Protege l’esprit positif ki ena dan congregation
“Ki faveur nou Seigneur Jésus Christ ki personne pa merité, li avek l’esprit ki zot manifesté.”—PHIL. 4:23.
COUMA NOU KAPAV FAVORISE ENN L’ESPRIT POSITIF DAN CONGREGATION . . .
kan nou frequente nou bann frere ek soeur?
kan nou zelé dan nou ministere?
kan nou pa cachiette bann peché grave?
1. Kifer congregation Philippes ek Thyatire ti gagne bann felicitation?
BANN chretien premier siecle ki ti vive dan la ville Philippes, ti pauvre lor plan materiel. Mais, zot ti genereux ek zot ti montré enn grand l’amour pou zot bann compagnon chretien. (Phil. 1:3-5, 9; 4:15, 16) Alors, kan l’apotre Paul ti termine lettre ki li ti ecrire zot, li ti kapav dire: “Ki faveur nou Seigneur Jésus Christ ki personne pa merité, li avek l’esprit ki zot manifesté.” (Phil. 4:23) Parski bann chretien dan Thyatire ti manifesté mem l’etat d’esprit, Jésus Christ ti dire zot: “Mo konn to bann action, ek to l’amour ek to la foi ek to ministere ek to l’endurance, ek mo koné ki bann action ki to’nn fek faire, zot plus ki seki to’nn faire dan le passé.”—Rév. 2:19.
2. Couma ou l’attitude ena enn l’effet lor l’esprit ou congregation?
2 Zordi aussi, chaque congregation Témoins de Jéhovah manifesté enn certain l’esprit, ou-soit enn certain l’attitude. Certain congregation ena reputation pou manifesté enn grand l’amour ek enn l’affection profond. Lezot montré ki zot ena enn grand zele kan zot soutenir travail predication ek accorde enn grand l’importance pou service a plein temps. Kan personnellement nou ena enn l’attitude positif, nou favorise l’unité dan congregation ek sa aide congregation pou progressé lor plan spirituel. (1 Cor. 1:10) Parkont, si nou ena enn l’attitude negatif, sa kapav pousse bann ki dan congregation pou faire moins dan zot service, perdi zot zele dan predication ek mem tolere bann peché grave. (1 Cor. 5:1; Rév. 3:15, 16) Ki l’esprit ou congregation manifesté? Couma personnellement ou kapav favorise enn l’attitude positif dan ou congregation?
FAVORISE ENN L’ATTITUDE POSITIF
3, 4. Couma nou kapav “loué [Jéhovah] dan grand l’assemblée”?
3 Enn psalmiste ti chanté: “Mo envie loué toi dan grand l’assemblée; parmi beaucoup dimoune, mo pou loué toi.” (Ps. 35:18) Sa psalmiste-la pa ti hesité pou loué Jéhovah kan li ti avek lezot serviteur Bondié. Bann reunion ki nou ena chaque semaine, parmi ena l’etude La Tour de Garde, donne nou bann bon l’occasion pou montré nou zele ek nou la foi par nou bann commentaire. Nou tou nou kapav demann-nou-mem sa bann question-la: ‘Eski mo faire bann commentaire autant ki mo kapav pendant bann reunion? Eski mo prepare-moi bien pou faire bann bon commentaire? En tant ki chef famille, eski mo aide mo bann zenfant pou prepare zot commentaire en avance ek pou reponn dan zot prop mot?’
4 Nou kapav montré ki nou ferme dan nou leker, setadir ki nou bien decidé pou faire seki droite, par fason ki nou chanté dan bann reunion. C’est seki David ti oulé dire kan li ti ecrire: “Mo leker ferme, o Bondié, mo leker ferme. Mo pou chanté ek mo pou faire bann melodie.” (Ps. 57:7) Bann cantik donne nou enn bon l’occasion pou ‘chanté ek pou faire bann melodie’ pou Jéhovah avek enn leker ferme. Si nou pa trop konn sa bann cantik-la, kifer nou pa pratik zot pendant nou l’adoration en famille? Nou bizin determiné pou ‘chante pou Jéhovah pendant tou nou la vie ek faire bann melodie pou Li aussi longtemps ki nou vive.’—Ps. 104:33.
5, 6. (a) Couma nou kapav montré ki nou ena l’hospitalité ek ki nou genereux? (b) Ki l’effet sa ena dan congregation?
