Nou bizin sauvé, al loin ar sa bann kitsoz-la
“Zot, descendant bann vipere, kisannla ki’nn donne zot l’idée pou sauvé, al loin ar sa colere ki pé vini-la?”—MAT. 3:7.
1. Cite bann l’exemple biblik kot bann dimoune ti bizin sauvé.
KAN ou tann mot “sauvé” ki sa faire ou pensé? Kitfois sa faire certain mazinn Joseph, sa joli garson ki ti sauvé kan femme Potiphar ti faire li bann l’avance immoral-la. (Gen. 39:7-12) Lezot kapav pense bann chretien premier siecle ki ti sauvé, ti sorti dan Jérusalem en 66 n.l. pou obeir sa l’avertissement Jésus-la: “Kan zot trouve Jérusalem entouré par bann l’armée ki pé campé . . . lerla, bann ki dan Judée bizin sauvé, al dan bann montagne, ek bann ki dan la ville bizin sorti allé.”—Luc 21:20, 21.
2, 3. (a) Ki Jean le Baptise ti pé rod dire vrai-mem kan li ti critik bann chef religieux juif ? (b) Couma Jésus ti appuye l’avertissement ki Jean ti donné?
2 Sa bann l’exemple ki nou’nn fek guetté-la koz lor bann dimoune ki’nn bizin vrai-mem sauvé, allé. Zordi, dan preské tou pays dan le monde, li bien urgent ki bann vrai chretien sauvé mais dan enn fason symbolik. Jean le Baptiste ti servi mot “sauvé” dan sa sens-la. Parmi bann dimoune ki ti vinn guette Jean, ti ena bann chef religieux juif ki ti pensé zot juste ek ki zot pa ti bizin repenti. Zot ti meprise bann ti-dimoune ki ti faire Jean baptise zot pou montré zot repentance. Sans okenn la crainte, Jean ti denonce sa bann hypocrite-la ek li ti dire: “Zot, descendant bann vipere, kisannla ki’nn donne zot l’idée pou sauvé, al loin ar sa colere ki pé vini-la? Alors, produire fruit ki montré ki zot finn repenti.”—Mat. 3:7, 8.
3 Jean pa ti pé dire bannla ki zot ti bizin vrai-mem sauvé, allé. Li ti pé averti zot ki ti pou ena enn jugement, enn jour colere; ek li ti dire zot ki, si zot ti envie sauvé pendant sa jour-la, zot ti pou bizin produire fruit ki montré ki zot finn repenti. Plitar, avek courage, Jésus ti denonce bann chef religieux—zot l’attitude criminel ti montré ki zot vrai papa ti Satan le Diable. (Jean 8:44) Jésus ti appuye seki Jean ti dire avant; li ti appel sa bann chef religieux-la “descendant bann vipere” ek li ti demandé: “Couma zot kapav sauvé, al loin ar jugement la géhenne?” (Mat. 23:33) Ki Jésus ti pé rod dire par “géhenne”?
4. Ki Jésus ti pé rod dire kan li ti koz lor “la géhenne”?
4 La géhenne ti enn vallée ki ti trouve en dehors bann muraille Jérusalem kot ti brule bann saleté ek cadavre bann zanimo. Jésus ti servi mot géhenne couma enn symbole ki represente la mort eternel. (Guette La Tour de Garde 15 juin 2008, en français, page 27.) Kan li ti demann bann chef religieux couma zot kapav sauvé, al loin ar la géhenne, li ti montré ki, en tant ki enn groupe, zot ti merite destruction eternel.—Mat. 5:22, 29.
