Parole Jéhovah vivant
Point biblik interessant dan bann lettre Jean ek Jude
C’EST en 98 n.l. kan li ti Éphèse ki kitfois Jean ti ecrire sa trois lettre ki trouve parmi bann dernier livre ki forme partie dan bann l’Ecriture inspiré-la. So deux premier lettre encourage bann chretien pou contigne marche dan la lumiere ek pou lutté pou empeche l’apostasie fané partout. Dan so troisieme lettre, Jean pa zis koz lor l’importance pou marche dan la verité mais li aussi encourage bann chretien pou cooperé.
Dan lettre ki Jude, demi-frere Jésus ti ecrire kitfois en 65 n.l., en Palestine, li averti so bann compagnon chretien kont bann mauvais dimoune ki ti’nn reussi rente dan congregation ek li donne bann conseil lor fason pou resisté kont bann mauvais l’influence. Kan nou prend en consideration message ki ena dan sa bann lettre ki Jean ek Jude inn ecrire-la, sa kapav aide nou pou reste fort dan la foi malgré bann difficulté ki nou joinde.—Héb. 4:12.
CONTIGNE MARCHE DAN LA LUMIERE, DAN L’AMOUR EK PAR LA FOI
Jean ti ecrire so premier lettre pou tou bann chretien ki en union avek Christ. Dan so lettre li donne bann bon conseil pou aide bann chretien resisté kont l’apostasie, ek reste bien attaché ar la verité ek la justice. Li montré ki li bien important pou contigne marche dan la lumiere, dan l’amour ek par la foi.
Jean ecrire: “Si nou pé marche dan la lumiere pareil couma [Bondié] Li-mem Li dan la lumiere, nou ena enn participation avek sakenn nou camarade.” Ek parski Bondié Li la Source l’amour, l’apotre Jean dire: “Anou contigne content sakenn nou camarade.” Alors ki “l’amour Bondié” pousse nou pou “suive so bann commandement,” nou gagne victoire lor le monde par “nou la foi” dan Jéhovah, dan so Parole ek dan so Garson.—1 Jean 1:7; 4:7; 5:3, 4.
Reponse pou bann question biblik:
2:2; 4:10—Dan ki sens sacrifice Jésus, li “enn sacrifice ki couvert nou bann peché”? Dan grec, sa mot ki traduire par couvert-la, li vedir aussi “calmé.” Kan Jésus ti donne so la vie en sacrifice, dan enn certain sens sa ti conforme avek seki la justice parfait demandé. Grace a sa sacrifice-la, Bondié ti kapav montré misericorde, ek li ti kapav pardonne peché bann ki ena la foi dan Jésus.—Jean 3:16; Rom. 6:23.
2:7, 8—Ki commandement Jean appel “ancien” ek “nouveau” toulé-deux? Jean pé koz lor commandement pou ena l’amour pou nou bann frere ek pou disposé pou sacrifié nou-mem pou zot. (Jean 13:34) Jean appel sa “ancien” parski Jésus ti donne sa commandement-la plus ki 60 an avant ki li ti inspiré pou ecrire so premier lettre. Alors, bann croyant ti’nn gagne sa “depuis commencement” kan zot ti vinn chretien. Commandement-la aussi “nouveau” parski li al pli loin ki ‘content nou prochain pareil couma nou-mem.’ Li demann aussi bann chretien pou ena enn l’amour ki pousse zot pou sacrifié-zot pou zot bann frere.—Lév. 19:18; Jean 15:12, 13.
3:2—Ki kitsoz ki ‘pankor faire bann chretien oint koné’ ek kisannla zot pou trouvé “couma li été vrai-mem”? Seki pa finn revele bann chretien oint, c’est l’apparence ki zot pou ena kan zot pou ressuscité dan le ciel avek enn lekor spirituel. (Phil. 3:20, 21) Mais, seki zot koné asterla, c’est ki “kan [Bondié] pou manifesté, [zot] pou couma Li, parski [zot] pou trouve Li couma Li été vrai-mem”, setadir, “l’Esprit.”—2 Cor. 3:17, 18.