5 Kan nou montré l’hospitalité envers nou bann frere ek soeur, c’est enn lot fason ki nou encourage l’amour dan congregation. Dan lettre ki Paul ti ecrire bann chretien hébreu, dan dernier chapitre, li ti donne sa conseil-la: “Ki zot contigne ena l’amour fraternel. Pa blié montré l’hospitalité.” (Héb. 13:1, 2) Kan nou offert enn repas surveillant circonscription ek so madame ou-soit bann serviteur a plein temps dan congregation, c’est enn bon fason pou montré l’hospitalité. Parfois, nou kapav aussi invite bann veuve, bann parent ki pé elevé tousel zot zenfant, ou-soit lezot pou prend enn repas avek nou ou-soit pou assisté nou l’adoration en famille.
6 Paul ti demann Timothée pou encourage lezot “pou faire le bien, pou vinn riche dan bann bon action, pou vinn genereux, pré pou partagé, coumsa zot pou garde couma enn tresor pou zot-mem, enn bon base pou l’avenir, pou ki zot kapav bien saisi vrai la vie.” (1 Tim. 6:17-19) Paul ti pé encourage so bann frere ek soeur pou vinn genereux. Mem kan ena bann probleme economik, nou kapav montré-nou genereux. Enn bon fason pou faire sa c’est kan nou servi nou transport pou amenn certain predication ou-soit reunion. Couma bann ki profite sa bann disposition-la kapav montré zot l’appreciation? Zot kapav encourage sa l’esprit genereux-la, kan zot donne seki zot kapav pou aidé pou frais l’essence ki pé augmenté. En plus, si nou organise-nou pou passe plus le temps avek nou bann frere ek soeur, eski zot pa pou senti ki nou bizin zot ek ki nou content zot? Kan nou faire bann bon action “envers nou bann frere dan la foi,” ek nou disposé pou partage nou le temps ek seki nou ena avek zot, nou pé augmente nou l’amour pou zot ek aussi nou pé encourage enn l’esprit positif dan congregation.—Gal. 6:10.
7. Kan nou konn garde bann kitsoz confidentiel, couma sa kapav protege l’esprit positif ki ena dan congregation?
7 Anou guette lezot kitsoz ki fortifié l’amour ki nou ena pou nou bann frere ek soeur: nou l’amitié ek kan nou garde bann kitsoz confidentiel. (Lire Proverbes 18:24.) Bann vrai camarade konn garde bann kitsoz personnel, confidentiel. Kan enn frere ou-soit enn soeur dire nou so bann pensée ek so bann sentiment bien profond ek li ena confiance ki nou pa pou al dire sa lezot, l’amour ki li ena pou nou pou vinn pli solide. Anou encourage enn l’esprit famille dan congregation kan nou vinn enn camarade ki lezot kapav faire confiance ek ki konn garde bann kitsoz confidentiel!—Prov. 20:19.
RESTE ZELÉ DAN NOU MINISTERE
8. Ki conseil bann chretien dan Laodicée ti gagné, ek kifer?
8 Kan Jésus ti koz ar congregation Laodicée, li ti dire: “Mo konn to bann action, ek mo koné ki to ni frais ni chaud. Mo ti pou prefere ki to frais ou-soit chaud. Alors, parski to tiede, ek to ni chaud ni frais, mo pou vomi toi par mo la bouche.” (Rév. 3:15, 16) Bann chretien dan Laodicée ti mank zele dan zot ministere. Surement sa l’attitude-la ti ena aussi enn l’influence lor relation ki zot ti ena entre zot. Alors, avek amour Jésus ti donne zot sa conseil-la: “Tou bann pou ki mo ena l’affection, mo corrige zot ek mo discipline zot. Alors, ena zele ek repenti.”—Rév. 3:19.
