“Heureux bann ki conscient ki zot pauvre lor plan spirituel”

KAN bann zoiseau levé dan gramatin, zot gazouillé pou enn moment ek apré zot envolé pou zot al rod mangé. Dan tantot zot retourne dan zot place, zot gazouille encore enn tipé, ek apré zot al dormi. Kan zot lé-temps arrivé, zot accouplé, zot ponn, ek zot occupe zot bann tipti. Bann lezot zanimo suive apepré mem qualité la-vie.

Nou, bann humain, nou different. Li vrai ki nou mangé, nou dormi, ek nou reproduire, mais la plupart parmi nou pa contente-nou zis avek sa bann kitsoz-la. Nou envie koné kifer nou existé. Nou envie koné ki but nou la-vie. Nou aussi envie ena enn l’espoir pou l’avenir. Sa bann besoin ki nou ressenti endan nou-la, montré ki en tant ki humain, nou ena enn qualité exceptionnel: spiritualité, setadir enn besoin, ek enn capacité pou apprecié bann kitsoz spirituel.

Nou finn crée a l’image Bondié

La Bible expliké kifer li dan nature dimoune pou ena bann besoin spirituel, kan li dire: “Bondié finn commence crée zom a so l’image, a l’image Bondié, Li finn crée li; Li finn crée zot male ek femelle.” (Genèse 1:27) Parski nou finn formé “a l’image Bondié,” sa vedir ki mem si nou finn sali par peché ek l’imperfection, nou ena capacité pou reflete certain qualité Bondié. (Romains 5:12) Par exemple, nou kapav faire bann nouveau kitsoz avek nou la-main. Nou aussi ena enn certaine sagesse, enn sens la justice, ek capacité pou montré enn l’amour ki paré pou faire bann sacrifice, enn envers lot. En plus, nou ena capacité pou reflechi lor le passé ek faire plan pou l’avenir.—Proverbes 4:7; Ecclésiaste 3:1, 11; Mika 6:8; Jean 13:34; 1 Jean 4:8.

Nou trouve nou capacité spirituel pli bien dan sa desir naturel ki nou ena pou adore Bondié-la. Nou pa kapav trouve vrai bonheur ki pou duré, si nou pa satisfaire sa besoin pou ena contact avek nou Createur-la. Jésus ti dire: “Heureux bann ki conscient ki zot pauvre lor plan spirituel.” (Matthieu 5:3) Mais, nou bizin faire attention pou nou satisfaire sa besoin-la avek la verité—la verité lor Bondié, lor so bann principe, ek lor so projet pou bann dimoune. Kot-sa nou kapav trouve la verité? Dan la Bible.

“To parole li la verité”

L’apotre Paul ti ecrire: “Tou l’Écritures finn inspiré par Bondié, li utile pou enseigné, pou corrigé, pou mette bann kitsoz en ordre.” (2 Timothée 3:16) Seki Paul ti dire, li en accord avek seki Jésus ti dire dan enn la-priere ki li ti adresse ar Bondié: “To parole li la verité.” Pou nou zordi, sa parole-la, li la Bible, ek li pou bon si nou examine nou bann croyance ek nou bann principe, pou guetté si zot en harmonie avek seki la Bible dire.—Jean 17:17.

Kan nou compare nou bann croyance avek Parole Bondié, nou pé imite bann habitant ancien la-ville Bérée, ki ti assure-zot ki seki Paul ti enseigné ti en harmonie avek bann l’Écritures. Au lieu ki li ti critik zot, Luc ti felicite zot pou zot l’attitude. Zot “ti bien content pou gagne Parole Bondié, ek zot ti examine bann l’Écritures en profondeur toulé-jour pou guetté si sa bann kitsoz-la ti vrai-mem coumsa.” (Actes 17:11) Zordi ena tellement difference dan bann l’enseignement lor la religion, ek lor seki bon ek mauvais, ki li important ki nou imite l’exemple bann habitant la ville Bérée.

Enn lot fason pou reconette la verité, c’est kan nou trouvé couma li influence la vie bann dimoune. (Matthieu 7:17) Par exemple, kan enn kikenn vive dapré la verité ki ena dan la Bible, sa bizin faire li vinn enn pli bon mari, enn pli bon papa, enn pli bon madame pou so mari, enn pli bon mama. Sa pou faire li ena enn la-vie famille heureux, ek pou augmente so satisfaction personnel. Jésus ti dire: “Heureux bann ki ecoute parole Bondié ek ki obeir li.”—Luc 11:28.

