Enseigne zot zenfant pou content Jéhovah

“Couma bann fleche dan la main enn zom fort, coumsa-mem bann garson ki’nn gagné dan la jeunesse, été.”—PSAUME 127:4.

1, 2. Couma bann zenfant zot couma “bann fleche dan la main enn zom fort”?

ENN tireur pé prepare-li pou tire enn fleche lor enn kitsoz. Li place so fleche avek precaution lor la corde so l’arc, ek li riss li avek bann muscle bien raidi. Malgré sa bann grand zeffort ki li pé faire-la, li prend so lé-temps pou vise bien. Apré sa, li laisse so fleche allé! Eski sa fleche-la pou reussi al kot li’nn visé? Sa pou depann lor plusieurs kitsoz, parmi ena capacité sa tireur-la, direction di-vent, ek dan ki l’etat so fleche été.

² Le roi Salomon ti compare bann zenfant ar bann “fleche dan la main enn zom fort.” (Psaume 127:4) Anou guetté couma nou kapav applik sa l’exemple-la. Enn tireur tini so fleche dan so l’arc zis pou enn ti moment-mem. Pou li kapav vise enn kitsoz, li bizin largue so fleche vite. Li pareil pou bann parent, zot ena zis enn tigit lé-temps pou developpe enn l’amour sincere pou Jéhovah dan leker zot zenfant. Apré dé-trois l’année ki parette passe bien vite, bann zenfant grandi ek quitte lakaz. (Matthieu 19:5) Eski bann parent pou reussi vise seki zot envie, setadir eski bann zenfant-la pou contigne content ek servi Bondié apré ki zot pou quitte lakaz? Sa reponse-la depann lor plusieurs kitsoz. Trois parmi sa bann kitsoz-la c’est: capacité bann parent, dan ki l’atmosphere bann zenfant grandi, ek fason ki sa ‘fleche-la,’ setadir sa zenfant-la reagir ar formation so parent. Anou examine en detail sa trois kitsoz-la. Premierement, nou pou guette certain qualité ki bann parent efficace ena.

Zot donne enn bon l’exemple

3. Kifer bann parole enn parent bizin marche ensam avek so bann action?

³ Jésus ti donne bann parent enn bon l’exemple kan li ti mette en pratik seki li ti enseigné. (Jean 13:15) Parkont, li ti condamne bann Pharisien ki ti zis “dire” mais ki pa ti “faire.” (Matthieu 23:3) Pou ki bann parent kapav aide zot zenfant pou content Jéhovah, zot parole bizin marche ensam avek zot action. Kan bann parent dire kitsoz mais apré zot-mem zot pa faire li, sa pa servi nanyin, pareil couma enn l’arc ki pena la corde.—1 Jean 3:18.

4. Ki bann question li bon bann parent pose zot-mem, ek kifer?

⁴ Kifer l’exemple bann parent li bien important? Pareil couma bann adulte kapav aprann pou content Bondié kan zot guette l’exemple Jésus, bann zenfant kapav aprann pou content Jéhovah kan zot suive bon l’exemple zot parent. Bann dimoune ki enn zenfant frequenté kapav soit fortifié li, ou-soit “gate [so] bann bon l’habitude.” (1 Corinthiens 15:33) Pendant enn bon partie la vie enn zenfant, ek surtout pendant so bann premier l’année, bann dimoune ki li frequenté, ki pli proche avek li ek ki ena enn grand l’influence lor li c’est so bann parent. Alors, bann parent bizin demann zot-mem: ‘Ki qualité frequentation mo été? Eski mo l’exemple encourage mo zenfant pou developpe bann bon l’habitude? Ki l’exemple mo pé donné dan bann domaine important couma la priere ek l’etude la Bible?’

Zot prié avek zot zenfant

5. Ki bann zenfant kapav aprann ar la priere zot parent?

⁵ Ou bann zenfant kapav aprann beaucoup lor Jéhovah kan zot ecoute ou la-priere. Si zot tann ou remercié Bondié avant mangé, ek prié kan ou faire l’etude la Bible, ki conclusion kitfois zot pou tiré? Zot pou aprann ki Jéhovah donne nou seki nou bizin lor plan physik—nou bizin remercié Li pou sa—ek ki Li enseigne nou bann verité ki ena dan la Bible. Sa c’est bann leson bien important.—Jacques 1:17.

