Sapit Vin-te-enn
Proze Zeova Realize dan Laglwar
1, 2. (a) Ki proze Bondye ena pu so bann kreatir intelizan? (b) Ki bann ankor ti fer parti dan fami ki ador Bondye dan linite?
ALA proze ki Bondye finn fer dan so lamur: Tu so bann kreatir ki ena lintelizans ador Li dan linite, ek zot tu zwir liberte extraordiner kuma so bann zanfan. Ek sa mem bann ki kontan lazistis pe kontiyn rode.
2 Zeova ti kumans realiz sa gran proze la kan Li ti kumans kre. So premye kreasyon ti enn Garson, ki depi so rezireksyon pe “reflekte laglwar [Bondye] ek ena resanblans egzak so natir.” (Ebre 1:1-3) Li ti sel Garson ki ti’nn kre direk par Bondye. Dayer, atraver sa Garson la ki Bondye ti pu kre bann lezot kreatir: premyerman bann anz dan lesyel, ek apre bann dimunn lor later. (Zob 38:7; Lik 3:38) Zot tu form enn fami iniversel ek zot rekonet Zeova kuma zot Bondye, Suverin Liniver, ek zot Papa ki kontan zot.
3. (a) Ki nu tu finn erite avek nu bann premye paran? (b) Ki dispozisyon Zeova finn pran avek lamur pu bann desandan Adan?
3 Kan nu bann premye paran ti kondane amor akoz zot ti fer pese volonterman, Bondye ti pus zot andeor Edenn ek Li ti nepli rekonet zot kuma so bann zanfan. Zot ti aret fer parti dan so fami iniversel. (Zenez 3:22-24; Deteronom 32:4, 5) Nu tu, nu zot bann desandan, alor nu finn ne avek bann tandans pu fer pese. Me Zeova ti kone ki parmi bann desandan Adan ek Ev, ena ti pu kontan lazistis. Alor, avek lamur Li finn pran enn dispozisyon kot sa bann desandan la kapav gayn “liberte extraordiner kuma bann zanfan Bondye.”—Romin 8:20, 21.
Izrael Perdi So Pozisyon Faver
4. Ki privilez Zeova ti donn ansyin lepep Izrael?
4 Preske 2,500 lane apre kreasyon Adan, Zeova ti donn sertin imin privilez pu ena enn relasyon spesyal avek Li. Li ti swazir ansyin Izrael kuma so pep ek Li ti donn zot so Lalwa. (Zenez 12:1, 2) Li ti fer zot vinn enn nasyon ek Li ti servi zot an armoni avek so proze. (Deteronom 14:1, 2; Izai 43:1) Me, zot ti tuzur esklav pese ek lamor, alor zot pa ti zwir liberte extraordiner ki Adan ek Ev ti ena avan.
5. Kuma eski bann Izraelit finn perdi zot pozisyon spesyal ki zot ti ena avek Bondye?
5 Kan mem sa, bann Izraelit ti ena enn pozisyon faver devan Bondye. Zot ti ena usi responsabilite pu respekte Zeova kuma zot Papa ek travay an armoni avek so proze. Zezi ti montre byin linportans pu asim sa responsabilite la. (Matye 5:43-48) Me, nasyon Izrael pa finn reysi fer sa. Alor ki sa bann Zwif la ti pe pretann ki zot “ena enn sel Papa, Zeova,” Zezi li, li ti dir ki zot bann aksyon ek zot latitid pa ti montre sa. (Zan 8:41, 44, 47) Dan lane 33 N.L., Bondye ti met enn fin ar Lalwa ek relasyon spesyal ki Izrael ti ena avek Li ti aret par la mem. Me, eski sa ti vedir ki zame bann dimunn pa ti pu kapav ena enn relasyon favorab avek Bondye?
Rasanble “Bann Kitsoz dan Lesyel”
6. Ki lobzektif sa “administrasyon” ki Pol ti mansyone dan Efezyin 1:9, 10 la?
6 Lapot Pol ti montre ki sertin parmi bann dimunn ti pu kapav zwir enn relasyon spesyal avek Bondye. Par egzanp, li ti koz lor laranzman ki Zeova ti’nn fer pu permet bann ki montre lafwa, vinn bann manb So fami. Li ti ekrir: “[Bondye] finn fer nu konn sin sekre konsernan so volonte. Par so prop plezir ki Li finn propoz Limem pu enn administrasyon ziska bann letan fixe, setadir pu rasanble tu bann kitsoz ankor enn fwa dan Kris, bann kitsoz dan lesyel ek bann kitsoz lor later.” (Efezyin 1:9, 10) Sa “administrasyon” la li santre lor Zezi Kris. Atraver li ki bann dimunn kapav gayn enn kondisyon apruve devan Bondye. Enn ti grup parmi sa bann dimunn la ena posibilite pu al dan lesyel. Ek enn pli gran kantite dimunn pu viv lor later pu tuletan.
