“Avant Tou, Éna enn l’Amour Intense”
“La fin tou kitsoz finn approché. . . . Avant tou, éna enn l’amour intense enn envers l’autre.”—1 PIERRE 4:7, 8.
JÉSUS ti koné ki bann dernier moments ki li ti pou passé avec so bann apôtres ti bien précieux. Li ti koné séki ti pé atann zot devant. Zot ti éna enn grand travail pou accompli, mais zot ti pou victimes la haine ek persécution, pareil couma séki ti arrive Jésus. (Jean 15:18-20) Dans so dernier nuit ki li ti passe avec zot, plusieurs fois Jésus ti rappelle zot ki zot bizin “content zot camarade.”—Jean 13:34, 35; 15:12, 13, 17.
2 L’apôtre Pierre ki ti présent sa soir-la, ti bien retenir sa leçon-la. Dans enn lettre ki li finn écrire plusieurs l’années plitar, enn tipé avant destruction Jérusalem, li ti mette l’emphase lor l’importance manifesté l’amour. Li ti donne bann Chrétiens sa conseil-la: “La fin tou kitsoz finn approché. . . . Avant tou, éna enn l’amour intense enn envers l’autre.” (1 Pierre 4:7, 8) Bann paroles Pierre éna beaucoup poids pou bann ki pé vive dans “dernier jours” sa système-la. (2 Timothée 3:1) Ki védir “enn l’amour intense”? Kifer li important ki nou éna sa qualité l’amour-la pou lézot? Et couma nou kapav montré ki nou éna enn l’amour intense?
“L’amour Intense”—Ki Sa Védir?
3 Beaucoup considère l’amour couma enn sentiment naturel ki enn dimoune éna dans so léker. Mais Pierre pa ti pé koze lor n’importe ki qualité l’amour. Li ti pé koz lor enn forme l’amour ki beaucoup pli supérieur. Dans 1 Pierre 4:8, “l’amour” finn traduire à partir mot Grec agapê. Sa terme-la védir enn l’amour ki pa égoïste et ki guidé par bann principes. Enn livre faire sa commentaire-la: “Nou kapav contrôle l’amour agapê parski li pa enn simple émotion, mais plutôt li enn qualité ki nou kapav développé par nou propre volonté.” Parski nou finn hérite bann tendances égoïste, nou bien bizin bann rappels pou manifesté l’amour enn envers l’autre, en accord avec bann principes Bondié.—Genèse 8:21; Romains 5:12.
4 Mais sa pa védir ki nou bizin montré l’amour envers nou prochain zis par obligation. Dans l’amour agapê éna aussi bann profond sentiments. Pierre ti dire ki nou bizin “éna enn l’amour intense [littéralement, “élargi”] enn envers l’autre.”a (Kingdom Interlinear) Pou manifesté sa qualité l’amour-la, sa demann zefforts. Concernant mot Grec ki’nn traduire par “intense,” enn expert faire sa commentaire-la: “[Sa mot-la] faire nou pense bann muscles enn athlète, ki’nn bien raidi, dans so dernier zeffort pou traverse la ligne d’arrivée.”
5 Donc, fodé pa ki nou montré l’amour zis kan li facile ek envers enn ti groupe dimoune seulement. Manifesté l’amour Chrétien védir ki nou bizin “élargi” nou léker, c’est-à-dire montré l’amour mem dans bann situations difficile. (2 Corinthiens 6:11-13) Oui, c’est sa qualité l’amour-la ki nou bizin cultivé. Pareil couma enn athlète bizin faire beaucoup l’entraînement pou améliore so performance, nou aussi nou bizin entraîne nou pou manifesté l’amour. Li bien important ki nou manifesté sa qualité-la enn envers l’autre. Kifer? Pou au moins trois raisons.
Kifer Nou Bizin Montré l’Amour Enn Envers l’Autre?
