Pa blié ki pa reste beaucoup le temps
“Preche la parole, pa arrete faire li.”—2 TIM. 4:2.
ESKI OU KAPAV EXPLIKÉ?
Kifer bann chretien premier siecle ti conscient ki zot ti ena enn travail urgent pou faire?
Couma nou kapav garde dan nou l’esprit ki nou ena enn travail urgent pou faire?
Kifer predication lor Royaume Bondié li pli urgent dan nou lepok ki avant?
1, 2. Ki bann question nou pou reponn en rapport avek l’ordre pou ‘pa arrete preché’?
BANN dimoune ki zot metier c’est pou sauve la vie lezot, koné ki zot pena le temps pou perdi. Par exemple, kan bann pompier gagne enn call urgent, zot pa tardé pou allé; zot koné ki kitfois ena bann la vie en danger.
2 En tant ki Témoins de Jéhovah, nou envie aide bann dimoune pou gagne la vie. A cause sa, nou considere mission pou preche la bonne nouvelle lor Royaume Bondié couma enn travail important. Bien sur, mem si nou predication li urgent, nou pa galope partout sans reflechi. Mais ki l’apotre Paul ti pé rod dire kan li ti donne sa conseil-la: “Preche la parole, pa arrete faire li”? (2 Tim. 4:2) Couma nou kapav montré ki predication li enn travail urgent? Ek kifer sa travail-la urgent?
KIFER LI URGENT KI NOU PRECHÉ?
3. Ki pou arrive bann ki accepté ou-soit ki rejette message lor Royaume Bondié?
3 Kan ou reflechi couma nou predication kapav sauve la vie bann dimoune, surement ou ena sentiment ki ou bien bizin preche la bonne nouvelle avek zot. (Rom. 10:13, 14) Parole Bondié dire: “Ek kan mo dire sa mauvais dimoune-la: ‘Vrai-mem to pou mort,’ ek ki li arrete faire peché ek li faire seki droite ek seki juste, . . . li pou reste en vie. Li pa pou mort. Sa bann peché ki li’nn faire-la, pa pou servi sa kont li.” (Ézék. 33:14-16) Oui, la Bible dire bann ki preche Royaume Bondié: “To pou sauve to-mem ek bann ki ecoute toi.”—1 Tim. 4:16; Ézék. 3:17-21.
4. Kifer a cause l’apostasie, li ti urgent pou preché dan premier siecle?
4 Pou nou comprend kifer Paul ti encourage Timothée pou considere predication couma enn travail urgent, nou bizin guette contexte nou verset clé. Nou lire: “Preche la parole, pa arrete faire li dan lepok favorable, dan lepok difficile, montré zot, zot erreur, discipline certain, encourage lezot, avek tou to patience ek l’art pou enseigné. Pou arrive enn lepok kot zot pou nepli supporte l’enseignement ki en accord avek la verité. Mais, a cause zot bann prop desir, zot pou entoure-zot avek enn quantité enseignant pou ki bannla faire zot tann seki zot zoreille envie tendé; ek zot pou detourne zot zoreille ar la verité.” (2 Tim. 4:2-4) Jésus ti predire ki ti pou ena l’apostasie. (Mat. 13:24, 25, 38) Avant ki sa l’apostasie-la vinn enn pli grand menace, li ti urgent ki Timothée “preche la parole” mem dan congregation pou ki bann chretien pa laisse-zot embeté par bann fausse l’enseignement. Zot la vie ti en danger. Ki nou kapav dire zordi?
5, 6. Ki bann l’enseignement bann dimoune ki nou joinde dan nou ministere, croire?
5 Zordi, l’apostasie inn bien developpé ek inn fané partout. (2 Thess. 2:3, 8) Ki bann l’enseignement ki faire zoreille bann dimoune plaisir zordi? Dan beaucoup pays, finn enseigne l’evolution avek enn grand zele, coumadir pé enseigne enn religion. Mem si en general, servi bann terme scientifik pou koz lor l’evolution, sa theorie-la finn vinn couma enn religion, li influence fason ki bann dimoune considere Bondié ek lezot dimoune. Enn lot l’enseignement ki finn bien developpé c’est ki Bondié pa interessé ar nou; alors, li pa necessaire ki nou interessé ar Li. Kifer plusieurs million dimoune finn attiré par sa bann l’enseignement-la ek finn tombe dan enn sommeil spirituel sans ki zot rann-zot compte? Parski toulé-deux l’enseignement ena sa message-la: ‘Ou kapav faire tou seki ou envie parski ou pa pou ena okenn compte pou rendé.’ Sa c’est enn message ki finn faire beaucoup zoreille plaisir.—Lire Psaume 10:4.