6. Couma bann parent kapav aide zot zenfant pou trouvé ki Jéhovah interessé ar zot personnellement?

⁶ Selman, si a part bann repas ek bann l’etude la Bible, ou prié avek ou famille dan lezot l’occasion, ek si dan sa bann la-priere-la ou mentionne bann kitsoz precis ki affecté ou ek ou bann zenfant, ou pou gagne bann pli bon resultat encore. Ou pou aide zot pou trouvé ki Jéhovah forme partie dan ou famille, ki Li prend sakenn parmi zot soin. (Éphésiens 6:18; 1 Pierre 5:6, 7) Enn papa dire: “Depuis ki nou tifi inn né, nou ti faire la priere ensam avek li. A mesure ki li ti grandi, nou ti prié lor l’importance pou ena bann bon frequentation ek lor lezot kitsoz ki ti concerne li. Ziska ki li’nn quitte lakaz kan li’nn marié, jamais enn jour inn passé sans ki nou’nn prié ensam avek li.” Eski ou aussi ou kapav prié avek ou bann zenfant chaque jour? Eski ou kapav aide zot pou considere Jéhovah couma enn Camarade ki pa zis donne zot bann kitsoz materiel ek spirituel mais ki prend compte aussi zot sentiment?—Philippiens 4:6, 7.

7. Pou ki la priere bann parent kapav precis, ki zot bizin koné?

⁷ Bien sur, pou ki ou kapav faire bann la-priere precis, ou bizin koné ki pé passé dan la vie ou zenfant. Guetté ki enn papa ki’nn grandi deux zenfant dire: “A la fin chaque semaine, mo ti pose mo-mem deux question: ‘Ki bann kitsoz ki finn tracasse mo bann zenfant sa semaine-la? Ek ki bann bon kitsoz ki finn arrive zot?’ ” Parent, eski ou kapav pose ou-mem sa bann question-la ek mentionne certain parmi bann reponse ki ou gagné dan la priere ki ou faire avek ou bann zenfant? Si ou faire sa, ou pa pou zis enseigne ou bann zenfant pou prié Jéhovah—sa Kikenn ki ecoute la priere-la—mais aussi pou content Li.—Psaume 65:2.

Zot encourage zot zenfant pou ena bann bon l’habitude pou etudié

8. Kifer bann parent bizin aide zot zenfant pou developpe l’habitude etudié la Bible?

⁸ Couma l’attitude ki enn parent ena envers l’etude la Bible kapav influence relation ki so zenfant ena avek Bondié? Pou ki enn relation grandi ek duré, bann dimoune ki impliké pa zis bizin koz sakenn avek so camarade, zot bizin aussi ecouté. Enn fason ki nou ecoute Jéhovah c’est kan nou etudié la Bible avek l’aide bann publication ki “l’esclave fidel” donne nou. (Matthieu 24:45-47; Proverbes 4:1, 2) Alors, pou aide zot zenfant developpe bann bon relation avek Jéhovah, bann relation ki pou duré, li bon ki bann parent encourage zot zenfant pou developpe l’habitude etudié la Bible.

9. Couma kapav aide bann zenfant pou zot developpe bann bon l’habitude pou etudié?

⁹ Couma kapav aide bann zenfant pou developpe bann bon l’habitude pou etudié? Encore enn fois, c’est par l’exemple bann parent. Eski ou bann zenfant souvent trouve ou pé lire ou-soit pé etudié la Bible avek plaisir? Li vrai ki ou surement bien occupé pou prend soin ou bann zenfant, ek kitfois ou demann ou-mem kan eski ou pou gagne le temps pou lire ek pou etudié. Mais pose ou-mem sa question-la: ‘Eski mo bann zenfant souvent trouve moi pé guette television?’ Si oui, eski ou kapav servi inpé sa lé-temps-la pou faire ou l’etude personnel ek lerla donne zot enn bon l’exemple?

10, 11. Kifer bann parent bizin ena bann conversation biblik en famille regulierement?

¹⁰ Enn lot fason pratik ki bann parent kapav enseigne zot zenfant pou ecoute Jéhovah, c’est kan zot ena bann conversation lor la Bible en famille regulierement. (Isaïe 30:21) Mais certain kapav demandé: ‘Kifer bann zenfant bizin enn l’etude la Bible en famille si zot parent amenn zot reunion regulierement?’ Ena plusieurs bon raison pou sa. Principal responsabilité ki Jéhovah inn donne bann parent c’est pou enseigne zot bann zenfant. (Proverbes 1:8; Éphésiens 6:4) Kan nou ena enn l’etude la Bible en famille, sa enseigne bann zenfant ki vrai l’adoration, c’est pa enn tradition ki nou suive zis en publik, mais ki sa forme partie dan la vie privé nou famille.—Deutéronome 6:6-9.

