Sapit De

Donn Zeova Loner Parski Li Tusel Vre Bondye

1. Kisannla sel vre Bondye?

LABIB dir ki malgre ki ena buku ki konsidere kuma bann bondye, “anverite ena enn sel Bondye, nu Papa.” (1 Korintyin 8:5, 6) Sa “enn sel Bondye” la Li Zeova, Kreater tu kitsoz. (Deteronom 6:4; Revelasyon 4:11) Zezi ti dir ki Li “mo Bondye ek zot Bondye.” (Zan 20:17) Li ti pans parey kuma Moiz, ki inpe pli avan, ti dir: “Zeova Li [vre] Bondye; pena lot apart Li.” (Deteronom 4:35) Zeova buku pli siperyer ki bann kitsoz ki bann dimunn adore, kuma par egzanp bann zidol, bann dimunn ki zot met lor mem ran ki bondye, uswa so lennmi Satan ki apel usi Dyab ek ki “bondye sa sistem ki egziste la.” (2 Korintyin 4:3, 4) Zeova byin diferan ar tusala, akoz sa Zezi finn apel Li “sel vre Bondye.”—Zan 17:3.

2. Amezir ki nu aprann konn Bondye, ki lefe sa bizin ena lor nu lavi?

² Kan bann dimunn ki ena rekonesans, aprann bann kalite atiran ki Zeova ena, seki Li finn fer, ek seki Li pu fer ankor pu nu, sa fer zot vinn pli pros ar Li. Amezir zot lamur grandi pu Zeova, zot santi enn lafors pus zot pu donn Li loner. Kuma? Enn fason: kan zot koz Li ar lezot. Romin 10:10 dir: “Avek labus ki enn kikenn fer deklarasyon piblik pu delivrans.” Enn lot fason: kan zot imit Li par zot parol ek zot aksyon. Efezyin 5:1 dir: “Imit Bondye, kuma bann zanfan ki Li byin kontan.” Pu nu kapav fer sa pli byin, nu bizin kone kuma Zeova ete vremem.

3. Ki bann kalite prinsipal Bondye ena?

³ Dan tu bann paz Labib, ena buku lide ki fer nu idantifye bann kalite ki Bondye ena, ek ki nu remark byin. Li ena kat kalite prinsipal, sazes, lazistis, pwisans, ek lamur. “Avek Li ena sazes.” (Zob 12:13) “Tu so bann semin lazistis.” (Deteronom 32:4) “Li byin for an pwisans.” (Izai 40:26) “Bondye Li lamur.” (1 Zan 4:8) Me, parmi sa kat kalite prinsipal la, ki kalite ki nu remark plis ek montre pli byin ki kalite Bondye Li ete?

“Bondye Li Lamur”

4. Ki kalite parmi sa kat la finn sirtu pus Bondye pu kre liniver ek tu bann diferan form lavi?

⁴ Ki finn pus Zeova pu kre liniver avek so bann kreatir intelizan, setadir bann anz ek bann dimunn? Eski ti so sazes uswa so pwisans? Non, mem ki Bondye finn servi sa de kalite la, pa sa ki finn motiv Li. Lot kote, so lazistis pa ti obliz Li donn lavi. Plito, so lamur ki finn pus Li pu partaz avek lezot lazwa so legzistans antan ki enn Kikenn intelizan. Lamur finn pus Bondye pu met enn proze debut kot bann dimunn ki obeir Li pu kapav viv pu tuletan dan Paradi. (Zenez 1:28; 2:15) Lamur finn pus Li pu fer laranzman pu tir kondanasyon lamor ki pese Adan finn amenn lor bann dimunn.

5. Dapre Labib, Bondye reprezant ki kalite, ek kifer?

⁵ Alor, parmi tu bann kalite ki Bondye ena, lamur sa mem kalite ki pli remarke. Sa fer parti dan natir Bondye. Malgre ki so sazes, so lazistis ek so pwisans zot bann kalite inportan, Labib zame pa dir ki Bondye Li enn sa bann kalite la. Me purtan, li dir ki Bondye Li lamur. Wi, Zeova Li reprezantasyon lamur. Sa lamur la li enn lamur ki dirize par bann prinsip, pa par lemosyon. Lamur Bondye inflyanse par bann prinsip laverite ek lazistis. Sa mem form lamur ki pli siperyer, dayer Bondye Zeova Li mem legzanp sa lamur la. Dan sa kalite lamur la pena ditu bann santiman egois, ek li tuletan akonpayne par bann aksyon byin vizib ki montre byin sa lamur la.

