Anou contigne fortifié sakenn nou camarade
1 L’apotre Paul ti faire tou seki li ti kapav pou fortifié so bann compagnon chrétien. (Actes 14:19-22) Nou aussi pareil, kan nou bann frere ek soeur passe par bann situation difficile, nou senti-nou concerné ek nou envie aide zot. La Bible dire ki nou tou, ek pa zis bann ancien, ki bizin interessé ar lezot. (Rom. 15:1, 2) Anou guette deux fason couma nou kapav applik sa bon conseil-la: “Alors, contigne console zot entre zot-mem ek fortifié sakenn so camarade.”—1 Thess. 5:11.
2 Koné seki lezot bizin: La Bible dire ki Dorcas ti “faire beaucoup di-bien ek beaucoup donation pou aide lezot.” (Actes 9:36, 39) Li ti prend compte bann ki ti bizin l’aide ek li ti faire tou seki li ti kapav pou aide zot. Vrai-mem, li finn laisse enn bon l’exemple pou nou! Ou kapav tann dire ki enn frere ou enn soeur agé bizin l’aide pou li kapav vinn reunion. Ou-bien li kapav arrivé ki enn pionnier pena personne pou accompagne li dan so service, enn l’apré-midi dan la semaine. Si ou koné ki enn kikenn bizin sa qualité soutien-la, ek ki ou aide li dan enn fason pratik, maziné ki quantité sa dimoune-la pou encouragé!
3 Bann conversation spirituel: Nou kapav aussi fortifié lezot par seki nou dire. (Éph. 4:29) Enn ancien experimenté ti faire sa remark-la: “Si ou envie encourage lezot, koz lor bann kitsoz spirituel. Pou commence enn conversation encourageant, ou kapav servi enn question simple, par exemple, ‘Comment to finn konn la verité?’” Montré enn l’interet sincere pou bann jeune dan congregation. Interessé ar bann ki’nn decouragé ou-bien bann ki kitfois timide. (Prov. 12:25) Pa laisse bann conversation lor bann divertissement ki ena dan sa lé-monde-la, empeche ou pou koz lor bann kitsoz spirituel avek ou bann frere ek soeur.—Rom. 1:11, 12.
4 Mais, ki ou kapav dire pou fortifié lezot? Dan ou lecture la Bible ek ou l’etude personnel, eski ou finn trouve enn nouveau point ki finn faire ou l’amour ek ou reconnaissance pou Jéhovah grandi? Eski finn ena enn kitsoz ki finn encourage ou dan enn discours publik ou-soit dan enn l’etude La Tour de Garde? Ou-bien, eski ou leker finn touché par enn l’experience ki finn faire ou la-foi vinn pli solid? Si ou accorde enn grand l’amour pou sa bann tresor spirituel-la, touletan ou pou ena enn kitsoz encourageant pou partage avek lezot.—Prov. 2:1; Luc 6:45.
5 Anou contigne fortifié nou camarade kan nou donne lezot enn l’aide pratik ek kan nou ena bann conversation spirituel.—Prov. 12:18.