Bann parole Jésus faire nou rappel seki so Papa ti dire bann Israélite ena bien longtemps: “Moi Jéhovah, mo-mem to Bondié, mo-mem ki enseigne toi pou to profit, mo-mem ki faire toi marche lor chemin kot to bizin marché. Ah si seulement to ti prend compte mo bann commandement! Lerla to la-paix ti pou vinn couma enn la-riviere, ek to la-justice pareil couma bann vague la mer.” (Isaïe 48:17, 18) Tou bann ki content la bonté ek la justice bizin surement touché par sa l’invitation-la!

Certain pli content kan “dire zot seki zot envie tendé”

Bondié ti lance bann Israélite sa l’invitation sincere-la parski zot ti pé laisse-zot trompé par bann mensonge religieux. (Psaume 106:35-40) Nou aussi nou bizin faire attention kont bann fausseté. Concernant bann soi-disant chrétien, Paul ti ecrire: “Pou arrive enn lepok kot zot pou nepli supporte l’enseignement la verité. Mais, zot pou suive zot prop desir, zot pou rassemblé beaucoup enseignant autour zot pou dire zot seki zot envie tendé; zot pou nepli ecoute la verité.”—2 Timothée 4:3, 4.

Bann chef religieux dire bann dimoune seki zot envie tendé kan zot tolere bann pratik ki satisfaire bann mauvais desir, couma bann relation sexuel en dehors mariage, bann relation homosexuel, ek boire ziska sou. La Bible dire bien clair ki bann ki approuve ek ki pratik sa bann kitsoz-la “pa pou herite royaume Bondié.”—1 Corinthiens 6:9, 10; Romains 1:24-32.

Li sur ki nou bizin courage pou vive en accord avek bann principe ki ena dan la Bible, surtout kan bann dimoune moque nou, mais li pa impossible pou nou faire li. Parmi bann Témoins de Jéhovah, ena beaucoup dimoune ki ti bann drogué, bann soulard, bann ki ti amenn enn mauvais la-vie, bann tapeur, bann voleur, ek bann menteur. Pourtant, zot finn prend Parole Bondié compte, ek avek l’aide l’esprit saint, zot finn faire bann changement dan zot la-vie pou ki zot kapav “marche dan enn fason ki Jéhovah approuvé.” (Colossiens 1:9, 10; 1 Corinthiens 6:11) Parski zot inn faire la paix avek Bondié, zot finn aussi gagne la paix dan zot ek, couma nou pou trouvé, zot finn gagne enn vrai l’esperance pou l’avenir.

L’esperance dan Royaume Bondié

L’esperance ki ena dan la Bible concernant enn la-paix ki pa pou fini jamais pou bann dimoune obeissant, pou realisé grace a Royaume Bondié. Dan so la-priere model, Jésus ti dire: “Ki to royaume vini. Ki to volonté faire lor la terre pareil couma dan le ciel.” (Matthieu 6:10) Oui, zis Royaume Bondié ki kapav garanti ki volonté Bondié pou faire lor la terre. Kifer? Parski sa Royaume ki dan le ciel-la—sa gouvernement ki dan la main Jésus Christ-la—sa-mem moyen ki Bondié servi pou exerce So droit pou dirige la terre.—Psaume 2:7-12; Daniel 7:13, 14.

En tant ki lé-Roi dan sa Royaume-la, Jésus Christ pou libere bann dimoune obeissant ar tou forme esclavage, mem ar l’esclavage peché, ki la cause maladie ek la mort. Révélation 21:3, 4 dire: “Guetté! La tente Bondié avek bann dimoune . . . Lerla, Li [Jéhovah] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré, zot nepli pou ena douleur. Bann kitsoz avant finn disparette.”

Pou ena la paix partout lor la terre pou toujours. Kifer nou kapav sur ki sa pou arrivé? Nou trouve la raison dan Isaïe 11:9, kot li dire: “Personne [bann sujet Royaume-la] pa pou faire okenn di-tort, ni okenn ravage lor mo montagne sacré, parski la terre pou rempli avek connaissance Jéhovah, pareil couma de l’eau couvert la mer.” Oui, chaque habitant la terre pou ena enn connaissance exact lor Bondié ek pou obeir Li. Eski sa l’idée-la faire ou leker content? Si oui, ou bizin commence gagne “connaissance Jéhovah” asterla-mem.

