Lalimyer Bondye Repus Nwarte!

“Se Zeova ki fer mo nwarte briye.”—2 SAMYEL 22:29.

1. Ki lyin ena ant lalimyer ek lavi?

“BONDYE finn dir: ‘Les lalimyer paret.’ Lerla finn ena lalimyer.” (Zenez 1:3) Par sa bann parol byin inportan la, resi lor kreasyon ki truv dan Zenez, idantifye Zeova kuma lasurs lalimyer. San lalimyer, lavi lor later ti pu inposib. Zeova lasurs lalimyer spirityel usi, ki byin inportan pu gid nu dan nu lavi. (Psom 43:3) Lerwa David ti montre kuma lalimyer spirityel ek lavi mars byin ansam, kan li’nn ekrir: “Lasurs lavi li avek twa; par lalimyer ki sorti kot twa nu truv lalimyer.”—Psom 36:9.

2. Dapre seki Pol finn montre, ar ki kitsoz lalimyer li byin asosye?

² Apepre 1,000 an apre lepok David, lapot Pol ti fer referans ar sa resi lor kreasyon la. Dan so let ki li ti pe ekrir kongregasyon Kretyin Korint, li’nn dir: “Bondye Limem ti dir: ‘Les lalimyer briye dan nwarte.’” Apre sa, Pol finn montre ki lalimyer spirityel ek konesans ki Zeova done, zot de kitsoz ki byin asosye. Li ti dir: “Li finn ekler nu leker pu ekler [bannla] avek konesans extraodiner Bondye atraver figir Kris.” (2 Korintyin 4:6) Kuma eski sa lalimyer la ariv ziska nu?

Labib ―Enn Liv Ki Transmet Lalimyer

3. Ki lalimyer Zeova donn nu atraver Labib?

³ Zeova transmet lalimyer spirityel sirtu atraver so Parol inspire, Labib. Donk, amezir ki nu etidye Labib ek nu fer konesans Bondye rant dan nu lespri, nu les so lalimyer briy dan nu direksyon. Atraver Labib, Zeova ekler nu lor so bann proze ek Li dir nu kuma nu kapav fer so volonte. Sa donn nu lavi enn sans ek ed nu pu satisfer nu bann bezwin spirityel. (Eklezyast 12:1; Matye 5:3) Zezi finn byin montre ki nu bizin pran kont nu bann bezwin spirityel, kan li ti sit Lalwa Moiz. Li ti dir: “Finn ekrir, ‘Enn zom bizin viv, pa zis avek dipin me avek tu parol ki sorti dan labus Zeova.’”—Matye 4:4; Deteronom 8:3.

4. Dan ki fason eski Zezi li “lalimyer lemond”?

⁴ Labib idantifye Zezi byin avek lalimyer spirityel. Dayer, li ti dir limem ki li “lalimyer lemond” ek li ti azute: “Seki swiv mwa zame pa pu mars dan nwarte, me li pu posed lalimyer lavi.” (Zan 8:12) Sa lexpresyon la ed nu pu konpran rol byin-byin inportan ki Zezi ena pu transmet limanite laverite Zeova. Si nu’le evit nwarte ek kontiyn mars dan lalimyer Bondye, nu bizin ekut tu seki Zezi dir ek swiv byin pre so legzanp ek so bann lanseynman, parey kuma finn ekrir dan Labib.

5. Ki responsabilite bann disip Zezi ti ena apre so lamor?

⁵ Detrwa zur avan li mor, ankor enn fwa Zezi ti koz lor limem kuma lalimyer, kan li ti dir so bann disip: “Lalimyer pu parmi zot pu enn tigit letan ankor. Marse, pandan ki zot ena lalimyer, pu ki nwarte pa dominn zot; seki mars dan nwarte pa kone kot li pe ale. Egzers lafwa dan lalimyer pandan ki zot ena lalimyer, pu ki zot vinn bann garson lalimyer.” (Zan 12:35, 36) Bann ki finn vinn bann garson lalimyer finn aprann “model bann parol ki bon pu [zot].” (2 Timote 1:13, 14) Lerla zot servi sa bann bon parol la pu tir lezot dimunn sinser dan nwarte ek amenn zot ver lalimyer Bondye.