5. Couma l’histoire confirmé ki seki Jean ek Jésus ti’nn annoncé, ti realisé?
5 Bann chef juif ti faire encore plus peché kan zot ti persecute Jésus ek so bann disciple. Plitar, pareil couma Jean ek Jésus ti averti, jour colere Bondié ti vini. Dan sa cas-la, ‘sa colere ki ti’nn vini-la’ ti vinn zis dan enn region, Jérusalem ek Judée. Alors li ti possible pou vrai-mem sauvé, allé. Sa colere-la ti vini kan Jérusalem ek so temple ti detruire par l’armée romain en 70 n.l. Sa ‘tribulation-la’ ti pli grand ki tou seki ti’nn deja arrive Jérusalem. Ti ena beaucoup ki ti mort ou-soit ki bann Romain ti faire prisonnier. Sa destruction-la ti annonce enn pli grand destruction ki pé attann bann soi-disant chretien ek bann ki dan lezot religion.—Mat. 24:21.
Nou bizin sauvé, al loin ar sa colere ki pé vini-la
6. Ki ti commence developpé dan congregation chretien dan premier siecle?
6 Certain parmi bann premier chretien ti vinn bann apostat, ek ti ena ki ti suive zot. (Actes 20:29, 30) Tant ki bann zapotre Jésus ti vivant, zot ti couma “enn l’obstacle” kont sa l’apostasie-la, mais apré zot la mort, beaucoup secte chretien finn developpé. Zordi, ena par centaine religion ki pretann zot chretien ek ki pa d’accord entre zot. La Bible ti annoncé ki clergé la chretienté pou apparette. Li ti decrire zot en tant ki enn groupe ki li ti appel “zom ki rebelle kont la loi” ek “garson destruction . . . ki Seigneur Jésus pou detruire . . . ek pou crase net par manifestation so presence.”—2 Thess. 2:3, 6-8.
7. Kifer l’expression “zom ki rebelle kont la loi” al bien ar clergé la chretienté?
7 Clergé la chretienté li kont la loi parski li’nn embete bann million dimoune par bann l’enseignement, bann fête ek bann conduite ki contraire ar la Bible. Pareil couma bann chef religieux ki Jésus ti condamné, zordi bann dimoune ki forme partie dan “garson destruction” pou detruire sans okenn l’espoir pou ressuscité. (2 Thess. 1:6-9) Mais ki pé attann bann dimoune ki clergé la chretienté ek bann lezot chef fausse religion finn trompé? Pou reponn sa question-la, anou guette seki ti arrivé apré premier destruction Jérusalem en 607 a.n.l.
“Sauvé, sorti dan Babylone”
8, 9. (a) Ki prophetie Jérémie ti annoncé pou bann Juif ki ti en exil dan Babylone? (b) Apré ki bann Mède ek bann Perse ti prend Babylone, dan ki sens bann Juif ti gagne possibilité pou sauvé?
8 Prophete Jérémie ti annonce destruction Jérusalem ki ti arrivé en 607 a.n.l. Li ti dire ki peuple Bondié ti pou al en exil dan Babylone mais apré “soixante-dix an” zot ti pou retourne dan zot pays. (Jér. 29:4, 10) Pou bann Juif ki ti en exil dan Babylone, Jérémie ti ena enn message important: zot pa ti bizin laisse-zot contaminé par fausse religion ki bann Babylonien ti pratiké. Lerla, zot ti pou pré pou retourne Jérusalem ek retabli l’adoration pur kan l’heure ti pou arrivé. Sa l’heure-la ti’nn arrivé zis apré ki bann Mède ek bann Perse ti prend la ville Babylone en 539 a.n.l. Le roi perse, Cyrus II ti tire enn la loi pou ki bann Juif retourne Jérusalem ek reconstruire temple Jéhovah.—Ezra 1:1-4.
