Jéhovah Li ‘sa Kikenn ki faire nou sapé-la’
“Jéhovah pou aide zot ek pou faire zot sapé.”—PS. 37:40.
1, 2. Ki verité bien important concernant Jéhovah, encourage nou ek fortifié nou?
L’OMBRAGE ki crée par bann rayon soleil pa reste touletan mem place. A mesure ki la terre tourné, bann l’ombrage zot touletan pé bougé ek changé. Parkont, Createur la terre ek soleil Li, Li pa changé. (Mal. 3:6) La Bible dire: “Avek Li, pena okenn changement couma dan mouvement l’ombrage.” (Jacq. 1:17) C’est enn verité bien important concernant Jéhovah ki vrai-mem encourage nou ek fortifié nou, surtout kan nou gagne bann l’epreuve ek bann difficulté bien grave. Kifer?
2 Pareil couma nou ti trouvé dan premier lartik, Jéhovah finn montré ki Li ‘enn Kikenn ki ti faire so bann serviteur dan lepok biblik sapé.’ (Ps. 70:5) Li pa changé ek Li toujours garde so parole; alors, so bann serviteur zordi kapav ena confiance ki Li pou “aide zot ek pou faire zot sapé.” (Ps. 37:40) Couma Jéhovah inn faire so bann serviteur dan lepok moderne sapé? Couma Li kapav faire sa pou nou personnellement?
Delivré ar nou bann opposant
3. Kifer nou kapav sur ki bann opposant pa pou reussi faire bann serviteur Jéhovah arrete preche la bonne nouvelle?
3 N’importe ki quantité l’opposition nou pou gagné ar Satan, jamais sa pou empeche bann Témoins de Jéhovah pou donne Jéhovah l’adoration ki Li tousel merité. Parole Bondié donne nou sa l’assurance-la: “N’importe ki zarme ki formé kont toi, pa pou reussi, ek n’importe kisannla ki pou porte enn jugement kont toi, to pou condamne li.” (Is. 54:17) Bann opposant finn essaye empeche peuple Bondié contigne preché, mais zot pa finn reussi. Anou examine deux l’exemple.
4, 5. Ki l’opposition bann serviteur Jéhovah ti gagné en 1918, ek ki resultat sa finn produire?
4 En 1918, clergé la chretienté ti responsable bann grand persecution ki peuple Jéhovah ti gagné; l’objectif ki zot ti ena c’est arrete predication. Le 7 mai, gouvernement États-Unis ti tire bann mandat pou arrete frere J. F. Rutherford, ki ti pé dirige l’activité predication dan le monde dan sa lepok-la, ek lezot frere responsable ki ti travail ensam avek li dan Béthel. Dan moins ki deux mois, gouvernement ti accuse frere Rutherford ek so bann associé dan enn fason injuste, zot ti dire ki bannla ti pé faire enn complot kont gouvernement, ek ti condamne zot pou plusieurs l’année prison. Eski sa vedir ki bann opposant ti’nn reussi servi la cour pou arrete predication net? Non, pa ditou!
5 Rappel sa promesse Jéhovah-la: “N’importe ki zarme ki formé kont toi, pa pou reussi.” Enn coute, situation ti’nn changé net. Le 26 mars 1919—neuf mois apré zot condamnation—frere Rutherford ek so bann associé ti liberé lor caution. L’année apré, le 5 mai 1920, ti cancel tou bann accusation ki ti faire kont zot. Bann frere ti profite zot liberté pou faire l’activité Royaume Bondié avancé. Ki resultat zot ti gagné? Eh bien, depuis sa, finn ena enn l’accroissement extraordinaire! C’est sa ‘Kikenn ki faire so bann serviteur sapé-la’ ki merite gagne tou la gloire pou sa bann bon resultat-la.—1 Cor. 3:7.
6, 7. (a) Couma certain ti traite bann Témoins de Jéhovah dan l’Allemagne nazi, ek finalement ki ti arrivé? (b) Ki l’histoire moderne bann Témoins de Jéhovah prouvé?
6 Asterla, anou prend enn deuxieme l’exemple. En 1934, Hitler ti faire serment pou elimine tou bann Témoins de Jéhovah en Allemagne, ek li ti ena vrai-mem l’intention pou faire sa. Apré ki li ti faire sa menace-la, partout bann soldat ti arrete bann Témoins de Jéhovah ek ti mette zot dan prison. Plusieurs millier Témoins de Jéhovah ti persecuté; plusieurs centaine ti mort dan bann camp concentration. Eski Hitler ti reussi elimine tou bann Témoins de Jéhovah? Eski li ti reussi arrete tou l’activité predication ki ti pé faire en Allemagne? Non! Pendant sa persecution-la, nou bann frere ti contigne preché en cachiette. Apré ki partie nazi ti disparette, nou bann frere ti servi zot liberté pou contigne preché. Zordi, ena plus ki 165,000 proclamateur en Allemagne. Oui, encore enn fois, sa ‘Kikenn ki faire so bann serviteur sapé-la’ inn faire exactement seki Li ti promette: “N’importe ki zarme ki formé kont toi, pa pou reussi.”