6. Ki verite inportan lor lalimyer ek nwarte nu truve dan 1 Zan 1:5?

⁶ Lapot Zan finn ekrir: “Bondye Li lalimyer ek pena ditu nwarte dan Li.” (1 Zan 1:5) Not diferans ki ena ant lalimyer ek nwarte. Lalimyer spirityel sorti kot Zeova, ek pa kapav asosye nwarte spirityel ar Li. Me alor, kisannla ki lasurs nwarte?

Lasurs Nwarte Spirityel

7. Kisannla lasurs nwarte spirityel dan lemond, ek ki linflyans li ena?

⁷ Lapot Pol ti koz lor “bondye sa sistem ki egziste la.” Par sa lexpresyon la, Pol ti pe fer referans ar Satan, ki apel usi Dyab. Li finn dir usi ki limem ki “finn avegle lespri bann ki pale krwar, pu ki lalimyer labonn nuvel extraordiner konsernan Kris, ki zimaz Bondye, pa perse.” (2 Korintyin 4:4) Buku pretann ki zot krwar an Bondye; me selman, enn bon kantite parmi zot pa krwar ki Dyab egziste. Kifer? Zot pale aksepte ki enn move lafors, ki pli for ki bann imin, kapav egziste ek inflyans fason ki zot panse. Me selman, kuma Pol montre, Dyab vremem egziste, ek li inflyans vremem bann dimunn pu ki zot pa kapav truv lalimyer laverite. Nu kapav truv puvwar ki Satan ena pu inflyans panse bann dimunn dan enn profesi ki dekrir li kuma “kikenn . . . ki anbet later antye.” (Revelasyon 12:9) Akoz bann laktivite Satan, kondisyon ki profet Izai ti anonse aplik asterla ar tu bann dimunn, eksepte bann serviter Zeova. Sa profesi la dir: “Gete! nwarte limem pu kuver later, ek enn gro nwarte pu kuver bann nasyon.”—Izai 60:2.

8. Dan ki fason, bann ki dan nwarte spirityel montre ki zot dan konfizyon?

⁸ Li inposib pu truv kitsoz kan fer byin nwar. Enn kikenn kapav fasilman perdi uswa pa kone kot li pe ale. Pareyman, bann ki dan nwarte spirityel pena disernman ek byin vit zot tom dan konfizyon lor plan spirityel. Zot perdi zot kapasite pu fer diferans ant laverite ek foste, ant seki bon ek seki move. Profet Izai finn koz lor sa bann ki dan sa kalite nwarte la kan li ti ekrir: “Maler pu bann ki pe dir ki seki bon li move ek seki move li bon, bann ki pe met nwarte pu lalimyer ek lalimyer pu nwarte, bann ki met amer pu du ek du pu amer!” (Izai 5:20) Satan Dyab, bondye nwarte, inflyans bann ki res dan nwarte spirityel ek donk sa bann dimunn la zot elwayne ar lasurs lalimyer ek lavi.—Efezyin 4:17-19.

Sorti dan Nwarte pu Vinn dan Lalimyer―Enn Defi

9. Explike kuma bann move dimunn ena enn latirans pu nwarte fizik ek nwarte spirityel tulede.

⁹ Zob, sa kikenn ki ti fidel la, ti atir latansyon lor latirans ki bann move dimunn ena pu nwarte fizik kan li ti dir: “An seki konsern lizye sa kikenn ki fer ladilter la, li veye kan fer nwar aswar, ek li dir: ‘Okenn lizye pa pu truv mwa! Ek li met enn vwal lor so figir.” (Zob 24:15) Bann move dimunn zot dan nwarte spirityel usi, ek sa kalite nwarte la kapav dominn zot. Lapot Pol ti dir ki move kondwit sexyel, kokin, gurmandiz, bwar ziska su, insilte lezot, ek gayn bann kitsoz par bann mwayin malonet, tusala zot bann kitsoz byin popiler parmi bann ki finn tom dan sa nwarte la. Me ninport kisannla ki vinn dan lalimyer Parol Bondye kapav sanze. Dan let ki li finn ekrir bann Korintyin, Pol finn montre klerman ki sa sanzman la li vremem posib. Buku Kretyin dan Korint ti abitye fer bann pratik ki dan nwarte, me purtan Pol finn dir zot: “Me zot finn lave, me zot finn vinn sin, me finn deklar zot drwat onon nu Senyer Zezi Kris ek avek lespri nu Bondye.”—1 Korintyin 6:9-11.

