Ki jour Jéhovah pou faire nou decouvert?
“Jour Jéhovah pou vini couma enn voleur, . . . ek la terre ek bann travail ki ena ladan, pou decouvert.”—2 PIERRE 3:10.
1, 2. (a) Couma sa mauvais le monde-la pou disparette? (b) Ki bann question nou pou examiné?
SA MAUVAIS le monde kot nou pé vive-la li basé lor enn grand mensonge: bann dimoune kapav reussi dirige la terre sans l’aide Jéhovah. (Ps. 2:2, 3) Eski enn kitsoz ki basé lor seki fausse kapav resté pou touletan? Non! Selman, nou pa pou bizin attann ki le monde Satan detruire par li-mem. Au contraire, c’est Bondié ki pou detruire li dan ler ki Li’nn fixé ek dan So fason. Seki Bondié pou faire kont sa mauvais le monde-la pou montré so justice ek so l’amour dan enn fason parfait.—Ps. 92:7; Prov. 2:21, 22.
2 L’apotre Pierre ti ecrire: “Jour Jéhovah pou vini couma enn voleur, ek sa jour-la, bann le ciel pou disparette vite dan enn grand tapage, mais bann element ki’nn bien chauffé pou fonn, ek la terre ek bann travail ki ena ladan, pou decouvert.” (2 Pierre 3:10) Ki “bann le ciel” ek “la terre” ki mentionné dan sa verset-la representé? Ki été sa “bann element” ki pou fonn-la? Ki Pierre ti pé pensé kan li ti dire ki “la terre ek bann travail ki ena ladan” ti pou “decouvert”? Si nou konn reponse sa bann question-la, sa pou aide nou pou prepare-nou pou bann l’evenement ki faire peur, ki pou arrivé bientot dan l’avenir.
Bann le ciel ek la terre ki pou disparette
3. Ki “bann le ciel” ki mentionné dan 2 Pierre 3:10 representé, ek couma zot pou disparette?
3 Kan la Bible servi l’expression “bann le ciel” dan enn fason symbolik, souvent sa faire reference ar bann dirigeant, ki dan enn position pli haute par rapport ar bann dimoune ki zot dirigé. (Is. 14:13, 14; Rév. 21:1, 2) Sa “bann le ciel [ki] pou disparette[-la]” represente domination bann dimoune lor enn le monde ki pena okenn respé pou Bondié. Zot pou disparette dan enn “grand tapage”—kitfois sa montré ki sa bann le ciel-la pou disparette bien vite.
4. Ki la “terre” representé, ek couma li pou detruire?
4 La “terre” represente tou bann dimoune ki eloigné ar Bondié. Enn le monde coumsa ti existé dan lepok Noé ek par l’ordre Bondié, li ti detruire par enn deluge. “Mais par sa mem parole-la, Bondié finn reserve le ciel ek la terre ki existé zordi, pou brulé par difé, ek pou jour jugement ek destruction bann dimoune ki pena okenn respé pou Bondié.” (2 Pierre 3:7) Alors ki deluge ti detruire tou bann mauvais dimoune enn sel coup, sa destruction ki pou vini-la pou arrivé en plusieurs l’etape pendant “la grande tribulation.” (Rév. 7:14) Dan premier l’etape sa tribulation-la, Bondié pou pousse bann dirigeant politik sa le monde-la pou detruire “Babylone la Grande,” coumsa Li pou montré so mepris pou sa prostitué religieux-la. (Rév. 17:5, 16; 18:8) Apré sa, dan la guerre Har-Maguédôn, dernier l’etape sa grande tribulation-la, Jéhovah Li-mem pou detruire le reste le monde Satan.—Rév. 16:14, 16; 19:19-21.
“Bann element . . . pou fonn”
5. Ki kitsoz ki forme partie dan sa bann element symbolik-la?
5 Ki sa “bann element” ki “pou fonn[-la]”? Dapré enn dictionnaire biblik, l’expression “bann element” vedir “bann principe de base,” ou-soit “bann kitsoz de base.” Dapré sa dictionnaire-la, ti servi sa l’expression-la en rapport avek bann lettre alphabet, ek ti decrire sa bann lettre-la couma bann kitsoz de base pou kozé. Alors, sa “bann element” ki Pierre ti mentionné-la c’est bann kitsoz de base ki faire ki le monde li seki li été, avek so bann principe, bann l’attitude, bann fason faire ek bann l’objectif ki kont bann principe Bondié. Sa “bann element[-la]” implik “l’esprit le monde” ki “pé agir asterla dan bann garson desobeissance.” (1 Cor. 2:12; lire Éphésiens 2:1-3.) Sa l’esprit-la ou-soit sa “l’air[-la],” li partout dan le monde Satan. Li pousse bann dimoune pou ena bann pensée, pou faire bann projet, pou kozé, ek pou agir dan enn fason ki reflete personnalité Satan, “chef lor pouvoir ki l’air ena,” sa kikenn ki ena l’orgueil ek ki rebelle-la.
