bondié, passe pou trop severe ek demodé. (2 Corinthiens 4:3, 4) Mais, si nou examine avek enn l’esprit ouvert seki Bondié dire lor role enn femme dan mariage, nou pou trouvé ki quantité Parole Bondié li sage ek li pratik.

Enn l’avertissement pou bann ki marié

4, 5. (a) Kifer enn femme bizin faire attention kan li decide pou marié? (b) Ki enn femme bizin faire avant li accepté pou marié?

⁴ La Bible donne enn l’avertissement. Li dire ki dan le monde ki dirigé par Satan, mem bann ki finn reussi dan zot mariage pou gagne bann “problem.” Alors, mem si mariage li enn disposition ki Bondié finn prend, la Bible donne enn l’avertissement bann ki decide pou marié. Enn ecrivain la Bible ki ti inspiré par Bondié, ti dire concernant enn femme ki’nn perdi so mari ek ki alors libre pou remarié: “Li pli heureux . . . si li reste couma li été.” Jésus aussi ti encourage bann dimoune pou reste celibataire, si zot “kapav accepté sa.” Mais, si enn kikenn decide pou marié, li bizin marié “dan le Seigneur,” setadir avek enn serviteur Jéhovah ki’nn voué so la-vie ek ki’nn baptisé.—1 Corinthiens 7:28, 36-40; Matthieu 19:10-12.

⁵ Kifer surtout enn femme bizin faire attention avek kisannla li marié? Parski la Bible dire: “Enn femme marié, li lié ar so mari par la loi.” Zis si so mari mort ou-soit commette l’immoralité sexuel ek zot divorcé a cause sa, ki li pou kapav ‘liberé ar so la-loi.’ (Romains 7:2, 3) Kan enn dimoune attiré par enn lot dimoune dé-suite couma li trouve li, kitfois sa kapav assez pou commence enn joli zistoire d’amour, mais sa pa enn base assez solid pou enn mariage heureux. Alors, enn femme celibataire bizin demann li-mem: ‘Eski mo disposé pou prend enn l’engagement ki pou faire moi vinn enba la-loi sa zom-la?’ C’est avant mariage ki bizin examine sa question-la, pa apré.

6. Ki decision la plupart femme kapav prend zordi, ek kifer c’est enn decision bien important?

⁶ Dan beaucoup pays zordi, enn femme kapav accepté ou-soit refuse enn demande en mariage. Pourtant, kitsoz ki pli difficile ki enn femme pou bizin faire dan so la-vie, c’est faire enn bon choix dan sa domaine-la. Kifer? Parski li possible ki so desir pou gagne l’intimité ek l’amour ki ena dan mariage, li bien fort. Enn ecrivain ti faire sa remark-la: “Plus nou envie faire enn kitsoz—ki nou envie marié ou-soit grimpe enn montagne—plus nou ena tendance pou base-nou lor seki nou pensé bon ek nou prend compte zis bann renseignement ki nou envie tendé.” Si enn dimoune ki al grimpe enn montagne prend enn decision ki pa raisonnable, li kapav perdi so la-vie; li pareil aussi si enn dimoune pa bien choisir avek ki li pou marié, sa kapav faire li gagne bann malheur.

7. Ki conseil sage certain inn gagné avant zot choisir enn conjoint?

⁷ Enn femme bizin examine bien seki sa kapav impliké pou vinn enba la-loi enn missié ki demann li en mariage. Ena plusieurs l’année, enn tifi Indien ti reconette avek humilité: “Nou parent pli vié ek zot ena plus sagesse ki nou, ek zot pa faire erreur facilement couma nou. . . . Li ti pou tellement facile ki mo faire enn erreur.” Oui, bann parent ek bann lezot dimoune kapav aide nou beaucoup dan sa domaine-la. Enn kikenn ki ti donne bann bon conseil, pendant longtemps ti encourage bann jeune pou aprann konn bien bann parent zot futur conjoint ek aussi pou observé couma li agir avek so bann parent ek avek lezot membre so famille.

Couma Jésus ti montré so soumission

8, 9. (a) Couma Jésus ti considere so soumission envers Bondié? (b) Ki bienfait sa kapav ena kan nou soumette?