10, 11. Kuma eski Zezi ti montre konsiderasyon pu enn misye kan li ti fer li truv kler? (b) Kifer eski buku pa swazir lalimyer?

¹⁰ Kan enn dimunn sorti dan enn gro nwarte ek li vinn dan lalimyer, so lizye bizin inpe letan pu adapte ar lekleraz. Akoz sa, kan Zezi ti geri enn aveg dan lavil Betsaida, avek bonte li ti fer sa etap par etap. “Li finn trap lamin misye aveg la, ek li finn amenn li andeor vilaz ek apre ki li finn kras lor so lizye, li finn poz so lamin lor li ek li finn demann li: ‘Eski to truv kitsoz?’ Misye la lev so lizye ek li kumans dir: ‘Mo truv bann zom, parski mo pe truv kumadir bann pye, me zot pe marse.’ Lerla li finn poz so lamin ankor enn fwa lor lizye misye la, ek misye la finn truv kler; li finn geri, ek li ti pe truv tu kitsoz kuma bizin.” (Mark 8:23-25) Sirman, Zezi finn fer sa misye la truv kler dusma-dusma pu ki so lizye kapav adapte avek lalimyer for soley. Nu kapav mazinn lazwa ki sa misye la finn gayne kan li finn kapav truve.

¹¹ Me selman, bann ki gayn led pu sorti dusma-dusma dan nwarte spirityel ek vinn dan lalimyer laverite, zot, zot lazwa buku pli gran ki seki sa misye aveg la ti resanti. Kan nu truv zot lazwa, nu kapav demann nu mem kifer malgre sa, buku dimunn pa atire ver lalimyer. Ebyin, Zezi explike kifer: “Gete kifer ena zizman: lalimyer finn vinn dan lemond me bann dimunn finn pli kontan nwarte ki lalimyer, parski seki zot ti pe fer ti move. Parski seki pratik bann kitsoz degutan, ena laenn pu lalimyer ek li pa vinn ver lalimyer atansyon reprimann seki li pe fer.” (Zan 3:19, 20) Wi, buku dimunn kontan pratik “bann kitsoz degutan”—kuma limoralite, fer dominer ar lezot, koz manti, fer frod, ek kokin—ek nwarte spirityel Satan la li enn bon lanvironnman pu zot fer seki zot anvi.

Progrese dan Lalimyer

12. Ki profi nu finn tire letan nu’nn vinn dan lalimyer?

¹² Depi ki nu finn gayn konesans lalimyer, ki bann sanzman nu’nn truve dan nu mem? Defwa li bon ki nu reget deryer ek nu analiz bann progre spirityel ki nu finn fer. Ki bann move labitid nu finn abandone? Ki bann problem dan nu lavi nu finn reysi regle? Kuma eski nu bann proze pu lavenir finn sanze? Grasa lafors Zeova ek avek led so lespri sin, nu kapav kontiyne fer bann sanzman dan nu personalite ek dan fason nu panse ek kumsa nu pu montre ki nu pe aksepte lalimyer. (Efezyin 4:23, 24) Sa mem ki Pol finn dir: “Parski lontan zot ti nwarte, me asterla zot lalimyer an seki konsern Senyer. Kontiyn mars kuma bann zanfan lalimyer, parski dan frwi lalimyer ena tu sort kalite bonte, lazistis ek laverite.” (Efezyin 5:8, 9) Kan nu les lalimyer Zeova gid nu, sa donn nu enn lespwar ek donn nu lavi enn sans. Anplis li azut lazwa dan lavi bann dimunn ki otur nu. Ek leker Zeova byin kontan kan nu fer sa bann sanzman la!—Proverb 27:11.