6. Couma eski l’esprit le monde li manifesté?
6 Alors, ki zot rann zot compte ou-soit non, bann ki’nn contaminé par l’esprit sa le monde-la, laisse zot l’esprit ek zot leker influencé par Satan, ek sa faire zot reflete so fason pensée ek so l’attitude. A cause sa, zot faire seki zot envie, sans prend compte volonté Bondié. Zot reagir avek l’orgueil ou-soit dan zot prop l’interet, zot manifesté enn l’attitude rebelle envers l’autorité, ek sans okenn controle, zot cedé ar “desir la chair, [ek] desir lizié.”—Lire 1 Jean 2:15-17.a
7. Kifer nou bizin “protege [nou] leker”?
7 Alors li bien important ki nou “protege [nou] leker” kan nou prend bann decision sage ki en accord avek bann principe biblik en rapport avek nou bann frequentation, nou lecture, nou bann divertissement, ek bann site Internet ki kitfois nou guetté! (Prov. 4:23) L’apotre Paul ti ecrire: “Faire attention: kapav arrivé ki enn kikenn entraine zot couma so victime par moyen philosophie ek tromperie ki dan vide dapré tradition bann zom, dapré bann kitsoz de base ki ena dan sa le monde-la ek pa dapré Christ.” (Col. 2:8) Li pé vinn encore plus urgent ki nou obeir sa l’ordre-la alors ki jour Jéhovah pé kosté. Kifer? Parski a cause ‘chaleur’ sa jour-la, enn chaleur ki jamais pa finn ena avant, tou “bann element” le monde Satan pou fonn, setadir ki sa jour-la pou prouvé ki sa bann element-la pa kapav resisté ar sa chaleur-la. Sa faire nou rappel bann parole ki ena dan Malaki 4:1: “Sa jour ki chaud couma enn four-la pé vini, ek tou bann ki ena l’orgueil ek tou bann ki pé pratik bann mauvais kitsoz, pou bizin vinn couma la paille. Ek sa jour ki pé vini-la pou vrai-mem devore zot.”
“La terre ek bann travail ki ena ladan, pou decouvert”
8. Couma la terre ek bann travail ki ena ladan, pou “decouvert”?
8 Ki Pierre ti pé rod dire kan li ti ecrire ki “la terre ek bann travail ki ena ladan, pou decouvert”? Mot “decouvert” kapav aussi traduire par “trouvé” ou-soit “ki’nn devoilé.” Pierre ti pé rod dire ki pendant la grande tribulation, Jéhovah pou devoilé couma le monde Satan été vrai-mem, tou dimoune pou kapav trouvé ki sa le monde-la kont Li ek kont So Royaume, ek ki a cause sa li merite destruction. Isaïe 26:21 ti koz lor la dan enn fason prophetik: “Jéhovah pé sorti dan so place pou demann enn compte bann habitant sa pays-la pou peché ki zot inn faire kont Li, ek vrai-mem sa pays-la pou expose di-sang ki’nn versé lor li, ek li pou nepli couvert so bann mort.”
9. (a) Ki nou bizin rejeté, ek kifer? (b) Ki nou bizin developpé, ek kifer?
9 Pendant jour Jéhovah, bann ki finn laisse le monde ek so mauvais l’esprit influence zot, pou montré seki zot été vrai-mem, zot pou mem touye sakenn zot camarade. En realité, li possible ki tou sa bann divertissement violent ki bien populaire zordi-la, pé prepare l’esprit beaucoup dimoune pou lepok kan la main chaque dimoune “pou leve kont la main so camarade.” (Zek. 14:13) Alors, li vrai-mem bien important ki nou rejette n’importe ki kitsoz—bann film, livre, video game, ek lezot kitsoz encore—ki kapav faire nou developpe bann defaut ki Bondié detesté, couma par exemple l’orgueil, ek l’amour pou la violence! (2 Sam. 22:28; Ps. 11:5) Mais, anou developpe bann qualité ki ena dan fruit l’esprit saint Bondié, parski sa pou aide nou pou kapav resisté kont chaleur symbolik ki pou ena kan jour Jéhovah pou vini.—Gal. 5:22, 23.