⁸ Mem si li pa toujours facile pou soumette ar enn kikenn, bann femme kapav considere soumission couma enn bon kitsoz, pareil couma Jésus. Mem si a cause so soumission envers Bondié, li ti souffert ek mort lor enn poteau souffrance, Jésus ti trouve la joie kan li ti soumette-li ar Bondié. (Luc 22:41-44; Hébreux 5:7, 8; 12: 3) Bann femme kapav prend Jésus couma enn l’exemple, parski la Bible dire: “Chef enn femme c’est enn zom; ek chef Christ c’est Bondié.” (1 Corinthiens 11:3) Sa vedir ki c’est pa zis kan bann femme zot marié ki zot vinn enba l’autorité bann zom.

⁹ La Bible expliké ki bann femme, ki zot marié ou-soit celibataire, zot bizin soumette ar l’autorité bann zom qualifié lor plan spirituel ki dirige la congregation. (1 Timothée 2:12, 13; Hébreux 13:17) Kan bann femme obeir Bondié dan sa domaine-la, zot laisse enn l’exemple pou bann ange ki bizin reste dan zot place zot aussi dan l’organisation Bondié. (1 Corinthiens 11:8-10) En plus, par zot bon l’exemple ek par bann bon conseil, bann femme marié ki pli agé, kapav enseigne bann jeune femme pou “soumette ar zot prop mari.”—Tite 2:3-5.

10. Couma Jésus ti donne enn l’exemple kan li ti montré so soumission?

¹⁰ Jésus ti koné ki li important pou soumette kan bizin. Enn fois, li ti demann l’apotre Pierre pou donne bann dimoune ki ti pé ramasse taxe, l’argent pou zot toulé-deux. Li ti mem faire Pierre gagne l’argent pou faire sa. Plitar, Pierre ti ecrire: “A cause nou Seigneur, soumette-zot ar tou dimoune.” (1 Pierre 2:13; Matthieu 17:24-27) Concernant soumission extraordinaire ki Jésus ti manifesté, nou lire: “Li ti laisse tou, li ti prend forme enn esclave ek li ti vinn pareil couma bann zom. En plus, kan li ti trouve-li couma enn zom, li ti abaisse li-mem, ek li ti obeir ziska la mort.”—Philippiens 2:5-8.

11. Kifer Pierre ti encourage bann femme pou soumette ar zot mari mem si bannla pa dan la verité?

¹¹ Kan Pierre ti encourage bann chrétien pou soumette mem ar bann l’autorité ki severe ek injuste dan sa lé-monde-la, li ti expliké: “Avredir, pou sa-mem ki finn appel zot, parski Christ aussi finn souffert pou zot, ek li finn laisse enn model pou zot, pou ki zot suive bien so trace.” (1 Pierre 2:21) Apré ki li ti decrire ki quantité Jésus ti souffert ek couma li ti enduré ek li ti contigne soumette, Pierre ti donne sa l’encouragement-la bann femme ki zot mari pa dan la verité: “Zot bann femme, soumette ar zot prop mari, pou ki si ena ki pa oulé ecoute la parole, kapav gagne zot sans parole grace a conduite zot femme, parski zot finn trouvé ar zot prop lizié couma zot femme ena enn conduite pur ek enn grand respé.”—1 Pierre 3:1, 2.

12. Ki bienfait lezot finn gagné grace a soumission Jésus?

¹² Certain kapav pensé ki, si nou soumette ar bann dimoune ki bouffonne nou ek ki koz brite ar nou, c’est enn signe ki nou faible. Pourtant, Jésus li, li pa ti pense coumsa. Pierre ti ecrire: “Kan dimoune ti insulté li, li pa ti insulté zot pareil. Kan li ti souffert, li pa ti reponn par bann menace.” (1 Pierre 2:23) Certain dimoune ki ti trouve Jésus souffert ti vinn bann croyant, au moins ziska enn certain point. Parmi ti ena enn bandit ki ti lor poteau a coté Jésus, ek officier l’armée ki ti là kan li ti mort. (Matthieu 27:38-44, 54; Marc 15:39; Luc 23:39-43) Pierre ti dire ki certain mari ki pa dan la verité—mem bann ki insulté zot femme—pou vinn bann chrétien apré ki zot pou observe soumission ki zot femme manifesté envers zot. Dan nou lepok, nou finn trouve sa arrivé.

Couma bann femme kapav gagne faveur zot mari

13, 14. Ki bienfait bann femme inn gagné kan zot inn soumette ar zot mari ki pa ti dan la verité?

