Tir Maximum Profi ar To Lektir Labib

1. Ki kitsoz montre ki bann Lekritir ti inportan pou Zezi?

ESEY mazine ki to pe viv dan lepok Zezi ek to pe ekout li ansegne. Souvan li ti sit bann Lekritir par-ker. Ofet, mem bann premie parol ki li ti dir apre so batem, ek bann dernie parol ki li ti dir avan so lamor, ti sorti dan bann Lekritir.b (Det. 8:3; Ps. 31:5; Lik 4:4; 23:46) Anplis, pandan trwa-z-an edmi ki Zezi ti prese, souvan li ti lir, li ti sit bann Lekritir, ek li ti explik zot.​—Mat. 5:17, 18, 21, 22, 27, 28; Lik 4:16-20.

2. Kan Zezi ti pe grandi, ki kitsoz ti ed li pou konn bien bann Lekritir? (Get zimaz lor kouvertir.)

² Kan Zezi ti pran batem ek li ti gagn lespri sin, li ti koumans rapel so lavi avan ki li ti vinn lor later. Avan ki Zezi koumans prese, souvan li ti lir ek li ti tann koz lor Parol Bondie. Kitfwa souvan li ti tann Mari ek Zozef sit bann Lekritir kan zot ti pe koze lakaz.c (Det. 6:6, 7) Nou sir ki Zezi ti al sinagog toule Saba avek so fami. (Lik 4:16) Kan li ti laba, sirman li ti pe ekout bien kan ti pe lir bann Lekritir. Ek avek letan, Zezi ti aprann pou lir bann Lekritir par limem. Akoz sa, Zezi pa ti zis konn bien bann Lekritir, me li ti osi kontan zot ek li ti met zot an pratik. Par exanp, rapel seki ti arive dan tanp kan Zezi ti ena douz an. Bann ansegnan ki ti konn bien lalwa Moiz “ti extra inpresione par so lintelizans ek so bann repons.”​—Lik 2:46, 47, 52.

3. Ki nou pou examine dan sa lartik la?

³ Nou osi, nou kapav konn ek kontan Parol Bondie kan nou lir li regilierman. Selman, kouma nou kapav tir maximum profi ar seki nou lir? Nou kapav aprann boukou kitsoz ar seki Zezi ti dir bann dimounn ki ti konn bien lalwa, parmi ena bann dokter lalwa, bann Farizien, ek bann Sadisein. Sa bann sef relizie la, ti lir bann Lekritir souvan. Selman, zot pa ti tir profi ar seki zot ti lir. Zezi ti koz lor trwa kitsoz ki sa bann zom-la ti bizin fer pou ki zot tir maximum profi ar bann Lekritir. Bann parol ki Zezi ti dir zot, pou ed nou pou: (1) konpran seki nou lir, (2) rod bann perl spiritiel, ek (3) les Parol Bondie form nou.

LIR POU KONPRAN

4. Ki kitsoz Lik 10:25-29 ansegn nou konsernan lektir Labib?

⁴ Nou anvi konpran seki nou lir dan Labib. Sinon, nou pa pou tir profi ar nou lektir Labib. Par exanp, anou gete seki Zezi ti dir enn “zom ki ti bien konn Lalwa.” (Lir Lik 10:25-29.) Kan sa zom-la ti demann Zezi seki li bizin fer pou gagn lavi eternel, Zezi ti sit Parol Bondie kan li ti dir: “Ki’nn ekrir dan Lalwa? Ki to konpran?” Misie-la ti donn enn bon repons kan li ti sit bann Lekritir ek li ti dir ki nou bizin kontan Bondie ek kontan nou prosin. (Lev. 19:18; Det. 6:5) Me remarke seki li ti dir zis apre. Li ti dir: “Kisann-la vremem mo prosin?” Sa misie-la ti montre ki li pa ti vremem konpran seki li ti lir. Akoz sa, li pa ti kone kouma pou met an pratik seki li ti lir.

5. Kan nou fer lapriyer ek nou pran letan pou lir, kouma sa kapav ed nou pou konpran pli bien nou lektir Labib?

⁵ Kan nou lir Labib, nou pou kapav konpran pli bien seki nou lir, si nou pran bann bon labitid. Anou get sertin kitsoz ki kapav ed nou. Priye avan ki to koumans lir. Nou bizin led Zeova pou konpran bann Lekritir. Alor, nou kapav demann Li so lespri sin pou ki nou res bien konsantre. Apre sa, pran to letan pou lir. Sa pou ed twa pou bien konpran seki to pe lir. Kitfwa to kapav lir for, ouswa swiv dan to Labib anmemtan ki to ekout so lanrezistreman. Kan to ekout enn lanrezistreman Labib ek ki to swiv li dan to Labib, sa pou ed twa pou konpran, rapel, ek aprann plis kitsoz ar to lektir Labib. (Zozwe 1:8) Kan to fini lir, priye Zeova ankor enn fwa pou remersie Li pou so Parol ki Li’nn donn nou, ek demann Li so led pou met an pratik seki to’nn lir.