7 L’histoire moderne bann Témoins de Jéhovah prouvé ki jamais Jéhovah pou permette ki tou so peuple en tant ki enn groupe, disparette net. (Ps. 116:15) Ki nou kapav dire lor sakenn parmi nou? Couma Jéhovah sauve nou personnellement?
Eski Jéhovah protege nou lor plan physik?
8, 9. (a) Couma nou koné ki li pa garanti ki nou gagne enn protection lor plan physik desuite couma nou bizin li? (b) Ki nou bizin reconette si nou realiste?
8 Nou koné ki Jéhovah pa’nn garanti ki Li pou toujours protege sakenn parmi nou lor plan physik. Nou prend mem position ki sa trois fidele Hébreux-la kan zot ti refuse pou prosterne devant zimage l’or ki le roi Neboukadnetsar ti faire. Sa bann jeune ki ti ena la crainte pou Bondié-la pa ti attann ki Jéhovah faire enn mirak pou protege zot lor plan physik. (Lire Daniel 3:17, 18.) Mais finalement, Jéhovah ti delivré zot dan bann la flamme enn four difé ki ti extra chaud. (Dan. 3:21-27) Mais, mem dan lepok biblik, c’est pa a chaque fois ki Jéhovah ti delivré so bann serviteur par enn mirak, Li ti faire sa rare. Beaucoup fidele serviteur Jéhovah ti mort dan la main zot bann opposant.—Héb. 11:35-37.
9 Ki nou kapav dire zordi? Jéhovah Li enn ‘Kikenn ki faire so bann serviteur sapé,’ alors, Li kapav delivré zot dan bann situation dangereux. Eski nou kapav dire avek l’assurance ki c’est Jéhovah ki’nn agir pou sauve enn kikenn dan tel ou tel situation? Non. Pourtant, enn dimoune ki finn reussi sap dan enn situation dangereux kapav ena sentiment ki Jéhovah inn sauve li. Si lezot commence discute avek li parski zot pa d’accord avek seki li pensé, zot pou depasse zot limite. En mem temps, nou bizin realiste ek reconette ki beaucoup chretien fidele inn mort a cause persecution, pareil couma ti arrivé dan lepok nazi. Ena lezot ki’nn mort dan bann situation bien terrible. (Eccl. 9:11) Nou kapav demann-nou-mem: ‘Eski sa “Kikenn ki faire so bann serviteur sapé-la,” Li pa’nn reussi sap sa bann fidele Témoins ki’nn perdi zot la vie enn coute coumsa-la?’ Non, nou pa kapav pense sa.
10, 11. Kifer bann dimoune pa kapav faire nanyin face ar la mort, mais ki Jéhovah kapav faire?
10 Anou reflechi: Bann dimoune pa kapav faire nanyin pou empeche la mort vini, parski okenn dimoune pa kapav “faire so nâme sapé dan la main shéol,” ou-soit l’hadès, setadir tombe kot tou dimoune allé. (Ps. 89:48) Ki nou kapav dire lor Jéhovah? Enn soeur ki ti survive lepok bann nazi rappel seki so mama, ki ti enn Témoin, ti dire li pou console li kan bann dimoune ki zot content ti mort dan bann camp concentration: “Si la mort ti ena pouvoir pou garde bann dimoune prisonnier pou touletan, li ti pou pli fort ki Bondié, pa vrai?” Oui, nou sur ki la mort pa pli fort ki sa Kikenn ki donne la vie ek ki ena tou pouvoir-la! (Ps. 36:9) Tou bann ki dan shéol ou-soit l’hadès, zot dan memoire Jéhovah, ek Li pou faire zot tou sapé.—Luc 20:37, 38; Rév. 20:11-14.
11 Entre-temps, Jéhovah Li vrai-mem faire kitsoz dan la vie so bann serviteur fidele zordi. Asterla, anou examine trois fason couma Li vrai-mem ‘enn Kikenn ki faire nou sapé.’
Jéhovah protege nou lor plan spirituel
12, 13. Kifer protection spirituel li pli important ki tou, ek couma Jéhovah donne nou sa protection-la?