6 Premièrement, “l’amour sorti ar Bondié.” (1 Jean 4:7) C’est Jéhovah ki la Source sa qualité remarquable-la, et c’est Li ki’nn content nou en premier. L’apôtre Jean finn dire: “Ala couma Bondié finn manifesté so l’amour envers nou: Li finn envoye so Garçon [ki’nn crée directement par Li] dans le monde, pou ki par so moyen, nou kapav gagne la vie.” (1 Jean 4:9) Oui, Bondié “finn envoye” so Garçon lor la terre couma enn humain. Li finn accompli so ministère et li finn mort lor enn poteau de supplice—tou sa, pou ki “nou kapav gagne la vie.” Couma eski nou kapav montré nou reconnaissance pou sa l’amour suprême ki Bondié finn manifesté-la? Jean dire: “Si c’est coumsa ki Bondié finn content nou, alors, nou obligé content sakenn nou camarade.” (1 Jean 4:11) Note séki Jean finn écrire: “Si c’est coumsa ki Bondié finn content nou”—pa zis ou, mais nou. Li clair donc, ki si Bondié content nou bann compagnons, nou obligé content zot, nou aussi.
7 Deuxièmement, li particulièrement important ki nou manifesté l’amour enn envers l’autre zordi, pou ki nou kapav aide nou bann frères ki bizin l’aide parski “la fin tou kitsoz finn approché.” (1 Pierre 4:7) Nou pé vive “bann lé-temps critique ki difficile pou supporté.” (2 Timothée 3:1) Bann conditions mondial, bann catastrophes naturel, ek l’opposition rann nou la-vie bien difficile. Dans bann épreuves pareil, nou bizin vinn encore pli proche avec nou bann compagnons. Nou pou soudé par enn l’amour intense, et sa pou motive nou pou ‘prend soin sakenn parmi nou.’—1 Corinthiens 12:25, 26.
8 Troisièmement, nou bizin éna l’amour enn envers l’autre parski nou pa envie “donne le Diable l’occasion” pou exploite nou. (Éphésiens 4:27) Satan veille tou ti imperfections nou bann frères—zot faiblesses, zot défauts ek zot erreurs—pou décourage nou. Si enn kikenn finn dire ou-soit finn faire enn kitsoz ki’nn offense nou, eski nou pou quitte la congrégation à cause sa? (Proverbes 12:18) Nou pa pou faire sa, si nou éna enn l’amour intense. Sa qualité l’amour-la permette nou préserve la paix ek servi Bondié dans l’unité, “la main dans la main.”—Tsephania 3:9.
Couma Ou Kapav Montré ki Ou Éna l’Amour pou lézot
9 L’amour bizin commence dans lakaz. Jésus ti dire ki c’est l’amour ki zot éna entre zot, ki ti pou identifié so bann vrai disciples. (Jean 13:34, 35) L’amour bizin visible, pa zis dans la congrégation, mais aussi dans la famille—entre mari ek femme, entre parents ek zenfants. Li pa suffi ressenti l’amour pou bann membres nou famille; nou bizin exprime sa l’amour-la dans bann façon positif.
10 Couma eski mari-femme kapav manifesté l’amour envers zot camarade? Enn mari ki sincèrement content so femme, pou montré li par so paroles ek so actions—en public ek en privé—ki quantité vrémem li content li. Li pou respecté dignité so femme, et li pou prend en considération so bann pensées, so bann l’opinions, ek so bann sentiments. (1 Pierre 3:7) Li pou mette bien-être so femme avant so propre bien-être, et li pou faire tou séki li kapav pou comblé so bann besoins matériel, spirituel ek affectif. (Éphésiens 5:25, 28) Enn femme ki vrémem content so mari pou éna enn “profond respect” pou li, mem si parfois so mari pa réussi faire li plaisir. (Éphésiens 5:22, 33) Li pou soutenir so mari et li pou soumette ar li. Li pa pou demann so mari bann kitsoz ki pa raisonnable, mais li pou coopère avec li pou ki zot contigne donne bann kitsoz spirituel la priorité.—Genèse 2:18; Matthieu 6:33.
11 Parents, couma ou kapav manifesté l’amour envers ou bann zenfants? Ou montré ou l’amour kan ou disposé pou travaille dur pou donne zot bann kitsoz matériel. (1 Timothée 5:8) Mais, c’est pa zis mangé, linges ek lakaz ki bann zenfants bizin. Pou ki zot contigne content Jéhovah ek servi Li enn fois ki zot inn grandi, zot bizin gagne enn formation spirituel. (Proverbes 22:6) Sa védir ki ou bizin réserve le temps pou étudié la Bible en famille, pou prêché, ek pou assisté réunions. (Deutéronome 6:4-7) Pou réussi faire tousala, sa demann beaucoup sacrifices, surtout dans sa l’époque critique kot nou pé vive-la. Ou l’intérêt ek zeffort ki ou faire pou comblé besoins spirituel ou zenfants, montré ki ou éna l’amour pou zot. Sa montré ki ou envie sincèrement ki zot vive heureux éternellement.—Jean 17:3.