Eski ou pou ecoute message concernant Royaume?

Par moyen So Royaume, Bondié pou detruire tou seki Satan inn faire ek Li pou instruire bann dimoune dan So bann chemin droite. Alors, li pa etonnant ki tou seki Jésus ti enseigné ti tourne autour Royaume. Li ti dire: “Mo bizin annonce la bonne nouvelle lor royaume Bondié, parski c’est a cause sa ki finn envoye moi.” (Luc 4:43) Jésus ti donne l’ordre so bann disciple pou zot partage sa mem message-la avek lezot. (Matthieu 28:19, 20) Li ti predire: “Sa bon nouvel lor royaume-la pou preché partout kot dimoune resté lor la terre couma enn temoignage pou tou bann nation, ek lerla la fin pou vini.” (Matthieu 24:14) Sa la-fin-la pé vini a grand pas. Alors, li bien important ki bann dimoune sincere ecoute sa bon nouvel ki pou sap zot la-vie-la!

Albert, ki nou ti mentionné dan premier lartik, ti tann message Royaume Bondié kan so madame ek so garson ti commence etudié la Bible avek bann Témoins de Jéhovah. Au commencement, Albert ti ena doute. Li ti mem al demann enn pretre dan so l’endroit pou visite so madame ek so garson, pou montré zot ki bann Témoins de Jéhovah pa dire la verité. Mais pretre-la pa ti envie faire sa. Alors, Albert ti decide pou zis ecoute enn discussion lor la Bible, pou li trouve bann erreur dan seki bann Témoins de Jéhovah enseigné. Apré zis enn session, li ti commence etudié li aussi, parski li ti envie konn plus. Plitar li ti expliké kifer so l’attitude ti changé. Li ti dire: “Sa-mem ki mo ti pé touletan rodé.”

Enfin, Albert ti commence satisfaire so besoin spirituel, ek jamais li pa finn regretté. La verité ki ena dan la Bible ti donne li seki li ti pé rodé tout longue so la-vie—solution pou l’injustice ek corruption ki finn envahir le monde, ek aussi enn l’esperance pou l’avenir. La verité ki ena dan la Bible finn faire li ressenti la paix dan li. Eski ou pé satisfaire ou besoin spirituel? Alors, kifer ou pa prend enn lé-temps pou lire bann question ki ena dan l’encadré lor page 6? Si ou envie plus renseignement, bann Témoins de Jéhovah pou content pou aide ou.

[L’encadré, page 6]

ESKI OU PÉ SATISFAIRE OU BANN BESOIN SPIRITUEL?

Eski ou satisfait avek nourriture spirituel ki ou pé gagné? Nou invite ou lire sa bann question-la ek guetté si ou kapav reponn zot bien.

□ Kisannla Bondié ek couma li appelé?

□ Kisannla Jésus Christ? Kifer li ti bizin mort? Ki bienfait ou kapav gagné grace a so la-mort?

□ Eski Satan existé? Si oui, kot-sa li sorti?

□ Ki arrive nou kan nou mort?

□ Ki projet Bondié ena pou la terre ek pou bann dimoune ki reste lor la terre?

□ Ki été Royaume Bondié?

□ Ki bann principe Bondié lor moralité?

□ Dan la famille, ki role Bondié inn donne bann mari ek bann femme? Ki bann principe ena dan la Bible ki favorise bonheur dan la famille?

Si ou pa trop sur reponse certain sa bann question-la, ou kapav demann pou gagne brochure Ki Bondye Pe Demann Nu? Sa brochure-la publié par bann Témoins de Jéhovah dan preské 300 langage, ek li koz lor 16 sujet biblik principal, ek li donne enn reponse basé lor la Bible pou tou bann question ki posé la-haut.

[Zimage, page 4]

Bann dimoune pa pareil couma bann zanimo; zot ena bann besoin spirituel

[Zimage, page 5]

“Zot pou rassemblé beaucoup enseignant autour zot, pou dire zot seki zot envie tendé.”—2 Timothée 4:3

[Zimage, page 6]

Grace a Royaume messianik Bondié, pou ena la paix pou touletan