6. Kifer eski nu kapav imit Bondye mem ki Li pli siperyer ki nu?

⁶ Sa kalite lamur extraordiner la mem ki permet nu imit enn Bondye ki kumsa. Pwiski nu bann sinp dimunn inparfe ki fer erer, nu kapav panse ki zame nu pu kapav reysi imit Bondye. Me zisteman, ala enn dezyem legzanp ki montre gran lamur Zeova: Li konn nu bann limit; Li konpran nu ek Li pa atann ki nu fer tu kitsoz parfe. Li kone ki nu byin lwin ar perfeksyon. (Psom 51:5) Akoz sa, Psom 130:3, 4 dir: “Si to ti bizin pran kont nu bann fot, O Ya, O Zeova, kisannla ti pu kapav tini? Parski avek twa, ena vre pardon.” Wi, Zeova Li “enn Bondye ki ena pitye ek ki konpran nu, ki pa ankoler vit, ek ki ena enn labondans lamur fidel.” (Egzod 34:6) “Twa, O Zeova, to bon ek to pre pu pardone.” (Psom 86:5) Sa vremem sulaz nu! Wi, li vremem enn sulazman pu servi sa Bondye extraordiner la ek pu gut swin ranpli ar lamur ek pitye ki Li donn nu.

7. Kuma eski nu kapav truv lamur Zeova dan seki Li finn kre?

⁷ Nu truv lamur Bondye usi dan seki li finn kre. Pans bann bon kitsoz ki Zeova finn donn nu pu nu plezir, kuma par egzanp bann zoli montayn, bann lafore, bann lak, ek bann losean. Li finn donn nu enn gran varyete manze ki fer nu pale plezir ek ki donn nu lafors. Pa fini, Zeova finn donn nu enn gran varyete zoli fler ki ena bon-bon parfin, ek bann zanimo extraordiner. Li finn fer bann kitsoz ki pu donn bann dimunn plezir, mem ki Li pa ti oblize fer li. Li vre ki dan sa move lemond inparfe kot nu pe viv la, nu pa kapav profit net kreasyon Bondye. (Romin 8:22) Me nek pans enn ku ki Zeova pu fer pu nu dan Paradi! Enn ekrivin psom donn nu sa lasirans la: “To pe uver to lamin ek to pe satisfer dezir tu kitsoz ki viv.”—Psom 145:16.

8. Ki legzanp pli extraordiner montre ankor plis lamur ki Bondye ena pu nu?

⁸ Ki legzanp extraordiner montre ankor plis lamur ki Zeova ena pu bann dimunn? Labib explike: “Bondye finn telman kontan lemond ki Li finn donn so sel Garson ki finn kre direk par Li, pu ki tu seki ena lafwa an li pa mor, me gayn lavi pu tuletan.” (Zan 3:16) Eski Bondye finn fer sa parski bann dimunn bon? Romin 5:8 reponn: “Bondye finn pruv so prop lamur pu nu kan Kris finn mor pu nu, alor ki nu ti ankor bann dimunn ki fer pese.” Wi, Bondye finn avoy so Garson parfe lor later pu li donn so lavi an sakrifis kuma enn ranson pu sap nu dan kondanasyon pese ek lamor. (Matye 20:28) Grasa sa ranson la, bann dimunn ki kontan Bondye kapav gayn lavi pu tuletan. Nu bizin remersye Zeova ki Li pa montre so lamur zis anver enn kategori dimunn, me Li fer li an faver tu bann ki ule fer so volonte. Dayer Labib dir nu: “Bondye pa fer preferans, me, dimunn ki dan ninport ki nasyon ki ena lakrint pu Li ek ki pratik lazistis, Bondye aksepte li.”—Akt 10:34, 35.