“Bann nouveau le ciel ek enn nouveau la terre”
10, 11. Ki “bann nouveau le ciel” ek “enn nouveau la terre” representé?
10 Lire 2 Pierre 3:13. “Bann nouveau le ciel” represente Royaume Bondié ki dan le ciel, ki finn etabli en 1914 kan “le temps fixé bann nation” ti fini. (Luc 21:24) Dan sa gouvernement royal-la ena Christ Jésus ek so 144,000 le roi ki pou regne avek li, la plupart inn fini gagne zot recompense pou al dan le ciel. Livre Révélation decrire sa bann dimoune ki Jéhovah inn choisir-la couma “la ville saint, Nouvelle Jérusalem, ki pé sorti dan le ciel kot Bondié ek pé desann, ek ki’nn preparé couma enn la marié ki’nn faire li joli pou so mari.” (Rév. 21:1, 2, 22-24) Pareil couma dan le passé Jérusalem ti l’endroit kot gouvernement Israël ti été, Nouvelle Jérusalem ek le marié pou forme gouvernement ki pou dirige le monde nouveau. Sa la ville ki dan le ciel-la pou ‘sorti dan le ciel ek pou desann’ setadir ki li pou tourne so l’attention vers la terre.
11 “Nouveau la terre” represente enn nouveau societé bann dimoune ki pou lor la terre ek ki pou’nn montré zot soumission total ar Royaume Bondié. Paradis spirituel ki peuple Bondié pé profité zordi pou finalement dan place kot li bizin été, setadir lor sa joli “la terre habité ki pou vini[-la].” (Héb. 2:5) Couma nou kapav forme partie dan sa nouveau le monde-la?
Anou prepare-nou pou grand jour Jéhovah
12. Kifer le monde pou gagne sok kan jour Jéhovah pou vini?
12 Paul ek Pierre toulé-deux ti annoncé ki jour Jéhovah pou vini “couma enn voleur”—enn coute sans ki personne remarké ek sans ki nou attann. (Lire 1 Thessaloniciens 5:1, 2.) Mem bann vrai chretien ki pé attann sa jour-la, pou etonné tellement li pou vinn enn sel coute. (Mat. 24:44) Mais le monde li, li pou plus ki etonné. Paul ti ecrire: “Kan zot [bann dimoune ki eloigné ar Jéhovah] pou dire: ‘La paix ek securité!’ lerla, enn sel coup enn destruction pou vinn lor zot, sans ki zot attann, pareil couma bann douleur enn femme enceinte; ek dan okenn fason zot pa pou sapé.”—1 Thess. 5:3.
13. Couma nou kapav evité ki declaration “La paix ek securité!” embete nou?
13 Sa declaration “La paix ek securité[-la]!” pou zis enn lot mensonge ki inspiré par bann demon; selman, sa pa pou embete bann serviteur Jéhovah. Paul ti ecrire: “Zot pa dan noirté, pou ki sa jour-la vinn enn coup lor zot couma bann voleur, parski zot tou zot bann garson la lumiere ek bann garson li-jour.” (1 Thess. 5:4, 5) Alors, anou reste dan la lumiere, bien loin ar sa noirté ki ena dan le monde Satan-la. Pierre ti ecrire: “Zot ki mo bien content, zot ki konn sa bann kitsoz-la en avance, reste lor zot garde pou ki zot pa laisse-zot entrainé avek bannla [bann fausse enseignant dan congregation chretien] par tromperie bann dimoune ki desobeir la loi ek ki lerla zot nepli tini ferme.”—2 Pierre 3:17.
14, 15. (a) Couma Jéhovah honore nou? (b) Ki bann parole inspiré ki nou bizin prend bien compte?
14 Remarké ki Jéhovah pa zis dire nou ki nou bizin ‘reste lor nou garde’ sans ki Li donne nou okenn lezot renseignement. Au contraire, Li honore nou kan Li faire nou ‘konn en avance’ seki pou arrivé, nou ena enn connaissance de base lor seki pou arrivé dan l’avenir.
15 Mais malheureusement, certain finn vinn indifferent ou-soit zot finn mem ena doute concernant bann rappel ki concerne l’importance pou reste lor nou garde. Kitfois zot dire: ‘Nou finn tann sa bann mem rappel-la pendant beaucoup l’année.’ Pourtant, sa bann dimoune-la bizin rappel ki kan zot dire sa, en realité zot pé mette en doute Jéhovah ek so Garson, pa zis l’esclave fidele et avisé. Jéhovah ti dire: “Contigne attann.” (Hab. 2:3) Jésus aussi ti dire: “Contigne veillé parski zot pa koné ki jour zot Seigneur pé vini.” (Mat. 24:42) En plus, Pierre ti ecrire: “Ki qualité dimoune zot bizin été par bann action ki montré ki zot conduite saint ek ki zot ena l’attachement pou Bondié, alors ki zot pé attann ek pé garde presence jour Jéhovah touletan dan zot l’esprit!” (2 Pierre 3:11, 12) Jamais groupe l’esclave fidele ek so College central pou considere sa bann parole important-la couma enn kitsoz banal!