12 Jéhovah protege nou lor plan spirituel, ek sa protection-la li pli important ki tou. En tant ki bann vrai chretien, nou comprend ki ena enn kitsoz ki ena plus valeur ki la vie ki nou ena zordi. Nou pli grand tresor c’est nou bann relation personnel avek Jéhovah. (Ps. 25:14; 63:3) Sans sa bann relation-la, nou la vie zordi pa ti pou ena sens, ek nou pa ti pou ena okenn l’espoir pou l’avenir.
13 Heureusement, Jéhovah donne nou tou l’aide ki nou bizin pou garde bann relation bien proche avek Li. Nou ena so Parole, so l’esprit saint, ek so l’organisation mondial pou aide nou. Couma nou kapav profite maximum sa bann disposition-la? Kan nou etudié la Bible regulierement ek nou faire sa avek serieux, nou pou fortifié nou la foi ek nou l’esperance pou vinn pli solide. (Rom. 15:4) Kan nou prié avek tou nou leker pou gagne l’esprit saint Bondié, nou pou gagne l’aide pou resisté kont bann tentation pou faire bann kitsoz ki pou kapav mette en danger nou relation avek Li. (Luc 11:13) Si nou suive direction ki l’esclave fidele et avisé donne nou a travers bann publication biblik, bann reunion, ek bann l’assemblée, nou pou bien nourri avek ‘nourriture spirituel ki nou gagné dan ler ki bizin.’ (Mat. 24:45) Tou sa bann disposition-la protege nou lor plan spirituel ek aide nou pou reste proche ar Bondié.—Jacq. 4:8.
14. Raconte enn l’experience ki montré couma Jéhovah protege nou lor plan spirituel.
14 Pou montré couma Jéhovah protege nou lor plan spirituel, anou reguette seki ti arrive bann parent ki ti mentionné dan commencement premier lartik. Deux-trois jour apré ki zot tifi Theresa ti’nn disparette, zot ti gagne sa mauvais nouvelle-la: zot tifi ti’nn assassiné.a Sa nouvelle-la ti bouleverse zot terrible. Papa-la raconté: “Mo ti’nn prié Jéhovah pou protege li. Kan ti’nn decouvert li assassiné, mo bizin reconette ki mo premier reaction c’est pou demann-moi kifer Jéhovah pa finn ecoute mo la priere. Bien sur, mo koné ki Jéhovah pa faire mirak pou protege sakenn so bann serviteur. Mo ti contigne prié Jéhovah pou mo comprend. Seki ti encourage moi c’est pou rappel ki Jéhovah protege so bann serviteur lor plan spirituel, setadir ki Li donne nou seki nou bizin pou protege nou relation avek Li. Sa qualité protection-la pli important parski li kapav influence nou l’avenir eternel. C’est dan sa sens-la ki Jéhovah ti vrai-mem protege Theresa. Li ti pé servi Jéhovah fidelement kan li ti mort. Mo ressenti la paix parski mo koné ki so l’avenir dan la main Jéhovah.”
Jéhovah soutenir nou kan nou malade
15. Dan ki fason Jéhovah kapav aide nou kan nou affecté par la maladie?
15 Jéhovah kapav soutenir nou “lor [nou] lili douleur,” pareil couma Li ti faire ar David. (Ps. 41:3) Mem si dan nou lepok Jéhovah pa sauve nou par enn mirak pou gueri nou, pena doute ki Li aide nou. Couma? Bann principe ki trouve dan so Parole kapav aide nou pou prend bann bon decision concernant bann traitement medical ek lezot kitsoz. (Prov. 2:6) Nou kapav gagne bann bon renseignement ek bann suggestion pratik dan bann lartik La Tour de Garde ek Réveillez-vous ! ki koz lor nou probleme la santé. En plus, par so l’esprit saint, Jéhovah kapav donne nou “sa puissance ki plus ki seki normal-la” pou nou faire face ar nou situation ek pou garde nou fidelité malgré tou seki kapav arrivé. (2 Cor. 4:7) Avek sa l’aide-la, nou kapav evité ki nou maladie tellement bouleverse nou ki nou nepli donne priorité bann kitsoz spirituel.
16. Couma enn frere pé reussi faire face ar so maladie?
16 Prend l’exemple sa jeune frere ki nou ti mentionné dan commencement premier lartik. En 1998, docteur ti decouvert ki li ena enn maladie ki appel sclérose latérale amyotrophique, ou-soit SLA, ki finalement inn paralyse li net.b Couma li’nn reussi faire face ar sa maladie-la? Li raconté: “Kan mo ti pensé ki c’est zis la mort ki pou kapav soulage moi, sa ti bien bouleverse moi. A chaque fois ki mo senti ki mo nepli kapav, mo prié Jéhovah pou donne moi trois kitsoz: enn leker calme, patience ek l’endurance. Mo sur ki Jéhovah reponn mo la priere. Enn leker calme permette moi pou reflechi lor bann pensée encourageant, par exemple couma la vie pou été dan le monde nouveau kan mo pou kapav marché, apprecié enn bon repas, ek kapav koz avek mo famille encore. Patience aide moi pou faire face ar bann desavantage ek bann difficulté ki mo gagné parski mo paralysé. L’endurance permette moi pou reste fidele ek pou pa perdi mo l’equilibre spirituel. Mo kapav vrai-mem ena mem sentiment ki David, parski mo senti ki Jéhovah soutenir moi lor mo lili douleur.”—Is. 35:5, 6.