¹³ Bann femme ki’nn vinn bann serviteur Jéhovah, finn gagne zot mari kan zot finn imite Jésus Christ. Dan enn l’assemblée district bann Témoins de Jéhovah ki’nn fek passé, enn mari ti dire lor so femme, enn chrétienne: “Mo ena l’impression ki mo ti bien bet kan mo ti traite li couma mo’nn faire. Pourtant, li ti toujours respecté moi. Jamais li ti mank respé envers moi. Jamais li ti essaye force moi pou accepté so bann croyance. Li ti prend moi soin avek amour. Kan li ti al enn l’assemblée, li ti travail dur pou prepare mo bann repas bien a l’avance ek li ti fini faire tou so l’ouvrage. So l’attitude ti commence faire moi interessé ar la Bible. Ek zordi, moi aussi mo enn Témoin de Jéhovah!” Oui, en realité, sa soeur-la ti ‘gagne so mari sans parole’ par so conduite.

¹⁴ Couma Pierre ti dire, seki produire bann bon resultat, c’est pa seki enn femme dire, mais c’est seki li faire. Nou trouve sa dan cas enn femme ki ti etudié la Bible ek ki ti bien decidé pou assisté bann reunion. So mari ti dire li: “Agnès, si to sorti par sa la-porte-la, pa ré-rente dan lakaz encore!” Agnès pa ti sorti par “sa la-porte-la,” mais par enn lot la-porte. Kan Agnès ti al prochain reunion, so mari ti menace li: “Mo pa pou là kan tou pou retourné.” Ek vrai-mem li pa ti là—li ti’nn quitte lakaz pou trois jour. Kan li ti retourné, Agnès ti demann li avek bonté: “Eski to envie mange kitsoz?” Agnès ti reste toujours attaché ar Jéhovah. Finalement, so mari ti accepté enn l’etude la Bible, li ti prend bapteme ek plitar li ti vinn enn ancien ek li ti ena beaucoup responsabilité.

15. Ki la Bible encourage bann femme chrétienne pou manifesté pou zot “vinn pli joli”?

¹⁵ L’apotre Pierre ti encourage enn kitsoz ki bann femme ki nou finn mentionné la-haut finn manifesté. Zot pa finn rod “faire-zot vinn pli joli” par “bann cheveux tressé” ou “par bann joli linge.” Au contraire, Pierre ti dire: “Faire zot vinn pli joli [par] seki zot été endan, dan zot leker, kan zot manifesté enn caractere trankil ek douce, ki jamais pa pou disparette, ek ki ena enn grand valeur dan lizié Bondié.” Enn chrétienne manifesté sa caractere-la par ton so la-voix ek so fason agir ki agreable. Li pa kozé ni li agir dan enn fason kot touletan li kont so mari, ou-soit dan enn fason trop exigeant. C’est coumsa ki enn femme chrétienne montré enn profond respé pou so mari.—1 Pierre 3:3, 4.

Bann l’exemple ki nou kapav imité

16. Dan ki fason eski Sara li enn bon l’exemple pou bann femme chrétienne?

¹⁶ Pierre ti ecrire: “Longtemps bann femme ki ti saint ek ki ti mette zot l’espoir en Bondié, ti habitué arrange zot pou vinn pli joli, zot ti soumette ar zot prop mari.” (1 Pierre 3:5) Sa bann femme-la ti koné ki kan zot faire Jéhovah plaisir ek zot obeir so conseil, finalement c’est zot famille-mem ki pou heureux, ek recompense ki zot pou gagné c’est la vie eternel. Pierre ti mentionne Sara, enn joli femme ki ti marié ar Abraham, ek li ti dire ki Sara “ti habitué obeir Abraham, ek ti appel li ‘seigneur.’ ” Sara ti soutenir so mari ki ti ena la crainte pou Bondié ek ki ti’nn accepté pou al dan enn pays bien loin. Sara ti abandonne enn la-vie confortable ek li ti mem riské so la-vie. (Genèse 12:1, 10-13) Pierre ti prend Sara couma enn bon l’exemple a cause so courage, kan li ti dire: “Zot inn vinn so bann zenfant, pourvu ki zot contigne faire seki bien ek pa peur okenn kitsoz ki kapav faire zot peur.”—1 Pierre 3:6.