9. Couma nou l’attitude envers nou ministere ena enn l’effet lor l’esprit ki ena dan congregation?
9 Pou ki nou favorise enn l’esprit positif dan congregation, nou bizin manifesté zele dan predication. Dan nou territoire ena bann dimoune ki couma bann brebis. Congregation ena l’objectif pou rod sa bann dimoune-la ek pou forme zot lor plan spirituel. Alors, nou bizin participe dan sa l’activité-la avek zele, pareil couma Jésus ti faire. (Mat. 28:19, 20; Luc 4:43) Plus nou ena enn grand zele dan nou ministere, plus nou pou uni couma “bann [dimoune] ki travail ensam avek Bondié.” (1 Cor. 3:9) A mesure ki nou observe lezot defann zot la foi ek exprime zot reconnaissance pou bann kitsoz spirituel dan predication, sa pousse nou pou plus content zot ek respecté zot. Ek aussi, kan nou servi “cote a cote” dan ministere, sa favorise l’unité dan congregation.—Lire Tsephania 3:9.
10. Kan nou faire zeffort pou ameliore nou predication, ki l’effet sa kapav ena lor lezot dan congregation?
10 Bann zeffort ki nou faire pou ameliore nou predication ena aussi enn bon l’effet lor lezot. Kan nou montré enn grand l’interet pou bann dimoune ki nou joinde, ek kan nou faire zeffort pou ameliore nou capacité pou touche leker bann ki ecoute nou, sa augmente nou l’enthousiasme pou nou ministere. (Mat. 9:36, 37) Si nou ena l’enthousiasme, sa pou pousse lezot pou ena l’enthousiasme zot aussi. Jésus ti envoye so bann disciple preché deux par deux au lieu tousel. (Luc 10:1) Sa pa ti zis encourage zot ek forme zot, mais ti aussi augmente zot zele pou zot ministere. Eski nou pa content pou preche avek bann proclamateur ki zelé? L’enthousiasme ki zot manifesté encourage nou ek pousse nou pou perseveré dan nou travail predication.—Rom. 1:12.
PA CRITIKÉ EK PA CACHIETTE ENN PECHÉ GRAVE
11. Ki qualité l’attitude certain Israélite ti ena dan lepok Moïse, ek ki sa ti amenn zot pou faire?
11 Zis deux-trois semaine apré ki bann Israélite ti’nn vinn enn nouveau nation, zot ti commence critiké ek plaigné. Sa ti amenn zot pou rebelle kont Jéhovah ek kont so bann representant. (Ex. 16:1, 2) Zis enn tigit parmi bann Israélite ki ti quitte l’Égypte, ki ti rente dan la Terre promise. Oui, mem Moïse pa ti gagne droit rente dan la Terre promise a cause fason ki li ti reagir kan bann Israélite ti manifesté enn mauvais l’attitude! (Deut. 32:48-52) Ki nou kapav faire zordi pou nou pa developpe enn mauvais l’attitude nou aussi?
12. Couma nou kapav faire attention pou pa developpe l’habitude pou plaigné?
12 Nou bizin faire attention pou nou pa developpe l’habitude pou plaigné. L’humilité ek respé pou l’autorité pou aide nou pou rejette sa l’habitude-la, mais en mem temps, nou bizin faire attention ar nou bann frequentation. Si nou choisir bann mauvais divertissement, ou-soit nou passe trop beaucoup le temps avek bann collegue travail ek bann camarade lekol ki pena okenn respé pou bann principe biblik, nou pou gagne bann mauvais consequence. Alors, nou pou montré ki nou sage si nou pa trop frequente bann dimoune ki content plaigné ou-soit ki encourage enn l’esprit l’independance.—Prov. 13:20.
13. Ki lezot probleme lor plan spirituel kapav ena dan congregation kan certain ena tendance pou plaigné?
13 Kan certain ena tendance pou plaigné dan congregation, sa kapav amenn lezot probleme lor plan spirituel. Par exemple, sa kapav detruire la paix ek l’unité ki ena dan congregation. En plus, kan touletan nou ena bann kitsoz pou dire kont nou bann frere ek soeur, sa pa pou zis faire zot la peine, mais pli grave encore, sa kapav vinn bann calomnie ek fini par bann insulte. (Lév. 19:16; 1 Cor. 5:11) Dan premier siecle, certain dan congregation ki ti pé plaigné, ti “pé meprise bann ki ti ena l’autorité ek zot ti pé koz en mal lor bann ki Bondié ti donne la gloire.” (Jude 8, 16) Pena doute ki kan zot ti agir coumsa kont bann zom responsable dan congregation, zot pa ti gagne faveur Bondié.