12 Li bien important aussi ki bann parents prend soin zot zenfants lor plan affectif. C’est enn l’autre façon pou montré zot l’amour. Bann zenfants zot fragile; bann parents bizin donne zot zenfants l’assurance ki zot éna l’amour pou zot. Donc, parents, dire ou bann zenfants ki ou content zot, et donne zot beaucoup l’affection. Sa pou empêche zot perdi l’estime pou zotmem. Félicite zot sincèrement kan bizin, parski sa pou montré ki ou trouve zot bann zefforts ek ou apprécié sa. Discipline zot avec amour; sa pou faire zot trouvé ki ou pa indifférent ar chemin ki zot pé prend. (Éphésiens 6:4) Kan ou montré ou l’amour dans tou sa bann façons-la, sa favorise le bonheur dans la famille ek sa renforci bann liens familial. Et coumsa, la famille li pli bien préparé pou affronte bann pressions sa bann dernier jours-la.
13 L’amour pousse nou pou passe lor bann erreurs ki lézot faire. Rappelle ki kan Pierre ti encourage so bann lecteurs pou “éna enn l’amour intense enn envers l’autre,” li ti donne enn raison kifer sa li important: “Parski l’amour couver enn quantité péchés.” (1 Pierre 4:8) Mais, ‘couver’ péchés pa védir ‘cachiette’ bann péchés grave. Au contraire, nou bizin informe bann anciens dans la congrégation pou ki zot prend bann mesures ki bizin. (Lévitique 5:1; Proverbes 29:24) Nou pa pé manifesté l’amour—ek en plus, sa li kont bann principes Biblique—si nou permette bann ki pé faire bann péchés grave, contigne faire bann innocents du tort.—1 Corinthiens 5:9-13.
14 La plupart du temps, nou bann compagnons commette bann ti fautes mineur. En fait, nou tou nou faire erreur. Défois, nou paroles ou-soit nou actions kapav décevoir ou blesse lézot. (Jacques 3:2) Si jamais enn kikenn blesse nou, eski nou pou al raconte sa tou dimoune? Si nou faire sa, nou risqué crée bann divisions dans la congrégation. (Éphésiens 4:1-3) Si nou éna l’amour, nou pa pou “dévoile défaut” nou frère. (Psaume 50:20) Pareil couma crépissage ek la peinture couver bann défauts lor enn muraille, l’amour couver l’imperfection lézot.—Proverbes 17:9.
15 L’amour pou pousse nou pou aide bann ki vrémem bizin l’aide. Dans sa bann dernier jours kot nou pé vive-la, pli allé bann conditions pé vinn pli difficile. Alors, parfois nou bann frères kapav bizin nou l’aide lor plan matériel ou-soit lor plan physique. (1 Jean 3:17, 18) Par exemple, eski ena enn kikenn dans nou congrégation ki éna enn gros problème finance ou-soit ki’nn perdi travail? Kitfois, nou kapav aide li matériellement, d’après nou situation. (Proverbes 3:27, 28; Jacques 2:14-17) Eski éna enn soeur âgé ki veuve, dans la congrégation, ki éna bann réparations pou faire dans so lakaz? Alors, peut-être nou kapav porte nou volontaire pou aidé.—Jacques 1:27.
16 Nou pa manifesté l’amour zis envers bann Chrétiens ki vive dans mem l’endroit ek mem pays ki nou. Défois, nou gagne nouvelles nou bann frères dans lézot pays ki finn victime cyclone, tremblement de terre, ou-soit la guerre. Dans bann situations pareil, kitfois zot bizin mangé, linge ek lezot kitsoz nécessaire. Nou pa pou guetté ki race ou-soit ki communauté zot sorti. Nou “content la famille international nou bann frères.” (1 Pierre 2:17) Donc, pareil couma bann congrégations dans premier siècle, nou pou envie soutenir avec tou nou léker bann dispositions ki prend pou aide sa bann Chrétiens-la. (Actes 11:27-30; Romains 15:26) Kan nou manifesté l’amour dans sa bann façon-la, sa renforci l’unité ki éna parmi nou dans sa bann dernier jours-la.—Colossiens 3:14.