7. Kisannla sa “bann kitsoz dan lesyel” la?
7 Premyerman, apartir Lapantkot lane 33 N.L., latansyon ti lor “bann kitsoz dan lesyel,” setadir bann ki zeritye ansam avek Kris dan Rwayom ki dan lesyel. Bondye deklar zot drwat parski zot ena lafwa dan valer sakrifis Zezi. (Romin 5:1, 2) Avek letan finn azut bann Zwif ek bann Zanti, ek sa “bann kitsoz dan lesyel” la ti pu antu 144,000. (Galat 3:26-29; Revelasyon 14:1) Res zis enn tigit mem sa bann manb la lor later.
Rasanble “Bann Kitsoz lor Later”
8. Kisannla “bann kitsoz lor later,” ek ki relasyon zot ena avek Zeova?
8 Sa mem administrasyon la pe rasanble usi “bann kitsoz lor later.” Zordi, plizir milyon dimunn pe rasanble avek posibilite pu viv pu tuletan lor later. Ansam dan linite avek bann zeritye Rwayom ki reste lor later, zot donn laglwar non Zeova ek so ladorasyon. (Izai 2:2, 3; Sefanya 3:9) Zot usi zot apel Zeova “Papa” parski zot rekonet ki Limem ki donn lavi. Ek zot zwir enn pozisyon apruve devan Li grasa zot lafwa dan disan ki Zezi finn verse. (Revelasyon 7:9, 14) Me pwiski zot ankor tuzur inparfe, se dan lavenir ki Bondye pu rekonet zot kuma so bann zanfan.
9. Ki promes Romin 8:21 rezerve pu limanite?
9 Sa bann ki ena lesperans pu viv lor later la pe atann asterla avek inpasyans ler kan tu bann dimunn pu “libere ar esklavaz pese.” (Romin 8:21) Sa liberasyon la pu kumanse apre ki Kris ek so larme dan lesyel pu deklans Armagedonn, ek pu terminn gran detres. Sa pu vedir destriksyon move sistem Satan an antye ek apre sa limanite pu konn bann benediksyon pandan Reyn Milan Kris.—Revelasyon 19:17-21; 20:6.
10. Ki kantik luanz bann serviter Zeova pu sante?
10 Li pu vremem enn gran lazwa kan bann serviter Zeova lor later pu partaz ansam dan linite mem santiman bann serviter Bondye dan lesyel, ki pe proklame: “Bondye Zeova, Tu-Pwisan, to bann travay gran ek extraordiner. Lerwa leternite, to bann semin drwat ek vre. Kisannla ki pa pu ena vremem lakrint pu twa, Zeova, ek kisannla ki pa pu donn to non laglwar, parski to tusel fidel? Parski tu bann nasyon pu vini, ek zot pu ador devan twa, parski to bann lord ki drwat finn manifeste.” (Revelasyon 15:3, 4) Wi, tu bann serviter Zeova pu ador sel vre Bondye dan linite. Mem bann mor pu resisite ek zot pu gayn lokazyon pu zwenn zot lavwa ansam pu donn Zeova bann luanz.—Akt 24:15.
Enn Liberte Extraordiner Pe Atann Nu Devan
11. Ki liberte extraordiner bann ki pu sape dan gran detres pu zwir?
11 Apre ki gran detres ek Armagedonn pu fini tir tu mesanste lor later, Satan pu nepli “bondye sa sistem ki egziste la.” Bann adorater Zeova pu nepli bizin lit kont move linflyans Satan. (2 Korintyin 4:4; Revelasyon 20:1, 2) Fos relizyon pu nepli mal reprezant Zeova ek li pu nepli diviz lasosyete imin. Bann serviter vre Bondye pu nepli viktim linzistis ek bann lotorite imin pu nepli explwat zot. Wi, sa pu vremem enn liberte extraordiner!