5:5-8—Couma eski de l’eau, di-sang, ek l’esprit rann temoignage ki “Jésus, li Garson Bondié”? De l’eau ti rann temoignage parski kan Jésus ti baptisé dan de l’eau, Jéhovah Li-mem ti dire ki Li approuve so Garson. (Mat. 3:17) Di-sang Jésus, ou-soit so la vie, ki li ti’nn donné couma “enn ranson ki corresponn pou sauve tou dimoune,” montré aussi ki Christ, li Garson Bondié. (1 Tim. 2:5, 6) Ek l’esprit saint ti confirmé ki Jésus li Garson Bondié kan li ti desann lor li ler li ti prend bapteme. L’esprit saint ti permette li ‘traverse bann l’endroit, ek faire seki bien, ek gueri bann ki ti ki le Diable ti pé maltraité.’—Jean 1:29-34; Actes 10:38.
Bann leson pou nou:
2:9-11; 3:15. Si enn chretien laisse enn kitsoz ou-soit enn kikenn detruire l’amour ki li ena pou so bann frere, li pé marche dan noirté spirituel ek li pa koné kot li pé allé.
CONTIGNE “MARCHE DAN LA VERITÉ”
Jean commence so deuxieme lettre kan li dire: “De la part sa ancien-la, pou sa madame ki’nn choisir-la ek so bann zenfant.” Li dire ki li bien content pou trouve ‘certain zenfant sa madame-la ki pé marche dan la verité.’—2 Jean 1, 4.
Apré ki li encourage zot pou developpe l’amour, Jean dire: “Ala seki vedir l’amour: ki nou contigne marche dapré so bann commandement.” Jean aussi donne enn l’avertissement kont ‘sa kikenn ki trompe lezot-la ek l’antichrist.’—2 Jean 5-7.
Reponse pou bann question biblik:
1, 13—Kisannla “sa madame ki’nn choisir-la”? Kitfois Jean ti pé koz lor enn certaine madame ki li appel Kuria, enn mot grec ki vedir “madame.” Kitfois aussi li pé zis appel enn congregation par sa nom-la pou mette bann ki ti pé persecute bann chretien dan confusion. Dan sa cas-la, so bann zenfant ti surement bann membre sa congregation-la ek ‘bann zenfant so soeur,’ surement ti represente bann membre enn lot congregation.
7—Lor ki ‘ venue ’ Jésus, Jean pé kozé ici, ek kifer sa bann ki trompe lezot-la, zot “pa accepté” sa? Ici kan li pé koz ‘ venue, ’ li pa pé koz kan Jésus pou vini dan l’avenir dan enn fason invisible. Li pé plutot koz kan Jésus ti vinn lor la terre en tant ki enn humain ek kan l’esprit saint ti desann lor li ek li ti vinn Christ. (1 Jean 4:2) Bann dimoune ki trompe lezot-la pa reconette ki Jésus inn vini en tant ki enn humain. Li possible ki zot dire ki jamais Jésus pa’nn existé ou-soit zot rejette l’idée ki l’esprit saint inn desann lor li.
Bann leson pou nou:
2, 4. Li bien important ki nou aprann konn “la verité,” setadir tou bann l’enseignement chretien ki zordi forme partie dan la Bible ek ki nou reste attaché avek sa pou nou gagne delivrance.—3 Jean 3, 4.
8-11. Si nou pa envie perdi “faveur ki personne pa merité, misericorde ek la paix ki Bondié nou Papa ek Jésus Christ donné” ek aussi sa fraternité ki nou ena avek nou bann compagnon chretien-la, nou bizin “faire attention” ar nou-mem lor plan spirituel. Nou bizin aussi rejette bann ki “pa reste dan l’enseignement Christ.”—2 Jean 3.
VINN “BANN COMPAGNON TRAVAIL DAN LA VERITÉ”
Jean ecrire so troisieme lettre pou so bon camarade Gaïus. Ladan li dire: “Pena nanyin ki faire moi ena plus reconnaissance, ki kan mo tann dire ki mo bann zenfant pé contigne marche dan la verité.”—3 Jean 4.
Jean felicite Gaïus parski li pé “faire enn travail fidele” kan li aide bann frere ki passe dan so congregation. L’apotre Jean dire: “Nou dan l’obligation pou accueil sa qualité dimoune-la avek l’hospitalité pou ki nou kapav vinn bann compagnon travail dan la verité.”—3 Jean 5-8.