13. Kuma eski nu kapav montre nu rekonesans pu lalimyer Zeova, ek ki nu bizin pu nu fer sa?

¹³ Nu montre nu rekonesans pu sa lavi pli ere ki nu ena la kan nu reflet lalimyer Zeova—partaz seki nu finn aprann dan Labib avek bann manb nu fami, nu bann kamarad, ek nu bann vwazin. (Matye 5:12-16; 24:14) Nu predikasyon ek nu lavi Kretyin ki personn pa kapav reprose, kapav vinn enn koreksyon pu bann ki refiz ekute. Pol explike: “Kontiyn verifye byin seki Senyer aksepte, ek aret pran par avek zot dan bann travay nwarte ki steril, me plito reprimann zot.” (Efezyin 5:10, 11) Nu bizin ena buku kuraz pu ed lezot kit nwarte ek swazir lalimyer. Pli inportan ankor, nu bizin ena konpasyon ek lintere pu lezot ek ena enn dezir sinser pu partaz lalimyer laverite ar zot pu zot profi eternel.—Matye 28:19, 20.

Fer Atansyon Bann Fos Lalimyer!

14. Ki lavertisman nu bizin ekute an seki konsern lalimyer?

¹⁴ Bann ki lor lamer res buku letan dan nwarte ek zot byin kontan kan zot truv lalimyer. Avan, dan Angleterre, ti alim bann dife lor bann falez ros pu indike ki kote kapav gayn refiz kan ena bann tanpet. Bann manb lekipaz enn bato ti byin apresye kan bann lalimyer ti gid zot dan bann por kot pa ti ena okenn danze. Me selman, ti ena bann dife ki ti fos. Olye ki bann bato la truv enn por, zot finn les zot tronpe par sa bann fos dife la ek zot ti fer nofraz lor bann ros ki lor lakot, ek la, bann voler ti kokin zot kargezon. Dan sa lemond ki anbet dimunn la, nu bizin fer atansyon pu pa les nu atire par bann fos lalimyer ki kapav amenn nu fer nofraz lor plan spirityel. Nu finn aprann ki “Satan kontiyn transform limem an enn anz lalimyer.” Pareyman, so bann serviter, parmi ena bann aposta, zot usi zot “bann zuvriye ki anbet lezot” ki “kontiyn transform zot an bann minis lazistis.” Si nu pran kont fos rezonnman sa bann dimunn la, sa kapav afebli nu konfyans dan Labib, Parol laverite Zeova, ek nu lafwa kapav mor.—2 Korintyin 11:13-15; 1 Timote 1:19.

15. Ki pu ed nu pu res lor semin ki al ver lavi?

¹⁵ Enn ekrivin Psom finn ekrir: “To parol li enn lalanp pu mo lipye, ek enn lalimyer pu mo larut.” (Psom 119:105) Wi, nu Bondye Zeova, ki kontan nu ek ki “anvi ki tu sort kalite dimunn sape ek gayn enn konesans egzak lor laverite,” pe ekler byin sa ‘semin sere ki al ver lavi la.’ (Matye 7:14; 1 Timote 2:4) Kan nu aplik bann regleman ki ena dan Labib, sa pu anpes nu kit sa semin sere la ek al dan semin nwarte. Pol finn ekrir: “Tu lekritir finn inspire par Bondye, li profitab pu anseyne, pu korize, pu met bann kitsoz an ord, pu disipline dan lazistis.” (2 Timote 3:16) Amezir ki nu grandi lor plan spirityel, nu les nu anseyne par Parol Bondye. Grasa lalimyer Parol Bondye, nu kapav koriz nu mem, uswa si neseser, les nu korize par bann ansyin ki kontan nu dan kongregasyon. Kumsa, nu kapav redres bann kitsoz ek avek limilite aksepte disiplinn dan lazistis ek kontiyn mars lor semin lavi.