6. Kan to poz tomem bann kestion ek to pran bann not, kouma sa kapav ed twa kan to lir? (Get zimaz osi.)

⁶ Anou get de kitsoz ankor ki kapav ed nou pou konpran bien nou lektir Labib. Poz tomem bann kestion lor seki tonn lir. Kan to’nn lir enn zistwar dan Labib, demann tomem kisann-la bann personaz prinsipal? Kisann-la pe koze? Ar kisann-la li pe koze, ek kifer? Kotsa, ek kan sa finn arive? Sa bann kestion-la pou ed twa pou reflesi lor seki to pe lir ek pou konpran bien bann lide inportan ki ena ladan. To kapav osi pran bann not kan to pe lir. Kan to pran bann not, sa pou ed twa pou reflesi plis lor seki to’nn lir ek sa pou ed twa pou konpran pli bien. Anplis, sa pou ed twa pou rapel seki to’nn lir. Kitfwa to kapav not bann kestion, bann resers ki to’nn fer, ek bann pwin prinsipal. To kapav osi note kouma to pou met an pratik seki to’nn lir, ouswa seki to resanti lor seki to’nn lir. Kan to pran bann not, sa pou ed twa pou konsider Parol Bondie kouma enn mesaz ki Bondie inn avoye pou twa personelman.

7. Ki kalite nou bizin ena kan nou lir, ek kifer? (Matie 24:15)

⁷ Zezi ti koz lor enn kalite inportan ki nou bizin ena si nou anvi konpran seki nou lir dan Parol Bondie. Li ti koz lor bon zizman. (Lir Matie 24:15.) Ki ete bon zizman? Se kapasite pou konpran kouma enn lide ena enn lien avek enn lot lide, ouswa kouma li diferan avek enn lot lide. Bon zizman se osi kapasite pou konpran enn kitsoz ki kitfwa pa kler o-koumansman. Anplis, kouma Zezi ti dir, nou bizin ena bon zizman pou konpran kouma bann kitsoz ki pe arive pe realiz bann profesi Labib. Nou bizin osi ena sa kalite-la pou ki nou tir maximum profi ar tou seki nou lir dan Labib.

8. Kouma bon zizman kapav ed nou kan nou lir?

⁸ Zeova donn so bann serviter bon zizman. Alor, priye Li ek demann Li so led pou devlop sa kalite-la. (Prov. 2:6) Kouma to kapav azir an-akor avek to lapriyer? Reflesi bien lor seki to lir, ek gete kouma li ena enn lien avek bann lezot kitsoz ki to kone. Pou ed twa fer sa, to kapav servi bann piblikasion kouma Liv Resers pou Bann Temwin Zeova. Bann piblikasion koumsa pou ed twa konpran Labib pli bien. Lerla, to pou kapav met seki tonn aprann an pratik dan to lavi. (Ebre 5:14) Kan to lir avek bon zizman, to pou plis konpran bann Lekritir.

LIR POU ROD BANN PERL SPIRITIEL

9. Ki verite bien inportan bann Sadisein pa ti aksepte?

⁹ Bann Sadisein ti konn bien sink premie liv Lekritir Ebre. Selman, zot pa ti aksepte bann verite inportan ki ti ena dan sa bann liv-la. Par exanp, anou gete kouma Zezi ti reponn bann Sadisein kan zot ti poz li enn kestion lor rezireksion. Zezi ti dir zot: “Eski zot pa finn lir dan liv Moiz, dapre zistwar ki koz lor touf pikan, ki Bondie ti dir li: ‘Momem Bondie Abraam, Bondie Izaak, ek Bondie Zakob’?” (Mark 12:18, 26) Mem si bann Sadisein ti lir sa zistwar-la plizir fwa, kestion ki Zezi ti poz zot ti montre ki zot pa ti aksepte enn verite bien inportan, setadir lansegnman lor rezireksion.​—Mark 12:27; Lik 20:38.d

10. Ki kitsoz nou anvi konpran kan nou lir Labib?

¹⁰ Ki leson nou aprann? Kan nou lir Labib, nou anvi konpran seki sak verse ek sak zistwar dan Labib ansegn nou. Nou pa anvi zis konpran bann kitsoz ki fasil, me osi bann lezot verite ek bann prinsip ki ena valer.

11. Kouma 2 Timote 3:16, 17 kapav ed twa pou rod bann perl spiritiel dan Labib?

¹¹ Kouma to kapav rod bann perl spiritiel kan to pe lir Labib? Anou get seki 2 Timote 3:16, 17 dir. (Lir.) Sa bann verse-la dir ki “tou Lekritir . . . itil pou” (1) ansegne, (2) korize, (3) redres bann kitsoz, ek (4) disipline. To kapav gagn sa kat bienfe-la mem ar bann liv Labib ki to pa lir souvan. Reflesi lor seki to pe lir pou trouve seki sa ansegn twa lor Zeova, lor so proze, ek lor bann prinsip Labib. Gete kouma sa li itil pou korize. To kapav fer sa kan to esey konpran kouma sa bann verse-la kapav ed twa pou trouv ek rezet bann move tandans ouswa latitid ki to ena, pou ki to res fidel anver Zeova. Reflesi kouma sa bann verse-la kapav ed twa pou redres bann kitsoz, setadir pou koriz enn move fason panse. Par exanp, sa kapav enn kitsoz ki enn kikenn inn dir twa dan predikasion. Ek gete kouma sa bann verse-la kapav disiplinn twa, setadir form twa pou pans parey kouma Zeova. Kan to rapel sa kat kitsoz-la, to pou trouv bann perl spiritiel ki kapav ed twa pou tir profi ar to lektir Labib.

