Jéhovah tann nou kan nou suppliye Li pou gagne l’aide
“Lizié Jéhovah lor bann dimoune ki juste, ek so zoreille tann zot suppliye Li pou gagne l’aide.”—PS. 34:15.
1, 2. (a) Ki sentiment beaucoup dimoune ena zordi? (b) Kifer nou pa etonné par sa situation-la?
ESKI ou pé passe par bann moment difficile? Si oui, ou pa tousel dan sa cas-la. Plusieurs million dimoune pé lutté pou faire face ar bann pression ki ena dan la vie toulé-jour dan sa mauvais lé-monde-la. Pou certain, inn arrive enn point kot coumadir zot nepli kapav supporté. Zot ena preské mem sentiment ki David, ki ti ecrire dan enn psaume: “Mo lekor inn engourdi ek mo’nn senti-moi crasé ziska dernier degré; mo’nn hurlé a cause mo leker ti pé soupiré. Mo’nn gagne palpitation, mo la-force inn quitte moi, mem la lumiere mo lizié nepli avek moi.”—Ps. 38:8, 10.
2 En tant ki chretien, nou pa etonné ki ena enn quantité probleme dan la vie. Nou comprend ki “bann douleur” forme partie dan signe ki Jésus ti annoncé concernant so presence. (Marc 13:8; Mat. 24:3) Dan langue original, mot ki’nn traduire par “bann douleur” faire reference ar bann douleur bien fort ki enn femme gagné kan li gagne enn tibaba. Sa montré bien ki quantité bann dimoune pé souffert dan nou lepok “critik” ki tellement “difficile pou supporté”!—2 Tim. 3:1.
Jéhovah comprend nou bann souffrance
3. Ki bann serviteur Bondié bien koné?
3 Bann serviteur Jéhovah konn bien ki zot aussi zot affecté par sa bann difficulté-la ek zot koné ki sa bann condition difficile-la pou vinn pli pire. En plus bann probleme ki bann dimoune gagné en general, nou, bann serviteur Bondié, nou bizin faire face ar enn “adversaire, le Diable,” ki bien decidé pou ruine nou la-foi. (1 Pierre 5:8) Alors, li pa difficile pou comprend seki David ti ressenti kan li ti dire: “Deshonneur inn casse mo leker, ek pa kapav gueri sa blessure-la. Mo ti contigne attann ki kikenn pou prend part dan mo la-peine, mais pa ti ena personne, ek ki pou ena bann consolateur, mais mo pa ti trouve personne”!—Ps. 69:20.
4. Ki kitsoz encourage nou kan nou pé passe par bann probleme?
4 Eski vrai-mem David ti pé rod dire ki li pa ti ena okenn l’espoir? Non. Remarké seki li dire pli loin dan sa psaume-la: “Jéhovah ecoute bann ki misere, ek vrai-mem Li pa pou meprise so bann prisonnier,” ou-soit “bann ki pou Li ek ki prisonnier.” (Ps. 69:33; note) Dan enn fason symbolik, li arrivé ki parfois coumadir nou senti-nou prisonnier ar nou bann probleme. Li possible ki nou ena sentiment ki lezot pa vrai-mem comprend nou situation—ek kitfois vrai-mem zot pa comprend! Mais pareil couma David, sa kapav encourage nou beaucoup kan nou koné ki Jéhovah Li, Li comprend bien nou bann souffrance.—Ps. 34:15.
5. Ki le roi Salomon ti sur?
5 Salomon, garson David ti montré sa pendant l’inauguration temple Jérusalem. (Lire 2 Chroniques 6:29-31.) Li ti suppliye Jéhovah pou ecoute la priere n’importe ki dimoune sincere ki ti pou prié Li concernant “so prop la-peine ek so prop douleur.” Ki Bondié ti pou faire kan Li ti pou tann la priere sa bann dimoune ki ena probleme-la? Salomon ti dire ki li sur ki Bondié pa ti pou zis tann zot la-priere, mais Li ti pou aussi faire kitsoz pou aide zot. Kifer? Parski Li konn bien seki ena dan “leker bann dimoune.”