6 Mais ena lezot l’enseignement ki faire zoreille bann dimoune plaisir. Certain dimoune ki al l’eglise content tann zot pretre dire zot: ‘N’importe ki zot faire, Bondié content zot.’ Bann pretre ek bann pasteur faire zoreille bann dimoune plaisir kan zot convaink bannla ki bann ceremonie, bann la messe, bann fête religieux, ek bann zimage ena benediction Bondié. Sa bann dimoune ki al l’eglise-la pa realisé ki zot en danger. (Ps. 115:4-8) Pourtant, si nou essaye casse zot sommeil spirituel pou ki zot comprend vrai message ki ena dan la Bible, zot pou kapav gagne bann bienfait grace a Royaume Bondié.
COUMA NOU KAPAV MONTRÉ KI NOU PREDICATION URGENT?
7. Couma nou kapav montré ki nou predication bien urgent?
7 Enn bon docteur bizin bien concentré kan li pé faire enn l’operation parski la vie bann dimoune dan so la main. Dan nou ministere, nou kapav montré ki nou l’activité bien urgent kan nou concentré lor nou travail. Par exemple, nou kapav reflechi lor bann question ou-soit bann sujet ki kapav interesse bann dimoune ki nou joinde. Si nou conscient ki nou pé faire enn travail urgent, sa kapav aussi amenn nou pou change nou programme pou nou kapav visite bann dimoune kan zot pli disposé pou ecoute nou.—Rom. 1:15, 16; 1 Tim. 4:16.
8. Ki nou pou faire si nou conscient ki nou predication bien urgent?
8 Kan nou conscient ki nou predication urgent, nou pou aussi fixé bann priorité. (Lire Genèse 19:15.) Par exemple, maziné ki ou docteur appel ou pou donne ou resultat ou bann test medical ek li dire ou dan enn fason bien serieux: “Ou situation bien critik. Ou ena enn mois pou faire kitsoz concernant ou maladie.” Kitfois ou pa pou sorti en vitesse couma enn pompier ki pé al teigne enn difé. Mais surement ou pou ecoute bien so bann suggestion, ou pou al lakaz ek ou pou fixé bann priorité.
9. Kifer nou kapav dire ki Paul ti montré ki predication ti urgent kan li ti Éphèse?
9 Nou kapav aprann ar l’exemple Paul ki ti conscient ki li ti ena enn travail urgent pou faire. Nou trouve sa par seki li ti dire bann ancien dan Éphèse, lor so predication dan district l’Asie. (Lire Actes 20:18-21.) Premier jour ki li ti arrivé-mem, li ti bien occupé pou preche la bonne nouvelle lakaz par lakaz. En plus, pendant deux an, li ti faire enn programme pou ki ‘toulé-jour li faire bann discours dan la salle lekol Tyrannus.’ (Actes 19:1, 8-10) Li clair ki Paul ti conscient ki li ti ena enn travail urgent pou faire ek sa ti influence so bann l’habitude. Kan la Bible encourage nou pou ‘pa arrete faire nou travail,’ sa pa vedir ki nou bizin senti-nou debordé ar travail. Selman, predication bizin vinn enn priorité dan nou la vie.
10. Kifer nou kapav content ki bann Etudiant la Bible ti conscient ki zot ti ena enn travail urgent pou faire?
10 Avant 1914, enn ti groupe Etudiant la Bible ti commence preche la bonne nouvelle. Zot l’exemple montré couma nou bizin considere enn travail urgent. Mem si zot pa ti beaucoup, zot ti conscient ki pa ti reste beaucoup le temps ek zot ti preche Royaume Bondié avek zele. Zot ti imprime bann discours dan plusieurs centaine la gazette ek ti presente enn projection film ek zimage en couleur ki ti appel “ Photo-Drame de la Création. ” Dan sa fason-la, zot ti faire plusieurs million dimoune tann la bonne nouvelle. Si zot pa ti conscient ki ti ena enn travail urgent pou faire, ki quantité parmi nou ti pou’nn tann la bonne nouvelle zordi?—Lire Psaume 119:60.
