Couma reconette vrai l’adoration

La plupart religion dire ki zot l’enseignement sorti kot Bondié. Alors, nou bizin prend compte bann parole ki Jean, enn zapotre Jésus ti ecrire: “Mo bann frere ki mo bien content, pa croire tou parole inspiré, mais verifié bann parole inspiré pou guetté si zot sorti kot Bondié, parski beaucoup fausse prophete finn sorti dan le monde.” (1 Jean 4:1) Couma eski nou kapav testé enn kitsoz pou koné si li sorti kot Bondié?

Tou seki sorti kot Bondié reflete so personnalité, surtout so qualité principal, l’amour. Par exemple, Bondié inn montré nou so l’amour kan Li’nn donne nou capacité pou senti, seki permette nou apprecié parfum bann zepice, bann fleur ou-soit di-pain ki’nn fek cuit. Capacité ki nou ena pou trouve enn coucher soleil, enn papillon, ou-soit enn ti-zenfant ki pé faire enn joli sourire, sa li reflete l’amour ki Bondié ena pou nou. Li pareil pou nou capacité pou tann enn joli la-musik, tann enn zoiseau chanté, ou-soit tann la voix enn kikenn ki nou content. Mem si en tant ki bann humain, nou imparfait, nou reflete l’amour Jéhovah. C’est a cause sa, ki souvent nou rann-nou compte ki sa bann parole Jésus-la, zot vrai: “Ena plus bonheur kan donné ki kan recevoir.” (Actes 20:35) Nou content manifesté l’amour parski nou’nn crée “dan ressemblance Bondié.” (Genèse 1:27) Mem si Jéhovah ena beaucoup lezot qualité, l’amour, sa-mem qualité ki pli ressorti dan so personnalité.

Livre ki sorti kot Bondié, li bizin reflete so l’amour. Bann religion ki ena dan le monde ena enn quantité ancien livre. Ki quantité sa bann livre-la vrai-mem reflete l’amour ki Bondié ena pou nou?

Avredir, la plupart bann ancien livre religieux pa koz beaucoup lor fason ki Bondié content nou ek lor fason ki nou kapav content Li. A cause sa, bann million dimoune pa gagne okenn reponse kan zot pose sa question-la: “Kifer kan nou guette la creation nou trouve bann preuve ki Bondié content nou, alors ki la souffrance ek le mal contigne existé?” Parkont, la Bible, li sel livre religieux ki ancien, ki explik en detail l’amour ki Bondié ena. Li aussi enseigne nou couma pou trouve la joie pou montré nou l’amour.

Enn livre ki koz lor l’amour

Parole Bondié, la Bible, presente Jéhovah couma “Bondié ki ena l’amour.” (2 Corinthiens 13:11) La Bible expliké couma l’amour ti pousse Jéhovah pou donne bann premier humain la vie, enn la-vie sans maladie ek sans la mort. Mais c’est parski zot ti rebelle kont l’autorité Bondié ki bann dimoune inn commence souffert. (Deutéronome 32:4, 5; Romains 5:12) Jéhovah ti prend bann disposition pou redonne bann dimoune seki zot ti’nn perdi. Parole Bondié dire: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” (Jean 3:16) Bann l’Ecriture sacré faire nou trouve encore pli bien l’amour ki Bondié ena? Couma? Kan zot expliké couma Bondié finn etabli enn gouvernement parfait pou ki bann dimoune obeissant regagne la paix, ek sa gouvernement-la li dan la main Jésus.—Daniel 7:13, 14; 2 Pierre 3:13.

La Bible resume l’obligation ki bann dimoune ena, par sa bann parole-la: “ ‘To bizin content Jéhovah to Bondié avek tou to leker ek avek tou to nâme ek avek tou to l’esprit.’ Sa-mem pli grand ek premier commandement. Deuxieme commandement ki pareil, c’est: ‘To bizin content to prochain couma to-mem.’ La Loi entier, ek bann Prophete aussi, zot basé lor sa deux commandement-la.” (Matthieu 22:37-40) La Bible dire ki li inspiré par Bondié. Parski la Bible vrai-mem reflete personnalité Bondié dan enn fason bien clair, nou kapav sur ki li sorti kot “Bondié ki ena l’amour.”—2 Timothée 3:16.

Si nou prend zis sa en consideration, nou kapav reconette ki livre parmi tou sa bann ancien livre-la, vrai-mem sorti kot Bondié. L’amour permette nou aussi pou reconette kisannla bann vrai adorateur, parski zot imite Bondié kan zot manifesté l’amour.

Couma reconette bann ki content Bondié?

Bann ki vrai-mem content Bondié zot bien different ar lezot dimoune, surtout dan sa lepok kot nou pé vive-la ek ki la Bible appel bann “dernier jour.” Pli allé dimoune pli ‘content zot-mem, zot content l’argent, ek zot plutot content plaisir ki Bondié.’—2 Timothée 3:1-4.