6. Couma nou kapav faire face avek nou bann tracas, ek kifer?
6 Nou aussi nou kapav prié Jéhovah concernant ‘nou prop la-peine ek nou prop douleur,’ setadir nou bann probleme personnel. Sa bizin encourage nou kan nou koné ki Li comprend nou bann probleme ek ki Li interessé ar nou situation. L’apotre Pierre ti confirme sa kan li ti dire: “Jette tou zot tracas lor Li, parski Li interessé ar zot.” (1 Pierre 5:7) Jéhovah prend compte seki arrive nou. Jésus ti montré ki Jéhovah interessé ar nou ek ena l’amour pou nou kan li ti dire: “Eski pa vann deux moineau pou enn piece l’argent ki ena enn tigit valeur? Pourtant, pa mem enn sel pou tombe enba sans ki zot Papa koné. Mais, Li finn mem compte tou bann cheveux lor zot la-tête. Alors, pa peur: zot vaut plus ki beaucoup moineau.”—Mat. 10:29-31.
Compte lor l’aide Jéhovah
7. Ki l’aide nou kapav sur nou pou gagné?
7 Nou kapav sur ki Jéhovah envie ek Li kapav aide nou kan nou affecté par enn situation difficile. “Bondié Li enn refuge ek enn la-force pou nou, enn l’aide ki facile pou trouvé dan bann moment difficile.” (Ps. 34:15-18; 46:1) Couma Bondié donne nou sa l’aide-la? Guette seki 1 Corinthiens 10:13 dire: “Bondié Li fidele, ek Li pa pou laisse zot gagne enn tentation ki zot pa kapav supporté, mais avek sa tentation-la, Li pou aussi donne zot enn moyen pou sorti ladan, pou ki zot kapav endure sa.” Jéhovah kapav dirige bann l’evenement pou tire nou bann probleme, ou-soit Li kapav donne nou la force ki nou bizin pou endure nou situation. Dan toulé-deux cas, Li pou aide nou.
8. Couma nou kapav profite l’aide ki Bondié donne nou?
8 Couma nou kapav profite sa l’aide-la? Remarké ki nou bizin faire: “Jette tou zot tracas lor Li.” Sa vedir ki dan enn certain sens, nou laisse Jéhovah prend responsabilité tou nou bann tracas. Nou arrete tracassé ek avek patience, nou compte lor Li pou donne nou seki nou bizin. (Mat. 6:25-32) Pou nou ena enn confiance coumsa, nou bizin ena l’humilité ek pa compte lor nou prop la-force ek sagesse. Kan nou abaisse nou “enba la-main puissant Bondié,” nou reconette ki nou inferieur. (Lire 1 Pierre 5:6.) En retour, sa pou aide nou pou supporte n’importe ki situation ki Bondié permette. Kitfois nou vrai-mem envie ki Jéhovah soulage nou desuite, mais nou ena confiance ki Jéhovah koné exactement kan ek dan ki fason Li pou agir dan nou faveur.—Ps. 54:7; Is. 41:10.
9. Ki qualité fardeau David ti bizin jette lor Jéhovah?
9 Rappel bann parole ki David ti dire dan Psaume 55:22: “Jette to fardeau lor Jéhovah Li-mem, ek Li-mem Li pou soutenir toi. Jamais Li pa pou laisse enn kikenn droite, tombé.” Kan David ti ecrire sa bann parole-la, li ti dan enn grand la-peine. (Ps. 55:4) Nou pensé ki li ti ecrire sa psaume-la kan so garson Absalom ti comploté pou prend so place couma le roi. Ahithophel, so conseiller ki ti pli proche ar li, ti associé avek Absalom dan sa complot-la. David ti bizin quitte Jérusalem pou sauve so la-vie. (2 Sam. 15:12-14) Mem dan sa bann situation difficile-la, David ti contigne mette so confiance dan Bondié ek li pa ti chagrin.
10. Ki nou bizin faire kan nou passe par bann l’epreuve?
10 Pareil couma David, li bien important ki nou prié Jéhovah pou n’importe ki l’epreuve nou ena. Anou guetté ki l’apotre Paul ti encourage nou pou faire dan sa situation-la. (Lire Philippiens 4:6, 7.) Ki pou arrivé kan nou faire bann la-priere sincere coumsa? “La paix ki Bondié donné ek ki pli grand ki tou pensée, pou protege [nou] leker ek [nou] l’esprit, par moyen Jésus Christ.”
11. Couma “la paix Bondié” protege nou leker ek nou l’esprit?
11 Eski la priere pou change nou situation? Li possible. Selman, nou bizin realisé ki Jéhovah pa toujours reponn nou la-priere couma nou, nou envie. Mais, la priere aide nou pou garde nou l’equilibre mental, pou ki nou bann l’epreuve pa touffe nou. “La paix Bondié” kapav aide nou pou reste calme kan nou abatte par bann sentiment ki troublé nou. Pareil couma enn groupe soldat ki’nn gagne l’ordre pou protege enn la-ville kont bann l’ennemi, “la paix Bondié” pou protege nou leker ek nou l’esprit. Li pou permette nou aussi pou faire face ar nou bann doute, ar seki faire nou peur, ar bann pensée negatif, ek li pou empeche nou reagir dan enn fason brite ek sans reflechi.—Ps. 145:18.