9. Pwiski nu kone ki Zeova finn donn so Garson kuma enn ranson pu nu, ki lefe sa bizin ena lor nu?

⁹ Pwiski nu kone ki Zeova finn donn so Garson kuma enn ranson pu nu pu ki nu kapav viv pu tuletan, ki lefe sa bizin ena lor fason ki nu pe amenn nu lavi zordi? Abe, sa bizin ogmant nu lamur pu nu vre Bondye, Zeova. An mem tan, sa bizin fer nu gayn dezir pu ekut Zezi, ki reprezant Bondye. “[Zezi] finn mor pu tu, pu ki bann ki viv, nepli viv pu zot mem, me pu sa kikenn ki finn mor pu zot la.” (2 Korintyin 5:15) Li vremem enn plezir pu swiv bann tras Zezi parski li finn les enn legzanp pu nu dan fason ki Li finn imit lamur ek santiman profon Zeova. Nu truv sa dan bann parol ki li ti dir ar bann ki pa fyer: “Vinn ver mwa, zot tu ki pe rinte ek ki ena pwa lor zot, ek mwa, mo pu sulaz zot. Pran mo zug lor zot ek aprann ar mwa, parski mo dus ek mo ena limilite dan mo leker, ek zot pu gayn sulazman pu zot nam. Parski mo zug dus ek mo lasarz li leze.”—Matye 11:28-30.

Montre Lamur pu Lezot

10. Ki bann fason nu kapav montre lamur anver nu bann frer ek ser Kretyin?

¹⁰ Kuma eski nu kapav montre mem lamur ki Zeova ek Zezi ena pu nu anver nu bann frer ek ser Kretyin? Not bann fason kuma nu kapav fer sa: “Lamur ena pasyans ek li bon. Lamur pa zalu, li pa fer vantar, li pa gonfle ar lorgey, li pa indesan, li pa rod zis so prop lintere, li pa ofans vit. Li pa gard enn kont pu tu dimal ki li gayne. Li pa rezwir akoz linzistis, me li rezwir avek laverite. Li siport tu kitsoz, li krwar tu kitsoz, li esper tu kitsoz, li andir tu kitsoz. Lamur pa pu disparet zame.”—1 Korintyin 13:4-8; 1 Zan 3:14-18; 4:7-12.

11. Anver kisannla ankor nu bizin montre lamur, ek kuma?

¹¹ Anver kisannla ankor nu bizin montre lamur, ek kuma? Zezi finn dir: “Alor, ale ek fer bann dimunn dan tu bann nasyon vinn bann disip, batiz zot onon Papa, onon Garson ek onon lespri sin, anseyn zot pu pratik tu bann kitsoz ki mo finn komann zot.” (Matye 28:19, 20) Sa komannman la vedir ki nu bizin fer bann dimunn ki pankor vinn nu bann frer ek ser Kretyin, konn labonn nuvel konsernan paradi ki Bondye pu etabli dan lemond nuvo. Zezi finn montre klerman ki nu bizin pa zis kontan bann ki partaz nu krwayans, kan li ti dir: “Parski si zot kontan bann ki kontan zot, ki rekonpans eski zot ena? Eski bann ki ramas tax usi pa fer parey? Si zot dir bonzur zis zot bann frer, ki kitsoz extraordiner eski zot pe fer? Eski bann nasyon usi pa fer parey?”—Matye 5:46, 47; 24:14; Galat 6:10.

“Mars Onon Zeova”

12. Kifer eski non Bondye aplik zis ar Li tusel?

¹² Enn lot kitsoz inportan pu donn vre Bondye loner li an rapor avek so non. Nu bizin konn non ki Li tusel ena, Zeova, ek servi non la ek anseyn li lezot. Sa mem ki enn ekrivin psom ti swete avek tu so leker: “Pu ki bann dimunn kone ki twa, ki apel Zeova, to tusel Pli Ot lor later antye.” (Psom 83:18) Sa non Zeova la vedir “Li Fer arive.” Li enn Kikenn ki Gran ek ki tuletan reysi so bann proze ki Li met debut. Zis vre Bondye ki ena drwa port sa non la, parski bann dimunn zame pa kapav sir si zot bann zefor pu reysi. (Zak 4:13, 14) Zeova tusel kapav dir ki so parol “pu reysi” dan sa kitsoz ki Li finn avoy li pu fer la. (Izai 55:11) Buku gayn sok kan premye fwa zot truv non Bondye dan zot Labib ek zot aprann seki li vedir. (Egzod 6:3) Me zot pu tir profi ar sa konesans la si selman zot “mars onon Zeova . . . pu tuletan.”—Mika 4:5.