14, 15. (a) Ki kapav arrivé dan congregation si enn kikenn cachiette enn peché grave? (b) Ki nou bizin faire si nou koné ki enn kikenn pé faire enn peché grave?
14 Ki nou pou faire si nou koné ki enn kikenn pé faire enn peché grave ek li pé cachiette sa, kitfois li boire trop beaucoup, li guette pornographie, ou-soit li pé commette l’immoralité? (Éph. 5:11, 12) Si nou ferme nou lizié lor enn peché grave, sa kapav empeche l’esprit saint Jéhovah pou agir couma bizin ek sa kapav aussi detruire la paix dan congregation. (Gal. 5:19-23) Pareil couma bann Corinthien ti bizin tire tou seki mauvais dan zot congregation, zordi aussi fodé pa nou tolere okenn mauvais l’influence ki kapav gate lezot. Si nou faire sa, nou pou protege l’esprit positif ki ena dan congregation. Ki nou kapav faire pou garde la paix dan congregation?
15 Pareil couma nou ti mentionné au commencement, li important ki nou garde certain kitsoz confidentiel, surtout kan lezot partage zot sentiment ek zot pensée avek nou. Li bien mauvais pou fann bann renseignement confidentiel ki concerne enn dimoune ek sa kapav faire di-tort. Mais selman, kan enn kikenn inn faire enn peché grave, bann ancien dan congregation bizin konn sa. Dapré la Bible, zot ena responsabilité pou traite sa probleme-la. (Lire Lévitique 5:1.) Alors, si nou koné ki enn frere ou-soit enn soeur finn faire enn peché grave, nou bizin encourage li pou al guette bann ancien pou gagne zot l’aide. (Jacq. 5:13-15) Si li pa faire sa dan enn le temps raisonnable, c’est nou ki bizin al guette bann ancien.
16. Couma nou protege congregation kan nou faire bann ancien koné ki enn kikenn pé faire enn peché grave?
16 Congregation chretien li enn place kot nou gagne securité spirituel. Nou bizin faire nou part pou protege li kan nou faire bann ancien koné ki enn kikenn pé faire enn peché grave. Si bann ancien aide sa dimoune-la pou reflechi ki quantité so peché grave, li repenti, ek li accepté discipline, li pou nepli enn menace pou l’esprit congregation. Mais ki pou arrivé si sa dimoune ki’nn faire peché-la pa’lé repenti ek pa accepté l’aide ki bann ancien donne li avek amour? Lerla li pou exclu dan congregation. Dan sa fason-la, congregation pou debarrassé ar sa mauvais l’influence-la ek bann ancien pou protege l’esprit congregation. (Lire 1 Corinthiens 5:5.) Oui, nou tou nou ena responsabilité pou protege congregation. Si nou koné ki enn kikenn pé faire enn peché grave, nou bizin dire bann ancien ek coopere avek zot.
FAVORISE “L’UNITÉ DAN L’ESPRIT”
17, 18. Ki pou aide nou pou ena “l’unité dan l’esprit”?
17 Bann premier chretien “ti consacré zot le temps pou ecoute l’enseignement bann zapotre,” ek sa ti favorise l’unité dan congregation. (Actes 2:42) Conseil ek direction ki sa bann ancien-la ti donne zot ti sorti dan Parole Bondié ek sa ti ena enn grand valeur pou zot. Zordi aussi kan bann ancien coopere avek l’esclave fidele et avisé, zot tou dan congregation gagne l’encouragement ek sa aide zot pou reste uni. (1 Cor. 1:10) Kan nou soumette-nou ar bann l’instruction biblik ki nou gagné dan l’organisation Jéhovah ek nou suive direction ki bann ancien donne nou, nou montré ki nou pé “faire bann grand zeffort pou garde l’unité dan l’esprit, dan la paix ki soude [nou] ensam.”—Éph. 4:3.
18 Alors, anou faire tou pou garde enn l’esprit positif dan congregation. Si nou faire sa, nou kapav sur ki ‘faveur nou Seigneur Jésus Christ ki personne pa merité, pou avek l’esprit ki nou manifesté.’—Phil. 4:23.
[Zimage page 24]
Eski ou faire ou part pou encourage enn l’esprit positif kan ou prepare bann bon commentaire?
[Zimage page 25]
Faire ou part pou encourage enn l’esprit positif kan ou aprann bien bann cantik