12. Donne enn l’exemple pou montré couma enn kikenn kapav gagne la paix l’esprit.
12 Couma nou kapav gagne la paix l’esprit kan nou passe par bann l’epreuve? Anou prend enn l’exemple ki dan enn certaine sens, ressemblé inpé nou situation. Mazinn enn travailleur ki pé travail enba l’autorité enn manager ki koz brite. Selman, travailleur-la gagne l’occasion pou dire so bann sentiment ar proprietaire compagnie-la, ki enn dimoune bon ek raisonnable. Proprietaire-la donne li l’assurance ki li comprend so situation, ek li faire li koné ki bientot sa manager-la pou perdi so place. Ki sentiment sa travailleur-la pou ena lerla? Parski li senti-li rassuré par seki so patron inn dire li ek li koné ki pou arrivé bientot, sa pou aide li pou contigné, mem si entre-temps li pou bizin supporte encore inpé difficulté. Li pareil aussi pou nou. Nou koné ki Jéhovah comprend nou situation, ek Li donne nou l’assurance ki bientot Li “pou jette chef sa lé-monde-la dehors.” (Jean 12:31) C’est vrai-mem enn pensée ki reconforte nou, pa vrai?
13. A part prié Jéhovah, ki nou bizin faire en plus?
13 Mais eski li assez ki nou zis koz nou bann probleme ar Jéhovah dan la priere? Non. Nou bizin faire plus. Nou bizin agir en accord avek nou la-priere. Kan le roi Saül ti envoye bann zom dan lakaz David pou touye li, David ti faire sa la-priere-la: “Delivré moi ar mo bann l’ennemi, ah mo Bondié; protege moi ar bann ki pé leve kont moi. Delivré moi ar tou bann ki pratik bann kitsoz ki faire di-tort, sauve moi ar bann zom ki verse di-sang.” (Ps. 59:1, 2) Kan li ti fini prié, David ti ecoute so femme ek li ti faire seki bizin pou sauvé. (1 Sam. 19:11, 12) Nou aussi pareil, nou kapav prié pou gagne la sagesse pratik ki pou aide nou pou faire face ek kitfois-mem pou ameliore nou bann situation difficile.—Jacq. 1:5.
Couma nou kapav ena la force pou enduré
14. Ki kapav aide nou pou enduré kan nou gagne bann difficulté?
14 Kitfois nou bann difficulté pa pou disparette desuite. Li possible mem ki zot contigné pou encore inpé lé-temps. Dan sa cas-la, ki pou aide nou pou enduré? Premierement, nou bizin rappel ki, kan nou contigne servi Jéhovah avek fidelité malgré bann difficulté, nou montré nou l’amour pou Li. (Actes 14:22) Rappel l’accusation ki Satan ti faire kont Job: “Eski pou nanyin ki Job adore Bondié? Eski to pa’nn monte coumadir enn muraille protection autour li, autour so lakaz ek autour tou so bann di-bien? To finn beni tou seki li faire: so bann troupeau finn multiplié dan pays! Mais mette la-main lor so bann di-bien ek lor so famille, nou pou guetté si li pa maudi toi dan to figure.” (Job 1:9-11, Bible du Semeur) Grace a so l’integrité, Job inn montré ki sa l’accusation-la ti bien fausse. Kan nou enduré dan bann situation bien difficile, nou aussi nou ena l’occasion pou montré ki Satan enn menteur. En plus, nou l’endurance fortifié nou l’esperance ek nou confiance.—Jacq. 1:4.
15. Ki l’exemple kapav encourage ou?
15 Deuxiemement, fodé pa ou blié ki “la famille international [ou] bann frere pé passe par sa bann mem souffrance-la.” (1 Pierre 5:9) Oui, “pena okenn tentation ki zot inn gagné ki lezot pa’nn gagné.” (1 Cor. 10:13) Alors, ou kapav gagne la force ek courage kan ou medite lor l’exemple lezot plutot ki ou fixé ou l’esprit zis lor ou bann difficulté. (1 Thess. 1:5-7; Héb. 12:1) Prend le temps pou reflechi lor l’exemple bann dimoune ki ou koné ek ki finn enduré fidelement malgré ki zot finn passe par bann l’epreuve ki’nn faire zot bien souffert. En plus, kifer ou pa rod dan nou bann publication, bann zistoire lor la vie bann dimoune ki finn konn mem situation ki ou? Pena doute ki sa pou donne ou beaucoup la-force.