9 Plusieurs millier Juif ti saisi sa l’occasion-la ek ti retourne Jérusalem. (Ezra 2:64-67) Kan zot ti faire sa, zot ti realise enn l’ordre ki ti trouve dan prophetie Jérémie. Dan zot cas, sa l’ordre-la ti demann zot pou sauvé dan enn certain sens, setadir, sauvé al dan enn lot place. (Lire Jérémie 51:6, 45, 50.) Situation pa ti permette tou bann Juif pou faire sa longue voyage-la pou retourne Jérusalem ek Judée. Bann ki ti reste Babylone, couma par exemple prophete Daniel ki ti agé, ti kapav gagne benediction Bondié a enn condition: zot ti bizin soutenir avek tou zot leker vrai l’adoration dan Jérusalem ki ti pou vinn centre vrai l’adoration ek zot ti bizin reste separé ar fausse religion ki ti ena dan Babylone.
10. Ki qualité “kitsoz degoutant” “Babylone la Grande” responsable?
10 Zordi, plusieurs milliard dimoune impliké dan different qualité fausse religion ki sorti dan ancien la ville Babylone. (Gen. 11:6-9) La Bible appel tou sa bann religion-la ensam “Babylone la Grande, mama bann prostitué ek bann kitsoz degoutant ki ena lor la terre.” (Rév. 17:5) Depuis bien longtemps, fausse religion inn soutenir bann chef politik dan sa le monde-la. Parmi “bann kitsoz degoutant” ki li responsable, ena bann la guerre ki finn ‘touye plusieurs million dimoune lor la terre.’ (Rév. 18:24) Parmi bann lezot “kitsoz degoutant” ena bann agression sexuel lor bann zenfant ek lezot forme l’immoralité sexuel ki bann pretre commette ek ki bann responsable dan zot religion toleré. Eski sa etonne nou ki Jéhovah pou nettoye la terre ek tire fausse religion?—Rév. 18:8.
11. Tant ki Babylone la Grande pankor detruire, ki devoir bann vrai chretien ena?
11 Bann vrai chretien ki konn sa, ena devoir pou averti bann membre Babylone la Grande. Enn fason ki zot faire sa c’est kan zot distribué bann la Bible ek bann publication ki basé lor la Bible ek ki publié par “l’esclave fidele et avisé,” ki Jésus inn etabli pou donne ‘nourriture spirituel dan l’heure ki bizin.’ (Mat. 24:45) Kan bann dimoune interessé ar message ki sorti dan la Bible, bann vrai chretien prend aussi bann disposition pou etudié la Bible avek zot. Nou souhaité ki zot pou trouve l’importance pou “sauvé, sorti dan Babylone” avant ki li trop tard.—Rév. 18:4.
Sauvé, al loin ar l’idolatrie
12. Couma Bondié considere l’adoration bann zimage ek bann zidole?
12 Enn lot kitsoz degoutant ki pratiké dan Babylone la Grande c’est l’adoration bann zimage ek bann zidole. Bondié appel zot “bann kitsoz degoutant” ek “bann zidole malprop.” (Deut. 29:17) Tou bann ki envie faire Bondié plaisir bizin rejette l’idolatrie, en accord avek seki Bondié dire: “Mo-mem Jéhovah. Sa-mem mo nom; ek mo pa pou donne personne mo la gloire, ni mo pou donne mo louange bann zimage.”—Is. 42:8.
13. Nou bizin sauvé, al loin ar ki bann forme l’idolatrie ki sournois?
13 Parole Bondié montré aussi ki ena bann forme l’idolatrie ki nou pa reconette facilement, ki sournois. Par exemple, li appel convoitise “l’idolatrie.” (Col. 3:5) Kan nou ena convoitise, sa vedir ki nou ena enn l’envie exageré pou gagne enn kitsoz ki defann, couma par exemple gagne kitsoz enn lot dimoune. (Ex. 20:17) Ange ki ti vinn Satan le Diable ti developpe enn l’envie exageré pou vinn pareil couma Bondié ki Pli Grand lor la terre, ek pou gagne l’adoration. (Luc 4:5-7) Sa ti amenn li pou rebelle kont Jéhovah ek pou embete Ève pou ki li envie enn kitsoz ki Bondié ti defann. Dan enn sens, Adam aussi ti commette l’idolatrie kan li ti laisse so desir egoïste pou reste avek so madame vinn pli important ki obeir so bon Papa ki dan le ciel. Mais, tou bann ki envie sapé kan jour colere Bondié vini, bizin adore zis Jéhovah ek rejette enn convoitise coumsa.