Reponse pou bann question biblik:
11—Kifer certain tombe dan enn mauvais conduite? Parski zot mank spiritualité, certain pa arrivé discerne presence Bondié. Parski zot pa kapav trouve Li avek zot lizié, zot agir coumadir Bondié pa pé trouve zot.—Ézék. 9:9.
14—Kisannla Jean appel “bann camarade”? Sa expression-la implik plus ki zis bann ki ena enn relation bien proche sakenn ar so camarade. Jean servi sa expression-la pou koz lor bann chretien en general.
Bann leson pou nou:
4. Dan congregation, bann frere ek soeur ki mur content kan zot trouvé ki bann jeune “contigne marche dan la verité.” Ek li encore enn pli grand la joie pou bann parent kan zot reussi aide zot bann zenfant pou vinn bann dimoune spirituel!
5-8. Parmi bann ki travail dur pou zot bann frere parski zot ena l’amour pou zot ek pou Jéhovah ena bann surveillant itinerant, bann missionnaire, bann ki travail dan Béthel ou-soit dan bann bureau bann Témoins de Jéhovah, ek bann pionnier. Zot merité ki nou imite zot la foi, ek zot merite soutien ki nou donne zot avek amour.
9-12. Nou bizin imite l’exemple Démétrius ki ti fidele, mais pa l’exemple Diotréphès ki ti faire palab ek ti mette tache lor lezot dimoune.
“RESTE DAN L’AMOUR BONDIÉ”
Jude decrire bann ki reussi rente dan congregation ek ki “bann dimoune ki murmuré, ki plaigne zot sort dan la vie, ki agir dapré zot bann prop desir.” Zot “la bouche dire bann bann grand-grand kozé alors ki zot pé admire bann grand-grand dimoune.” —Jude 4, 16.
Couma bann chretien kapav resisté kont bann mauvais l’influence? Jude dire: “Zot ki mo bien content, pa blié bann parole ki bann apotre nou Seigneur Jésus Christ inn deja dire.” Li ajouté: “Reste dan l’amour Bondié.”—Jude 17-21.
Reponse pou bann question biblik:
3, 4—Kifer eski Jude ti encourage bann chretien pou “lutté pou la foi”? Parski ‘certain dimoune ki pena okenn respé pou Bondié ti’nn rente dan congregation.’ Sa bann zom-la ‘ti’nn servi faveur Bondié ki personne pa merité couma ‘enn pretexte pou ena enn conduite devergondé.’
20, 21—Couma nou kapav “reste dan l’amour Bondié”? Nou kapav faire sa dan trois fason: (1) kan nou contigne fortifié nou-mem dan nou “bann croyance ki bien saint” grace a enn l’etude serieux lor Parole Bondié ek enn participation zelé dan travail predication; (2) kan nou prié “avek l’esprit saint,” ou-soit en accord avek so l’influence; ek (3) kan nou ena la foi dan sa moyen ki permette nou gagne la vie eternel, setadir sacrifice Jésus Christ.—Jean 3:16, 36.
Bann leson pou nou:
5-7. Eski bann mauvais dimoune kapav evite jugement Jéhovah? Sa trois l’exemple ki Jude donné couma bann l’avertissement-la montré nou ki sa impossible.
8-10. Nou bizin suive l’exemple Mikaël l’archange ek montré respé pou bann ki Jéhovah inn donne l’autorité.
12. Bann apostat ki faire semblant ki zot ena l’amour, zot dangereux pou nou la foi pareil couma bann roche ki cachiette enba de l’eau zot dangereux pou bann bateau ou-soit pou bann dimoune ki pé nagé. Kitfois bann fausse enseignant parette content donné, mais lor plan spirituel zot vide couma bann nuage ki pena de l’eau. Sa bann dimoune-la pa rapporte okenn fruit pareil couma bann pié ki’nn mort vers la fin l’automne. Zot pé attann destruction, pareil couma bann pié ki’nn deraciné. Nou montré ki nou ena sagesse kan nou sauvé, nou al loin ar bann apostat.
22, 23. Bann vrai chretien ena la haine pou seki mauvais. Bann chretien ki mur, surtout bann surveillant donne enn l’aide spirituel ar “certain ki ena bann doute” pou zot kapav sapé dan difé destruction eternel.
[Zimage lor page 30]
De l’eau, l’esprit, ek di-sang ti rann temoignage ki “Jésus, li Garson Bondié”