13. Ki vedir konn Zeova ek mars onon Zeova?

¹³ Konsernan non Bondye, Psom 9:10 dir: “Bann ki konn to non pu fer twa konfyans.” Pu fer sa, li pa sifi konn zis non Zeova, parski enn fwa ki nu konn so non sa pa vedir ki nu fer Li konfyans. Konn non Bondye vedir apresye ki kalite Bondye Zeova ete, respekte so lotorite, obeir so bann komannman, ek fer Li konfyans dan tu kitsoz. (Proverb 3:5, 6) Pareyman, ‘mars onon Zeova’ vedir ki nu angaze ar Li ek nu reprezant Li kuma enn so bann adorater. Sa vedir usi ki nu viv nu lavi an akor avek so volonte. (Lik 10:27) Eski u pe fer sa?

14. Si nu anvi servi Bondye pu tuletan, ki nu bizin fer apart servi Li zis parski nu oblize?

¹⁴ Si nu anvi servi Zeova pu tuletan, nu bizin pa fer li zis parski nu oblize fer li. Lapot Pol ti ankuraz Timote, ki ti pe servi Zeova pandan buku lane: “Antrenn to mem pu devlop latasman pu Bondye.” (1 Timote 4:7) Nu devlop latasman pu enn dimunn kan nu apresye sa dimunn la buku dan nu leker. Ena “latasman pu Bondye” vedir ki nu montre enn profon loner ek respe pu Zeova personelman. Avek lamur, nu atase ar Li parski nu ena buku lestim pu Li ek pu so bann fason azir. Sa fer nu gayn anvi ki tu bann lezot dimunn usi ena gran lestim pu non Bondye. Nu bizin devlop latasman pu Bondye dan nu lavi si nu’le mars onon Zeova, nu sel vre Bondye, pu tuletan.—Psom 37:4; 2 Pyer 3:11.

15. Kuma eski nu kapav donn Bondye enn latasman zis pu Li tusel?

¹⁵ Pu ki Bondye aksepte nu servis, nu bizin pa donn Li enn ladorasyon ki partaze, parski Li “enn Bondye ki demann enn latasman zis pu [Li] tusel.” (Egzod 20:5) Nu pa kapav kontan Bondye ek an mem tan kontan move lemond kot Satan bondye. (Zak 4:4; 1 Zan 2:15-17) Zeova konn byin ki kalite dimunn nu anvi ete. (Zeremi 17:10) Si vremem nu kontan lazistis, Li truve ek Li pu ed nu pu siport bann sityasyon difisil ki nu gayne tulezur. Avek led so gran lafors, lespri sin, Li pu fer nu gayn laviktwar lor mesanste ki byin popiler dan sa lemond la. (2 Korintyin 4:7) Li pu usi ed nu pu kontiyn gard nu lespwar solid pu viv pu tuletan dan enn paradi lor later. Wi, sa li vremem enn gran posibilite ki nu ena! Nu bizin ena enn gran rekonesans pu sa ek ena dezir pu servi nu vre Bondye, Zeova ki finn rann lavi pu tuletan posib.

16. Ki u pu bizin fer ansam avek bann milyon lezot dimunn?

¹⁶ Plizir milyon dimunn lor later finn aksepte avek lazwa linvitasyon sa ekrivin psom la: “Donn Zeova loner avek mwa, ek ansam, anu donn so non laglwar.” (Psom 34:3) Enn gran laful ki sorti dan tu nasyon ek ki pe kontiyn grosi pe donn Zeova loner ek laglwar. Zeova invit u pu fer parti ansam avek sa gran laful la.

Kestyon Revizyon

• Ki kalite kikenn Zeova ete? Ki profi nu tire kan nu konpran byin so bann kalite?

• Kuma eski nu kapav ed lezot dimunn pu aprann laverite lor Bondye?

• Ki vedir konn Zeova ek mars onon Zeova?

[Bann zimaz paz 14]

Dan so gran lamur, Zeova ‘pu uver so lamin ek Li pu satisfer dezir tu kitsoz ki viv’