17. Kifer kitfois Pierre ti pensé ki Abigaïl ti pou enn bon l’exemple pou bann soeur ki marié?

¹⁷ Abigaïl aussi ti enn femme ki ti ena courage ek ki ti mette so confiance dan Bondié. Li possible ki Pierre ti pé pense li aussi kan li ti koz lor bann femme ki saint. Abigaïl ti “ena bon sens,” mais so mari Nabal “ti dur, ek li ti mauvais dan so fason agir.” Kan Nabal ti refuse pou aide David ek so bann zom, bannla ti prepare-zot pou detruire Nabal ek tou seki ti reste dan so lakaz. Mais Abigaïl ti faire kitsoz pou sauve bann dimoune ki ti reste dan so lakaz. Li ti rempli bann sac ar mangé ek ti mette sa lor ledo bann bourrik. Li ti al joinde David ek so bann zom armé alors ki bannla ti en route pou vinn detruire zot. Kan li ti trouve David, li ti desann lor so bourrik ek li ti tombe dan lipié David. Li ti suppliye li pou pa faire enn kitsoz sans reflechi. Sa ti bien touche David ek li ti dire li: “Mo beni Jéhovah, Bondié Israël ki finn envoye toi pou vinn joinde moi zordi! Ek mo beni to bon sens.”—1 Samuel 25:2-33.

18. Si enn femme tenté par bann l’avance enn lot zom ki pa so mari, lor ki l’exemple li kapav reflechi, ek kifer?

¹⁸ Ena enn lot bon l’exemple ki bann femme marié kapav imité. C’est l’exemple enn jeune Shoulammite ki ti reste fidel envers enn simple berger ar ki li ti pou marié. So l’amour pou so berger ti reste fort malgré bann l’avance ki enn lé-roi bien riche ti contigne faire li. Sa Shoulammite-la ti dire ki sentiment li ti ena pou so berger: “Mette moi couma enn scellé lor to leker, couma enn scellé lor to lé-bras; parski l’amour li fort couma la mort . . . Beaucoup de l’eau pa pou kapav teigne l’amour, ni bann grand la-riviere pa pou kapav sarié li allé.” (Chant de Salomon 8:6, 7) Nou souhaité ki tou bann jeune fille ki accepté enn demande en mariage, zot aussi zot pou reste fidel ek zot pou ena enn profond respé pou zot mari.

Bann lezot conseil ki Bondié donné

19, 20. (a) Pou ki raison bann femme bizin soumette ar zot mari? (b) Kisannla ki finn donne enn bon l’exemple pou bann femme?

¹⁹ Finalement, anou guette contexte nou verset clé: “Femme soumette ar zot mari.” (Éphésiens 5:22) Kifer li important ki zot soumette? Verset apré reponn: “Parski enn mari li chef so femme pareil couma Christ aussi li chef la congregation.” Alors, la Bible donne sa l’encouragement-la bann femme: “Pareil couma la congregation soumette ar Christ, fodé ki bann femme aussi, soumette ar zot mari dan tou kitsoz.”—Éphésiens 5:23, 24, 33.

²⁰ Pou obeir sa l’ordre-la, bann femme bizin etudié ek imite l’exemple bann chrétien oint ki forme partie dan congregation Christ. S’il vous plait, lire 2 Corinthiens 11:23-28 ek guette seki enn membre sa congregation-la, l’apotre Paul, ti bizin enduré pou li reste fidel ar so Chef, Jésus Christ. Pareil couma Paul, bann femme ek aussi tou lezot membre la congregation bizin soumette ek reste fidel ar Jésus. Bann femme montré sa kan zot soumette ar zot mari.

21. Ki kapav encourage bann femme pou reste soumette ar zot mari?

²¹ Kitfois beaucoup femme zordi pa content pou soumette ar enn kikenn, mais enn femme ki ena sagesse pou guette bann l’avantage ki ena kan faire sa. Anou prend l’exemple enn femme ki so mari pa Témoin de Jéhovah. Si li soumette ar l’autorité so mari dan tou kitsoz, sans ki li desobeir la loi ou-soit bann principe Bondié, li kapav gagne enn grand recompense: li kapav ‘sauve so mari.’ (1 Corinthiens 7:13, 16) En plus, li kapav gagne enn grand satisfaction pou koné ki Jéhovah accepté so conduite ek pou faire li gagne bann grand benediction parski li pé imite so Garson ki Li bien content.

Eski ou rappel?

• Kifer sa kapav difficile pou enn femme respecté so mari?

• Kifer accepté enn demande en mariage, c’est enn kitsoz serieux?

• Ki l’exemple Jésus inn donné pou bann femme, ek ki bienfait zot kapav gagné si zot suive so l’exemple?

[Zimage, page 16]

Kan enn jeune fille decidé si li pou accepté enn demann ou non, kifer eski c’est enn decision bien serieux?