“Sauvé, al loin ar fornication”
14-16. (a) Kifer Joseph li vrai-mem enn bon l’exemple en seki concerne moralité? (b) Ki nou bizin faire si nou ena bann desir sexuel impur? (c) Couma nou pou kapav reussi sauvé, al loin ar fornication?
14 Lire 1 Corinthiens 6:18. Kan femme Potiphar ti rod gagne bann relation sexuel avek Joseph, Joseph ti sauvé dan enn fason litteral, li ti al loin ar li. C’est enn bon l’exemple pou bann chretien, ki zot marié ou-soit celibataire! Li clair ki conscience Joseph ti’nn formé par bann l’evenement ki ti’nn arrivé dan le passé ek ki ti montré couma Bondié considere l’immoralité sexuel. Si nou envie obeir l’ordre pou “sauvé, al loin ar fornication,” nou pou rejette bann kitsoz ki kapav faire nou ena bann desir sexuel pou enn kikenn ki pa nou conjoint. La Bible donne sa l’encouragement-la: “Detruire net bann membre zot lekor . . . en seki concerne la fornication, l’impureté, bann desir sexuel, bann desir ki faire di-tort, ek enn l’envie exageré, ki enn l’idolatrie. C’est a cause sa bann kitsoz-la ki colere Bondié pé vini.”—Col. 3:5, 6.
15 Remarké ki “colere Bondié pé vini.” Beaucoup dimoune dan le monde developpe bann mauvais desir sexuel ek kan zot laisse sa domine-zot, zot pratik bann kitsoz impur. A cause sa, nou bann chretien, nou bizin prié pou gagne l’aide Bondié ek so l’esprit saint pou ki bann desir sexuel impur pa domine nou. En plus, kan nou etudié la Bible, nou assisté bann reunion ek nou preche la bonne nouvelle ar nou prochain, sa pou aide nou pou “contigne marche par l’esprit.” Lerla, nou “pa pou pratik okenn desir la chair.”—Gal. 5:16.
16 Li clair ki si nou guette bann kitsoz pornographik, nou pa pou “marche par l’esprit.” Alors, chaque chretien bizin faire attention pou pa lire, guette ou-soit ecoute bann kitsoz ki pou faire li gagne bann desir sexuel impur. Bann serviteur Bondié zot “saint” ek li pou mauvais si zot prend plaisir pou faire bann badinage lor sa bann kitsoz-la ou-soit pou koz sa entre zot. (Éph. 5:3, 4) Lerla nou pou montré nou bon Papa ki nou vrai-mem envie sapé kan so colere vini ek vive dan le monde nouveau kot pou ena la justice.
Sauvé, rejette “l’amour pou l’argent”
17, 18. Kifer nou bizin sauvé, rejette “l’amour pou l’argent”?
17 Dan premier lettre ki Paul ti ecrire Timothée, li ti mette l’accent lor bann principe ki ti bizin guide bann esclave chretien. Kitfois certain parmi zot ti attann pou gagne bann l’avantage materiel parski zot maitre ti bann chretien. Li possible ki lezot ti essaye servi bann kitsoz sacré pou zot prop profit egoïste. Paul ti averti bann chretien pou ki zot pa “pensé ki l’attachement pou Bondié c’est enn moyen pou gagne bann profit” materiel. Kitfois racine sa probleme-la ti “l’amour pou l’argent.” Sa l’amour-la kapav ena enn mauvais l’effet lor n’importe ki dimoune, ki li riche ou-soit misere.—1 Tim. 6:1, 2, 5, 9, 10.