¹¹ En plus, kan bann parent bien conduire zot l’etude familial, sa kapav donne zot l’occasion pou comprend seki zot zenfant pensé lor bann kitsoz spirituel ek lor la moralité. Par exemple, kan bann zenfant encore jeune, bann parent kapav servi bann publication couma livre Écoute le grand Enseignant.a Dan preské chaque paragraphe dan sa livre-la, ena bann question ki encourage bann zenfant pou dire seki zot pensé lor sujet ki pé discuté. Kan bann parent raisonne avek zot zenfant lor bann verset la Bible ki mentionné dan sa livre-la, zot kapav aide zot zenfant pou developpe zot capacité pou “faire difference entre seki bon ek seki mauvais.”—Hébreux 5:14.

12. Couma bann parent kapav adapté zot l’etude familial ar besoin zot bann zenfant, ek ki kitsoz ou finn trouvé ki efficace dan sa domaine-la?

¹² A mesure ki ou bann zenfant grandi, adapté l’etude dapré seki zot bizin. Guetté couma enn couple ti aide zot deux tifi adolescent pou raisonné, kan bannla ti demann zot parent si zot kapav al enn dansé ki ti pou ena dan zot lekol. Papa-la dire: “Nou ti dire nou deux zenfant ki pendant enn partie nou prochain l’etude la Bible en famille, mo madame ek moi nou pou faire role bann zenfant, ek nou bann tifi zot, zot pou faire coumadir zot bann parent. N’importe kisannla entre zot deux ti pou kapav joué role papa ou-soit mama, mais zot ti bizin travail ensam pou faire bann recherche lor sa sujet-la ek pou donne nou bann conseil lor bann dansé ki organisé dan lekol.” Ki resultat sa ti ena? Papa-la ajouté: “Nou ti etonné couma nou bann tifi ti kapav faire difference entre seki bon ek seki mauvais kan (dan role bann parent) zot ti explik nou (bann zenfant), bann raison biblik kifer li pa sage pou al sa dansé-la. Seki ti impressionne nou encore c’est bann suggestion ki zot ti donné concernant bann lezot activité ki kapav faire dan sa place-la. Sa ti aide nou pou bien comprend zot pensé ek zot desir.” Li vrai ki sa demann beaucoup perseverance ek l’imagination pou faire l’etude familial regulierement ek pou toujours adapté li avek seki nou famille bizin. Mais kan nou guette bann recompense ki nou gagné, li vaut la peine faire tou sa bann zeffort-la.—Proverbes 23:15.

Crée enn l’atmosphere kot ena la paix

13, 14. (a) Couma bann parent kapav crée enn l’atmosphere kot ena la paix dan lakaz? (b) Ki bon resultat kapav ena si enn parent admette ki li’nn faire enn erreur?

¹³ Ena plus chance pou enn fleche touche so l’objectif, si tireur-la tire li kan le temps bon. Li pareil aussi avek bann zenfant. Ena plus chance ki zot aprann pou content Jéhovah si dan lakaz, zot parent crée enn l’atmosphere kot ena la paix. Disciple Jacques ti ecrire: “La grain fruit la justice li semé dan la paix pou bann ki faire la paix.” (Jacques 3:18) Couma bann parent kapav crée dan zot lakaz, enn l’atmosphere kot ena la paix? Enn couple marié bizin garde enn relation solid entre zot. Enn mari ek enn femme ki content ek respecté sakenn so camarade pou ena plus chance pou enseigne zot zenfant pou content ek pou respecté lezot dimoune, ek Jéhovah aussi. (Galates 6:7; Éphésiens 5:33) L’amour ek respé favorise la paix. Enn couple ki ena la paix entre zot pou pli kapav faire face avek bann problem ki kapav arrivé dan la famille.

¹⁴ Bien sur, pareil couma pena okenn mariage parfait, pena aussi okenn famille ki parfait lor la terre zordi. Bann parent parfois pa reussi manifesté fruit l’esprit saint kan zot traite avek zot zenfant. (Galates 5:22, 23) Kan sa arrivé, ki bann parent bizin faire? Si zot admette ki zot inn faire enn erreur, eski sa pou diminué respé ki zot zenfant ena pou zot? Anou prend l’exemple l’apotre Paul. Li ti couma enn papa spirituel pou beaucoup chrétien. (1 Corinthiens 4:15) Pourtant, li ti reconette devant beaucoup ki li ti faire bann erreur. (Romains 7:21-25) Mais mem sa, parski li ti ena l’humilité ek li ti honnete, sa faire nou ena plus respé pou li au lieu ki sa diminué nou respé. Malgré so bann erreur, Paul ti kapav ecrire congregation Corinthe avek confiance: “Imite moi, pareil couma moi mo imite Christ.” (1 Corinthiens 11:1) Si ou aussi ou admette ou bann erreur, kitfois ou bann zenfant pou passe lor la.