PA BLIÉ KI PREDICATION ENCORE URGENT
11. Ki’nn amenn certain pou nepli considere travail predication couma enn kitsoz urgent?
11 Ena bann kitsoz ki kapav distraire enn dimoune ek faire li pensé ki travail predication pa trop important. Satan servi sa le monde-la pou distraire nou ek pou faire nou occupé avek bann kitsoz personnel ek avek bann kitsoz ki pa important. (1 Pierre 5:8; 1 Jean 2:15-17) Certain, ki longtemps ti mette service Jéhovah en premier dan zot la vie, nepli considere travail predication couma urgent. Par exemple, Démas, enn chretien premier siecle, ti “compagnon travail” Paul, mais apré, li ti laisse-li distraire par bann kitsoz dan le monde. Au lieu ki li ti contigne fortifié Paul dan enn moment difficile, li ti abandonne li.—Philém. 23, 24; 2 Tim. 4:10.
12. Ki l’occasion nou ena asterla, ek ki bann l’occasion nou pou gagné dan l’avenir?
12 Si nou envie considere travail predication couma enn kitsoz urgent, nou bizin resisté kont l’envie pou profite a fond bann kitsoz ki ena dan la vie. Nou bizin faire tou seki nou kapav pou “saisi vrai la vie.” (1 Tim. 6:18, 19) Kitfois ou pena doute ki ou pou kapav faire beaucoup kitsoz ki ou content grace a la vie eternel ki Bondié pou donne ou kan so Royaume pou dirigé. Mais pou asterla, ou ena enn l’occasion ki jamais pa pou ena encore, pou aide bann dimoune gagne la vie sauve kan Har-Maguédôn vini.
13. Asterla ki nou finn konn la verité, couma nou kapav reste lor nou garde?
13 Mem si la plupart dimoune autour nou pé dormi lor plan spirituel, ki kapav aide nou pou reste lor nou garde? Nou kapav rappel ki enn lepok, coumadir nou ti pé dormi dan noir. Mais kan nou finn konn la verité, nou sommeil spirituel inn cassé, ek Christ finn eclaire nou couma Paul ti dire. Asterla nou ena privilege pou eclaire lezot. (Lire Éphésiens 5:14.) Apré ki li ti mentionne sa, Paul ti ecrire: “Faire bien attention ki zot maniere marché pa pareil couma bann dimoune ki pena okenn sagesse, mais plutot couma bann dimoune ki ena la sagesse, ek ré-acheté le temps ki bizin pou zot-mem, parski nou pé vive dan enn mauvais lepok.” (Éph. 5:15, 16) Au milieu sa mauvais le monde-la, anou “ré-acheté le temps” pou faire bann l’activité ki kapav faire nou reste lor nou garde.
NOU PÉ VIVE DAN ENN LEPOK BIEN IMPORTANT
14-16. Kifer zordi nou predication beaucoup pli urgent ki avant?
14 Nou ministere ti touletan urgent, mais asterla li beaucoup pli urgent encore. Depuis 1914, bann l’evenement ki forme partie dan signe ki la Bible ti annoncé pé realisé. (Mat. 24:3-51) Jamais l’existence bann dimoune finn en danger couma asterla. Malgré bann l’accord ki’nn fek faire, bann grand nation encore ena environ 2,000 missile nucleaire ki’nn paré pou lancé. Bann l’autorité dire ki ena plusieurs centaine cas kot bann materiel nucleaire “inn perdi.” Eski bann terroriste ena certain parmi sa bann materiel-la? Certain dimoune dire ki si enn terroriste commence enn la guerre, facilement l’humanité kapav detruire. Mais selman, pena zis la guerre ki mette la vie bann dimoune en danger.
15 En 2009, The Lancet ek University College dan Londres ti dire dan enn rapport: “Changement climat c’est sa-mem ki pé plus menace la santé le monde entier dan 21eme siecle.” Sa rapport-la ti dire: “Bann l’effet ki changement climat ena lor la santé pou affecté la plupart population dan bann prochain dizaine l’année ek sa pou contigne mette la vie ek bien-etre plusieurs milliard dimoune en danger.” Beaucoup l’endroit kitfois pou detruire a cause niveau de l’eau la mer pou augmenté, la secheresse, inondation, bann l’epidemie, bann cyclone, ek bann la guerre ki bann dimoune pou faire a cause pena assez ressource. Oui, bann la guerre ek bann catastrophe menace l’humanité en entier.
16 Certain dimoune kitfois pensé ki menace enn la guerre nucleaire kapav amenn bann l’evenement ki realise “signe” ki concerne nou lepok. Pourtant, beaucoup pa comprend vrai signification sa signe-la. Mais sa faire plusieurs dizaine l’année ki nou pé trouve realisation sa signe-la. Sa montré ki presence Christ c’est enn kitsoz réel ek ki la fin sa systeme-la pé approché bien vite. (Mat. 24:3) Jamais avant nou pa finn trouve sa quantité l’evenement ki forme partie dan sa signe-la realisé couma zordi. Inn arrive ler ki bann dimoune levé dan zot sommeil spirituel. Nou ministere kapav aide zot pou faire sa.