18 Eski ou kapav mazinn bann l’exemple biblik ki koz lor bann dimoune ki’nn perdi bann bon relation avek Bondié a cause zot “l’amour pou l’argent” ou-soit a cause l’amour pou bann kitsoz ki pa necessaire ek ki l’argent kapav acheté? (Jos. 7:11, 21; 2 Rois 5:20, 25-27) Paul ti donne Timothée sa conseil-la: “Toi, zom ki servi Bondié, sauvé, al loin ar sa bann kitsoz-la. Mais poursuive la justice, l’attachement pou Bondié, la foi, l’amour, l’endurance, enn caractere doux.” (1 Tim. 6:11) Tou bann ki envie gagne la vie sauve kan jour colere Jéhovah vini bien bizin suive sa conseil-la.
“Sauvé, al loin ar bann desir la jeunesse”
19. Ki tou bann jeune bizin?
19 Lire Proverbes 22:15. Parski betise attaché ar leker enn jeune, sa kapav facilement amenn li pou prend enn mauvais chemin. Enn kitsoz ki kapav aide bann jeune pou faire face ar sa, c’est enn discipline ki basé lor la Bible. Beaucoup jeune chretien ki pena bann parent dan la verité, faire zeffort pou rod bann principe biblik ek pou applik zot. Ena lezot ki profite bann conseil sage ki bann membre dan congregation ki mur lor plan spirituel donne zot. Mais n’importe kisannla ki donne bann conseil biblik, si nou applik zot, sa kapav faire nou vive heureux asterla ek dan l’avenir.—Héb. 12:8-11.
20. Ki kapav aide bann jeune pou sauvé, rejette bann mauvais desir?
20 Lire 2 Timothée 2:20-22. Beaucoup jeune ki pa finn gagne discipline ki bizin, finn faire bann kitsoz bete. Par exemple, zot finn ena enn l’esprit competition, enn desir exageré pou gagne kitsoz, zot finn commette fornication, zot finn developpe l’amour pou l’argent ek zot finn galope derriere bann plaisir. Tou sa bann kitsoz-la c’est “bann desir la jeunesse” ki la Bible encourage nou pou rejeté. Pou enn jeune chretien sauvé, al loin ar sa bann kitsoz-la, li bizin faire attention ar bann mauvais l’influence, n’importe ki coté sa sorti. Seki kapav surtout aide li c’est conseil ki la Bible donné pou contigne rod bann qualité spirituel “ensam avek bann ki invok le Seigneur avek enn leker pur.”
21. Ki promesse extraordinaire Jésus Christ ti faire lor so bann disciple ki li ti compare ar bann brebis?
21 Ki nou jeune ou agé, kan nou refuse pou ecoute bann dimoune ki essaye mette nou lor enn mauvais chemin, nou montré ki nou envie parmi bann disciple Jésus ki ‘sauvé ek pa ecoute la voix bann etranger.’ (Jean 10:5) Selman, pou nou sapé kan jour colere Bondié vini, nou bizin faire plus ki zis sauvé, al loin ar bann mauvais kitsoz. Nou bizin aussi poursuive bann qualité positif. Dan prochain lartik, nou pou examine sept parmi sa bann qualité-la. Nou ena enn bon raison pou examine sa lartik-la en profondeur parski Jésus ti faire sa promesse-la: “Mo donne [mo bann brebis] la vie eternel; non, jamais zot pa pou detruire, ek personne pa pou rass zot dan mo la main.”—Jean 10:28.
Couma ou pou reponn?
• Ki l’avertissement Jésus ti donne bann chef religieux?
• Ar ki situation dangereux bann million dimoune pé faire face zordi?
• Nou bizin sauvé, al loin ar ki bann forme l’idolatrie ki sournois?
[Zimage lor page 17]
Ki sa faire ou pensé kan ou tann mot “sauvé”?