15, 16. Kifer bann parent bizin enseigne zot zenfant pou content zot bann frere ek soeur spirituel, ek couma zot kapav faire sa?

¹⁵ Ki kitsoz encore bann parent kapav faire pou crée enn l’atmosphere kot zot zenfant pou aprann content Jéhovah? L’apotre Jean ti ecrire: “Si enn kikenn dire: ‘Mo content Bondié,’ ek pourtant li ena la haine pou so frere, li enn menteur. Parski enn kikenn ki pa content so frere, ki li’nn trouvé, pa kapav content Bondié, ki li pa’nn trouvé.” (1 Jean 4:20, 21) Alors, kan ou enseigne ou bann zenfant pou content zot bann frere ek soeur chrétien, ou pé enseigne zot pou content Bondié. Li bon ki bann parent demann zot-mem: ‘Eski en general mo bann conversation lor la congregation zot encourageant ou-soit eski mo ena tendance pou critiké?’ Couma ou kapav konn sa? Ecoute bien dan ki fason ou bann zenfant koz lor bann reunion ek lor bann membre congregation. Surement, ou pou trouve ou bann pensée refleté dan seki zot dire.

¹⁶ Ki bann parent kapav faire pou aide zot zenfant pou content zot bann frere ek soeur spirituel? Peter, papa deux garson adolescent dire: “Depuis ki nou bann garson ti encore tipti, souvent nou ti invite bann frere ek soeur ki mur lor plan spirituel pou vinn mangé kot nou ek pou passe le temps avek nou, ek nou ti bien content pou faire sa. Nou bann garson finn grandi avek l’habitude pou frequente bann dimoune ki content Jéhovah ek zordi zot trouvé ki servi Jéhovah c’est enn fason vive ki agreable.” Dennis enn papa ki ena cinq tifi dire: “Nou ti encourage nou bann tifi pou faire camarade avek bann pionnier ki agé dan congregation, ek kan li ti possible, nou ti montré l’hospitalité envers bann surveillant circonscription ek zot madame.” Eski ou aussi ou kapav prend l’initiative pou aide ou bann zenfant pou considere la congregation couma zot famille?—Marc 10:29, 30.

Responsabilité enn zenfant

17. Ki decision bann zenfant pou bizin prend finalement?

¹⁷ Anou prend encore enn fois l’exemple enn tireur. Mem si li bien konn visé, li pa pou reussi touche seki li pé visé si so fleche inn vinn travers ou-soit inn deformé. Bien sur, bann parent pou faire tou seki zot kapav pou coumadir dresse sa fleche ki’nn vinn travers-la, setadir, zot faire zeffort pou redresse bann mauvais pensée enn zenfant. Mais bann zenfant pou bizin finalement decidé zot-mem si zot pou laisse le monde deforme zot pou zot faire so volonté, ou-soit si zot pou laisse Jéhovah faire zot “bann chemin vinn droite.”—Proverbes 3:5, 6; Romains 12:2.

18. Ki l’effet choix ki enn zenfant faire, sa kapav ena lor lezot?

¹⁸ Li vrai ki bann parent ena enn grand responsabilité pou elevé zot zenfant “dan discipline ek dan bann l’avertissement Jéhovah,” mais finalement, c’est zenfant-la li-mem ki pou decidé ki qualité dimoune li pou vini kan li pou vinn grand. (Éphésiens 6:4) Alors bann zenfant bizin demann zot-mem: ‘Eski mo pou accepté l’enseignement ki mo bann parent donne moi avek amour?’ Si ou accepté zot l’enseignement, ou pou choisir pli bon qualité la vie ki kapav ena. Ou pou faire ou bann parent content. Ek surtout, ou pou faire leker Jéhovah content.—Proverbes 27:11.

[Note]

Eski ou rappel?

• Couma bann parent kapav donne enn bon l’exemple en rapport avek la priere ek l’etude la Bible?

• Couma bann parent kapav crée enn l’atmosphere kot ena la paix dan zot lakaz?

• Ki choix bann zenfant ena pou faire, ek ki l’effet sa choix-la pou ena lor lezot?

[Zimage, page 30]

Eski ou donne ou zenfant enn bon l’exemple en rapport avek l’etude personnel?

[Zimage, page 31]

Dan la famille, enn l’atmosphere kot ena la paix favorise bonheur