Jéhovah donne nou seki nou bizin
17. Ki Jéhovah inn promette pou faire pou nou, ek ki sa promesse-la vedir?
17 Jéhovah promette pou prend nou soin lor plan materiel. (Lire Matthieu 6:33, 34 ek Hébreux 13:5, 6.) Sa pa vedir ki nou bizin attann ki Jéhovah faire mirak pou donne nou seki nou bizin pou vive, ou-soit ki li pa necessaire nou travail. (2 Thess. 3:10) Sa promesse-la plutot vedir ki si nou rod Royaume Bondié en premier dan nou la vie ek ki nou disposé pou travail pou gagne seki nou bizin, nou kapav compte lor l’aide Jéhovah pou gagne bann kitsoz ki nou bizin dan la vie. (1 Thess. 4:11, 12; 1 Tim. 5:8) Li kapav donne nou seki nou bizin dan bann fason ki nou pa attann, kitfois a travers enn frere ou enn soeur ki aide nou ou-soit ki propose nou enn travail.
18. Raconte enn l’experience ki montré ki nou kapav gagne seki nou bizin dan enn moment difficile.
18 Rappel sa mama ki ti elevé so zenfant tousel, ki nou ti mentionné dan commencement premier lartik. Kan li ek so jeune tifi ti al reste dan enn lot l’endroit, li ti gagne difficulté pou trouve enn travail. Li expliké: “Mo ti al preché gramatin, ek mo ti passe tou mo l’apré-midi pou rod enn travail. Mo rappel enn jour kan mo ti al la boutik pou acheté di-lait. Mo ti debouté ek mo ti guette bann legume, mais mo pa ti ena assez kass pou acheté nanyin. Jamais dan mo la vie mo ti’nn senti-moi deprimé coumsa. Kan mo ti rente lakaz sa jour-la, ti ena bann sac rempli ar tou sorte qualité legume devant la porte derriere mo lakaz. Ti ena assez mangé pou plusieurs mois. Mo ti ploré ek mo ti remercié Jéhovah.” Enn tipé apré, sa soeur-la ti aprann ki c’est enn frere dan congregation ki plante legume dan so jardin, ki ti quitte sa bann sac-la kot li. Plitar li ti ecrire frere-la: “Mem si mo ti remercié toi beaucoup sa jour-la, mo ti aussi remercié Jéhovah parski Li ti’nn servi to bonté pou rappel moi so l’amour.”—Prov. 19:17.
19. Pendant la grande tribulation, ki l’assurance bann serviteur Jéhovah pou ena, ek ki nou bizin determiné pou faire asterla?
19 Oui, seki Jéhovah inn faire dan lepok biblik ek dan nou lepok, donne nou bann bon raison pou faire Li confiance ki Li pou aide nou. Bientot, kan la grande tribulation pou vinn lor le monde Satan, nou pou bizin protection Jéhovah couma jamais nou pa finn bizin avant. Pourtant, bann serviteur Jéhovah pou kapav tourne vers Li avek full confiance. Zot pou kapav leve zot la tête ek ena la joie, parski zot koné ki zot delivrance pé kosté. (Luc 21:28) Mais ziska ki sa arrivé, n’importe ki l’epreuve nou kapav gagné, anou determiné pou mette nou confiance en Jéhovah avek l’assurance total ki nou Bondié ki pa changé, Li ‘enn Kikenn ki faire nou sapé.’
[Note]
a Guette lartik “ Une épouvantable tragédie ” dan Réveillez-vous ! 22 juillet 2001, page 19-23.
b Guette lartik “ La foi m’aide à vivre avec la SLA ” dan Réveillez-vous ! janvier 2006, page 25-29.
Eski ou rappel?
• Couma Jéhovah kapav sap so bann serviteur ki’nn perdi zot la vie enn coute?
• Kifer protection spirituel li pli important ki tou?
• Ki sa vedir kan Jéhovah promette ki Li pou prend nou soin lor plan materiel?
[Zimage lor page 14]
Frere Rutherford ek so bann associé ti arreté en 1918, ek apré ti largue zot, ek ti cancel bann l’accusation ki ti ena kont zot
[Zimage lor page 16]
Jéhovah kapav soutenir nou lor nou “lili douleur”