16. Ki l’attitude nou bizin rejeté, ek kifer?
16 En realité, c’est sa “mauvais esclave-la” ki dire ki le Maitre pé tardé. (Mat. 24:48) Sa mauvais esclave-la forme partie dan enn groupe ki’nn decrire dan 2 Pierre 3:3, 4. Pierre ti ecrire: “Dan dernier jour, pou ena bann moqueur” ki, “dapré zot prop desir,” pou bouffonne bann dimoune ki par obeissance, garde jour Jéhovah touletan dan zot l’esprit. Oui, au lieu ki zot concentré lor bann l’interet Royaume Bondié, sa bann moqueur-la pense zis zot-mem ek zot prop desir egoïste. Fodé jamais ki nou developpe enn l’attitude desobeissant ek dangereux coumsa! Au contraire, anou “considere patience nou Seigneur couma enn delivrance.” Dan ki fason? Kan nou reste bien occupé pou preche Royaume Bondié ek pou faire bann disciple ek kan nou pa tracasse nou plus ki bizin pou koné kan bann l’evenement pou arrivé. Sa c’est enn kitsoz ki concerne Jéhovah.—2 Pierre 3:15; lire Actes 1:6, 7.
Anou faire confiance nou Bondié ki sauve nou
17. Couma bann chretien fidele ti reagir ar l’ordre ki Jésus ti donné pou quitte Jérusalem, ek kifer?
17 Apré ki l’armée romain ti vinn attak Judée en 66 nou lepok, bann chretien fidele ti obeir l’ordre ki Jésus ti donne zot pou sauvé ek quitte Jérusalem premier l’occasion ki zot gagné. (Luc 21:20-23) Kifer zot ti agir vite ek sans pose okenn question? Nou kapav sur ki zot ti garde bien dan zot l’esprit l’avertissement ki Jésus ti donne zot. Pena doute ki zot ti attann ki zot decision ti pou faire zot gagne bann difficulté, couma Christ ti averti zot. Mais en mem temps, zot ti koné ki Jéhovah jamais ti pou quitte so bann fidele.—Ps. 55:22.
18. Couma bann parole Jésus ki trouve dan Luc 21:25-28 influence ou l’attitude lor la grande tribulation ki pé vini?
18 Nou aussi nou bizin ena full confiance en Jéhovah, parski Li tousel ki kapav sauve nou kan sa le monde-la pou konn pli grand tribulation dan l’Histoire l’humanité. Enn certain moment apré commencement la grande tribulation mais avant ki Jéhovah detruire le reste sa le monde-la, bann dimoune “pou gagne faiblesse tellement zot peur ek a cause bann kitsoz ki zot pé attann pou arrivé lor la terre.” Selman, alors ki bann l’ennemi Bondié pou tremblé ar la peur, bann serviteur fidele Jéhovah pa pou ressenti okenn la peur. Au contraire, zot pou content parski zot koné ki zot delivrance pé kosté.—Lire Luc 21:25-28.
19. Ki nou pou examiné dan prochain lartik?
19 Oui, c’est enn l’avenir extraordinaire ki pé attann bann ki reste separé ar le monde ek ar so “bann element”! Mais, prochain lartik pou expliké ki, si nou envie gagne la vie, nou bizin faire plus ki zis evite faire seki mauvais. Nou bizin developpe bann qualité ki faire Jéhovah plaisir ek faire bann action ki Li approuvé.—2 Pierre 3:11.
[Note]
a Pou plus renseignement lor bann comportement ki l’esprit le monde encouragé, guette livre Comment raisonner à partir des Écritures, page 140-143.
Eski ou kapav expliké?
• Ki ‘bann le ciel ek la terre’ ki existé zordi, representé?
• Ki “bann element” representé?
• Ki ‘bann nouveau le ciel ek enn nouveau la terre’ representé?
• Kifer nou bizin ena full confiance dan Bondié?
[Zimage page 17]
Couma ou kapav “protege ou leker” ek reste separé ar le monde?
[Zimage page 18]
Couma nou kapav montré ki nou “considere patience nou Seigneur couma enn delivrance”?