Couma ou kapav reconette bann dimoune ki content Bondié? La Bible dire: “Ala seki vedir l’amour pou Bondié: suive so bann commandement; ek pourtant so bann commandement pa lourd.” (1 Jean 5:3) L’amour pou Bondié pousse sa bann dimoune-la pou respecté bann principe moral ki ena dan la Bible. Par exemple, dan Parole Bondié, ena bann la-loi lor sexe ek mariage. Zis bann couple marié gagne droit ena relation sexuel, ek mariage bizin enn kitsoz ki permanent. (Matthieu 19:9; Hébreux 13:4) En Espagne, enn madame ki ti’nn etudié theologie ti assisté enn reunion kot bann Témoins de Jéhovah ti pé etudié bann principe moral ki ena dan la Bible avek enn grand l’interet. Li ti dire: “Kan mo ti sorti [sa reunion-la], mo ti senti-moi encouragé, pa zis par bann discours basé lor la Bible kot mo ti aprann beaucoup kitsoz mais aussi par l’unité ki existé parmi sa bann dimoune-la, par zot niveau moralité ki haute, ek par zot bon conduite.”

En plus ki bann vrai chrétien ena l’amour pou Bondié, nou reconette zot facilement par fason ki zot montré l’amour pou zot prochain. Travail ki pli important pou sa bann dimoune-la, c’est faire zot prochain konn sel l’espoir ki ena pou l’humanité, Royaume Bondié. (Matthieu 24:14) Pena nanyin ki kapav amenn plus bienfait pou zot prochain ki kan zot aide bannla pou gagne la connaissance lor Bondié. (Jean 17:3) Bann vrai chrétien montré zot l’amour dan lezot fason aussi. Zot offert bann ki pé souffert enn l’aide pratik. Par exemple, kan ti ena enn tremblement de terre ki ti faire beaucoup degat en Italie, enn journal local ti raconté ki bann Témoins de Jéhovah “agir dan enn fason pratik, zot paré pou aide tou bann ki pé souffert, sans guetté ki religion bann dimoune-la été.”

A part ki zot content Bondié ek zot prochain, bann vrai chrétien ena l’amour entre zot. Jésus ti dire: “Mo pé donne zot enn nouveau commandement: zot bizin content zot camarade. Pareil couma mo finn content zot, zot aussi, zot bizin content zot camarade. Par sa tou dimoune pou koné ki zot mo bann disciple, si zot ena l’amour entre zot.”—Jean 13:34, 35.

Eski nou kapav remarké ki l’amour ki bann vrai chrétien ena entre zot, li vrai-mem different? Ema ki ti enn servante, ti pense sa. Li travail La Paz en Bolivie kot souvent ena enn barriere entre bann dimoune riche ek bann dimoune misere a cause difference entre bann race. Li ti dire: “Premier fois mo ti al enn reunion bann Témoins de Jéhovah, mo ti trouve enn missié bien habillé ki ti pé assizé ek ti pé koz avek enn madame inca. Jamais mo ti’nn trouve sa avant. Dé-suite mo ti koné ki zot-mem peuple Bondié.” Pareil pou Miriam aussi, enn jeune madame bresilien. Li ti dire: “Mo pa ti koné couma mo kapav heureux, mem dan mo famille. Premier fois ki mo ti trouvé couma l’amour pousse bann dimoune pou faire kitsoz pou lezot, sa ti parmi bann Témoins de Jéhovah.” Dan États-Unis, directeur service l’information dan enn station television ti ecrire: “Si plus dimoune ti vive couma zot, sa nation-la pa ti pou dan sa condition kot li été-la. Mo enn journaliste ek mo koné ki zot l’organisation basé lor l’amour ek lor enn la-foi solid dan zot Createur.”

Rod vrai l’adoration

L’amour sa-mem qualité special ki faire nou reconette vrai l’adoration. Jésus ti expliké ki kan enn dimoune trouve vrai l’adoration, coumadir li trouve sa chemin ki bon-la ek li choisir pou marche ladan. C’est sel chemin ki amenn vers la vie eternel. Li ti dire: “Rente par la porte ki serré; parski chemin ki al vers destruction, li grand ek large, ek beaucoup dimoune pé passe par là; mais chemin ki amenn vers la vie, li serré, so la-porte tipti, ek zis enn tigit dimoune ki trouve li.” (Matthieu 7:13, 14) Zis enn group vrai chrétien ki marche dan l’unité avek Bondié lor chemin vrai l’adoration. Alors, li vrai-mem important ki religion ou choisir. Si ou trouve sa chemin-la ek ou choisir pou marche lor la, ou pou’nn trouve meilleur chemin ki ena dan la vie, parski sa-mem chemin l’amour.—Éphésiens 4:1-4.

Maziné ki la joie ou kapav gagné si ou marche lor chemin vrai l’adoration! C’est coumadir ou pé marche ar Bondié. Avek Bondié ou kapav aprann la sagesse ek l’amour, seki pou permette ou ena bann bon relation avek lezot. Avek Li ou kapav aprann ki but nou la-vie, ek ou kapav comprend bann promesse ki Li’nn faire ek ena enn l’esperance pou l’avenir. Jamais ou pa pou regretté ki ou finn rod vrai l’adoration.

[Zimage, page 3]

Parmi bann ancien livre religieux, zis la Bible ki faire nou konn l’amour ki Bondié ena

[Zimage, page 5]

Nou reconette bann vrai chrétien par l’amour ki zot manifesté