16. Couma Bondié fortifié nou kan nou pé passe par tou sorte qualité l’epreuve?
16 Troisiemement, rappel ki Jéhovah Li enn “Papa ki ena beaucoup misericorde ek Bondié ki donne tou consolation, ki console nou dan tou nou bann probleme, pou ki nou kapav console bann ki dan tou sorte qualité probleme, grace a consolation ki nou-mem nou gagné ar Bondié.” (2 Cor. 1:3, 4) C’est coumadir Bondié inn deboute pré kot nou pou encourage nou ek pou fortifié nou, pa zis dan bann probleme ki nou pé gagné asterla, mais “dan tou nou bann probleme.” Lerla, sa aide nou pou console lezot ki “dan tou sorte qualité probleme.” Paul personnellement ti faire l’experience ki sa bann parole-la zot vrai.—2 Cor. 4:8, 9; 11:23-27.
17. Couma la Bible aide nou pou faire face ar bann l’epreuve ki ena dan la vie?
17 Quatriemement, nou ena Parole Bondié, la Bible, ki “utile pou enseigné, pou corrigé, pou mette bann kitsoz en ordre, pou discipliné dan la justice, pou ki dimoune ki servi Bondié kapav bien qualifié, bien equipé pou tou bon travail.” (2 Tim. 3:16, 17) Parole Bondié pa zis “qualifié” nou ek ‘equipe nou pou tou bon travail,’ li permette nou aussi pou faire face ar bann probleme ki ena dan la vie. Grace a Parole Bondié, nou “bien qualifié” ek “bien equipé.” Dan langue original, mot ki’nn traduire par “bien equipé” vedir litteralement “ki finn equipé.” Kitfois dan le passé, ti servi sa mot-la pou koz lor enn bateau ki’nn bien equipé ar tou seki necessaire pou faire enn voyage ou-soit lor enn machine ki ti pou kapav faire tou seki ti attann ki li faire. Zordi aussi pareil, par so Parole, Jéhovah donne nou tou seki nou bizin pou faire face ar n’importe ki situation ki kapav arrive nou. Alors, nou kapav dire: “Si Bondié permette sa l’epreuve-la, sa vedir ki mo pou reussi endure li avek so l’aide.”
Delivré ar tou nou bann difficulté
18. Ki pou aide nou pou enduré ek pou reste fidele?
18 Cinquiemement, fodé jamais nou blié sa l’espoir ki nou ena-la, ki bientot Jéhovah pou delivré bann dimoune ar tou zot difficulté. (Ps. 34:19; 37:9-11; 2 Pierre 2:9) Finalement, Bondié pa pou zis delivré nou ar bann difficulté ki nou pé gagné zordi, mais Li pou donne nou aussi possibilité pou gagne la vie eternel, soit dan le ciel avek Jésus ou-soit dan enn paradi lor la terre.
19. Couma eski li possible pou enduré ek pou reste fidele?
19 Pendant ki nou pé attann sa moment-la, nou contigne supporte bann condition difficile ki ena dan sa mauvais lé-monde-la. Nou pé attann avek impatience lepok kot tousala pou nepli existé! (Ps. 55:6-8) Rappel bien ki nou l’endurance ek nou fidelité prouvé ki Satan le Diable li enn menteur. Anou faire en sorte ki grace a nou bann la-priere ek nou bann frere ek soeur, nou contigne gagne la force pou servi Jéhovah, ek nou pa blié ki nou bann frere ek soeur aussi pé passe par bann mem difficulté ki nou. Anou contigne montré ki nou bien qualifié ek bien equipé kan nou servi Parole Bondié dan enn fason efficace. Nou ena confiance ki Jéhovah, nou “Bondié ki donne tou consolation,” prend nou bien soin. Jamais pa laisse sa confiance-la vinn faible. Rappel bien ki “lizié Jéhovah lor bann dimoune ki juste, ek so zoreille tann zot suppliye Li pou gagne l’aide.”—Ps. 34:15.
Couma ou pou reponn?
• Ki David ti ressenti kan li ti faire face ar bann difficulté?
• Ki l’assurance le roi Salomon ti dire li ena?
• Ki kapav aide nou pou supporte seki Jéhovah permette?
[Zimage lor page 19]
Salomon ti ena confiance ki Jéhovah ti pou aide So peuple ki ti dan difficulté