17, 18. (a) Couma eski “lepok” ki nou pé vive ena enn l’effet lor nou? (b) Ki kapav pousse bann dimoune pou change zot fason pensé lor message Royaume Bondié?
17 Reste zis enn tigit le temps-mem pou nou prouve nou l’amour pou Jéhovah ek pou fini travail predication ki Li’nn confié nou dan sa bann dernier jour-la. Seki Paul ti dire bann chretien dan Rome dan premier siecle ena enn pli grand signification pou nou zordi. Li ti dire: “Zot koné dan ki lepok nou pé vive, ki’nn fini arrive ler pou zot levé ek arrete dormi, parski asterla nou delivrance pli pré ki letan nou ti vinn croyant.”—Rom. 13:11.
18 Bann l’evenement ki la Bible ti annoncé pou ena dan bann dernier jour kapav aide bann dimoune pou prend conscience ki zot pauvre lor plan spirituel. Certain rann-zot compte ki zot bizin enn l’aide spirituel kan zot trouvé ki bann gouvernement pa pé reussi faire face ar bann probleme economik, menace nucleaire, la violence, ou-soit destruction l’environnement. Ena lezot ki interessé ar message Royaume Bondié kan zot gagne probleme dan zot prop famille. Par exemple, kitfois zot faire face ar probleme la santé, divorce, ou-soit la mort enn kikenn ki zot bien content. Alors, kan nou dan predication, nou kapav aide sa bann dimoune-la.
PA RESTE BEAUCOUP LE TEMPS, ALORS SA MOTIVE NOU
19, 20. Couma beaucoup chretien finn change zot fason vive kan zot finn prend conscience ki pa reste beaucoup le temps?
19 Beaucoup chretien ki conscient ki pa reste beaucoup le temps, finn motivé pou faire plus dan zot ministere. Par exemple, enn jeune couple ki reste Équateur, ti decide pou simplifié zot la vie apré ki zot ti assisté l’assemblée special enn jour, “Garde ou lizié simple,” en 2006. Zot ti faire enn la liste bann kitsoz ki zot pa ti bizin, ek dan trois mois zot ti quitte zot lakaz kot ti ena trois la chambre, pou al reste dan enn l’appartement kot ena enn sel la chambre. Zot ti vann certain kitsoz, ek ti paye tou zot dette. Zot pa ti tardé pou faire pionnier auxiliaire ek ti accepté suggestion zot surveillant circonscription pou al servi dan enn congregation ki ti bien bizin l’aide.
20 Enn frere en Amérique du Nord ecrire: “Kan mo madame ek moi nou ti assisté enn l’assemblée en 2006, sa ti faire deja 30 an ki nou ti’nn prend bapteme. Apré l’assemblée, kan nou ti pé retourne lakaz, nou ti koz lor fason ki nou kapav mette en pratik conseil ki ti donné pou simplifié nou la vie. (Mat. 6:19-22) Nou ti ena trois lakaz, bann terrain, bann l’auto ki ti coute cher, enn bateau, ek enn caravane. Nou ti ena l’impression ki nou ti bann chretien ki pa ti ena okenn bon sens, alors, nou ti decide pou fixé l’objectif pou faire service a plein temps. En 2008, nou ti faire pionnier permanent pareil couma nou tifi. Nou ti vrai-mem content pou travail plus avek nou bann frere! Nou ti reussi al servi kot ti bien bizin bann proclamateur. Ek aussi, parski nou ti faire plus pou Jéhovah, sa ti faire nou vinn pli proche ar Li. Seki donne nou plus satisfaction c’est kan nou trouve lizié bann dimoune ouvert [lor plan spirituel] kan zot tann ek comprend la verité ki trouve dan Parole Bondié.”
21. Ki connaissance ki pousse nou pou preche avek zele?
21 Nou koné ki pou arrive sa mauvais le monde-la bientot—“jour jugement ek destruction bann dimoune ki pena okenn respé pou Bondié.” (2 Pierre 3:7) Connaissance ki nou ena lor Parole Bondié pousse nou pou preche avek zele lor la grande tribulation ki pé vini ek lor le monde nouveau ki pou suive apré. Nou toujours conscient ki nou ena enn travail urgent pou faire pou donne bann dimoune enn vrai l’esperance pou l’avenir. Kan nou faire tou seki nou kapav dan sa travail urgent-la, nou montré enn vrai l’amour pou Bondié ek pou bann dimoune.