LES SEKI TO LIR FORM TWA

12. Kifer Zezi ti demann bann Farizien, “Eski zot pa finn lir?”

¹² Kan Zezi ti dir bann Farizien “Eski zot pa finn lir?” li ti montre ki bann-la ti ena enn move fason panse lor bann Lekritir. (Mat. 12:1-7)e Sa zour-la, bann Farizien ti pe dir ki bann disip Zezi pa ti pe swiv lalwa lor Saba. Pou reponn zot, Zezi ti sit de lexanp dan Lekritir ek li ti sit enn verse dan Oze. Li ti fer sa pou montre ki bann Farizien pa ti konpran kifer ti ena lalwa lor Saba ek pou montre ki zot pa ti ena pitie. Kifer bann Farizien pa ti les seki zot ti lir dan Parol Bondie form zot? Zot ti lir bann Lekritir avek enn lespri kritik ek zot ti vantar. Sa latitid-la ti anpes zot konpran seki zot ti lir.​—Mat. 23:23; Zan 5:39, 40.

13. Avek ki latitid nou bizin lir Labib, ek kifer?

¹³ Seki Zezi ti dir bann Farizien ansegn nou ki nou bizin lir Labib avek enn bon latitid. Fode pa nou swiv lexanp bann Farizien. Okontrer, nou bizin sinser ek pre pou les nou ansegne. Nou bizin “aksepte avek douser ki plant parol Bondie dan [nou].” (Zak 1:21) Si nou ena douser, nou pou les Parol Bondie grandi dan nou leker. Sel fason pou nou les Labib form nou pou ena mizerikord, konpasion, ek lamour, se kan nou evit ena enn lespri kritik ouswa vantar.

14. Kouma nou kapav kone si nou pe les Labib form nou? (Get bann zimaz osi.)

¹⁴ Fason ki nou tret lezot osi, montre si nou pe les Parol Bondie form nou. Bann Farizien pa ti les Parol Bondie tous zot leker. Akoz sa, zot ti “kondann bann ki inosan.” (Mat. 12:7) Dan mem fason, nou pou montre ki nou pe les Parol Bondie form nou gras-a fason ki nou trouv lezot ek tret lezot. Par exanp, eski nou plis abitie koz lor bann kalite ki lezot ena, ouswa lor zot bann defo. Eski nou ena konpasion ek nou pre pou pardonn lezot, ouswa eski nou kritik lezot ek nou gard zot dan leker? Kan nou reflesi lor bann kestion koumsa, sa kapav ed nou pou trouve si nou pe les Labib form nou bann panse, nou bann santiman, ek nou bann aksion.​—1 Tim. 4:12, 15; Ebre 4:12.

LIR LABIB FER TWA GAGN LAZWA

15. Ki Zezi ti resanti konsernan bann Lekritir?

¹⁵ Zezi ti kontan bann Lekritir, ek seki nou lir dan Psom 40:8 ti predir seki Zezi ti pou resanti lor Parol Bondie. Li dir: “Mo ena boukou plezir obeyir to volonte, Bondie. Mo finn grav to lalwa dan mo leker.” Zezi ti ere ek li ti kontign servi Zeova, parski li ti kontan bann Lekritir. Nou osi nou kapav ere ek kontign servi Zeova si nou les Parol Bondie tous nou leker.​—Ps. 1:1-3.

16. Ki to anvi fer pou tir maximum profi ar to lektir Labib? (Get lankadre “Bann Parol Zezi Kapav Ed Twa pou Konpran Seki To Pe Lir.”)

¹⁶ Seki Zezi ti dir, ek lexanp ki li’nn donn nou, ankouraz nou pou amelior fason ki nou lir Labib. Nou kapav amelior fason ki nou konpran bann verse Labib kan nou priye, nou pran letan pou lir, nou poz bann kestion, ek nou pran bann not. Nou montre ki nou ena bon zizman kan nou servi bann piblikasion ki baze lor Labib, pou reflesi lor seki nou lir. Nou kapav aprann pou servi Labib pli bien, mem bann verse ki nou pa tro kone, kan nou rod bann perl spiritiel ki ena dan sa bann verse-la. Ek nou kapav les Parol Bondie form nou kan nou fer zefor pou ena enn bon latitid kan nou lir Labib. Kan nou fer nou best pou fer sa bann kitsoz-la, nou pou tir plis profi ar nou lektir Labib ek nou pou vinn pli pros ar Zeova.​—Ps. 119:17, 18; Zak 4:8.