17 L’amour pousse nou pou prêche la bonne nouvelle avec lézot. Prend l’exemple Jésus. Kifer li ti prêché ek li ti enseigne bann dimoune? Li ti “gagne pitié” pou bann la-foule ki ti dans enn condition spirituel bien critique. (Marc 6:34) Au lieu enseigne bann vérités spirituel ek donne le peuple l’espoir, bann chefs religieux sa l’époque-la ti néglige zot ek ti enseigne bann faussetés. Alors, parski li ti éna enn profond l’amour sincère ek li ti éna aussi la compassion, Jésus ti réconforte bann dimoune avec “la bonne nouvelle lor royaume Bondié.”—Luc 4:16-21, 43.
18 Zordi aussi, beaucoup dimoune zot négligé lor plan spirituel. Finn enseigne zot bann faussetés ek zot péna okenn l’espoir. Si pareil couma Jésus, nou prend compte besoins spirituel bann dimoune ki pa encore konn Bondié, eh bien l’amour ek compassion pou motive nou pou prêche la bonne nouvelle lor Royaume Bondié avec zot. (Matthieu 6:9, 10; 24:14) Pa reste beaucoup lé-temps; donc, li plus ki jamais urgent ki nou prêche sa message ki kapav sauve la vie bann dimoune.—1 Timothée 4:16.
“La Fin Tou Kitsoz Finn Approché”
19 Rappelle, avant ki Pierre donne conseil pou éna l’amour enn envers l’autre, li ti dire: “La fin tou kitsoz finn approché.” (1 Pierre 4:7) Bientôt, sa lé-monde méchant-la pou remplacé par nouveau lé-monde juste ki Bondié inn promette nou. (2 Pierre 3:13) Donc, zordi, c’est pa le moment pou pensé ki séki nou’nn faire ziska présent, sa-mem assez. Jésus ti averti nou: “Faire attention ki zot léker pa vinn lourd avec l’excès mangé ek boire ek bann tracas la vie; sinon lerla, sa jour-la pou vinn enn coup lor zot couma enn piège.”—Luc 21:34, 35.
20 Alors, anou faire tou nou possible pou “contigne veillé,” ek rappelle ki la fin li derrière la porte. (Matthieu 24:42) Anou reste bien lor nou garde pou ki nou pa tombe dans bann tentations Satan ki kapav détourne nou l’attention. Fodé pa ki nou laisse sa lé-monde froid ki péna l’amour-la, empêche nou montré l’amour envers lézot. Et pli important, anou vinn pli proche ar Jéhovah, nou vrai Bondié. Bientôt, so Royaume Messianique pou réalise so grand projet ki Li éna pou la terre.—Révélation 21:4, 5.
[Note]
a Dans 1 Pierre 4:8, lézot traductions la Bible dire ki nou bizin éna enn l’amour “sincère,” ou-soit “profond” enn envers l’autre.
QUESTIONS D’ÉTUDE
• Ki conseil Jésus ti donne so bann disciples avant li quitte zot, et ki montré ki Pierre ti bien retenir sa conseil-la? (Parag. 1-2)
• Ki été “l’amour intense”? (Parag. 3-5)
• Kifer sakenn bizin content so camarade? (Parag. 6-8)
• Couma ou kapav démontré ou l’amour pou lézot? (Parag. 9-18)
• Kifer eski c’est pa le moment pou pensé ki séki nou’nn faire ziska présent, sa-mem assez, et ki détermination nou tou bizin prend? (Parag. 19-20)
[Zimage, page 29]
Enn famille ki bien uni, li pli bien préparé pou affronte bann pressions ki nou gagné dans sa bann dernier jours-la
[Zimage, page 30]
L’amour pousse nou pou aide bann dimoune ki vrémem bizin l’aide
[Zimage, page 31]
Prédication la bonne nouvelle lor Royaume Bondié, li enn façon pou démontré nou l’amour