12. Kuma eski tu dimunn pu libere ar pese ek so bann lefe?
12 Antan ki “Lanyo Bondye ki tir pese lemond,” Zezi pu aplik valer so sakrifis pu kennsel bann pese limanite. (Zan 1:29) Kan Zezi ti lor later ek li ti pardonn pese enn dimunn, li ti montre so pardon kan li ti geri dimunn la. (Matye 9:1-7; 15:30, 31) Pareyman, Zezi Kris, Lerwa Rwayom Bondye dan lesyel, pu fer bann mirak: Li pu geri bann aveg, bann ki pa konn koze, bann surd, bann andikape, bann ki ena bann maladi mantal ek tu bann lezot maladi. (Revelasyon 21:3, 4) “Lalwa pese” pu nepli ena okenn linflyans lor tu bann ki obeir Bondye. Zot bann panse ek aksyon pu fer zotmem ek Bondye plezir. (Romin 7:21-23) Alafin Reyn Milan, zot pu fini vinn parfe, dan ‘resanblans ek zimaz’ sel vre Bondye.—Zenez 1:26.
13. Alafin Reyn Milan, ki Zezi pu fer, ek avek ki rezilta?
13 Kan Kris pu fini fer limanite vinn parfe, li pu rann so Papa lotorite ki li ti gayne pu fer sa travay la. Labib dir: “Li pu remet rwayom ar so Bondye, so Papa, kan li pu fini eliminn konpletman tu guvernman ek puvwar ek lotorite. Parski li bizin reyne kuma lerwa ziska ki Bondye met tu so bann lennmi anba so lipye.” (1 Korintyin 15:24, 25) Reyn Milan Rwayom Bondye pu realiz konpletman so lobzektif; alor pu nepli neseser ki ena sa guvernman segonder la ant Bondye ek limanite. Ek pwiski pese ek lamor pu fini anleve net ek Zezi pu fini sov limanite, so rol kuma sa Kikenn ki sov nu la pu fini la mem. Labib explike: “Kan tu kitsoz pu sumet ar li, alor lerla Garson la limem li pu sumet ar sa Kikenn ki finn sumet tu kitsoz ar li la, pu ki Bondye vinn tu kitsoz pu tu.”—1 Korintyin 15:28.
14. Par ki kitsoz tu bann dimunn ki pu fini vinn parfe, pu bizin pase, ek kifer?
14 Apre sa, limanite parfe pu gayn lokazyon montre ki zot finn swazir pu servi sel vre Bondye pu tuletan. Alor, avan ki Zeova adopte zot net kuma so bann zanfan, Li pu fer zot pas dan enn tes final. Satan ek so bann demon pu libere dan sa tru sinbolik kot zot ti ete la. Zot pa pu fer bann serviter Zeova ditor dan enn fason permanan. Me, ninport kisannla ki dezobeir Zeova, pu detrir pu tuletan, ansam avek Satan, rebel orizinel ek so bann demon.—Revelasyon 20:7-10.
15. Ki sityasyon pu egziste ankor enn fwa parmi bann kreatir Zeova ki dan lesyel ek lor later?
15 Lerla, Zeova pu adopte tu bann dimunn parfe ki pu’nn sutenir so suverennte dan sa tes final la, kuma so bann zanfan. Apartir sa moman la, zot pu zwir dan enn fason konple, liberte extraordiner kuma bann zanfan Bondye ek zot pu fer parti dan fami iniversel Bondye. Tu bann kreatir dan lesyel ek lor later pu ador sel vre Bondye ankor enn fwa dan linite. Proze Zeova pu’nn realize avek sikse! Eski u anvi fer parti dan sa fami iniversel ki ere ek ki pu viv pu tuletan la? Si wi, nu ankuraz u pu swiv seki Labib dir dan 1 Zan 2:17: “Lemond pe al fini ek so dezir usi, me seki fer volonte Bondye pu res pu tuzur.”
Kestyon Revizyon
• Avan dezobeisans dan Edenn, ki relasyon tu bann adorater Zeova ti ena avek Li?
• Ki responsabilite ena lor zepol bann serviter Bondye?
• Kisannla ankor pu vinn bann zanfan Bondye, ek kuma sa ena enn rapor avek proze Zeova konsernan so ladorasyon dan linite?
[Zimaz paz 190]
Bann dimunn obeisan pu zwir lavi dan enn paradi lor later antye