Mars dan Lalimyer Avek Rekonesans

16. Kuma eski nu kapav montre rekonesans pu lalimyer, sa don extraodiner ki Zeova donn nu la?

¹⁶ Kuma eski nu kapav montre nu rekonesans pu lalimyer, sa don extraordiner ki Zeova finn donn nu la? Zan sapit 9 rakont nu ki apre ki Zezi ti’nn geri enn misye ki ti ne aveg, misye la ti santi li puse pu exprim so rekonesans. Kuma? Li finn ena lafwa an Zezi antan ki Garson Bondye ek li finn idantifye Zezi an piblik kuma enn “profet.” Anplis, li finn koz avek kuraz kont bann ki ti sey suzestim mirak Zezi. (Zan 9:17, 30-34) Lapot Pyer apel bann manb 144,000 dan kongregasyon Kretyin “enn lepep ki pu vinn enn propryete spesyal.” Kifer sa? Parski zot ena mem latitid rekonesan ki sa misye ki ti ne aveg ek ki ti’nn geri la. Zot montre zot rekonesans anver Zeova, sa Kikenn ki fer zot dibyin la, kan zot ‘anons bann bon kalite sa kikenn ki finn tir zot dan nwarte pu met zot dan so lalimyer extraordiner.’ (1 Pyer 2:9; Kolosyin 1:13) Bann ki ena lesperans pu viv lor later, zot usi zot ena sa mem latitid rekonesan la ek zot sutenir zot bann frer win kan zot fer konn an piblik “bann bon kalite” Zeova. Wi, sa li enn privilez ki ena buku valer, ki Bondye donn bann imin inparfe!

17, 18. (a) Ki responsabilite sak dimunn? (b) Parey kuma Timote, ki kitsoz sak Kretyin ankuraze pu evite?

¹⁷ Li byin inportan ki nu ena enn rekonesans sinser pu lalimyer laverite. Rapel ki personn parmi nu pa finn ne avek konesans laverite. Sertin finn aprann laverite kan zot finn vinn adilt, ek byin vit zot finn truve ki lalimyer siperyer ar nwarte. Lezot finn gayn gran privilez pu elve par bann paran ki ena lakrint pu Bondye. Sa bannla kapav konsider sa lalimyer la kuma enn kitsoz ki normal. Enn ser, ki so bann paran ti pe servi Zeova avan li ne, admet ki li finn pran buku letan ek li finn fer buku zefor pu li sezi ful sinifikasyon ek linportans bann verite ki li finn aprann depi tibaba. (2 Timote 3:15) Nu tu, ki nu zenn ki nu vye, nu bizin kiltiv enn profon rekonesans pu laverite ki Zeova finn revele.

¹⁸ Zenn Timote ti gayn lanseynman lor “bann lekritir sakre” depi tibaba. Me pu li vinn enn Kretyin mir, li finn bizin fer buku zefor par limem dan so minister. (2 Timote 3:15) Lerla, li finn kalifye pu ed lapot Pol ki ti donn li sa lankurazman la: “Fer tu to posib pu paret devan Bondye kuma enn kikenn apruve, enn zuvriye ki pena nanyin pu li gayn onte, ki konn servi parol laverite kuma bizin.” Nu’si, parey kuma Timote, nu bizin evit fer ninport ki kitsoz ki kapav fer nu gayn onte—uswa fer Zeova gayn onte!—2 Timote 2:15.

19. (a) Parey kuma David, ki nu tu nu ena rezon pu dir? (b) Ki nu pu egzamine dan prosin lartik?

¹⁹ Nu ena tu bann rezon pu donn Zeova laglwar, Li ki finn donn nu lalimyer laverite. Parey kuma Lerwa David, nu’si nu dir: “To mem mo lalanp, O Zeova, ek se Zeova ki fer mo nwarte briye.” (2 Samyel 22:29) Me, fode pa nu fer nu mem tro konfyans, sinon sa kapav fer nu retom dan nwarte dan lekel nu’nn sape. Akoz sa, prosin lartik pu ed nu pu kalkil linportans ki laverite Bondye ena dan nu lavi.

Ki U Finn Aprann?

• Kuma eski Zeova donn nu lekleraz spirityel?

• Ki defi nu bizin releve akoz nwarte spirityel ki otur nu?

• Ki bann danze nu bizin evite?

• Kuma eski nu kapav montre nu rekonesans pu lalimyer laverite?

[Zimaz lor paz 23]

Zeova lasurs lalimyer fizik ek spirityel

[Zimaz lor paz 25]

Zezi ed nu pu sorti dan nwarte spirityel parey kuma li ti geri enn aveg dusma-dusma